NITRE israelita namanina juto nänkäre ñö Jordán yete ta rabakäre kä käbämikani Ngöbökwe ietre yekänti. Bati, meritre menteni nükani nitre Israel nübaire mröre aune kä ngwen juto jabätä bentre. Bailadre aune mrö kwin kwetadre nitre Israel yekwe ye köböire ja ketamuko mada mrä rabadre kwetre namanintre nütüre. Kukwe Biani Ngöbökwe nuaindre nitre Israel ie ye ererebätä meritre ye ñaka nämäne ja ngwen aune nämäne jondron jene jene nuainne, nitre brare ruäre namani nütüre ti ja ngübaibiti aune kukwe käme ñaka rabai bare tibätä.

 Akwa, ¿dre namani bare? Biblia tä niere: “Juta ye namani ja mike gure kämekäme nitre Moab ngängäntre yebe”. Metrere meritre ye tö namani nitre Israel ye tuai ngöbö ngwarbe mike täte. Aune ye erere nitre Israel nuainbare. Yebätä Jehová namani rubun nitre Israel kräke (Núm. 25:1-3).

Kukwe Biani Ngöbökwe nuaindre ye nitre israelita ñaka mikani täte kukwe ketebu känti: ja mikani kwetre ngukodokwäre ngöbö ngwarbe ye ngwärekri aune niaratre ja mikani gure kämekäme. Ye köböite nitre israelita kwati murie ketani (Éx. 20:4, 5, 14; Deut. 13:6-9). ¿Ñobätä nitre israelita kukwe tare mikani ja kisete? Ñobätä ñan aune niaratre namanina kä käbämikani ietre ye ken. Kukwe Biani Ngöbökwe nuaindre ye nitre israelita kwati ye käkwe mikadre täte akräke, kä rikadre braibe ta ngwane niaratre rikadre ñö Jordán yete ta aune rabadre Kä Käbämikani ietre yekänti (Núm. 25:5, 9).

Kukwe nakaninkä yebätä apóstol Pablo nämäne töbike yebätä kukwe ne tikani kwe ni mikakäre mokre: “Ni tödekaka Jesubti, kräke kukwe kuin ne nämane tikani kira Ngöbö Kukweibtä abko tä neme bare kä mrä ne näire, aisete kukwe nakaninkä jökrä kore nitre israelita kirakirabtä ja töikrä nie, yebtä nikwe töbikadre ja käne, abkokäre tä tikani Ngöbö Kukweibtä” (1 Cor. 10:7-11). Nitre israelita ja mikani ngite krubäte yebätä niaratre ñaka namani Kä Käbämikani ietre yekänti ye käi namani juto Satanabätä. Nitre Israel ja mikani ngite ye tä kukwe ütiäte driere nie ja töi kräke, ñobätä ñan aune Satana ñaka tö ni tuai nemen kä bä nuäre Ngöböta käbämike nie yete ye gare nie.

Ni kristiano ja mikadre ngite yekäre, Satana tä kö okwä keta kabre mike ni jiete ni nuatekäre aune ni kwati tä nakain kö okwä yete ie. Nibira gare nie ye erere, Satanakwe nitre israelita töi mikani ja mike ngite ja mika gure kämekäme yebiti. Täbe kö okwä yebiti nitre töi mike ja mike ngite kä nengwane. ¿Dre köböite ni raba nemen kö okwäte ie? Kö okwä keteiti ye abokän ni üai butiere tuata.

Kä nengwane, nitre raba ni üai butiere tuin ye ñaka raba nemen gare ni madai. Mekerabe sete, nire tö nämäne ni üai butiere tuai ngwane, nämäne niken cine película mrusaire o nämäne tärä o täräkwata kökö jai tuakäre. Nitre kwati käkwe ñaka nuainbare ñobätä ñan aune niaratre tuadre kä yekänti o kä ye ken ngwane rabadre jakaire. Akwa kä nengwane, nirekwe Internet tärä ye raba ni üai butiere mrusaire sribikänti o tätre karo mike nünenkä yekänti. Aune juta keta kabre känti, nitre brare aune meritre raba ni üai butiere mrusaire ja gwirete.

Akwa ye ñan aibe ngörä. Celular yete nitre tä ni üai butiere mrusaire. Ni iti raba niken ji ngrabare, bute o trente ye ngwane raba ni üai butiere mrusaire celular o tableta kwe yete.

