UMI israelita okrusa potaitéma hína kuri pe Rrío Jordán oike hag̃ua pe Tiérra Prometídape, péro upeichaháguinte oreko hikuái peteĩ visíta nohaʼarõietéva. Ou hendapekuéra heta kuña ndahaʼéiva israelita ha oinvita umi kuimbaʼépe peteĩ fiestarã. Orekóta hikuái amígo pyahu, ojerokýta ha okaru porãta hikuái. Haʼetévaicha iporãitereíva ko invitasión ha oiméne ndojavyséi raʼe hikuái upéva. Péro umi kostúmbre orekóva koʼã kuña ha oñekomporta lája, idiferentete vaʼekue Ñandejára Léi omboʼe vaʼekuégui umi israelítape. Upéicharõ jepe, heta kuimbaʼe opensáne raʼe: “Upéva ningo nañandeafektamoʼãi, jajekuidánte vaʼerã”.

 ¿Mbaʼépa oiko upe rire? La Biblia omombeʼu: “Haʼekuéra oñepyrũ hekovai umi moabítandi”. Péro añetehápe koʼã kuña oipota kuri umi israelita oadora umi dios fálsope. Ha okonsegi hikuái upéva. Upéicha rupi “Jehová ipochyeterei” umi israelítandi (Núm. 25:1-3).

Umi israelita ojapo mokõi mbaʼe Jehová heʼi vaʼekue chupekuéra ndojapói vaʼerãha: Oadora umi dios fálsope ha hekovai hikuái. Hetaiterei israelita omano naiñeʼẽrendúi rupi Jehovápe (Éx. 20:4, 5, 14; Deut. 13:6-9). ¿Mbaʼérepa ivaivéntema upe oikóva hesekuéra? Pórke saʼíma kuri ofalta oike hag̃ua hikuái pe Tiérra Prometídape. Umi kuimbaʼe iñeʼẽrendúrire Ñandejárape, ikatúta kuri okrusa pe Rrío Jordán ha oike pe Tiérra Prometídape (Núm. 25:5, 9).

Imanduʼávo koʼã mbaʼe oiko vaʼekuére, apóstol Pablo oskrivi: “Koʼã mbaʼe oikóva hesekuéra oservi ñandéve ehémploramo, ha ojehai ñanerekomboʼe hag̃ua ñandéve, jaikóva hína ko múndo ára pahápe” (1 Cor. 10:7-11). Satanás katuete ovyʼaitereíne raʼe ohechávo mbaʼéichapa heta israelita opeka vaiete Jehová kóntrape, ha ndoikéi pe Tiérra Prometídape. Ñande ñañatende vaʼerã ani hag̃ua oiko ñanderehe upéva, pórke Satanás ovyʼaitereíta ikáusare ndajaikéiramo avei Ñandejára múndo pyahúpe.

Satanás ningo oityseterei umi kristiánope, upévare oipuru jepi umi ñuhã haʼe oikuaa porãva ha oitýma vaʼekue hetápe. Por ehémplo, jahecha kuri haʼe oipuru hague pe tekovai oity hag̃ua umi israelítape. Ha koʼag̃aite peve upe ñuhã ipeligrosoiterei gueteri. ¿Mbaʼéichapa Satanás ikatu ñandereity upévape? Haʼe ikatu hína ñandereity ko ñuhãme pe pornografía rupive.

Koʼág̃arupi oimeraẽva ikatu ohecha pornografía ñemihaitépe jepe. Ymave idiferénte vaʼekue, pórke peteĩ ohechaséva pornografía oho vaʼerã umi síne ojehechaukahápe umi pelíkula tieʼỹ, térã oho vaʼerã umi negósio oñevendehápe rrevísta ha lívro tieʼỹ. Ha ndahetái vaʼekue umi hénte ohóva koʼãichagua lugárpe, ikatu oime okyhyje ótro ohechárõ g̃uarã chupe umírupi. Péro ñane tiémpope, oimeraẽ persóna orekóva Internet ikatúma oike ohecha hag̃ua pornografía, tahaʼe itravahohápe térã hiʼáutope. Heta paíspe peteĩ kuña térã peteĩ kuimbaʼe ikatu ohecha pornografía hogaitépe voi.

Péro ndahaʼéi upévante, umi selulár térã távlet rupive ifasilvéma ojehecha hag̃ua pornografía. Umi hénte ikatu ohecha umi mbaʼe tieʼỹ oguata aja kállere, térã oviaha aja kolektívo térã trénpe.

