LEBUH orang Israel menya besedia deka meraka Sungai Jordan ngagai menua ke disemaya Petara, bisi temuai datai. Sida tu bala indu ke ukai bansa Israel. Sida mai lelaki orang Israel makai begulai. Tu peluang ti jarang diulih sida. Ngiga bakih ti baru, betanda, sereta makai utai ti nyamai tentu ngagaka ati. Taja pan adat enggau standard moral bala indu nya enda sebaka enggau iya ke diberi Jehovah, sekeda lelaki bansa Israel engka berunding: ‘Enda ngachau tu. Nemu kami utai ti betul enggau salah.’

 Nama nyadi? Bup Kudus madahka: “Sida ke lelaki belabuh beleman enggau indu bansa Moap ti diau dia.” Ke amat nya, sida indu ke ukai bansa Israel nya dekaka lelaki bansa Israel nyembah petara pelesu. Nya meh utai ke nyadi! Ketegal nya, ‘Jehovah ringat ngagai sida.’—P-pau. 25:1-3.

Orang Israel nya ngelanggar dua iti Adat Petara: Sida meremi nyembah engkeramba, lalu ngereja ulah seks ti kamah. Beribu iku sida mati ketegal enda ngasika Adat Petara. (P-sut. 20:4, 5, 14; U-dat. 13:6-9) Nama ngasuh penanggul tu balat tusah agi? Nya bekaul enggau maya ti salah. Enti sida enda ngelanggar Adat Petara, orang Israel tentu udah meraka Sungai Jordan ngagai Menua ti Udah Disemaya.—P-pau. 25:5, 9.

Bekaul enggau pekara nya, rasul Paul nulis: “Semua utai tu nyadi ba sida ngambika nyadika chunto ke kitai, lalu utai nya dituliska kena ngajar kitai, laban pengujung dunya udah datai ba kitai.” (1 Kor. 10:7-11) Sitan tentu gaga ati laban sekeda orang Israel nyau ngereja dosa ti besai ke ngujungka sida enda ulih tama ngagai Menua ti Udah Disemaya. Kitai patut belajar ari penyalah sida laban kitai nemu Sitan tentu gaga ati enti iya ulih nagang kitai ari tama ngagai dunya ti disemaya Petara!

Sitan manjuk orang Kristian ngena chara ke udah mujur dikena iya sebedau tu. Baka ke baru udah dipelajarka kitai tadi, iya ngena ulah seks ti kamah. Kemayaharitu, ulah seks ti kamah agi nyadi panjuk ti tau ngujungka penusah. Siti chara ti pemadu suah ngujungka pengawa tu iya nya, ngena pornografi.

Kemayaharitu, orang ulih belalai meda pornografi. Bepuluh taun suba, orang ke deka meda pornografi patut ngagai panggung wayang meda cherita baka tu. Tauka sida ngagai kedai ke bisi nyual utai ti bekaul enggau pornografi. Mayuh orang engka enggai ngagai endur ke baka tu laban malu. Tang kemayaharitu, orang ulih meda pornografi nengah internet ba dini-dini endur sekalika ba endur gawa tauka dalam kerita. Ba mayuh menua, orang ke lelaki tauka indu ulih meda pornografi ba rumah diri empu.

Ukai nya aja. Perengka elektronik ngasuh orang senang meda pornografi. Lebuh bejalai, nepan bas tauka kerita api, sida ulih meda pornografi ba skrin perengka nya.

Ketegal orang senang meda pornografi lalu ulih belalai lebuh ngereja nya, pornografi ulih ngemediska mayuh agi orang ari ke udah. Mayuh orang ke meda pornografi ngerusak tikah sida, basa ngagai diri empu sereta pengasai ati. Ke balat agi, sida ngerusak kaul diri enggau Petara. Nya alai, pornografi endang ulih ngemediska orang ke meda iya. Kesuah agi, pornografi ngujungka orang balat tusah ati. Penusah ba ati engka ulih belubah-lubah diputarka, tang empas ke datai ari meda pornografi endang tusah deka lenyau.

Tang kitai patut nemu, Jehovah nyediaka tulung kena ngelindung kitai ari panjuk Sitan tu. Enti kitai deka Jehovah nyaga kitai, kitai enda tau enda ngasika Iya, ukai baka orang Israel ke enda ngasi. (P-sut. 19:5) Kitai enda tau enda nemu tu: Jehovah begedika pornografi. Baka ni kitai nemu?