Nengwane nitre kwati kräke nemen nuäre ni üai butiere mrusaikäre, ñobätä ñan aune ye ñaka nemen gare nitre madai, ye tä kukwe kri mike nitre kisete. Ye köböite, nitre kwati tä ja tuenmetre muko ben, ja ñaka nemen ruin ütiäte ietre aune töita nemen nike krubäte. Metrere ñaka tä nemen ja kete kwin Ngöböbe. Nire tä ni üai butiere mrusaire ye kisete kukwe kri tä nemen ye gare metre nie. Nitre tä kukwe ye nuainne yei jata nemen ruin ngite krubäte. Bätärekä bätärekä ja raba kiteta ruin kwin ietre akwa niaratre töi ye raba nike kä kwati krubäte te.

Jehová tä ni dimike ja kriemikakäre kö okwä Satanakwe yebätä ye nikwe ñaka käi kwitadrekä jabiti. Ni tö ja kriemikamana ie ngwane, nitre israelita kukwe nuainbare ye nikwe ñaka nuaindre, ñakare aune nikwe Ngöbö kukwei mikadre täte (Éx. 19:5). Ni üai butiere tuadre ye tuin käme Ngöböi ye nikwe mikadre nüke gare jai. ¿Ñobätä nita ye niere?

Ani töbike kukwe nebätä: kukwe keta kabre biani Ngöbökwe nuaindre nitre Israel ie kukwe ye biani niaratre aibe ie kä ye ngwane. Kukwe biani ye namani ki kwrere nitre israelita ye kräke abokän nämäne niaratre kriemike nitre juta madate nämäne kukwe käme nuainne yebätä (Deut. 4:6-8). Kukwe keta kabre biani Ngöbökwe ye nämäne kukwe metre mike gare: Jehová brukwä nitre nemen kämekäme jabe ye kräke.

Juta nämäne känime niaratre bäre ye nämäne kukwe kämekäme nuainne ye Jehovakwe kädekaninte nitre israelita ie ye bitikäre niebare kwe ietre:  “Kä Canaán känti ti näin mun ngwena yekänti nitre tä dre nuainne ye erere munkwe ñaka nuain. [...] kä tibien tä kämekäme aune tä ja mike ngite yebätä tikwe mikai ja ngie nuin”. Nitre cananeo nämäne ja ngwen ño ye nämäne tuin käme krubäte Ngöbö deme Israelkwe yei, yebätä kä te nitre cananeo nämäne nüne ye namani tuin käme ie niebare kwe (Lev. 18:3, 25).

Jehovakwe nitre cananeo mikani ja ngie nuin, akwa kukwe kämekäme nuain nämäne ye ñaka nianinkä. Kä nikani mil 500 ta ye bitikäre, juta te nitre kristiano nämäne nüne yete nitre nämäne ja ngwen ño ye Pablokwe niebare: “Kukwe mden mden käme amne kukwe mden mden kuin gare ñakare ietre, aisete kukwe kämekäme bätäkä ngwarbe meribe amne brarebe, jiebti tätre nakwen amne, tätre ja gaire ñakare, käta kukwe kämekäme nuene jökrä, akwa kukwe käme ye mdei tä neme bäri janknu ietre” (Efes. 4:17-19). Nengwane nitre kwati krubäte tä nemen kämekäme jabe. Nitre tä kukwe kämekäme nuainne rabakäre jabe ye nitre kristiano rabadre ja di ngwen ñaka mike ñärärä.

Ni üai butiere mrusaita ye ngwane ñaka Ngöbö mikata ütiäte jai. Niarakwe ni sribebare ja bä kwrere aune ni töi mikani kwe ja ngwankäre kwin. Töi kwinbiti niara kukwe ükaninte ja mika gure yebätä aune ye nuainbare kwe ne kwe ni brare aune meri tä ja mäkäninte ye aibe rabadre nemen jabe (Gén. 1:26-28; Prov. 5:18, 19). Akwa nire tä nitre mada töi mike ni üai butiere mrusaire ye tä kukwe ükaninte Ngöbökwe ja mika gure yebätä ye mike tuin ngwarbe jai aune ñaka mike ütiäte jai. Ye medenbätä, nire tä kukwe ye nuainne ben niarakwe kukwe ükaite (Rom. 1:24-27, TNM).

