OVAISRAEL ovakuru tjaave rirongere okukonda Onḓonḓu Jordan okuhita mehi Mukuru nde ve kwizikira pe ya ovandu mbe yokuryanga. Ovayenda mba va ri ovakazendu mbe ha ri Ovaisrael nu va ṋanga ovarumendu kotjitjitwa. Otjitjitwa hi mape ya aa tji munika tjimuna otjiṋa otjiwa tja peke. Okutjita omapanga, okupunda, nokurya ovikura oviwa tjiri oviṋa ovinanambango. Nandarire kutja otuzo nozongaro zomeritjindiro wovakazendu mbo kaaye hitasana nomahongero Ovaisrael ngu ve rihonga mOmatwako wa Mukuru, ovarumendu tjiva wOvaisrael mape ya aave munu kutja, ‘Eṱe kamaatu ṱunwa i yongaro yawo ndjo. Matu ritjevere.’

 Nu pakayenda ye? Ombeibela i tja: “Ovarumendu va vakirasana novakazendu Ovamoab.” Nungwari, ovakazendu mbo aave vanga kutja Ovaisrael ve rikotamene koomukuru wawo woposyo. Nu owo va tjita nao! Otjingaperi kutja, “Muhona wa ṱomazenge tjinene na wo.”​—Num. 25:1-3.

Ovaisrael mbo va teya Omatwako wa Mukuru momiano 2. Owo ve rikotamena koomukuru wovisenginina, nu va tjita otuvakiro. Omayovi wovandu va ṱa mena rokuhinonḓuviro. (Eks. 20:4, 5, 14; Deut. 13:6-9) Ongwaye otjitjitwa ho tji tja ri otjihihamise? Andakuzu ovarumendu mbo kave teyere Omatwako wa Mukuru, omayovi wOvaisrael atja ve konda onḓonḓu ya Jordan okuhita mEhi Ekwizikwa mokaruveze okasupi.​—Num. 25:5, 9.

Ohunga novitjitwa mbyo, omuapostele Paulus wa tja: “Noviṋa avihe mbi vya tjitirwe ku wo otja otjihorera ku eṱe, nu vya tjangerwa okuturonga, eṱe tjinga atu ri komaandero wouye.” (1 Kor. 10:7-11) Ouatjiri kutja Satan wa ri nondjoroka indu Ovaisrael tji va tjita ouvi ounene mbwi nu mena ranao owo kave hitire mEhi Ekwizikwa. Matu sokurihongera kozondataiziro zawo mena rokutja matu tjiwa kutja Satan u vanga okututjaera kutja atu ha hiti mouye oupe wa Mukuru!

Satan u vanga okupata Ovakriste ndino nu eye u ungurisa ovineya mbya ungurisa rukuru nu mbya ungura kovandu ovengi. Otja tji twe rihongo, Satan wa ungurisa oruvakiro ku nOvaisrael. Kundino oruvakiro ru kayenda komurungu otjombate onaumba. Satan u ungurisa oviperendero vyakamuzu otjombate imwe onamasa.

Ndino, omundu ma yenene okutarera oviperendero vyakamuzu nu ape ha kara omundu ngu me mu munu oparukaze. Oruveze orukuru ovandu tji mave vanga okutarera oviperendero vyakamuzu owo aave sokuyenda koruveze rwomawongarero wovandu okukatarera ozomuvi nḓe he ri ozombwa poo aave sokuyenda kozostora okukaranda omambo nge noviperendero vyakamuzu. Ovandu ovengi kaave i kotuveze two mena rokutja owo aave ṱohoṋi okumunikwa i varwe. Posi yokutja nai ovandu ve yenena okutarera oviperendero vyakamuzu motungovi indu tji ve ri poviungura poo mohauto ndja kurama. Nu momahi omengi, ovarumendu novakazendu ve yenena okutarera oviperendero vyakamuzu ngunda ave ri ku wo oveni.

Oungoze ouyendjezewa u tjita kutja irire oupupu okutarera ovipererendero vyakamuzu. Ovandu ve yenena okutjita nao indu tji mave kayenda momivanda poo tji va rondo mozombesi poo mozomahina.