Pikirka tu: Adat ke diberi Petara ngagai bansa Israel enda sebaka enggau adat bansa bukai ke diau ngelingi sida. Adat Petara nya baka dinding ke ngelindung sida ari orang bansa bukai ke ngelingi sida sereta ulah ti kamah ke suah digaga bansa nya. (U-dat. 4:6-8) Adat nya terang nunjukka, Jehovah begedika ulah seks ti kamah.

Jehovah nangkan orang Israel pasal ulah ti kamah ke digaga bansa bukai. Ku Iya madah: ‘Anang ngereja . . . utai ti dikereja orang di menua Kanaan, ti alai Aku deka mai kita diatu. . . . Menua nya enda tuchi. Nya kebuah Aku deka  ngukum menua nya lalu ngasuh menua nya nulak orang ke diau dia.’ Ba Petara Jehovah ti tuchi, chara idup orang Kanaan balat jai sereta enda bemoral. Iya ngumbai menua nya kamah.—Lew. 18:3,25.

Taja pan Jehovah ngukum orang Kanaan, bansa bukai majak ngereja ulah seks ti kamah. Lebih ari 1,500 taun udah nya, Paul bisi nyebut pasal orang maya jeman iya. Sida “nyau enda nemu malu agi.” Sida indah “nyerahka diri ngagai pengidup ti kamah, sereta seruran ingin deka ngereja semua macham ulah ti kamah.” (Eps. 4:17-19) Pia mega, kemayaharitu mayuh orang enda agi malu enggau pengidup ti kamah tu. Kitai ke orang Kristian, enda tau enda nyeliahka diri ari meda pengawa ti kamah ke dikereja orang ba dunya tu.

Pornografi enda ngayanka basa ngagai Petara Jehovah. Iya nempa mensia neladan gamal Iya sereta ngembuan pemanah baka Iya, lalu meri kitai penau ulih nemu ni bagi utai ti betul tauka salah. Iya endang bepenemu lebuh Iya meri adat pasal pengawa beleman. Iya deka pengawa nya utai ke ngelantangka ati orang ke udah jadi melaki-bini. (P-kal. 1:26-28; J-lam. 5:18, 19) Tang baka ni enggau sida ke ngasilka tauka ngemansangka pornografi? Sida balat enda bedulika standard moral Jehovah. Amat, orang ke ngemansangka pornografi enda bebasaka Jehovah. Petara Jehovah deka ngukum orang ke enda bedulika standard Iya tauka ngemansangka utai ti bekaul enggau ulah ti kamah.—Rom. 1:24-27.

Tang baka ni enggau orang ke sengaja macha tauka meda pornografi? Sekeda engka ngasaika pengawa nya nadai ngachau. Taja pia, kebendar iya sida nyukung orang ke enda bebasaka standard Jehovah. Tu engka enda diperundingka sida lebuh terubah-rubah meda pornografi. Tang Bup Kudus enggau terang nunjukka, nembiak Petara patut begedika pornografi. Ku Bup Kudus madahka: “Begedika utai ti jai.”—Amo. 5:15.

Indah orang ke enggai meda pornografi pan tusah deka nyeliahka tu. Kitai enda sempurna lalu kitai engka patut ngelaban pengingin ti deka ngereja ulah seks ti kamah. Pia mega, ketegal kitai enda sempurna, kitai engka ngumbai meda pornografi enda salah. (Jer. 17:9) Tang mayuh  orang ke nyadi nembiak Jehovah udah mujur mutarka penanggul tu. Nemu tu ulih ngasuh nuan andalka diri ulih nyeliah ari pornografi. Peratika chara jaku Petara ba Bup Kudus ulih nulung nuan nyeliah ari panjuk pornografi ke dikena Sitan.

Baka ke udah dipelajar tadi, mayuh orang Israel ngelakka pengingin ti salah bisi ba sida lalu ngujungka sida ngereja utai ti tau ngenusahka diri. Utai ti sama mega ulih nyadi kemayaharitu. Menyadi tiri Jesus ke benama James madahka: “Kitai diuji pengingin kitai empu, ti ngumpan lalu manjuk kitai; udah nya, lebuh pengingin nya udah ngandung, iya ngadaka dosa.” (Jas. 1:14, 15) Enti orang ngelakka pengingin ti kamah majak bisi ba sida, nyau kelama orang nya deka ngereja dosa. Nya alai, kitai patut enggau naka ulih muai runding ti kamah, lalu badu agi berundingka utai nya.

Enti nuan agi berunding pasal ulah ti kamah, seliahka nya enggau jampat. Jesus madahka: “Enti jari tauka kaki nuan mai nuan bedosa, tetak lalu buai iya! . . . Lalu enti mata nuan mai nuan bedosa, keruk lalu buai iya!” (Mat. 18:8, 9) Jesus ukai ngasuh kitai ngerusak tauka ngemediska tubuh diri. Iya ngena sempama tu nulung kitai meretika kebuah kitai mikirka utai ti salah lalu udah nya ngaga ubah. Baka ni kitai ulih ngena jaku lalau tu bekaul enggau pornografi?

