SANG manugtabok na sa Suba Jordan ang mga Israelinhon sang una para kadtuan ang duta nga ginpromisa sang Dios sa ila, may pila ka bisita nga nagkadto sa ila. Nag-abot ang mga babayi halin sa iban nga pungsod kag gin-agda nila ang Israelinhon nga mga lalaki para sa isa ka sinalusalo. Talagsa lang ini nga kahigayunan. Makagalanyat gid ang paghunahuna nga makakilala sila sang bag-o nga mga abyan, magasinaot, kag magapaayaw sa manamit nga mga pagkaon. Bisan pa nga ang mga kustombre kag paggawi sini nga mga babayi nagalapas sa Kasuguan sang Dios nga ginhatag sa Israel, mahimo nga naghunahuna ang pila ka Israelinhon nga lalaki: ‘Indi nila kami maimpluwensiahan. Magahalong kami.’

 Ano ang natabo? Ang Biblia nagasugid sa aton: “Nagpakighilawas ang katawhan sa mga anak nga babayi sang Moab.” Ang matuod, tuyo sini nga mga babayi nga magsimba man ang Israelinhon nga mga lalaki sa butig nga mga dios. Kag amo gid sini ang natabo! Gani, “naakig gid si Jehova sa Israel.”—Num. 25:1-3.

Duha ka sugo sa Kasuguan sang Dios ang ginlapas sang mga Israelinhon. Nagsimba sila sa mga diosdios, kag nakahimo sila sang seksuwal nga imoralidad. Linibo ang napatay bangod sang ila paglapas. (Ex. 20:4, 5, 14; Deut. 13:6-9) Masubo gid ini nga hitabo. Pero mas masubo pa gid kay manugtabok na kuntani sila sa Jordan. Kon wala ginlapas sining linibo ka Israelinhon ang Kasuguan sang Dios, nakaistar kuntani sila sa Ginsaad nga Duta.—Num. 25:5, 9.

Parte sa sini nga hitabo, si apostol Pablo nagsulat: “Ining mga butang nga natabo sa ila nangin halimbawa, kag ginsulat ini subong paandam sa aton nga nagakabuhi sa katapusan sang sistema sang mga butang.” (1 Cor. 10:7-11) Sigurado gid nga nalipay si Satanas nga nakahimo sang serioso nga sala ang pila ka Israelinhon kag wala sila nakaistar sa Ginsaad nga Duta. Dapat ini mangin paandam sa aton! Kabalo kita nga malipay gid si Satanas kon indi man kita makaistar sa bag-ong kalibutan sang Dios!

Gusto ni Satanas nga siuron ang mga Cristiano, kag ginagamit niya ang mga pamaagi nga nangin epektibo sa pagsiod sa madamo nga tawo. Natun-an naton nga gingamit niya sa mga Israelinhon ang imoral nga pagpakig-sex. Subong, ang imoralidad isa gihapon ka makatalagam nga siod. Ang isa ka epektibo nga paagi nga ginagamit niya para masiod kita sa sini amo ang pornograpiya.

Subong, mahimo na makalantaw sang pornograpiya ang bisan sin-o nga indi mabal-an sang iban. Sang una, kon gusto sang isa maglantaw sang pornograpiya, kinahanglan pa niya magkadto sa sinehan nga nagapagua sini ukon sa mga balaklan sang mga balasahon parte sa sini. Madamo nga tawo ang wala nagakadto sa sini nga mga lugar kay nahuya sila nga makita sang iban. Pero subong, malantaw na ang pornograpiya sa ulubrahan ukon bisan sa salakyan basta may Internet lang. Sa madamo nga pungsod, makalantaw na sang pornograpiya ang bisan sin-o sa ila mismo balay.

Mas naghapos pa gid ang paglantaw sang pornograpiya bangod sang mga gadyet. Paagi sa sini, makalantaw ang mga tawo sang imoral nga mga piktyur bisan nagalakat sila sa dalan ukon nagasakay sa salakyan.

Bangod nangin mahapos ang paglantaw sang pornograpiya nga indi mabal-an sang iban, mas madamo ang nahalitan sini subong. Madamo sa mga nagalantaw sang pornograpiya ang naguba ang pag-asawahay, nagnubo ang ila panan-aw sa ila kaugalingon, kag nahalitan ang ila konsiensia. Mas malain pa gid kay posible nga maguba ang ila pagpakig-abyan sa Dios. Gani grabe gid ang halit sa mga nagalantaw sang pornograpiya. Mabudlay madula ang malain nga epekto sini kag nagapabilin ini sa malawig nga tion. Kon kaisa, indi na gid madula ang malain nga epekto sini.

Pero, dapat naton mabal-an nga nagaaman si Jehova sing pangamlig para indi kita masiod ni Satanas. Para maamligan kita ni Jehova, dapat naton himuon ang wala mahimo sang Israelinhon nga mga lalaki sang una. Dapat “tumanon gid” naton si Jehova. (Ex. 19:5) Dapat mangin maathag sa aton nga ginadumtan gid sang Dios ang pornograpiya. Ngaa?