Mena ranao ya rira oupupu okutarera oviperendero vyakamuzu, poo okuhoreka ondjito otja indjo, nu ondjito ndji i hihamisa ovandu ovengi ndino kombanda ya indu tja tji hihamisa ovandu rukuru. Ovandu ovengi mbe tarera oviperendero vyakamuzu va zunḓa otukupo twawo, nonḓengu yawo, nomeritjiviro wawo womomutima. Kombanda yaavihe owo ve twa mo oupanga wawo kuna Mukuru moumba. Tjiri ouatjiri kutja oviperendero vyakamuzu vi twa ovandu mbu mave tarere moumba. Mozongaro ozengi, oviperendero vyakamuzu vi ṱuna kovandu momuano omuvi tjinene. Nu tji tjita kutja ovandu ve ṱunwe i otjiṋa ho oure woruveze orure, nu povikando tjiva omundu ka yenene okuisapo omaumba nga.

Eṱe tu sokutjiwa kutja Jehova u tupa ondjeverero okuyepa ombate ya Satan. Kutja tu mune ondjeverero okuza ku Jehova, matu sokutjita imbi Ovaisrael mbi ve hina va tjita, okutja matu ‘sokupuratena tjiri’. (Eks. 19:5) Matu sokutjiwa kutja Mukuru wa tonda ovandu okutarera oviperendero vyakamuzu. Ongwaye tji matu tja nao?

Ripura ohunga nokutja omatwako Mukuru nga yandja kotjiwaṋa tjOvaisrael ya pangukire komatwako woviwaṋa vyarwe vyoruveze ndo. Omatwako Mukuru nga yandja kOvaisrael ya ri tjimuna omira ndjai ve tjevere koviwaṋa ongondoroka na wo. (Deut. 4:6-8) Omatwako ngo aaye raisa oukahu kutja Jehova wa tonda oruvakiro.

 Jehova wa hungira ohunga notuvakiro oviwaṋa ongondoroka nOvaisrael mbyaave tjiti, na tja: ‘Amu tjiti omihingo . . . vyovature vehi ra Kanaan Ami ku me mu twara. . . . Ehi ra rira ehakohoke; nu Ami me vere ouhasemba wawo moviṋa mbi.’ Otja ku Mukuru wOvaisrael omuyapuke, omuano Ovakanaan maave hupu ya ri otjiṋa otjiyaukise ku ye, kunao eye aa vara ehi ndo otja ehi ehakohoke nu nda zunḓaka.​—Lev. 18:3, 25.

Nandarire kutja Jehova wa vera Ovakanaan, ovandu varwe va kayenda komurungu okutjita oruvakiro. Kombunda yozombura zokombanda 1 500, Paulus wa hungira ohunga noviwaṋa mbya hupire ongondoroka nOvakriste kutja “owo kave tji nahoṋi nangarire kaṱiṱi.” Mouatjiri owo “ve riyandja oveni kouvi ngamwa auhe, nu ve tjita ouhakohoke nokuhinomeritjaerero.” (Ef. 4:17-19) Kundino wina ovandu ovengi ve tjita oruvakiro nu kave ṱohoṋi. Ovakarere vatjiri ve sokunakaura oparukaze okutarera oviṋa mbi notuvakiro mouye mbwi.

Oviperendero vyakamuzu vi raisa okuhinondengero ku Mukuru. Eye wa mema ovandu kombunikiro na kosaneno ye nu eye we tu ungura kutja tu yenene okupangura pokati kouwa nouvi. Mukuru wa raisa ounongo indu tje tupa omatwako ohunga nomahakaeneno womonyama. Eye aa vanga kutja omahakaeneno womonyama ye rire otjiṋa ovakupasane tji mave yorokere. (Gen. 1:26-28; Omiano 5:18, 19) Nu hapo ovandu mbe ungura nokuhandjaura oviperendero vyakamuzu ve tjita tjike? Owo kave puratene oparukaze komirari vya Mukuru. Owo kave raisa ondengero ku Jehova. Mukuru ma pangura imba mbe ha puratene komirari vye mokuungura nokuhandjaura oviṋa vyotuvakiro.​—Rom. 1:24-27.

