DURANTE nga mapprepara i Israelita ira ta paddakida ta Bannag Jordan mappange ta davvun nga nipromesa na Dios nira, egga ira i zimittal nga bisita. Dayu nga babbay danatun anna imbitadda i lallaki na Israel ta fiesta. Makasta nakuan nga tiansa yatun tapenu mapeggan tu bagu nga kokkofun, makibayle, anna makipakkan. Maski nu neruma i kostumbre anna moral nga estandarte danatun nga babbay ta Dob na Dios ta Israel, baka ninono na karuan nga Israelita nga lallaki: ‘Kayang-kayami yaw. Magimmugug kami mabba.’

 Anni i nesimmu? Kagian nittam na rekord na Biblia: “I magili ay nakibbiko ta ána nga babbay na Moab.” Kakuruganna, kayà danatun nga babbay nga maddayaw ta falsu ira nga dios i lallaki na Israel. Yayya nga “fermi nga nakaporay si Jehova ta Israel” turi ta kingnguada yatun.​—Num. 25:1-3.

Egga i dua ta Dob na Dios nga ari nga sinuppal na Israelita ira: Nakkummag ira ta sasanto, anna nakangngua ira tu seksual nga imoralidad. Rinivu i natay megafu tatun. (Ex. 20:4, 5, 14; Deut. 13:6-9) Ngatta kuruga kaddaraddam yaw nga trahedia? Gafu ta nesimmu yatun turi ta araranni ngana ira ta Nepromesa nga Davvun. Nu sinuppal nakuan danatun nga lallaki i Dob na Dios, nakadaki nakuan i rinivu nga Israelita ta Bannag Jordan mappange tatun.​—Num. 25:5, 9.

Meyannung tatun nga nesimmu, nitura ni apostol Pablo: “Nesimmu nira ngamin danaw tu pamappalan ta karuan, anna netura gapa tu panuddu nittam nga mattolay toye nga tiempo nga aranni ngana nga manuppal.” (1 Cor. 10:7-11) Siguradu nga magayayya si Satanas megafu ta nakaliwa tu serioso kani Jehova i karuan nga Israelita anna megafu tatun, ariadda nakatallung ta Nepromesa nga Davvun. Talaga masirib para nittam nga ipafutu yatun nga abiso megafu ta ammu tam nga kakayà ni Satanas nga ariattam makatallung ta napabagu nga mundo na Dios!

Gafu ta puntiria ni Satanas i Cristiano ira, mangusa yayya tu taktika ira nga kabisaduna anna napakurugna nga efektibo ta aru nga tolay. Kagitta na kingngua ni Satanas ta Israelita ira, inusana i seksual nga imoralidad. Ta maddaggun, delikadu lagapa nga silu i imoralidad. Tadday ta efektibo nga panilu na imoralidad ay i pornograpia.

Sangawe, puede nga makagiraw i tadday nga tolay tu pornograpia nga awan tu makannammu tatun. Tagga, nu kayà na tolay nga makasingan tu pornograpia, mawagna i umay ta sine tapenu maggiraw onu umay gumatang ta pallakuan na pornograpiko ira nga material. Aru i ari umay tatun megafu ta mappasirang ira nga egga makasingan nira. Ngem sangawe, nu makakonekta ta Internet i tadday nga tolay, makagiraw ngana yayya tu pornograpia ta pattrabahuanna onu maski nu agga-parada laman i takena. Ta aru nga nasion, ari ngana mawag nga manaw ta balay i tadday nga lalaki onu babay tapenu makasingan tu pornograpia.

Ari laman tu yatun. Megafu ta cellphone anna tablet, mas mabi ngana laman i makasingan tu pornograpia. Angngariganna, ta dalan, bus, onu tren, posible ngana nga makagiraw ira tu imoral ta gadyetda.

Megafu ta mas alistu ngana i paningan tu pornograpia anna alistu gapa nga metagu yatun, mas dakal i perwisiu natun sangawe kumpara gari. Gafu ta paggiraw tu pornograpia, aru i nadaral i pagatawada, respeto ta baggida, anna i konsensiada. Pinakagrabe paga, pinappeligroda i pakikkofudda ta Dios. Makasiguradu ka nga daralan na pornograpia danuri maggiraw tatun. Ta aru nga situasion, marresulta yatun tu monag nga bigag ta emosion. Awayyana nga sisinu nga mammapia yatun nga bigag ngem mangibattang tu pilà.

Ngem ammu tam nga protektan ittam ni Jehova tatun nga sataniko nga silu. Tapenu maprotektan ittam ni Jehova, mawag tu kuattam i ari nga nakua na lallaki nga Israelita gari​—‘kuattam i ngamin nga kakkagianna.’ (Ex. 19:5) Mawag tu malippawa tam nga talaga ikala-kalussaw na Dios i pornograpia. Ngatta makagi tam yatun?

