TUMA min na Israɛldenw tun b’u yɛrɛ labɛnna ka Zurudɛn baji tigɛ ka don layidu jamana kɔnɔ, lonanmuso dɔw nana bɔ u ye. U ye Israɛlcɛ dɔw weele ka na u ka fɛti dɔ la. N’a sɔrɔ a tun b’o cɛɛw ɲɛɛ na k’o ye sababu ɲuman ye min sɔrɔ man di. U tun bena teri kuraw sɔrɔ, ka dɔɔn kɛ ani ka dumuni diimanw kɛ. Israɛldenw tun ye min kalan Ala ka sariya kɔnɔ, o tun be dan na n’o musow ka landaw n’u ka kokɛcogow ye. O bɛɛ n’a ta, n’a sɔrɔ Israɛlcɛ dɔw y’a miiri ko: “U ka kokɛcogow tɛna nɔɔ to an kan. An bena an yɛrɛ kɔrɔsi.”

 Mun lo kɛra do? Ala ka Kuma b’a fɔ an ye ko: “U y’a daminɛ ka kakalaya kɛ ni mowabumusow ye.” O musow tun b’a fɛ o Israɛlcɛw ka ngalon alaw bato. U fana y’o lo kɛ! O kama, Jehova “dimina u kɔrɔ kosɔbɛ.”—Nɔnb. 25:1-3.

O Israɛldenw ye Ala ka sariya tiɲɛ cogo fila la: U y’u kunbiri gwan joow kɔrɔ k’u bato ani u ye kakalaya kɛ. Mɔgɔ waa caaman sara sabu u ma mɛnni kɛ Ala fɛ (Ɛkiz. 20:4, 5, 14; Deter. 13:7-10 *). Min y’u sɔrɔ, mun na o tun ye bɔnɛba ye? Bɔnɛba tun lo sabu u yɔrɔ tun man jan layidu jamana na. N’o cɛɛw tun ma Ala ka sariya tiɲɛ, mɔgɔ waa caaman minw sara, yanni dɔɔni u tun bena baji tigɛ ka don layidu jamana kɔnɔ.—Nɔnb. 25:5, 9.

Ka ɲɛsin o koo ma, ciden Pol y’a sɛbɛ ko: “O koo nunu sera u ma, waasa ka koo dɔ ɲaa yira, ani u sɛbɛnna waasa k’an kalan, an minw be waati laban na.” (1 Kor. 10:7-11). Siga t’a la, a diyara Sutana ye k’a ye ko Israɛlden dɔw ye jurumuba kɛ ani u ma se ka don layidu jamana kɔnɔ. Min ye Israɛldenw sɔrɔ, an ka ɲi ka kalan sɔrɔ o la. Mun na do? Sabu an b’a lɔn ko ni Sutana sera k’an bali ka don Ala ka duniɲa kura kɔnɔ, o bena diya a ye kosɔbɛ!

Sutana b’a ɲinina ka koo jugu kɛ kerecɛnw na. Walisa k’o kɛ, a be tɛmɛ fɛɛrɛ dɔ fɛ a sera ka mɔgɔ caaman lafili ni min ye. I ko an y’a ye dakun tɛmɛninw na cogo min na, Sutana tɛmɛna kakalayako lo fɛ ka Israɛldenw lafili. Bi fana, kakalayako bele ye Sutana ka jaan fariman dɔ ye. A be tɛmɛ fɛɛrɛ jɔnjɔn minw fɛ ka mɔgɔw minɛ o jaan kɔnɔ, o dɔ ye porno lo ye.

Bi, mɔgɔ be se ka porno filɛ ani tɔɔw tɛ bɔ a kala ma. A saan caaman ye nin ye, ni dɔ tun b’a fɛ ka porno filɛ, fɔɔ a ka taga sinema boon na. Fɛɛn minw ɲɛsinna porno ma, n’o tigi tun b’a fɛ k’o san, fɔɔ a ka taga o fɛɛnw feereyɔrɔ la. N’a sɔrɔ mɔgɔ caaman tun tɛ sɔn ka taga o yɔrɔw la maloya kosɔn. Nka sisan, ɛntɛrɛnɛti be minw fɛ, olu be se ka porno filɛ u ka baarakɛyɔrɔ la wala u ka mobili kɔnɔ. Jamana caaman na, cɛɛ wala muso be se ka porno filɛ k’a to a ka soo.