Nitre tä ni üai butiere mrusaire o ñäkebätä nierare, ¿yebätä ni raba dre niere? Nitre ruäre raba niere tätre ye nuainne jerekäbe ja näkwitakäre aune ye ñaka tuin käme ietre. Akwa kukwe ükaninte Ngöbökwe ye nire nire ñaka tä mike täte yekri tätre ja mike. Niaratre jatani ni üai butiere mrusaire ye ngwane ñaka nämäne töbike kore. Akwa nire nire tä Ngöbö mike täte ye rabadre kukwe ye mike tuin käme jai. Biblia tä niere nie: “Mun Jehová tarekä, munkwe ja brukwä mika kukwe käme kräke” (Sal. 97:10).

Nire nire nämäne ni üai butiere mrusaire ie nüke gare, kukwe ye tuanemetre ye ñaka nuäre. Ni töi ngite yebätä nita ja di ngwen ne kwe ni ñaka ja töi mikadre nitre nemen kämekäme jabe ye erere. Ne madakäre, kukwe biani Ngöbökwe ye nikwe  ñaka mikadre täte ye ñaka blo ye ni brukwä raba niere nie (Jer. 17:9). Akwa nitre kwati käkwe ja mikani kristiano ye ngwane kukwe käme ye tuanimetre kwetre. Ye raba nire nire tä ja di ngwen ñaka ni üai butiere mrusaire ye dimike. Kukwe Ngöbökwe raba ni dimike ño ñaka nemen kö okwäte Satana ie ye ani mike gare jai.

Nibi gare kena nie kukwe nekänti erere, nitre israelita kwati käkwe ja tuanimetre töi kwitadre kukwe käme ie ye köböite ja tare nikani kwetre. Aune kukwe ye erere raba nemen bare nengwane. Santiago, Jesús eteba meyekri käkwe kukwe ne niebare: “Kukwe kämekäme käta ni nuente ja käne, ye abko kukwe käme mdei ni töibtä tä ni nuente ja käne, käta ni näkwite ja kukwäre. Yebti kukwe kämekäme mdeita nebe nie, ye erere nita niken nuene angwane, nita ja mike ngite Ngöbö rüere” (Sant. 1:14, 15). Nire tä kukwe käme ye tuenmetre nirien ja brukwäte ngwane, raba ja mike ngite raba ruin nie. Ye medenbätä, nikwe ñaka ja töi mikadre nitre tä nemen kämekäme jabe yebätä; nikwe ñaka kukwe käme ye kadre ngäbiti.

Kukwe blo tä ni töite ye ñaka rabadre nekä ni töite ngwane, ni ñaka rabadre kwekebe. Jesukwe niebare: “Ma kise ya o ma ngoto ya, köböite makwe ja mika ngite Ngöbö rüere ne ngwane, makwe tikaka ta jae, bti makwe kitaka [...]. Ma okwä köböite ma raba ja mike ngite Ngöbö rüere, ne ngwane makwe ja okwä ye diante kwati mento, bti makwe kitaka” (Mat. 18:8, 9). Ye nuaindre metre ye ñan ai gäräbare Jesukwe. Ñakare aune kukwe meden tä ni ngwen ngoto ritekä ye nikwe diandrekä drekebe ja töite ye meden gäräbare kwe. ¿Ñaka ni üai butiere tuadre yekäre kukwe nieta mäträkäre ye ni raba mike ño täte?

Batibe, ni üai butiere mata rabadre ngwane, ¿nikwe dre nuaindre? Kukwe käme ñaka rabai bare nibätä ye nikwe ñaka nütüdre. Ñakare aune nikwe nikradre drekebe mento. Jötrö ngwarbe nikwe televisión, computadora o celular ötadrete. Nikwe töbikadre kukwe bökänbätä. Nikwe ye erere nuaindi ngwane, kukwe käme ye ñaka rabaikä ni töite aune ye köböire kukwe käme ye nikwe diainkä ja töite.

Ni üai butiere bämikata ja töite ye raba neketete ni töite kä kwati krubäte te aune ni ñaka töbikebätä  akwa batibe kukwe ye raba nüketa ni töite. Ye erere tä nemen bare ngwane, nitre töi raba nemen küdrebätä akwle jabätä. Mä ñaka niena ni üai butiere mrusaire akwa nane ngwane, mäkwe kukwe meden tuani ye tä nüketa mä töite ngwane, kukwe ye rabai bare aune mä tädre juto biare kukwe käme ye diankakäre ja töite.

