ISRAELITAS na ténpu antigu staba ta pripara pa trabesa Riu Jurdon, i bai pa kel téra ki Deus prometeba es. Un dia, israelitas resebe un vizita. Éra mudjeris ki ka éra israelitas ki ba konvida kes ómi pa un fésta. Kel-la ta parseba un kuza sábi i un oportunidadi ki ka ta daba pa perde. Ta parseba ma éra sábi pa es ranja otus amigu, pa es badja i pa es kume kumida sábi. Kes kustumu i manera di konporta di kes mudjer ka éra sima kel ki israelitas prende na Lei ki Deus daba es. Má simé, alguns di kes ómi israelita podia pensaba: ‘Nu ta pode lida ku kel situason. Nu ta ten kuidadu.’

 Kuzê ki kontise? Bíblia ta fla: ‘Povu kumesa ta faze konportamentu seksual mariadu ku kes fidju-fémia di Moabi’. Kes mudjer kreba pa kes ómi israelita adoraba kes deus falsu. I es faze si! É klaru ki ‘Jeová fika xatiadu ku Israel.’ — Núm. 25:1-3.

Kes israelita viola Lei di Deus di dôs manera: Es nbaxa na frenti di imaji i es faze konportamentu seksual mariadu. Milharis di israelita móre pamodi es ka obi ku lei di Deus. (Êxo. 20:4, 5, 14; Deut. 13:6-9) Pamodi ki kuzas ki es faze éra más tristi inda? Es staba kuazi ta entra na kel téra ki Deus prometeba es. Si kes ómi ka violaba Lei di Deus, milharis di israelita ta trabesaba Riu Jurdon pa bai pa kel téra ki Deus prometeba es. — Núm. 25:5, 9.

Apóstlu Polu skrebe sobri kuzas ki kontise ku es: ‘Kes kuza li kontise pa sirbi di izénplu i es skrebedu pa sirbi di avizu pa nos, pa kenha ki fin di es sistéma dja txiga.’ (1 Cor. 10:7-11) Di sertéza Satanás fika txeu kontenti pamodi alguns di kes israelita faze pekadus gravi, i asi es ka entra más na kel téra ki Deus prometeba es. É txeu inportanti nu leba asériu kuzê ki kontise ku es. Nu meste prende di ses éru pamodi nu sabe ma Satanás ta fika txeu kontenti si el konsigi inpidi-nu di entra na kel mundu novu di Deus.

Satanás krê prujudika kristons oji. Pa kel-li, el ta uza armadilhas ki el konxe dretu i ki dja da bons rezultadu ku un monti algen. Sima nu odja antis, Satanás uza konportamentu seksual mariadu pa disvia israelitas. Na nos ténpu, konportamentu mariadu ta kontinua ta ser un armadilha prigozu. Un di kes armadilha poderozu ki pode prujudika-nu é pornografia.

Oji, un algen pode odja pornografia sen ningen da kónta. Txeu anu atras, un algen ki krê odjaba pornografia, el tinha ki baba sinéma pa ba odja kes tipu di filmi la ô el tinha ki ba na un lója pa ba kunpra kes livru ô revistas di pornografia. Txeu algen talvês ka ta baba pa kes lugar la, pamodi es tinha vergónha pa otus algen ka odjaba es. Má gósi, através di internet un algen pode odja pornografia na se trabadju ô ti mésmu na se karu. I na txeu país, ómis ku mudjeris pode odja pornografia sen sai di kaza.

É ka sô kel-la. Através di telemóvel ô tablet é fásil pesoas odja pornografia. Un algen ta anda na rua, na otokaru ô na konboiu pode odja imaji sobri séksu na un telemóvel ô un tablet ki ta kebe déntu se mô.

Désdi ki bira más faxi odja pornografia i faze-l sen ningen da kónta, el sta ta prujudika mutu más algen di ki antis. Txeu di kes ki ta odja pornografia ta prujudika ses kazamentu, es ta perde ruspetu pa ses kabésa i es ta prujudika ses konsénsia. Más piór inda, es pode fika na prigu di perde ses amizadi ku Jeová. Bu pode ten sertéza ma pornografia ta prujudika kenha ki ta odja-l. Kes frida li pode ti sara ku ténpu, má es ta dexa markas ki pode fika pa txeu ténpu ô ti pa tudu ténpu.

Nu debe sta sienti ma Jeová pode proteje-nu di kel armadilha di Satanás. Má si nu krê pa el proteje-nu, nu debe faze kel ki israelitas ka faze, ki é obi ku el ‘ku fé’. (Êxo. 19:5) Nu meste rekonhise ma Deus ta ôdia pornografia. Pamodi ki nu ta fla kel-li?