Nka o dɔrɔn tɛ. Telefɔni ni tablɛtiw y’a to a ka nɔgɔ mɔgɔw fɛ ka porno filɛ. U be se ka porno filɛ o fɛɛnw kan bisi wala tɛrɛn kɔnɔ wala n’u be tagamana.

Komi a ka nɔgɔ mɔgɔw fɛ ka dogo ka porno filɛ, a be tiɲɛniba kɛra bi ka tɛmɛ fɔlɔ kan. Porno filɛbaga caaman y’u ka furu nagasi. U tɛ bonya la u yɛrɛ kan ani u dusukun t’u kɛlɛ tugun. Min yɛrɛ ka jugu n’o bɛɛ ye, o ye ko jɛnɲɔgɔnya min tun b’u ni Ala cɛ, u y’u nagasi. La a la ko porno be nɔɔ jugu to mɔgɔw kan. A nɔfɛkow be se ka mɛɛn saan caaman kɔnɔ ani tuma dɔw la, u yɛrɛ tɛ ban abada.

An ka lɔn ko Jehova be ladiliw di an ma walisa k’an latanga Sutana ka jaan ma. N’an b’a fɛ ka nafa sɔrɔ u la, an ka ɲi ka mun lo kɛ do? An ka ɲi ka “mɛnni kɛ” Jehova fɛ n’an dusu bɛɛ ye. Galen, Israɛldenw m’o lo kɛ (Ɛkiz. 19:5). An ka ɲi k’a lɔn ko porno ka gwo Jehova ye. Mun na an b’o fɔ do?

Miiri k’a filɛ: Ala tun ye sariya minw di Israɛldenw ma, u ɲɔgɔn tun tɛ yen o wagati la. I ko kogow, o sariyaw tun be Israɛldenw latanga u gɛrɛfɛ siyaw n’u ka koo nɔgɔninw ma (Deter. 4:6-8). O sariyaw tun b’a yira ka gwɛ ko kakalayakow ka gwo Jehova ye.

 Siya minw tun be Israɛldenw gɛrɛfɛ, Jehova y’a ɲɛfɔ u tun be kakalayako minw kɛ. O kɔ, a y’a fɔ Israɛldenw ye ko: “Ne be taga n’aw ye Kanaan jamana min kɔnɔ fana, aw kana olu ka kɛwaliw ɲɔgɔn kɛ. . . . Jamana nin nɔgɔra. O le y’a to ne y’u ka tilenbaliya sara.” Israɛldenw ka Ala ka senu. O kama, a tun be Kanankaw ka kokɛcogow haramuya, fɔɔ a tun b’u ka jamana jati yɔrɔ nɔgɔnin ye.—Lev. 18:3, 25.

Jehova ye Kanankaw ɲangi. O n’a ta bɛɛ, mɔgɔ wɛrɛw tora ka kakalayakow kɛ. Saan 1500 o kɔ, kerecɛnw tun be siya minw cɛma, ciden Pol y’a fɔ olu koo la ko “maloya yɔrɔ ka jan u la, fɔɔ u y’u yɛrɛ bila kakalaya sifa bɛɛ la, u te wasa.” (Efɛz. 4:17-19). Bi, mɔgɔ caaman be kakalayako sifaw bɛɛ kɛ ani u be waso o kosɔn. Kerecɛn sɔbɛw ka ɲi k’u seko bɛɛ kɛ walisa u kana kakalayakow filɛ.

Porno tɛ bonya la Ala kan hali dɔɔni. Ala ye adamaden dan a yɛrɛ jaa la. A y’an dan cogo min na, an b’a lɔn min ka ɲi ani min man ɲi. A ye sariyaw sigi ka ɲɛsin cɛnimusoko ma. O ye hakilitigiyako yɛrɛ lo ye! A b’a fɛ furuɲɔgɔnw lo ka cɛnimusoko diyabɔ (Zɛnɛzi 1:26-28; Talenw 5:18, 19). Minw be porno labɛn, minw b’a jɛnsɛn wala minw be mɔgɔw jija u k’a filɛ, an be se ka mun lo fɔ olu koo la? U be Ala ka sariyaw lo mafiɲɛyara tagamacogo ta fan fɛ. U tɛ bonya la Jehova kan fewu! O kama, Ala bena u kiti.—Ɔrɔm. 1:24-27.