Pamalandungi ini: Lain gid ang mga kasuguan sang Dios sa pungsod sang Israel kon ikumparar sa mga kasuguan sang iban nga mga pungsod. Daw pareho ini sa pader nga nagaamlig sa Israel para indi sila maimpluwensiahan sang malain nga mga ginahimo sang iban nga mga pungsod sa palibot nila. (Deut. 4:6-8) Maathag nga makita sa sini nga mga kasuguan nga ginadumtan ni Jehova ang seksuwal nga imoralidad.

Pagkatapos ginsambit ni Jehova ang imoral nga mga buhat nga ginahimo sang mga pungsod sa palibot sang Israel, ginsilingan niya ang mga Israelinhon: “Indi ninyo paghimuon ang ginahimo  nila sa duta sang Canaan diin dalhon ko kamo. . . . Ang ila duta nangin indi matinlo, kag silutan ko ang mga pumuluyo sang duta bangod sang ila sala.” Para sa balaan nga Dios sang Israel, imoral katama ang pagkabuhi sang mga Canaanhon amo nga mahigko ang panan-aw niya sa ila duta.—Lev. 18:3, 25.

Bisan pa ginsilutan ni Jehova ang mga Canaanhon, nagpadayon sa paghimo sang seksuwal nga imoralidad ang iban nga tawo. Pagligad sang sobra 1,500 ka tuig, nagsiling si Pablo nga ‘wala na sing igbalatyag sa maayo kag malain’ ang mga pumuluyo sang mga pungsod nga ginaistaran sang mga Cristiano. Ang matuod, “nagpatuyang sila sa matampalason nga paggawi sa paghimo sang tanan nga kahigkuan nga may kakagod.” (Efe. 4:17-19) Subong, madamo man nga tawo ang imoral katama kag ginapabugal pa nila ini. Gani dapat manikasog gid ang matuod nga mga sumilimba nga indi paglantawon ang imoral nga mga ginahimo sini nga kalibutan.

Ang pornograpiya nagapakahuya gid sa Dios. Gintuga niya ang mga tawo suno sa iya larawan kag kaangay niya. Ginhatagan niya kita sang ikasarang nga mahantop ang husto ukon sala. Maalam gid ang Dios kay naghatag sia sang mga kasuguan parte sa pagpakig-sex. Gusto niya nga makahatag ini sang kalipay sa mga mag-asawa. (Gen. 1:26-28; Hulu. 5:18, 19) Pero ano ang masiling naton sa mga tawo nga nagahimo sang pornograpiya kag nagapalig-on sa iban nga lantawon ini? Hungod nila nga ginabalewala ang mga talaksan sang Dios sa moral. Huo, ginapakahuy-an nila si Jehova. Hukman gid sila sang Dios.—Roma 1:24-27.

Pero kamusta naman ang mga tawo nga hungod nga nagabasa ukon nagalantaw sang pornograpiya? Ang pila nagasiling nga indi ini makahalalit nga kalingawan. Pero ang matuod, ginasakdag nila ang mga nagabalewala sang mga talaksan ni Jehova. Mahimo nga indi man amo sini ang ila intension sang nagsugod sila sa paglantaw sang pornograpiya. Pero, maathag nga ginapakita sang Biblia nga dapat dumtan gid sang mga sumilimba sang matuod nga Dios ang pornograpiya. Amo ini ang laygay sang Biblia: “O kamo nga nagahigugma kay Jehova, dumti ang malaut.”—Sal. 97:10.

Bisan ang mga nagalikaw sa paglantaw sang pornograpiya mahimo mabudlayan man sa paghimo sini. Indi kita perpekto, kag dapat naton pakigbatuan ang imoral nga mga handum. Mahimo  man kita papatihon sang aton madaya nga tagipusuon nga indi sala ang paglantaw sang pornograpiya. (Jer. 17:9) Pero madamo ang madinalag-on nga nagsikway sang pornograpiya, kag matuod na sila nga Cristiano subong. Makapalig-on gid ini kon nabudlayan ka sa pagsikway sang pornograpiya. Talupangda kon paano ka mabuligan sang Pulong sang Dios para indi ka masiod ni Satanas paagi sa pornograpiya.

Natun-an naton nga ginpabay-an sang madamo nga Israelinhon nga magtubo ang ila sala nga mga handum gani nahalitan sila. Mahimo man ini matabo subong. Ang utod ni Jesus nga si Santiago nagpaandam: “Ang kada isa [ginaganyat] kag ginahaylo sang iya kaugalingon nga kailigbon. Dayon ang kailigbon, kon nakapanamkon na, nagabun-ag sang sala.” (Sant. 1:14, 15) Kon pabay-an sang isa ka tawo nga magtubo ang indi maayo nga handum sa iya tagipusuon, posible gid nga makahimo sia sang sala. Gani dapat naton isikway ang imoral nga mga panghunahuna, kag untatan naton ang pagpamensar sini.