Pensa na kel-li: Leis ki Deus daba nason di Israel éra diferenti di kes lei di kalker otu povu di kel ténpu. Kes lei éra sima un paredi ki ta protejeba israelitas di kes kuza nojéntu ki kes otu nason ta fazeba. (Deut. 4:6-8) Na kes lei tinha un verdadi klaru: Jeová ta ôdia konportamentu seksual mariadu.

 Dipôs ki Jeová fla tudu kes kuza mariadu ki kes otu nason ta fazeba, el fla israelitas: ‘Ka nhos faze kuzê ki pesoas na téra di Kanan ta faze, kel téra ki N sta ta leba nhos. Kel téra é inpuru, i riba di el N ta traze kastigu pa se éru’. Pa Jeová, kel Deus santu di Israel, kes povu di Kanan ta viveba di un manera txeu nojéntu ki kel lugar na undi es ta moraba bira inpuru i suju. — Lev. 18:3, 25.

Nbóra Jeová kastiga kes kananeu, otus povu kontinua ta faze konportamentu seksual mariadu. Más di 1500 anu dipôs, Polu fla ma kristons ta moraba na meiu di nasons ki ‘perde tudu sentidu di kel ki é dretu’. Na verdadi, ‘es ntrega ses kabésa pa konportamentu diskaradu, pa faze ku ganánsia tudu tipu di inpuréza.’ (Efé. 4:17-19) Oji tanbê, ta kontise mésmu kuza. Txeu algen ta faze konportamentu seksual mariadu i es ka ten vergónha di faze kel-la. Undi ménus nu ta spéra, pode parse imaji ki ten aver ku konportamentu mariadu. Má kristons verdaderu debe ivita odja kes tipu di kuzas li.

Pornografia ta mostra txeu falta di ruspetu pa Deus. El faze umanus sima se imaji i ta parse ku el; i el da-nu kapasidadi di sabe óras ki un kuza é dretu ô mariadu. Deus mostra sabedoria kantu el kria leis sobri relason seksual. El kreba pa séksu ser un kuza dretu i sábi entri maridu ku mudjer. (Gén. 1:26-28; Pro. 5:18, 19) Má, kes algen ki ta faze ô insentiva pornografia ta pensa sima Jeová? Klaru ki nau. Es ka ta da ninhun valor pa kes lei di Deus. Es sta ta mostra falta di ruspetu pa Jeová. I Deus ta ben julga tudu kes ki ta faze ô insentiva konportamentu mariadu. — Rom. 1:24-27.

Má i kes algen ki ta odja ô lé pornografia pamodi es krê? Alguns ta atxa ma ka ta faze nada si algen odja pornografia. Má na verdadi, es sta ta apoia kes ki ka ta ruspeta leis di Jeová. Talvês, é ka kel-la ki éra ses intenson kantu es kumesa ta odja pornografia. Má Bíblia ta dexa klaru ma kes ki ta adora Deus verdaderu, debe ôdia pornografia di korason. El ta fla: ‘Nhos ki ta ama Jeová, nhos ôdia kel ki é mau’. — Sal. 97:10.

 Mésmu kes algen ki ta ivita odja pornografia, pode ser difísil faze kel-li. Anos é inperfetu, i talvês nu ten ki luta kóntra dizejus mariadu. Tanbê, nos korason inperfetu ta tenta fla-nu ma odja pornografia é ka mariadu. (Jer. 17:9) Si bu sta pasa pa kel-li, fika ta sabe ma txeu algen ki bira kriston, konsigi ganha es luta. Nu ben odja modi ki Palavra di Deus pode djuda-u ka kai na armadilha di odja pornografia.

Sima dja nu odja, txeu israelita dexa dizejus mariadu kria na ses korason, i kel-la pô-s ta faze kuzas gravi. Mésmu kuza pode kontise ku nos. Tiagu, ki éra irmon di Jizus, fla sobri kel prigu li: ‘Kada un é provadu óras ki se própi dizeju ta tenta-l i ta ngoda-l. Nton, óras ki dizeju bira fórti, pekadu ta nase’. (Tia. 1:14, 15) Óras ki un algen ta dexa un dizeju mariadu kria na se korason, talvês ku ténpu kel algen ta kaba pa faze pekadu. Pur isu, nu meste forsa nos kabésa pa para di pensa na kuzas mariadu.