Koʼág̃arupi ifasilve ojehecha hag̃ua pornografía avave oikuaaʼỹre, upéicha rupi hetaitevépe operhudika yma guarégui. Umi ohecháva pornografía ombyai imatrimónio, ikonsiénsia ha ohechauka ndojerrespetaiha ijupe voi. Ha ivaiveha, ikatu operde pe amista orekóva Jehovándi. Upévare ikatu ñaime segúro pe pornografía operhudika vaietereiha umi ohechávape. Oĩ hetaiterei ohecha vaʼekue pornografía ha upéva oafekta vaieterei umi mbaʼe opensáva ha oñandúva, ha koʼã mbaʼe heta tiémpore operhudika chupe. Oĩ voi umi ndaikatuvéimava ojehekyipaite umi mbaʼe vai oguerúvagui pe pornografía.

Péro ñanemanduʼa vaʼerã Jehová ikatuha ñandeprotehe ko ñuhã oipurúvagui Satanás. Péro ikatu hag̃uáicha Jehová ñandeprotehe, jajapo vaʼerã peteĩ mbaʼe umi kuimbaʼe israelita ndojapói vaʼekue: ‘Ñaneñeʼẽrendu chupe opa mbaʼépe’ (Éx. 19:5). Iñimportánte hína jahechakuaa Ñandejára ndaijaʼeieteha voi pe pornografíare. ¿Mbaʼérepa jaʼe upéva?

Epensamínte umi léi Jehová omeʼẽ vaʼekuére umi israelítape. Umíva ningo ndaijojahái ha ni peteĩ ótro puévlo ndorekói vaʼekue umichagua léi. Umíva ningo haʼete vaʼekue peteĩ murálla oprotehéva umi israelítape umi nasión oĩvagui ijererekuéra, ha umi mbaʼe vai ojapóvagui hikuái (Deut. 4:6-8). Koʼã léipe ojekuaa porã vaʼekue peteĩ mbaʼe iñimportantetereíva: Jehovápe ombojeguaru pe tekovai.

Omombeʼu rire umi israelítape umi mbaʼe kyʼa ojapóva umi nasión oĩva ijererekuéra, Jehová heʼi chupekuéra: “Ndapejapói vaʼerã umi mbaʼe  ojapóva umi cananeo, upe lugár che poguerahahápe hína. [...] Koʼã hénte káusare ko yvy oñemongyʼa, ha che akastigáta umi hénte oikóva koʼã nasiónpe”. Jehová ningo peteĩ Dios sánto térã ipotĩva, ha chupe ombojeguaru vaʼekue umi mbaʼe vai ojapóva umi cananeo, upévare chupe g̃uarã haʼete voi ikyʼáva pe yvy haʼekuéra oĩha (Lev. 18:3, 25).

Jehová okastigárõ jepe umi cananéope, lomímonte oĩ vaʼekue hetaiterei nasión osegíva hekovai. Ohasa rire 1.500 áñorupi, apóstol Pablo omombeʼu vaʼekue umi kristiáno tiémpope umi hénte ‘ndoikuaavéima hague mbaʼépa iporã ha ivai’, ha ‘notĩveietemaha hembiapo vai hag̃ua’, upéva rangue “oñemeʼẽ hikuái opaichagua tekokyʼa ivaietereívape ha naikaneʼõi voi hekokyʼa hag̃ua” (Efes. 4:17-19). Ñane tiémpope avei oĩ hetaiterei hénte hekovaietereíva ha notĩriva voi oiko hag̃ua upéicha. Péro ñande kristiáno tee ñañehaʼãmbaite ani hag̃ua jahecha umi mbaʼe kyʼa ojejapóva ko múndope, umíva apytépe pe pornografía.

Pe pornografía rupive ojehechauka ndojerrespetaieteha Ñandejárape. Jehová ningo ñandeapo vaʼekue ijoguaháramo ha omeʼẽ ñandéve pe kapasida jahechakuaa hag̃ua mbaʼépa iporã ha mbaʼépa ivai. Haʼe ohechauka vaʼekue iñaranduha omeʼẽrõ guare umi léi oñeʼẽva umi rrelasión sexuál rehe. Jehová oipota kuri umi omendáva añoite odisfruta upéva oñondive (Gén. 1:26-28; Prov. 5:18, 19). ¿Péro mbaʼépa ikatu jaʼe umi oprodusívare pornografía térã omokyreʼỹvare ótrope ohecha hag̃ua? Haʼekuéra ohechauka ni michĩmi noñeinteresaiha umi mbaʼe Jehová heʼívare umi rrelasión sexuál rehe, ha péicha umi oprodusíva pornografía térã omokyreʼỹva ótrope ohecha hag̃ua, ohechauka ndorrespetaieteha Jehovápe. Upéicha rupi haʼe ohusgáta koʼãichagua persónape (Rom. 1:24-27).

