ALÒSKÈ sé Izraélit-la té kay travèsé Jouden-la pou yo té rantré adan Péyi-la Bondyé té pwomèt-yo la, ni moun ki vin vwè-yo. Détwa madanm ki pa té Izraélit vin envité sé nonm-la adan on fèt. Ni sèwten ki dwèt di kè sé on bèl lokazyon ki ka prézanté pou yo ni dòt zanmi, pou dansé é pou manjé on bon ti manjé. É konm a pa touléjou sa ka rivé, yo anvi alé. Menmsi koutim a sé madanm-la é jan yo ka menné vi a yo pa annakò èvè Lwa a Bondyé, pétèt kè sèwten Izraélit di : « Pa pè ! Nou ké jéré. Nou ké fè atansyon. »

 Ka ki pasé aprésa ? Bib-la ka di : « Pèp-la mété-y ka fè péché sèksyèl èvè fi Moab. » An réyalité, sé madanm-lasa té vlé fè sé nonm izraélit la adoré fo-dyé. É sé sa ki rivé ! Nou ka toukonprann kè « Jéova fè gwo kòlè èvè Izrayèl » (Nonb 25:1-3).

Sé Izraélit-la dézobéyi Lwa a Bondyé 2 fason diféran : yo mété-yo ka adoré idòl é yo fè péché sèksyèl. Plizyè milyé nonm mò paskè yo dézobéyi (Ègz. 20:4, 5, 14 ; Dét. 13:6-9). Sa ki rann sitiyasyon-la pli tris ankò, sé moman-la sa fèt la. Si tout sé milyé Izraélit-la té rèspèkté Lwa a Bondyé, on ti moman apré, yo té’é travèsé Jouden-la pou antré adan Tè-la Bondyé té pwomèt-yo la (Nonb 25:5, 9).

Lapòt Pòl té ka palé dè ègzanp-lasa lè i maké : « Sé évènman-lasa, kè yo maké pou avèti-nou, pé aprann-nou onlo biten, pas fen a sé sistèm-lasa rivé asi nou » (1 Kor. 10:7-11). Satan dwèt té kontan toubònman davwa sé Izraélit-lasa fè dé péché ki grav é davwa yo pa té pé antré adan Péyi-la Bondyé té pwomèt-yo la ankò. Si nou vlé aji èvè sajès, nou ké tchenn kont dè avèwtisman-lasa, pas nou sav kè sa té’é fè Satan plézi toubònman si i té ka rivé anpéché-nou antré adan mond nouvo la !

Pou rivé pran sé krétyen-la adan pyèj a-y, Satan ka sèvi èvè métòd i konnèt byen é ki ja maché èvè onlo moun. Kon nou sòti vwè adan ègzanp a sé Izraélit-la, i sèvi èvè péché sèksyèl pou tanté-yo. Jòdijou, onlo moun ka kontinyé pri adan zatrap-lasa. Satan ka sèvi èvè biten pòwno, é sa vréman éfikas.

Jòdijou, pou gadé biten pòwno san ponmoun sav, sa vréman fasil. Avan, fò-w té ay adan on sinéma oben adan on magazen ki té ka vann liv oben vidéo pòwno. Onlo moun té pè ay dé koté konsa, paskè yo té pè yo pongné-yo. Men jòdla, èvè Entèwnèt, on moun pé gadé biten pòwno an travay a-y é menm adan on vwati ki garé. É adan onlo péyi, madanm é misyé pa menm bizwen sòti akaz a yo pou gadé sa.

Men a pa yenki sa ! Èvè zafè a pòwtab-la, ou pé touvé biten pòwno pli fasilman ankò. Sé moun-la pé gadé imaj ki pa pwòp asi ékran a aparèy a yo toupannan yo ka maché an lari, yo adan on kaw oben on tren.

Konm ou pé gadé biten pòwno tèlman fasilman é san ponmoun vwè-w, sa ka fè lontan plis déga jòdla ki avan. Akòz dè sa, onlo mayé ka vin frajil, onlo moun ni lenprésyon kè yo ni mwens valè ki avan, é konsyans a yo pa trankil. Sa ki pli grav, sé kè séla ki ka adoré Bondyé pé pèd lanmityé a yo èvè-y. On biten ki sèten, sé kè lè on moun ka gadé biten pòwno sa ka fè onlo déga asi-y. Byensouvan, tchè a sé moun-lasa an bobo toubònman. Sé blès-lasa pé géri piti-a-piti, men pawfwa yo ka lésé sikatris ki pa’a pati konsa.

Érèzman, Jéova ka pwotéjé-nou pou nou pa tonbé adan pyèj dyabolik lasa. Men pou sa, fò-nou fè sa sé nonm izraélit la ki péché la pa fè : fò-nou ‘obéyi a san pou san’ (Ègz. 19:5). Fò-nou byen konprann kè Jéova hay biten pòwno. Poukwa nou ka di sa ?