Kon makahunahuna ka sang imoral nga mga handum, dapat may himuon ka gilayon. Nagsiling si Jesus: “Gani, kon ang imo kamot ukon tiil nagapasandad sa imo, utda ini kag ihaboy. . . . Kag kon ang imo mata nagapasandad sa imo, lukata ini kag ihaboy.” (Mat. 18:8, 9) Indi buot silingon ni Jesus nga halitan naton ang aton lawas. Naggamit sia sang ilustrasyon para mahangpan naton nga dapat determinado kita nga kuhaon gilayon ang nagapasandad sa aton. Paano naton ini mahimo para masikway naton ang pornograpiya?

Kon makakita ka sang pornograpiya, indi maghunahuna nga indi ka sini maimpluwensiahan. Magliso gilayon. Patya gilayon ang TV. Patya gilayon ang kompyuter ukon ang gadyet. Magpokus sa maayo nga mga butang. Kon himuon mo ini, makontrol mo ang imo panghunahuna imbes nga ikaw ang kontrolon sang malain nga mga handum.

Ano abi kon nag-untat ka na sa paglantaw sang pornograpiya, pero may mga tion nga madumduman mo ang imo mga nalantaw? Ang pornograpiko nga mga piktyur ukon eksena  mahimo magpabilin sa hunahuna sang tawo sa malawig nga tion. Mahimo ini madumduman bisan ano oras. Kon matabo ini, mahimo masulay ka nga maghimo sang mahigko nga buhat, pareho sang masturbasyon. Gani tandai nga may mga tion nga gulpi mo lang madumduman ang imoral nga mga piktyur ukon eksena, kag mangin handa nga isikway ini.

Mangin determinado nga ipahisuno sa kabubut-on sang Dios ang imo mga ginahunahuna kag ginahimo. Iluga si apostol Pablo, nga handa sa ‘pagsakit sang iya lawas kag paghimo sini nga ulipon.’ (1 Cor. 9:27) Indi magpakontrol sa imoral nga mga handum. “Bag-uha [ang imo] panghunahuna, agod mapamatud-an [mo sa imo] kaugalingon kon ano ang maayo kag kalahamut-an kag himpit nga kabubut-on sang Dios.” (Roma 12:2) Tandai ini: Indi ka mangin malipayon kon himuon mo ang imoral nga mga buhat, pero mangin malipayon ka kon himuon mo ang ginapatuman sang Dios.

Magsaulo sang pila ka teksto sa Biblia. Dayon kon makahunahuna ka sang imoral nga mga handum, puersaha ang imo kaugalingon nga hunahunaon ini nga mga teksto. Ang mga teksto pareho sang Salmo 119:37; Isaias 52:11; Mateo 5:28; Efeso 5:3; Colosas 3:5; kag 1 Tesalonica 4:4-8 makabulig sa imo nga mailog ang pagtamod ni Jehova sa pornograpiya kag mahangpan ang gusto niya nga himuon mo.

Pero ano abi kon may mga tion nga pamatyag mo daw indi mo masarangan nga sikwayon ang handum nga maglantaw ukon maghunahuna sang imoral nga mga butang? Iluga sing maayo ang aton huwaran nga si Jesus. (1 Ped. 2:21) Pagkatapos mabawtismuhan si Jesus, sulitsulit sia nga ginsulay ni Satanas. Ano ang ginhimo ni Jesus? Sulitsulit man niya ini nga ginsikway. Naggamit sia sang madamo nga teksto para sikwayon ang pagsulay ni Satanas. Nagsiling sia: “Palayo ka, Satanas!” kag ginbayaan sia ni Satanas. Iluga si Jesus nga wala gid nag-untat sa pagsikway sa pagsulay sang Yawa. (Mat. 4:1-11) Tinguhaan gid ni Satanas kag sang iya kalibutan nga maimpluwensiahan ka nga maghunahuna sang imoral nga mga butang, gani indi ka dapat mag-untat sa pagsikway sini. Madinalag-on mo nga masikway ang pornograpiya. Paagi sa bulig ni Jehova, madaug mo ang imo kaaway.

Pirme mangamuyo kay Jehova kag pangabaya sia nga buligan ka. Nagsiling si Pablo: “Ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.” (Fil. 4:6, 7) Ang paghidait sang Dios makabulig sa imo nga masikway ang handum nga maghimo sang malain. Kon magpalapit ka kay Jehova, “magapalapit sia sa [imo].”—Sant. 4:8.

Kon malapit kita ukon suod sa Soberano sang uniberso, amo ini ang pinakamaayo nga pangamlig sa mga siod sang Yawa. Nagsiling si Jesus: “Nagapakari ang manuggahom sang kalibutan [si Satanas], kag wala sia sing kontrol sa akon.” (Juan 14:30) Ngaa nasiling ini ni Jesus? Kay man, antes pa sini, nagsiling sia: “Ang Isa nga nagpadala sa akon kaupod ko; wala niya ako ginapabay-an, bangod pirme ko ginahimo ang kalahamut-an sa iya.” (Juan 8:29) Gani kon himuon mo ang mga butang nga nagapahamuot kay Jehova, indi ka man niya pagpabay-an. Sikwaya ang pornograpiya para indi ka masiod ni Satanas.