Nonopan yaw: I dorob na Dios ta nasion na Israel ay nerumu-ruma ta tanakuan nga nasion tatun nga tiempo. Kagitta na pader yatun nga masserbi tu proteksion na Israel ta kappasirang nga annangngua na totolay ta pallevuda. (Deut. 4:6-8) Pinannawag danatun nga dorob i  importante nga kinakurug: Ikala-kalussaw ni Jehova i seksual nga imoralidad.

Tinukoy ni Jehova i imoral ira nga kukukuan na nasion ira ta pallevu na Israel, tapus kunna: “Ariannu kuan i kukukuan na totolay ta Canaan, nu sitaw takamu nga iyangay. . . . Madaping i davvun anna kastiguakku danuri maddian taw gafu ta liwada.” Ta pagimamma na masanto nga Dios na Israel, fermi nga kannama-nama anna imoral i istilo na pattolay na Canaanita ira, yatutta para nisa, i davvudda ay maritta, anna peligroso.​—Lev. 18:3, 25.

Kinastigo ni Jehova i Canaanita ira, ngem tulu-tuloy lagapa nga nangngua tu imoralidad i tanakuan. Nappasa i maturu tu 1,500 dagun, nitura ni Pablo nga i nasion ira nga nattolayan na Cristiano ira ay “awan vuluvuga ngana tu appasiranad-da.” Kakuruganna, “egga ngamin nira i gannug na bisiu, anna ari ira nga mafugu-fugaddan nga mangngua ta ngamin nga marakay.” (Efe. 4:17-19) Kunnatun gapa ta kaggawattam. Sobra ngana i ka-imoral na totolay anna kadda ipasiran yatun. Kuan nakuan danuri na kurug nga maddayaw ta Dios i adde na mawayyada tapenu malillitan i paningan ta imoral nga annangngua naw nga mundo.

Talaga kawan tu respeto ta Dios i pornograpia. Pinaratuna ittam segun ta imahena anna niddanna ittam tu abilidad nga ammuan nu i tadday nga gannug ay fustu onu mali. Masirib i Dios ta niddanna ittam tu dorob ta seksual nga relasion. Ginakkagna nga i seksual nga relasion ay paggafuan na pagayayya na magatawa. (Gen. 1:26-28; Prov. 5:18, 19) Ngem anni i kukukuan danuri mamadday onu mangipagaram ta pornograpia? Ariadda vuluvuga importan i moral ira nga estandarte na Dios. Wan, danuri mangipagaram ta pornograpia ay awan tu respetoda kani Jehova. Sentensian noka na Dios danuri ari magimporta ta estandartena ira gafu ta pamadday onu pangipagaramda tu imoral ira nga material.—Roma 1:24-27.

Kunnasi gapa danuri sadya nga mabbibbig onu maggiraw tu pornograpia? Kurugan na karuan nga awan tu dake na paggiraw tu kunnatun tapenu maddibersion. Ngem kakuruganna, supu-suportadda danuri ari magimporta ta estandarte ira ni Jehova. Baka ari gapa tu yatun i intensiodda turi ta nigafuda i maggiraw tu pornograpia. Ngem manawag nga kagian na Biblia nga danuri kurug nga maddayaw ta Dios ay mawag nga kuruga  ikalussoda i pornograpia. Nitabarang na Biblia: “Ikalussaw nu i marakay, sikamu nga magiddu ta YAFU.”​—Sal. 97:10, ftn.

Maski danuri manakida nga maningan tu pornograpia ay marigatan lagapa nga ibita yatun. Imperfekto ittam anna posible nga laba-labanattam i maritta ira nga seksual nga pakkaraga. Baka irason paga na imperfekto nga futu tam nga ari tu mali i paningan ta pornograpia. (Jer. 17:9) Ngem aru ngana nga nabbalin tu Cristiano i nangaffu taw nga pakillaban. I pakannammu taw i mamakkomfiansa nikaw nga mawayyam gapa nga labanan i pornograpia. Innan nu kunnasi naka moffunan na Uvovug na Dios tapenu mebita i silu ni Satanas nga pornograpia.

Kagitta na nakagi ngana, aru nga Israelita i nangipamavulun nga mappeligro ira megafu ta mali nga pakkaraga. Mesimmu gapa yatun nittam. Nikagi na wagi ta yena ni Jesus nga si Santiago i peligro: “Matenta i tolay nu melogo anna pammagurayan na pakkaraga na ta marakay ira nga gannug. Nu yaw nga pakkaraga ay minatto ngana ta futu na, marresulta ta katagarulian.” (Sant. 1:14, 15) Oras tu minatto ngana i imoral nga pakkaraga ta futu na tolay, dakal i tiansa nga makangngua yayya tu liwa. Yatutta insigida nakuan nga alsattam ta nono tam i imoral ira nga gannug anna ariattam nga agga-nono yatun.