Réfléchi asi sa : pa té ni pon lwa ki té ka sanm sé lwa-la Jéova té ba Izrayèl la. Pon nasyon pa té ni lwa kon séla. Menmjan ki on masonn, sé lwa-la té pé pwotéjé sé Izraélit-la pou sé nasyon-la ki té ka rété owa yo la pa détenn asi yo (Dét. 4:6-8). Sé lwa-lasa ka aprann-nou on vérité enpòwtan : Jéova hay tout kalté péché sèksyèl.

 Lè Jéova palé dè vyé vis a sé nasyon-la ki té ka rété owa Izrayèl la, i di pèp a-y : « Fo pa zò fè kon moun ka fè an péyi Kanaan, koté-la an ka menné-zòt la. [...] Péyi-la pa pwòp é an ké pini-y pou fòt a-y » (Lév. 18:3, 25). Pou Bondyé a Izrayèl ki té sen, tèlman sé Kananéyen-la té ka menné on vyé vi, sé konsi péyi-la yo té ka viv adan-y la té kontaminé.

Magré Jéova té ja pini sé Kananéyen-la, ni dòt pèp ankò ki té ka kontinyé pratiké péché sèksyèl. Pliski 1 500 lanné apré, Pòl di kè sé krétyen-la té ka viv adan dé nasyon ki pa té « konnèt ka ki byen é ka ki mal ankò » é kè yo té ka « aji san rèspé èvè fon-é-toupé pou pratiké tout kalté biten ki pa pwòp san pon limit » (Éféz. 4:17-19). Jiskaprézan, onlo moun ka menné on vyé vi toubònman é yo fyèw dè sa. Vré sèwvitè a Bondyé dwètèt fè tousa yo pé pou yo pa gadé imaj ki sal é ki ka montré biten malpwòp kè moun ki adan mond-lasa ka fè.

On moun ki ka gadé biten pòwno ka méprizé Bondyé é ka dérèspèkté-y. Jéova kréyé lézòm a imaj a-y, kivédi nou pé imité sé kalité-la i ni la. Anplisdisa, jan-la i fè-nou la, nou pé konprann ka ki byen é ka ki mal natirèlman. Èvè onlo sajès, Bondyé mété dé limit ki rézonab adan domenn sèksyèl. I té vlé kè sé rèlasyon sèksyèl la rété pwòp é kè yo pwokiré moun ki mayé onlo plézi (Jén. 1:26-28 ; Pwov. 5:18, 19). Men ka sé moun-la ki ka fè sé imaj pòwno la é ki ka distribiyé-yo ka fè ? Yo ka méprizé prensip a Bondyé toubònman. An réyalité, yo ka dérèspèkté Bondyé. Jéova ké jijé touséla ki pa ka tchenn kont dè prensip a-y é ki ka fè imaj ki pa pwòp oben ki ka distribiyé-yo (Wom. 1:24-27).

Men ka nou pé di dè moun ki ka gadé oben ki ka li biten pòwno ? Pou désèrten, sé on anmizman ki pa danjéré. Men an réyalité, yo ka fè pati dè moun ki ka méprizé Bondyé. Pétèt sa pa té an tèt a yo lè yo koumansé gadé biten pòwno. Men Labib ka èspliké-nou, on mannyè ki klè, kè sèwvitè a Bondyé dwètèt hay biten pòwno. Labib  ka di : « Zòt ki enmé Jéova, fò zò hay sa ki mal » (Sòm 97:10).

Ni dé moun ki byen anvi pa gadé biten pòwno, men yo ni dimal a fè sa. Nou pa pawfè, kifè, pétèt fò-nou goumé pou nou pa lésé lanvi ki pa pwòp pran lanmen asi nou. Anplisdisa, konm tchè an nou pa pawfè, délè, i ka éséyé chèché èskiz pou fè-nou dézobéyi lwa a Bondyé (Jér. 17:9). Men onlo moun ki krétyen jòdijou, réyisi gangné konba-la yo menné la pou arété gadé biten pòwno ! Si ou adan konba-lasa osi, sa pé ankourajé-w. Gadé kijan Bib-la pé édé-w pou-w pa tonbé adan pyèj dyabolik-lasa, kè yo ka kriyé pòwnografi.

Kon nou vwè pli ho, sé Izraélit-la lésé mové lanvi yo té ni menné-yo a la katastwòf. Menm biten-la pé rivé-nou jòdijou. Jak, dèmi-frè a Jézi, palé dè danjé-lasa : ‘Chakmoun ka lésé pwòp lanvi a-y menné-y é sédui-y. É apré, lanvi-la, lè i fékondé, ka bay péché-la’ (Jak 1:14, 15). On moun ki ka lésé on mové lanvi grandi an tchè a-y pé rivé a péché. Sé pousa, fo pa nou réfléchi asi lidé ki pa pwòp. Fò-nou woté-yo an tèt an nou !

Si ou ni tandans a ni lidé ki pa pwòp an lèspri a-w, pòté mannèv. Jézi di konsa : « Donk si men a-w oben pyé a-w ka fè-w tribiché, koupé-y é jété-y lwen a-w. [...] Anplisdisa, si zyé a-w ka fè-w tribiché, raché-y é jété-y lwen a-w » (Mat. 18:8, 9). Jézi pa té ka ankourajé moun a fè kò a yo vwè mizè. I itilizé ègzanp-lasa pou montré kijan sa enpòwtan kè nou débarasé-nou — vitman é franchman — dè tousa ki té’é pé fè-nou péché. Kijan nou pé apliké konsèy-lasa anrapò èvè lapòwnografi ?