Oĩ avei umi hénte a propósito oleéva umi mbaʼe tieʼỹ térã ohecháva pornografía. Umichagua persóna oimoʼã ndojeperhudikamoʼãiha ojapóramo upéva, péro añetehápe haʼekuéra oapoja hína umi ndorrespetáivape Jehovápe, ha oiko chuguikuéra ikómplise. Ikatu oime nog̃uahẽséi kuri upévape oñepyrũrõ guare ohecha pornografía, upéicharõ jepe, la Biblia ohechauka porãiterei umi oadoráva Jehovápe ndochaʼeiete vaʼerãha pe pornografíare. Salmo 97:10 heʼi voi: “Enterove peẽ  pehayhúva Jehovápe, ndapechaʼéi vaʼerã umi mbaʼe ivaívare”.

Ñande ñañehaʼãmbaitéramo jepe ani hag̃ua jahecha pornografía, sapyʼánte ikatu ijetuʼu ñandéve jajejoko hag̃ua. Entéro ningo ñaneimperfékto ha ikatu voi ñañehaʼãmbaite hína ñamboyke umi deséo vai jarekóva. Upéicharõ jepe, ñane korasõ ikatu oñehaʼã ñanekonvense ndaivairiha jahecha pornografía (Jer. 17:9). Oiméramo oiko nderehe avei upéicha, nemokyreʼỹta reikuaávo koʼág̃arupi oĩha heta kristiáno ipuʼakáma vaʼekue umi deséo vaíre ha ndohechavéi pornografía. Jahechamína mbaʼéichapa Ñandejára Ñeʼẽ ikatu nepytyvõ ani hag̃ua reʼa ko ñuhã Satanás oipurúvape.

Jahecha haguéicha ajeʼi, heta israelita oheja vaʼekue imbarete hese umi deséo vai orekóva, ha upévare ojapo peteĩ mbaʼe ivaietereíva. Ha upéva ikatu hína oiko avei ñanderehe. Santiago, haʼéva Jesús médio ermáno, omombeʼu: “Káda uno ñañemoñuhã, jahejávo umi mbaʼe jajaposéva ñandestira ha ñanembotavy. Umi mbaʼe jajaposéva oñembohapóramo ñande pyʼapýpe, upéva omoheñói pekádo” (Sant. 1:14, 15). Peteĩ persóna ohejáramo peteĩ deséo vai oñembohapo ikorasõme, tiémpo rire upe persóna provávlemente opekáta hína. Upévare rejapo vaʼerã ikatúva entéro ani hag̃ua repensa umi mbaʼe tieʼỹre.

Péro rehechakuaáramo resegiha repensa umi mbaʼe tieʼỹre, pyaʼe porã rejapo vaʼerã Jesús heʼi vaʼekue: “Upévare, nde po térã nde py nemoñepysangáramo, eikytĩ ha emombo mombyry ndehegui. [...] Upéicha avei, nde resa nemoñepysangáramo, eipeʼa ha emombo mombyry ndehegui” (Mat. 18:8, 9). Jesús ndeʼiséi vaʼekue reikytĩ vaʼerãha nde rete. Upéva rangue, haʼe ohechaukánte iñimportanteha repilla mbaʼéicha rupípa repensa hína umi mbaʼe tieʼỹre, ha pyaʼe porã rekambia vaʼerãha tekotevẽhápe. ¿Mbaʼéichapa ikatu resegi ko konsého ojeapareséramo ndéve peteĩ taʼanga tieʼỹ?

Ojeapareséramo ndéve peteĩ taʼanga tieʼỹ, ani repensa: “Kóva ningo ndacheafektamoʼãi”. Upéva rangue, upepete remaña vaʼerã ótro ládo ha pyaʼe porã rembogue pe téle, távlet térã selulár. Epensa peteĩ mbaʼe iporãvare. Péicha rejapóramo  ndepuʼakáta umi mbaʼe repensávare, ha nderehejamoʼãi ipuʼaka nderehe umi deséo vai.