Enti nuan tepedaka pornografi, anang ngumbai, ‘Nadai ngachau tu.’ Tekala nya malik ke bukai. Tutup TV enggau lengkas. Padam komputer tauka perengka elektronik ke dikena nuan enggau jampat. Betatika utai ti tuchi. Tu ulih nulung nuan nyeliahka diri ari terus berundingka utai ti kamah.

Baka ni enti nuan udah mujur badu meda pornografi tang kadang-kadang agi ingatka utai ke kala dipeda nuan? Orang agi ingatka gambar pornografi indah udah lama bekau nya. Gambar pornografi ulih enggau ngenyit datai baru ba runding kitai. Enti tu nyadi, nuan engka ngasai  deka ngereja utai ti kamah baka ngeluchu. Nya alai, besedia meh ngelaban runding ke baka nya lebuh iya datai baru.

Tanka pengeran nuan ti deka berunding sereta ngereja utai ti sejalai enggau peneka Jehovah. Baka ku rasul Paul: “Aku mandam tubuh aku lalu ngaga iya nyadi ulun aku.” (1 Kor. 9:27) Anang ngelakka diri dipanjuk pengingin ti kamah. ‘Anang nitihka chara dunya, tang awakka Petara ngubah chara kita berunding, ngambika kita nemu peneka Iya—iya nya utai ti badas, ti ngerinduka ati Iya, ti pemadu menyana.’ (Rom. 12:2) Kingatka meh: Nuan enda lantang enti nuan ngereja ulah ti kamah. Tang nuan deka lantang agi enti nuan berunding sereta ngereja utai ti sejalai enggau peneka Jehovah.

Uji ingatka beberapa iti ayat Bup Kudus. Lebuh runding ti kamah datai, enggau naka ulih berundingka ayat Bup Kudus nya. Ayat Bup Kudus nya baka Masmur 119:37; Isaiah 52:11; Matthew 5:28; Epesus 5:3; Kolosi 3:5 enggau 1 Tesalonika 4:4-8. Semua ayat nya deka nulung nuan berunding baka Jehovah pasal pornografi lalu meretika utai ti dikearapka Iya ari nuan.

Nama patut digaga nuan enti nuan enda ulih nyeliah ari meda tauka berundingka utai ti kamah? Enggau naka ulih nitihka teladan Jesus. (1 Pet. 2:21) Pengudah Jesus dibaptisa, Sitan majak nguji iya. Nama digaga Jesus? Iya enda ngetu nulak penguji ari Sitan. Jesus ngena sekeda ayat Bup Kudus lebuh iya nulak penguji ari Sitan. Ku Jesus madahka: “Rari nuan Sitan!” lalu Sitan pan ninggalka iya. Baka Jesus ke majak ngelaban Sitan, nuan mega ulih ngereja utai ti sama. (Mat. 4:1-11) Sitan enggau dunya iya deka majak ngasuh nuan berundingka utai ti kamah, tang anang ngalahka diri. Nuan ulih mujur nyeliahka diri ari pornografi. Jehovah ulih nulung nuan ngalahka munsuh nuan.

Majak besampi ngagai Jehovah lalu minta Iya nulung nuan. Ku Paul madahka: ‘Bantaika semua peminta kita ngagai Petara ngena sampi; Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.’ (Plp. 4:6, 7) Pemaik Petara deka meri nuan pengelantang ba runding kena nulung nuan nyeliah ari ngereja utai ti salah. Enti nuan semak ngagai Jehovah, ‘Iya deka datai semak ngagai nuan.’—Jas. 4:8.

Enti kitai ngetanka kaul ti tegap enggau Petara Jehovah, kitai deka dilindung ari panjuk Sitan. Ku Jesus madahka: ‘Pemerintah dunya tu [Sitan] deka datai. Iya nadai kuasa atas aku.’ (Jhn. 14:30) Baka ni Jesus nemu tu? Iya kala nerangka: ‘Iya ke ngirumka aku bisi enggau aku. Iya nadai kala ninggalka aku kediri, laban aku seruran ngereja utai ti ngerinduka ati Iya.’ (Jhn. 8:29) Enti nuan nguji ngelantangka ati Jehovah enggau semua utai ke digaga nuan, nuan ulih andal Iya enda ninggalka nuan. Seliahka diri ari pornografi lalu Sitan enda ulih manjuk nuan.