Nu tjike novandu mbe lesa nokutarera oviperendero vyakamuzu owina? Ovandu tjiva ve muna kutja omanyando nga kamaaye ve etere oumba. Posi yokutja nokuhinokutjiwa owo ve yandja oruvara kovandu mbe ha puratene oparukaze komirari vya Jehova. Mape ya kutja indjo ka ndja ri ondando yawo indu tji va uta okutarera oviperendero vyakamuzu. Posi yokutja Ombeibela i raisa oukahu kutja ovakarere va Mukuru va tjiri ve sokutonda okutarera oviperendero vyakamuzu. Ombeibela i tja: “Eṋe mbu mwa suvera Muhona, tondeye ouvi!”​—Eps. 97:10.

 Nandarire imbo mbe ha vanga okutarera oviperendero vyakamuzu mape ya ai rire ouzeu ku wo okutjita nao. Kaweṱe ohomonena, nu mape ya tu hepa okukondja nomasa okupirukira ozonḓuma ozombi zomahakaeneno womonyama. Nu mape ya atu riraere oveni kutja kanavi okutarera oviperendero vyakamuzu. (Jer. 17:9) Posi yokutja ovengi mba rira Ovakriste va toṋa motjirwa hi. Okutjiwa otjiṋa hi matji yenene okukupa ongamburiro yokutja ove wina mo yenene okupirukira oviperendero vyakamuzu. Tara komuano Embo ra Mukuru mu ma ri yenene okukuvatera okupirukira ombate ya Satan yokutarera oviperendero vyakamuzu.

Otja tji pa tamunwa rukuru, Ovaisrael ovengi va yandjera ozonḓuma ozombi okukura mu wo, nga tji va tjita ouvi. Otjiṋa otjingewo matji yenene okutjitwa ndino. Omuangu wa Jesus Jakobus wa kahurura ohunga noumba mbu ya indu tji twa kongorere ozonḓuma ozombi, nu wa tja: “Omundu u . . . twarwa na hemenwa i ozonḓuma ze omuini zourunde. Nozonḓuma ze zourunde tji ze urisiwa ze kwata ouvi.” (Jak. 1:14, 15) Indu omundu tja yandjere ozonḓuma ze zourunde ze kurire ko, eye ma yenene okukatjita ouvi. Okutja eṱe matu sokuritjaera komeripura omavi aehe ngu tu na wo, nu atu ha kayenda komurungu okuripurira ko.

Tji wa munu kutja u kayenda komurungu okuripura ohunga noviṋa ovivi, toorera ko omukambo tjimanga. Jesus wa tja: “Eke nombaze yoye tji vya rire ombutarisiro kove, konda u vi imbirehi. . . . Neho roye tji ra rire ombutarisiro kove, homona u imbirehi.” (Mat. 18:8, 9) Jesus ka hee kutja tu sokuhihamisa otutu twetu. Eye aa ungurisa otjisasanekero hi okutuvatera okuzuva nawa ounahepero wokupaha kutja ongwaye tji matu ripura omeripura omavi, nu okuzambo tu tjite omarundurukiro ngu maye heperwa po. Omomuano uṋe mu matu yenene okuungurisa eronga ndo moviṋa tjimuna okutarera oviperendero vyakamuzu?

Indu tji we rihaka koviperendero vyakamuzu, o ripura kutja, ‘Kamaa vi ndji tjiti otjiṋa.’ Tara kokure tjimanga. Hakahana okuzemisa otivii. Zemisa okombiuta poo okayendjezewa ko ye tjimanga. Ripura noviṋa vyarwe ovikohoke. Tji wa tjiti nao ma ku ku vatere kutja o heripura ohunga nomeripura omavi.

Hapo tjike indu tji wa isa okutarera oviperendero vyakamuzu, posi yokutja oviperendero mbyo ngamba vi kotoka mourizemburuka woye? Oviperendero vyakamuzu poo omeripura ngo ye yenena okukara mourizemburuka womundu oure woruveze orure. Ovyo vi yenena okuya mourizemburuka oiri ngamwa aihe. Iho tji tja tjitwa, tji tjita kutja u kare nonḓero yokutjita otjiṋa otjihakohoke, tjimuna okurinyandisa oviṋepo vyourumendu novyoukazendu. Tjiwa kutja omeripura otja ingo mape ya aye kotoka, kunao rirongera okuyepirukira.