Nu matageno mu nga gittana ari mawawan i imoral nga gannug ta nono mu, insigida ka nga magguyu. Kinagi ni Jesus: “Nu i limam onu i takkim i kegafuan na pattagarulim, gappattam mu anna itabbo mu! . . . Ay nu i matam i kegafuan na pattagarulim, lakkuetam-mu anna itabbo mu.” (Mat. 18:8, 9) Ari kayà kagian ni Jesus nga literal nga kuattam yatun. Iyilustrana laman i pakawagan nga insigida anna determinadu nga alsan i kegafuan na pattagaruli. Kunnasi tam meyaplika yatun nga tabarang nu meyannung ta pornograpia?

Nu meparubakka ta pornograpia, kammu kagian, ‘Kayang-kayà yaw.’ Insigida nga mallipay ka ta tanakuan. Insigida nga addappammu i TV. Insigida nga patayammu i kompiuter onu i gadyet mu. Maffokus ta marenu nga gannug. Nu kuammu yatun, makontrol mu i appana-panono mu imbes nga makontrol naka na mali ira nga pakkaraga.

Kunnasi nu neyemmammu ngana i paggiraw tu pornograpia ngem manonono mu lagapa danuri nagirom? Posible nga mabayag nga ari malsa ta nono na tadday nga tolay i pornograpiko ira nga letratu onu appana-panono. Mesimmu yatun maski anni nga oras. Nu mesimmu yatun, baka matenta ka nga mangngua tu maritta nga gannug, gitta na masturbasion. Daddamman nga posible nga gavva laman nga luttuag yatun ira, yatutta preparadu ka nakuan nga labanan danatun.

Mas determinadu ka nakuan nga mannono anna magguyu segun ta kayà nikaw na Dios. Parigan si apostol Pablo nga sigga-paran nga ‘penamanna i baggina nga magattam anna gaggaddanna ta mapia i nonona.’ (1 Cor. 9:27) Ari ka nga mappakontrol ta mali ira nga pakkaraga. ‘Ipamavulummu tu ulian na Dios i affutu-futum gafu ta katalibagu na appana-panono mu. Ay kannammuammu i uray na Dios​—nu anni i mapia, i makapagayayya sa, anna i awan tu pakkuranganna.’ (Roma 12:2) Daddamman: I pannono anna pagguyu segun ta uray na Dios ay mas mamagayayya anne ta pamagustu ta imoral ira nga pakkaraga.

Makkabisadu tu teksto ira ta Biblia. Tapus nu makanono ka tu imoral, fuersammu nga nonopan danatun nga teksto. Uffunan naka na teksto ira gitta na Salmo 119:37; Isaias 52:11; Mateo 5:28; Efeso 5:3; Colosas 3:5; anna 1 Tesalonica 4:4-8 tapenu maparigan i pagimamma ni Jehova ta pornograpia anna tapenu malippawa mu nu anni i kayàna nga kuammu.

Anni i kuammu nu ariammu mafugaddan i pannono onu paningan ta imoral nga gannug? Memmugug nga parigan i Modelo tam, si Jesus. (1 Ped. 2:21) Kabalin na bawtismo ni Jesus, ari nagimmang si Satanas nga tentan yayya. Anni i kingngua ni Jesus? Kanna gapa nagimmang nga nakillaban. Aru nga teksto i inusa ni Jesus tapenu labanan i panenta ira ni Satanas. Kinagina: “Panawam-mà, Satanas!” tapus pinanawan yayya ni Satanas. Nu kunnasi nga ari nagimmang si Jesus nga labanan i Diablo, kunnatukka nakuan gapa. (Mat. 4:1-11) Ari magimmang si Satanas tuange ta mundona nga pannuan i nono mu tu imoral ira nga gannug, ngem ariammu mappaffu. Maffu mu i pornograpia. Ta uffun ni Jehova, maffu mu i kalabammu.

Ari magimmang nga makimallo kani Jehova anna mappoffun nisa. Kinagi ni Pablo: “Kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu ta ketadday nu kani Cristo Jesus.” (Fil. 4:6, 7) Iddan naka na Dios tu memammo nga nono tapenu malabanammu i pangngua tu liwa. Nu umaranni ka kani Jehova, ‘umaranni yaya nikaw.’​—Sant. 4:8.

I kapianan nga proteksion kontra ta maski anni nga silu ay i madukko nga relasion ta Soberano ta interu uniberso. Kinagi ni Jesus: “Duttal ngana i mammaguray [si Satanas] toye ta utun na davvun. Awan tu pakawayya na niakan.” (Juan 14:30) Ngatta siguradu si Jesus tatun? Mittan kinagina: “I naddog niakan ay egga niakan. Arian nà vuluvuga nga pagurayan, gafu ta kuak-ku nga kanayun i makapagayaya sa.” (Juan 8:29) Durante nga kuammu i ganna-gannug nga makapagayayya kani Jehova, makasiguradu ka nga ariannaka vuluvuga nga panawan. Lillitan i silu na pornograpia, tapenu ari naka masilu ni Satanas.