Nka, minw be tugu ka porno filɛ wala ka porno sɛbɛw kalan do? U dɔw be se k’a miiri ko ɲɛnagwɛko lo farati si tɛ min na. Nka tiɲɛn na, olu be tugura mɔgɔw kɔ minw be Jehova ka sariyaw mafiɲɛya. N’a sɔrɔ u ka laɲinita tun t’o lo ye tuma min na u y’a daminɛ ka porno filɛ. Nka, Bibulu b’a yira ka gwɛ ko tiɲɛn Ala batobagaw ka ɲi ka porno haramuya. Bibulu b’an jija ko: “Ala kanubagaw, aw ye kojugu kɔninya!”—Zab. 97:10, Biblu Ala ta Kuma.

Hali minw t’a fɛ ka porno filɛ, a be se ka gwɛlɛya olu ma ka ban k’a filɛ. An ye mɔgɔ dafabaliw ye. O kama, n’a sɔrɔ an ka ɲi ka bondori kɛ walisa ka kakalaya miiriyaw kɛlɛ.  Ka fara o kan, an be se k’an yɛrɛ nɛgɛ ko koo jugu tɛ ka porno filɛ (Zer. 17:9). Minw bɛɛ kɛra kerecɛnw ye, k’a lɔn ko olu sera ka ban porno la, o be se k’i hakili sigi ko ele fana be se ka ban a la. Sisan, a filɛ Ala ka Kuma be se k’i dɛmɛ cogo min na k’o kɛ.

I ko an y’a ye ka tɛmɛ cogo min na, Israɛlden caaman y’a to miiriya juguw ye bɔnɛba lase u ma. O ɲɔgɔn be se k’an fana sɔrɔ. Farati min be miiriya juguw la, Yezu dɔgɔcɛ Zaki y’an lasɔmi o la ko: “Mɔgɔ kelen kelen bɛɛ kɔnɔnako le be kojugukɛ nigɛ don a la. Ayiwa, ni kojugu nigɛ jiidira mɔgɔ kɔnɔ, a be na ni hakɛ ye.” (Zaki 1:14, 15). Ni mɔgɔ y’a to miiriya jugu ye sigiyɔrɔ sɔrɔ a kɔnɔ, a mɛɛn o mɛɛn, o tigi bena jurumu kɛ. O la, an kana to ka miiri kakalayakow la ani an kana a to u ka sigiyɔrɔ sɔrɔ an kɔnɔ.

N’i y’a kɔrɔsi ko i bele be to ka miiri kakalayakow la, sin ka dɔ kɛ dɔ ye. Yezu ko: “N’i bolo kelen, walima n’i seen kelen be kɛ sababu ye k’i don kojugu la, a tigɛ k’a fili yɔrɔjan. . . . N’i ɲaa be kɛ sababu ye k’i don kojugu la, a wɔgɔbi k’a fili yɔrɔjan.” (Mat. 18:8, 9). Yezu tun t’a fɔra le ko an ka ɲi k’an fari yɔrɔ dɔ tigɛ k’a fili yɛrɛ yɛrɛ la. Nka, a ye ɲɛyirali dɔ lo ta walisa k’an dɛmɛ ka koo kɔrɔtanin dɔ faamu: An ka ɲi k’a lɔn fɛɛn min kama an be ni miiriya juguw ye ani ka yɛlɛmani bɛnninw kɛ. An be se k’o ladili sira tagama cogo di ka ɲɛsin porno koo ma?

N’i ɲɛɛ bɛnna porno koo dɔ ma, kana a miiri k’o tɛna nɔɔ to i kan. I ɲɛɛ cɛ ka bɔ yen joona joona. Sin ka telewisɔn, ɔridinatɛri wala tablɛti n’a ɲɔgɔnnaw faga. To ka miiri fɛɛn ɲumanw kan. N’i b’o kɛ, i bena se k’i ka miiriya kɔrɔsi sanni k’a to miiriya juguw k’i lasun ka koo jugu kɛ.

N’a sɔrɔ i ye pornofilɛ dabila. Nka tuma dɔw la, i tun ye min filɛ, o bele be to ka na i hakili la. N’o lo, i be se ka mun lo kɛ do? Pornokow tɛ bɔ mɔgɔ kɔnɔ joona. U be  se ka bari ka na i hakili la. N’o kɛra, koo nɔgɔnin dɔ nege be se k’i minɛ i n’a fɔ k’i ɲɛfɛla mɔmɔ walisa k’i ka cɛnimusoko nege wasa. O kama, kana ɲinɛ k’o miiriya juguw be se ka bari ka na i hakili la. I yɛrɛ labɛn fana walisa k’u kɛlɛ.

