NGKE a a tauraoi tibun Iteraera rimoa n rinanon te Karaanga ae Ioretan nakon te aba are e beritanna te Atua nakoia, a a kawaraki naba irouia aomata tabeman. Naakai bon aine aika tiaki tibun Iteraera, aika kaoia mwaane nakon te baka n amwarake. E taara n ae bon te tai ae burenibwai rekena irouia mwaane aikai. E kona n rangi ni kakukurei rekeia raao aika boou, te mwamwaie, ao kanakin te amwarake ae kangkang. E ngae ngke aia katei ao aroaroni maiuia aine akanne a aki boraoi ma Ana Tua te Atua are a kairiraki iai tibun Iteraera, ma a kona tabeman mwaane aika tibun Iteraera n iango ni kangai: ‘Ti aki kona n rotaki irouia. Ti na taratara raoi.’

 Ma tera ae riki? E taku te Baibara: “Ao a a wene ni bure ma aine aika natiia tibuni Moaba.” A bon tangiria aine aikai bwa a na taromaurii atua aika kewe mwaane akanne. Ao a boni karaoa anne! Ngaia are “e a rangi n un Iehova irouia tibun Iteraera.”​—WarIte. 25:​1-3.

A urui Ana Tua te Atua tibun Iteraera akanne n aaro aika uoua: A bobaraaki nakoia bouannanti, ao a wene ni bure. A mate nga ma nga ibukin aia aki ongeaba. (TeOti. 20:​4, 5, 14; TuaKau. 13:​6-9) Tera ae rangi ni kananokawaki riki iai te kabuanibwai anne? Bon te tai are a karaoa iai anne mwaane akanne, bwa ngke arona bwa a aki urua Ana Tua te Atua, a nang bae n tia n rinanon te Ioretan nakon te Aba ni Berita tibun Iteraera aika nga ma nga.​—WarIte. 25:​5, 9.

Ni kaineti ma baike a riki akanne, e korea aei te abotoro Bauro: “A riki baikekei nakoia bwa banna ni katoto, ao a koreaki bwa bwaai ni kauring nakoira, ngaira aika ti a maeka n tain tokin taiani waaki aika ngkai i aon te aba.” (1Kor. 10:​7-11) E bae ni kukurei Tatan bwa a mwane ni karaoa te bure ae kakaiaki tabeman mai buakoia tibun Iteraera ao a aikoa kariaiakaki n rin n te Aba ni Berita. Ai wanawanara ngaira ngkana ti mutiakina te kauring anne, ngkai ti a ataia bwa e kukurei Tatan ngkana ti aki naba rin n ana aonnaba ae boou te Atua!

E kani kamwaneia Kristian Tatan ao e kabonganai aanga ake a a tia ni mwane iai aomata aika bati. N aron are taekinaki mai moa, e kabongana te wene ni bure nakoia tibun Iteraera. N ara bong aikai, e teimatoa ni karuanikai ana bwai ni kamwane anne. Te anga ae e kona ni kabwakaira iai nakon te wene ni bure bon rinanoni baika bwaitingako.

Ni boong aikai, e a kona temanna ni matakuakina te bwaitingako ao e aki ataaki. N taai akekei, te aomata ae kani mataku n te bwaitingako e na nako n te tabo n taamnei ni mataku n te bwaitingako iai, ke e na nakon te tabo ni boki ae kaboonakoi booki aika bwaitingako. A bati aomata aika aki kakawari taabo aikai ibukina bwa a maamaa ngkana a noraki iai. Ma e a kona ngkai te aomata ni matakuakina te bwaitingako n te intanete n ana tabo ni mwakuri ke i nanon ana kaa. Ao n aaba aika bati, e a kona te mwaane ke te aine n taamnei n te bwaitingako ni bon ana auti.

Tiaki tii anne, ma e a bebete riki ngkai norakini baika bwaitingako ni baika uouotaki n aron te tareboon ke te tablet. A kona n taamnei ni baika buakaka mani baikai aomata aika nakonako n te kawai ke a toka n te bwati ke te turein.

Kioina ngkai e a kai matakuakinaki riki ngkai te bwaitingako ao e aki ataaki bwa antai ae mataku iai, e a karika te kangaanga ae korakora n ara bong aikai nakon are mai mwaina. A bati taani mamataku iai ake a a uruaki aia mare, karineaia i bon irouia, ao mataniwin nanoia. Ma ae kakaiaki riki, e a uruaki aia iraorao ma te Atua. Ko kona ni kakoauaa bwa a na bon ruanikai naake a mamataku n te bwaitingako. A bati aika rotakibuaka iai. A kona mwina aika buakaka ni bua teutana imwina teutana ma a kona naba n tiku n te tai ae rangi ni maan.

Ti riai n ataia bwa e tauraoi Iehova ni kamanoira man ana bwai ni kamwane Tatan aei. Ngkana ti tangira ana kamanomano Iehova, ti riai ni karaoa te baere a kabwaka ni karaoia mwaane ake tibun Iteraera rimoa, ae taekan ae ti na ‘ongo raoi ni bwanaana.’ (TeOti. 19:5) Ti riai n ataia bwa te Atua e rangi n riribai baika bwaitingako. E aera bwa ti taekina aei?