Si on imaj pòwno enn parèt douvan zyé a-w, pa di-w : « Pa ni pwòblèm, an ka jéré. » Gadé ondòt koté onfwa menm. Étenn télé-la, òwdinatè-la oben téléfòn-la, tousuit. Chanjé lidé a-w é sonjé on biten ki pwòp. Sa ké édé-w métrizé lèspri a-w olyé ou lésé lanvi ki pa pwòp kontwolé-w.

Ka pou-w fè si ou ja réyisi arété gadé biten pòwno, men kè sé imaj-la ka wouvin an lèspri a-w dè tanzantan ? Imaj pòwno oben lidé ki pa pwòp pé rété an lèspri a on moun on bon enpé tan. É yo pé wouvin a nenpòt ki moman. Si sa ka rivé-w, ou pé santi kè ou vréman anvi fè on biten ki pa pwòp. Sé pé karésé pawti sèksyèl a-w pou ni on plézi. Alò, pa oubliyé kè sé mové lidé-lasa pé enki parèt onsèl kou, é fò-w toujou paré pou goumé èvè yo.

Fè tousa ki fo pou-w byen désidé a pansé é aji kon Jéova vlé. Menmjan ki lapòt Pòl, fò-w paré a ‘ba kò a-w bon kou é a menné-y kon on èsklav’ (1 Kor. 9:27). Pa lésé pon mové lanvi ki pa pwòp vin mèt a-w. ‘Kontinyé chanjé mantalité a-w pou transfòwmé-w, konsa ou ké pé vérifyé voumenm ka ki volonté a Bondyé, on volonté ki bon, ki konm i fo é ki pawfè’ (Wom. 12:2). Pa jen oubliyé sa : lè ou ka pansé é lè ou ka aji kon Bondyé vlé, sa ka ba-w lontan plis satisfaksyon ki lè ou ka suiv lanvi ki pa pwòp.

Éséyé aprann pa tchè sèwten vèwsé a Labib. É lè lidé ki pa pwòp ka vin an tèt a-w, fòsé lèspri-w rété anlè sé vèwsé-lasa, pa ègzanp : Sòm 119:37, Izayi 52:11, Matyé 5:28, Éfézyen 5:3, Kolosyen 3:5 é 1 Tésalonisyen 4:4-8. Sé vèwsé-lasa ké édé-w hay biten pòwno menmjan Jéova hay sa. É yo ké édé-w konprann plibyen sa Jéova ka atann dè-w.

Ka ou pé fè si, délè, ou pa ka rivé métrizé-w pou-w pa gadé biten ki pa pwòp oben pou-w pa réfléchi anlè yo ? Suiv ègzanp a Jézi, Modèl an nou, fidèlman (1 Pyè 2:21). Satan tanté-y plizyè fwa apré batèm a-y. Ka Jézi fè ? I pa jen tonbé an pyèj a-y. I pa lésé pon tantasyon a Satan sédui-y é pou-y té rivé fè sa, i itilizé on vèwsé a Labib pou yochak. Jézi di-y konsa : « Sòti-w la, Satan ! », é Satan lésé-y (Mat. 4:1-11). Kon Jézi, kontinyé tchenbé pou Dyab-la pa pran lanmen asi-w. Pa jen lagé. Satan é mond a-y ké toujou éséyé plen tèt a-w èvè lidé ki pa pwòp. Men kontinyé goumé. Ou pé gangné konba-la kont lapòwnografi. Grasa èd a Jéova, ou pé gangné lènmi a-w.

Kontinyé priyé Jéova é mandé-y èd a-y. Mi sa Pòl maké : « Fè Bondyé sav ka zò vlé [...] ; é lapé ki ka vin dè Bondyé, ki ka dépasé tousa on moun pé konprann, ké pwotéjé tchè a zòt é lèspri a zòt grasa Kris Jézi » (Filip. 4:6, 7). Lapé ki ka vin dè Bondyé ka édé-nou rézisté kont péché-la. Si ou ka rapwoché-w dè Jéova, ‘i ké rapwoché-y dè-w’ (Jak 4:8).

Si nou ni Gran Mèt a linivè èvè-nou, nou pé’é tonbé adan pon pyèj a Satan. Jézi di konsa : « Chèf a mond-la [Satan] ka vin ; men i pa ni pon pouvwa anlè mwen » (Jan 14:30). Poukwa Jézi té ni konfyans-lasa ? On jou i èspliké : « É sila ki voyé-mwen la èvè mwen ; i pa lésé-mwen tousèl an mwen, pas an toujou ka fè sa ki ka fè-y plézi » (Jan 8:29). Si ou toujou ka chèché a fè Jéova plézi, vou nonplis, i pé’é jen lagé-w. Pa lésé lapòwnografi pyéjé-w. Konsa, Satan pé’é pé pran lanmen asi-w.