I jija ka to ka miiri ani ka koow kɛ i ko Ala b’a fɛ cogo min na. Ciden Pol ladegi. Ale tun labɛnnin lo k’a ‘farikolo tɔɔrɔ ani k’a yɛrɛ minɛ.’ (1 Kor. 9:27). Kana a to miiriya juguw k’i lasun ka koo jugu kɛ. Bibulu b’an jija ko: “Aw ye hakilikura min sɔrɔ, aw jogo ka yɛlɛma ka kɛɲɛ n’o ye, janko aw ka se ka Ala sago lɔn, o min ye koɲuman ye, min ka di Ala ye, n’a dafanin be.” (Ɔrɔm. 12:2). Nin to i hakili la: N’i be kakalayakow kɛ, i tɛna ninsɔndiya sɔrɔ. Nka n’i be miiri ani ka koow kɛ i ko Ala b’a fɛ cogo min na, o bena i ninsɔn diya kosɔbɛ.

A ɲini ka vɛrise dɔw to i hakili la. O la, ni miiriya juguw nana i kɔnɔ, i jija ka miiri o vɛrisew la. Vɛrise nunu bena i dɛmɛ ka porno jati i ko Jehova b’a jati cogo min na ani k’a lɔn a b’a fɛ i ka min kɛ: Zaburuw 119:37; Ezayi 52:11; Matiyo 5:28; Efɛzikaw 5:3; Kɔlɔsikaw 3:5 ani 1 Tesalonikaw 4:4-8.

Ni kakalayakow filɛ nege be gwan i la tuma dɔw la wala n’i be to ka miiri u la, i ka ɲi ka mun lo kɛ do? I jija ka Yezu ladegi koɲuman ale min ye ɲɛyirali ɲuman ye an fɛ (1 Piyɛri 2:21). A batizenin kɔ, Sutana tora k’a kɔrɔbɔ. Yezu ye mun lo kɛ do? A lɔra kelen kan Sutana ɲɛ. Walisa ka se k’o kɛ, a ye vɛrise caaman kofɔ. A ko: “Taga ka bɔ yan Sutana.” O kɔ, Sutana tagara k’a to yen. Yezu lɔra kelen kan Sutana ɲɛ, a m’a fari faga fewu. I fana ka ɲi k’o lo kɛ (Mat. 4:1-11). Sutana n’a ka duniɲa bena to k’a ɲini k’i hakili fa ni kakalayakow ye. Nka, kana i fari faga. I be se ka pornofilɛ dabila ani ka kakalaya miiriyaw bɔ i hakili la. I be se k’o kɛ Jehova ka dɛmɛ sababu lo la.

To ka Jehova deli ani a ɲini a fɛ a k’i dɛmɛ. Pol ko: “Aw ye Ala daali ani ka barika la a ye, k’aw makoyako bɛɛ fɔ a ye. O la, Ala ka hɛrɛ min tɛmɛna mɔgɔw ka faamuyali ma, o le bena aw tanga hamikojugu ma, Yezu Krista barika la.” (Filip. 4:6, 7). Ala ka hɛɛrɛ bena i dɛmɛ walisa i ka se ka ban ka koo jugu kɛ. N’i y’i magwɛrɛ Jehova la, ‘ale fana bena gwɛrɛ i la.’—Zaki 4:8.

Jɛnɲɔgɔnya min b’an ni duniɲa kuru bɛɛ Masaba cɛ, an ka to k’o sabati. O la, an latanganin bena to Sutana ka jaanw ma. Yezu y’a fɔ ko: “Diɲɛ nin kuntigi [Sutana] be nana. A te se ne kɔrɔ.” (Zan 14:30). Mun na Yezu tun lanin b’o la? A y’a ɲɛfɔ loon dɔ ko: “Ne cibaga be ni ne ye. A ma ne to n kelen, bari min ka d’a ye, ne be o le kɛ tuma bɛɛ.” (Zan 8:29). N’i be Jehova diyanyeko kɛ, i be se ka la a la ko a tɛna i fana to yen fewu. N’i be ban porno la fana, Sutana tɛna se k’i minɛ a ka jaan kɔnɔ abada!