Iangoa aei: A kaokoro tuua ake e anga te Atua nakoia tibun Iteraera ma aia tua natannaomata ake tabeua n taai akekei. A riki tuua aikai bwa kaanga te oo ae kaokoroia tibun Iteraera ma natannaomata ake i rarikia aika kakaraoi baika rangi ni buakaka. (TuaKau. 4:​6-8) E kamatataaki n tuua akanne te koaua  ae kakawaki aei: E ribaa Iehova te wene te bure.

Ngke e taekin Iehova baika kammaira ake a kakaraoi natannaomata ake tabeua, e tuangia naba tibun Iteraera ni kangai: “Kam na tai karaoa te aro ae a kakaraoia aomata n te aba ae Kanaan ae I a kairingkami nako iai. . . . E a kamwara te aba, ao N na karokoa te tuuaa i aona ibukin te bure are iai.” Iroun te Atua ae tabu ae Atuaia tibun Iteraera, e rangi ni buakaka aroaroni maiuia kaaini Kanaan ike e a kamwara naba iai abaia ao n aki itiaki.​—⁠NakIbo. 18:​3, 25.

E ngae ngke e katuuaaeia kaaini Kanaan Iehova, ma a teimatoa natannaomata ake tabeua ni wewene ni bure. Tao 1,500 te ririki imwina, e a kabwarabwaraa Bauro “aki bwerengakia n te aroaro ni maiu ae riai” natannaomata ake a maeka Kristian i buakoia. A “arona te aroaro ae kammaira ni kakaraoi mwakuri aika kamwara n aekaia nako ma te nanonrang.” (IEbe. 4:​17-19) A bati ni boong aikai aika bwabwaina naba te aroaro ni maiu anne ao a aki kuba iai. A riai taan taromauri ni koaua n rarawa n tatarai aia mwakuri aika kammaira kaain te aonnaba.

E boni kaotaki aki karinean te Atua ni baika bwaitingako. E karikiia aomata te Atua n ai arona ao ni katotongana. E karikira ma ataakin ae riai ao ae kairua. E wanawana te Atua ngkai e anga tuua ni kaineti ma te wene n taanga. E bon riai n riki bwa te bwai ae itiaki ao ae kakukurei i nanon te mare. (KBwaai 1:​26-28; TaeRab. 5:​18, 19) Ma tera aroia naake a boutokai ke ni katauraoi baika bwaitingako? A bon aki karinei ana kaetieti te Atua ibukin te aroaro ni maiu ae riai. Eng, a boni kamatauningaa Iehova. E na boni motiki taekaia naake a aki mutiakin ana kaetieti bwa a boutokai ke ni katauraoi baika kammaira.​—IRom 1:​24-27.

Ma tera aroia naake a boni kani wareka ke ni matakuakina te bwaitingako? A bae n iangoia tabeman bwa bon akea karuanikain te kaakibotu aei. Ma a boni boutokaiia iai naake a aki karinei ana kaetieti Iehova. Tao tiaki anne aia iango n te moantai ngke a mamataku n te bwaitingako. Ma e kateretereaki n te Baibara bwa a bon riai taan taromauria te Atua ae koaua n ribai baika bwaitingako. E kangai: “Ngkami aika kam tangira Iehova, ribaa te bwai ae buakaka.”​—TaiAre. 97:10.

Naake a kataia n rarawa ni matakuakini baika  bwaitingako e kona naba ni kangaanga karaoan aei irouia. Ti aki kororaoi ao ti bae ni kataia ni buakana kaibwabwarun rabwatara. E ngae n anne, e kona nanora ae aki kororaoi n tuangira bwa e aki bure matakuakinan te bwaitingako. (Ier. 17:9) Ma a bati Kristian aika a tia n tokanikai i aon aei. Ataakin aei e kona n riki bwa kaungaam ngkana ko aitara naba ma te aekaki aei. Nora aron Ana Taeka te Atua ni kona ni buokiko n rarawa nakon ana bwai ni kamwane Tatan ae baika bwaitingako.

N aron ae taekinaki mai mwaina, a bati tibun Iteraera aika kariaia kaibwabwarun rabwataia bwa a na uotiia nakon te kabuanibwai. E kona n riki naba anne n ara bong aikai. E taekina te kangaanga anne tarin Iesu ae Iakobo ni kangai: “Aomata n tatabemania nako . . . a katikakinako ao ni mwamwanaaki n oin aia kaibwabwaru. Ao ngkana e bikoukou te kaibwabwaru ao e bungia te bure.” (Iak. 1:​14, 15) N te tai are e a rikirake iai te kaibwabwaru i nanon te aomata, e na boni bae ni karaoa te bure. Ngaia are ti riai ni kanakoi iango aika bubuaka ao n aki teimatoa n iangoi.