Mäkwe ja töi mika kwatibe töbike aune jondron nuainne Ngöbö töita ño ye erere. Mäkwe ja ngwan apóstol Pablo erere, niara niebare: “Tita ja ngrabare ara jire mike ja tare nike amne tita ja ngrabare ne mike ja kukwei mike täte” (1 Cor. 9:27). Mäkwe ñaka ja tuametre gobraindre kukwe blo tä mä töite yei. Kukwe nieta Romanos 12:2, (TNM) ye erere mäkwe nuain: “Ñaka ja töi kwitamana jondron kä nebätä yei, ñakare aune mun rabadre ja töi ükete kwin ne kwe kukwe meden kwin aune meden Ngöböta kain ngäbiti bätä meden metre ye rabadre gare kwin munye”. Nikwe töbikadre aune jondron nuaindre Ngöbö töita ño ye erere ye köböire kä rabai juto nibätä, akwa ja mikata ngite ngwane kukwe ye erere ñaka tä nemen bare ye nikwe ñaka käi kwitadrekä jabiti.

Mäkwe texto mika gare töbiti jai ye käkwe mä dimikai ja töi mike Jehová erere aune dre tuin kwin ie bätä dre tuin käme ie ye mike nüke gare jai aune ni üai butiere ye mike tuin käme jai. Kukwe käme rükadre mä töite ngwane, mäkwe ja töi mika texto yebätä. Texto ruäre ye abokän Salmo 119:37, Isaías 52:11, Mateo 5:28, Efesios 5:3, Colosenses 3:5 aune 1 Tesalonicenses 4:4-8.

Nane mä törba nitre tä nemen kämekäme jabe ye tuabätä o bämikabätä ja töite ngwane, ¿mäkwe dre nuaindre? Jesukwe ja ngwani ño ye erere mäkwe ja ngwan (1 Ped. 2:21). Niara ngökani ñöte ye bitikäre, Satana niara nuaninte bä kabre. ¿Jesús dre nuainbare? Niara ñaka ja ngwani di nekä. Satana nämäne kukwe nuainne Jesús nuatekäre ye ngwane bati bobu kukwe Ngöbökwe ye kädekaninte kwe ie. Niebare kwe ie: “Satana, nän mento nete” aune ye erere Satana nikani mento. Jesús ñaka ja ngwani di nekä Diablu käne ye erere mäkwe ñaka ja ngwan di nekä arato (Mat. 4:1-11). Satana aune nitre gobrainta kwe ye käkwe ja di ngwain jankunu ne kwe nikwe ja töi mikadre nitre nemen kämekäme jabe yebätä, akwa nikwe ñaka ja ngwandre di nekä. Ni üai butiere tuata ye ni raba denkä ja töite. Jehová diebiti ni raba kukwe käme ni rüe kwrere ye ganainne.

Nikwe oradre jankunu Jehovai aune ni dimikadre kwe ye nikwe ribedre ie. Pablokwe niebare: “Munkwe blita Ngöböbe jakrä amne, kukwe jökrä mike gare ie [...]. Munkwe nuendre kore angwane, Ngöbökwe kä jäme jakwe mikadi mun motobtä. Kä jäme Ngöbökwe abko ñan rükadre gare jire ni kä nebtäye. Kä jäme biandi Ngöbökwe munye, ye käkwe mun moto amne mun töi ngibiadibti kuin Kristo Jesu köböire” (Filip. 4:6, 7). Jehovakwe ni töi mikai jäme ja tuakäre kukwe käme tä nüke ni töite yebe. Ni rökrai Ngöbö ken ngwane, rökrai ni ken arato (Sant. 4:8).

Ja kriemikakäre kukwe tare yebätä ni Gobranka kri kä jökräbiti ye ken ni tädre. Jesukwe kukwe ne niebare: “Satana tä nitre nünanka Ngöbö rüere dänkiene abko kitera ti rüere. Satana abko tä ñakare jire chi ti dänkiene” (Juan 14:30). ¿Ñobätä kukwe ye nämäne gare metre ie? Bati niebare kwe: “Ni ti juanka ye abko tä tibe amne ti Rün tä ti mikete ñakare kaibe, ñobtä ñan angwane dre tuen kuin ie abko erere tita nuene” (Juan 8:29). Dre tuin kwin Jehovai ye erere nikwe nuaindi ngwane, niara ñaka ni tuainmetre kaibe. Ni üai butiere mikata tuare ye nikwe ñaka mikadre ñärärä ye köböire Satana ñaka ni töi kwitai jire.