Kurisa onḓero yoye yokuvanga okuripura nokutjita oviṋa Mukuru mbye vanga. Kara tjimuna omuapostele Paulus, ngwa ri nonḓero ‘yokutona orutu rwe ru tindire, nu me ri ete kehi youkarere.’ (1 Kor. 9:27) O yandjere ozonḓuma ozombi kutja ze ku havere. “Ndjambi nge mu yarure koupe mourekoto womitima vyeṋu. Indino otji mamu yenene okukara nondjiviro mombango ya Ndjambi, okutja mu tjiwe kutja ihi tji tji ri otjiwa nEye me nonyuṋe, nu tji tja pwira Ye, otjikeṋa.” (Rom. 12:2) Zemburuka kutja ondjoroka yatjiri i za mokuripura nokutjita imbi Mukuru mbye vanga, nungwari kai zu mokutjita oviṋa ovihakohoke.

Kondja okutjiwa omazeva tjiva wOmbeibela motjiuru. Indu omeripura omavi tji ye ya, kondja okutjita kutja u ripure ohunga nomatjangwa ngo. Omazeva tjimuna Epsalme 119:37; Jesaja 52:11; Mateus 5:28; Ovaefese 5:3; Ovakolose 3:5; no 1 Ovatesalonika 4:4-8 ma ye ku vatere kutja u kare noumune wa Jehova ohunga noviperendero vyakamuzu nomuano mbwe vanga kutja u ritjinde.

Hapo mo sokutjita vi indu tji mo munu kutja ko nokuyenena okuritjaera okutarera poo okuripura ohunga noviṋa ovihakohoke? Horera kotjihorera tja Jesus nawa. (1 Petr. 2:21) Jesus tja za nokupapitisiwa, Satan wa kayenda komurungu okumurora. Jesus wa tjita vi? Eye ee mu pirukire. Eye aa ungurisa omatjangwa pekepeke okupirukira omarorero wa Satan ngo. Eye wa tja: “Za po, Satan!” nu Satan wa za po pu ye. Tjimuna Jesus tje hina wa yumba ohama okupirukira Omudiaboli, eṱe wina tu sokutjita nao. (Mat. 4:1-11) Satan nouye we mau kayenda komurungu okukondja okutjita kutja tu ripure ohunga noviṋa ovihakohoke, posi yokutja katu sokuyumba ohama motjirwa hi. Ove mo yenene okupirukira okutarera oviperendero vyakamuzu. Nombatero ya Jehova ove mo yenene okurwisa omunavita na ove.

Kayende komurungu okukumba ku Jehova nu mu ningira kutja me ku vatere. Paulus wa tja: “Ningireye ku Ndjambi imbi mbi mwa hepa, aruhe amamu tja okuhepa ku Ye. Nohange ya Ndjambi ndja kapita ozondunge azehe zovandu mai ṱakamisa omitima vyeṋu nouripura weṋu mu Kristus Jesus.” (Fil. 4:6, 7) Mukuru me ku pe ohange momuinyo okukuvatera kutja oha tjiti oviṋa ovivi. Tji wa tumbuka popezu na Jehova, ‘eye ma tumbuka kove.’—Jak. 4:8.

Eṱe matu munu ondjeverero kombate ya Satan indu tji twa kara noupanga oupame ku nOmuhonapare wevaverwa. Jesus wa tja: “Omuhonapare wouye mbwi tjinga ame ya. Eye ke nomasa kombanda yandje.” (Joh. 14:30) Omena ra tjike Jesus tja ri nongamburiro otja indjo? Eye wa kahurura na tja: “Ingwi ngwe Ndji hinda u ri puna Ami; Eye keye Ndji esa erike, tjinga aruhe ambi tjita imbi mbi tjata ku Ye.” (Joh. 8:29) Indu tji mo tjiti imbi mbi tjata ku Jehova, ove wina mo kara nongamburiro kutja eye ke nokukwesa ko. Kondja okukara kokure nombate ya Satan yokuvanga kutja ove u tarere oviperendero vyakamuzu, kunao eye kamaa yenene okukutwa mongwehe ye.