Ngkana ko a moanna n iaiangoi baika aki raraoi, waekoa ni karaoa te bwai teuana. E taku Iesu: “Ngkana e kabwakako baim ke waem, koreia ao karenakoa. . . . Ao ngkana e kabwakako matam, autia ao karenakoa.” (Mat. 18:​8, 9) E aki nanonna Iesu bwa ko na kaikoaka rabwatam. Ma e kaikonaka ae e riai ni waekoa ni kanakoaki te baere e karika te kangaanga. Ti na kangaa ni maiuakina te reirei ni kairiri anne ni kaineti ma baika bwaitingako?

Ngkana ko kuba n nora taamnein te bwaitingako, tai kangai: ‘I aki kona n rotaki iai.’ Waekoa n tannako. Tiringa am terewitin ngkekei naba. Kamatea am kaombiuta ke am mobwaao n te tai naba anne. Iangoa te bwai teuana ae itiaki. Ni karaoan aei, ko na buokaki iai n aki taonakinako n iango aika bubuaka.

Ngkana arona bwa e a toki mamatakuakinan baika bwaitingako iroum, tera arom ngkana a a manga okioki taamnei akanne n am iango? A kona taamnei aika bwaitingako  ke iango aika bubuaka n tiku ni maan n ana iango te aomata. A kona ni manga okioki n te tai teuana ma teuana. Ngkana e riki anne, e bae n ueke iroum kani karaoan te bwai ae kamwara n aroni kumekumean am bwai ni kakariki. Ngaia are taratara raoi bwa a kona n rio iango akanne n te tai teuana ma teuana ao tauraoi ni kaaitarai.

Kamatoaa nanom bwa ko na iaiangoa ao ni kakaraoa nanon te Atua. Katotonga te abotoro Bauro are kukurei ni ‘kammaraka rabwatana ao ni kaaunganna.’ (1Kor. 9:27) Tai kariaia tangirani baika kammaira bwa a na taua arom. “Kam na onikaki n aromi ni kabooui ami iango, bwa kam aonga ni kakoauaa raoi bwa tera nanon te Atua ae raoiroi ma n riai ao ni kororaoi.” (IRom 12:2) Uringa aei: E na karekea te kimwareirei ae bati riki iaiangoan ao karaoan nanon te Atua nakon irakin nanom ni kani karaoa ae bure.

Kataia ni kamatenikunai kiibu tabeua. Ao ngkana a rio iango aika buakaka, iaiangoi kiibu akanne. A na buokiko kiibu aika Taian Areru 119:37; Itaia 52:11; Mataio 5:28; I-Ebeto 5:3; I-Korote 3:5; ao 1 I-Tetaronike 4:​4-8 bwa ko na kaboraoa am iango ma Iehova ni kaineti ma baika bwaitingako, ao tera ae e kantaningaia bwa ko na karaoia.

Ma tera arom ngkana ko namakinna bwa ko a aki kona n taona nanom mani matakuakinan ke iangoani baika kammaira? Toua raoi mwini mwanekan Teuare ara Banna ni Katoto ae Iesu. (1Bet. 2:21) Imwini bwabetitoan Iesu, e teimatoa Tatan ni kariria. Tera are e karaoia Iesu? E teimatoa n rawa. E kabongana te kibu teuana imwin teuana, n rawa iai nakon ana kariri Tatan. E taku: “An naako Tatan!” ao e kitanna Tatan. N aron Iesu ae teimatoa n rawa nakon te Riaboro, ko kona naba ni karaoa anne. (Mat. 4:​1-11) A na teimatoa Tatan ma ana aomata ni kataia ni karin n am iango baika kammaira, ma tai kariaia konaakim. Ko kona n tokanikai n rarawa nakoni baika bwaitingako. Man ana ibuobuoki Iehova, ko kona n tokanikai i aon aiam.

Teimatoa n tataro nakon Iehova ni bubutiia buokam. E taku Bauro: “A na kaotaki ami bubutii ni bwaai ni kabane nakon te Atua . . . ao te rau are mairoun te Atua ae riaon aia iango aomata, e na kawakin nanomi ma ami iango rinanoni Kristo Iesu.” (IBir. 4:​6, 7) E na buokiko te rau are mairoun te Atua bwa ko na rarawa nakon te bwai ae bure. Ngkana ko kaania Iehova, ‘ane e na kaaniko.’​—Iak. 4:8.

Ti na kamanoaki man ana kariri Tatan ngkana ti kateimatoa ara iraorao ae kaan ma te tia Tautaeka n te iuniweeti. E taku Iesu: “E a nakomai te tia tautaekania kaain te aonnaba [ae Tatan], ao akea mwaakana i aou.” (Ioa. 14:30) E aera bwa e kakoauaa aei Iesu? E taku n te taina: “Bon raou Teuare kanakomaiai ao e aki katukai i bon irou, ibukina bwa I kakaraoi baike a kakukurei nakoina.” (Ioa. 8:29) Ngkana ko karaoi baike e kukurei iai Iehova, e na bon aki naba kitaniko. Rarawa nakon te bwai ni kamwane ae baika bwaitingako, ao ko na aki kona ni mwane iroun Tatan.