Ikatu oime nde koʼág̃a nderehechavéima pornografía, péro sapyʼapyʼa nemanduʼa gueteri umi mbaʼe tieʼỹ rehecha vaʼekuére. Ñambyasýramo jepe, ñane akãme ikatu hína opyta heta tiémpore umi mbaʼe tieʼỹ térã pensamiénto tieʼỹ, ha umíva ikatu ou ñandéve ñane akãme ñaimoʼãʼỹve jave. Upéva oikóramo, peteĩ persóna ikatu hína ojapo peteĩ mbaʼe kyʼa, por ehémplo oñemasturva. Nemanduʼa vaʼerã umichagua pensamiénto ikatuha ou ndéve ne akãme reimoʼãʼỹve jave, upéicha rupi reime vaʼerã preparádo ndepuʼaka hag̃ua umívare.

Rejedesidi vaʼerã repensa ha rejapotaha umi mbaʼe Ñandejárape ogustáva. Rejapo vaʼerã apóstol Pablo ojapo haguéicha, haʼe ningo ‘ipuʼaka vaʼekue hetére ha oreko hembiguáiramo’ (1 Cor. 9:27). Aníke reheja nedomina umi deséo vai. Upéva rangue ‘rekambia vaʼerã repensa lája, ikatu hag̃uáicha eikuaa porã Ñandejára rembipota iporãva, hekopeguáva ha haʼe oguerohorýva’ (Rom. 12:2). Nemanduʼa vaʼerã nderevyʼamoʼãiha rejapóramo umi mbaʼe tieʼỹ, péro katuete revyʼáta repensa ha rejapóramo umi mbaʼe Ñandejára oguerohorýva.

Eñehaʼãkena eikuaa de memória unos kuánto téxto bíblico. Upéicharõ, ág̃a ou vove ndéve ne akãme umi pensamiénto vai, ejeovliga epensa hag̃ua umi téxto bíblicore. Por ehémplo, Salmo 119:37, Isaías 52:11, Mateo 5:28, Efesios 5:3, Colosenses 3:5, ha 1 Tesalonicenses 4:4-8 nepytyvõta repensa hag̃ua Jehová opensaháicha pe pornografíare ha rentende hag̃ua mbaʼépa haʼe oipota rejapo.

¿Péro mbaʼépa ikatu rejapo reñandúramo ndaikatuiha rejejoko ani hag̃ua repensa térã rehecha umi mbaʼe tieʼỹ? Upéicha jave, resegi vaʼerã Jesús ehémplo (1 Ped. 2:21). Jesús ojevautisa rire, Satanás heta vése omoñuhãse vaʼekue chupe. ¿Péro mbaʼépa Jesús ojapo rakaʼe? Haʼe osegi oñemoĩ ikóntrape. Upearã haʼe oipuru heta téxto bíblico ani hag̃ua hoʼa Satanás ñuhãme, ha upéi heʼi chupe: “¡Tereho koʼágui Satanás!”, ha Satanás osẽ oho. Jesús ningo noñentregái vaʼekue, ha nde avei resegi vaʼerã reñorairõ Satanás kóntrape (Mat. 4:1-11). Satanás ha imúndo osegíta oñehaʼã nemopensa umi mbaʼe tieʼỹre, péro aníkena eñentrega. ¡Nde ikatu rerrechasaite pe pornografía ha regana ko ñorairõ! Jehová rupive, nde ikatu hína ndepuʼaka ko enemígore.

Resegi vaʼerã eñemboʼe Jehovápe ha ejerure chupe tanepytyvõ. Pablo ningo heʼi vaʼekue: “Pemombeʼu Ñandejárape peipotáva [...]. Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare, Cristo Jesús rupive” (Filip. 4:6, 7). Ñandejára omeʼẽta ndéve pe pyʼaguapy reikotevẽva ikatu hag̃uáicha rejejoko ani hag̃ua rejapo ivaíva. Reñemoag̃uíramo Ñandejárare, ‘haʼe oñemoag̃uíta nderehe’ (Sant. 4:8).

¿Mbaʼépa nepytyvõta ani hag̃ua reʼa Satanás ñuhãme? Upearã iñimportanteterei resegi reguereko ne amigoitéramo Jehovápe, pe ogovernáva ko univérso. Jesús heʼi vaʼekue Satanás rehe: “Oúma [...] pe múndo ruvicha. Haʼe ndaipuʼakái cherehe” (Juan 14:30). ¿Mbaʼérepa Jesús oikuaa porãite rakaʼe upéva? Haʼe voi heʼi: “Pe chembou vaʼekue oĩ chendive, ndacherejái cheaño, che akóinte ajapógui umi mbaʼe haʼe oguerohorýva” (Juan 8:29). Nde avei resegíramo rejapo umi mbaʼe Jehová oguerohorýva, haʼe núnka nanderejamoʼãi. Eñemomombyrýkena pe pornografíagui ha ani reʼa iñuhãme, péicha Satanás ndaipuʼakamoʼãi nderehe.