Si inda bu sta kontinua ta ten pensamentus mariadu, faze algun kuza pa bu libra di es. Jizus fla: ‘Nton, si bu mô ô bu pé ta faze-u tropesa, korta-l i bota-l lonji di bo. Tanbê, si bu odju ta faze-u tropesa, rinka-l i bota-l pa lonji di bo.’ (Mat. 18:8, 9) Jizus ka staba ta fla ma nu debe korta algun párti di nos korpu. El uza kel ilustrason li pa djuda-nu ntende ma nu meste libra di kes kuza ki ta pô-nu ta pensa na kuzas mariadu, i faze mudansas na nos vida. Modi ki nu pode sigi kel konsedju li, óras ki nu sta lida ku pornografia?

Si bu da ku odju na pornografia, ka bu pensa: ‘N ta pode lida ku kel situason.’ Vira róstu kel óra. Fitxa tilivizon kel óra. Fitxa konputador i telemóvel kel óra. Pensa na algun kuza dretu. Faze kel-li, pode djuda-u kontrola bus pensamentu envês di dexa dizejus mariadu kontrola-u.

Talvês bu konsigi para di odja pornografia. Má alvês, bu ta kontinua ta lenbra di kes  kuza ki dja bu odjaba. Kuzê ki bu debe faze? Un algen pode kontinua ta lenbra di kes imaji di pornografia ô pensa na kes kuza la pa txeu ténpu. Kel-li pode kontise kalker óra i sen el krê. Si kel-li kontise, talvês bu ta xinti gana di faze algun kuza inpuru, sima masturbason. Pur isu, bu debe sta sienti pamodi kes tipu di pensamentu li pode parse di un óra pa kel otu, i bu debe sta priparadu pa luta kóntra es.

Sta kada bês más disididu na pensa i na faze sima Deus ta krê. Faze sima apóstlu Polu, ki staba disididu na ‘sota se korpu i gia-l sima skravu’. (1 Cor. 9:27) Nu ka debe dexa dizejus mariadu kontrola-nu. Sigi kel konsedju li: ‘Nhos troka nhos manera di pensa pa nhos pode transforma, asi nhos ta prova nhos kabésa kal ki é kel vontadi di Deus, ki é dretu, ki é perfetu i ki el ta seta.’ (Rom. 12:2) Ka bu skese ma si bu pensa i aji di akordu ku vontadi di Deus, bu ta ten más alegria di ki sigi kes dizeju mariadu.

Tenta dikora alguns testu di Bíblia. Asi, óras ki ben pensamentus mariadu, forsa bu kabésa pa pensa na kes testu di Bíblia. Testus sima Salmo 119:37; Isaías 52:11; Mateus 5:28; Efésios 5:3; Colossenses 3:5 i 1 Tessalonicenses 4:4-8, ta djuda-u pensa sobri pornografia sima Jeová ta pensa, i ta djuda-u ntende kuzê ki el ta spéra di bo.

Kuzê ki bu debe faze si na algun óra bu xinti ma bu ka sta konsigi kontrola dizeju di odja pornografia ô di pensa na kuzas mariadu? Sigi izénplu di Jizus. (1 Ped. 2:21) Dipôs ki Jizus batizadu, Satanás tenta-l alguns bês. Kuzê ki Jizus faze? El mante firmi. El uza skrituras un tras di kel otu pa el ka kai na kes tentason di Satanás. El fla: ‘Sai di li Satanás!’, i Satanás bai se kaminhu. Jizus nunka ka para di luta. Abo tanbê, bu ka debe para di luta kóntra Diabu. (Mat. 4:1-11) Satanás ku se mundu ta kontinua ta tenta intxi bu menti ku pensamentus mariadu, má ka bu para di luta. Bu pode ganha luta kóntra pornografia. Jeová pode djuda-u vense bu inimigu.

Kontinua ta faze orason pa Jeová i pidi-l pa el djuda-u. Polu fla: ‘Faze orason ku súplika djuntu ku agradesimentu, pa Deus pode sabe kuzê ki nhos krê; i pas di Deus, ki ningen ka ta konsigi ntende, ta guarda nhos korason i nhos pensamentu através di Kristu Jizus.’ (Fil. 4:6, 7) Deus pode da-u un pas déntu bo ki ta djuda-u kontinua ta luta kóntra pekadu. Si bu ser amigu di Jeová, ‘el ta ser bu amigu’. — Tia. 4:8.

Midjór proteson kóntra kalker armadilha di Satanás é ten un amizadi fórti ku Kel Más Grandi di Séu ku Téra. Jizus fla: ‘Governanti di mundu sta ta txiga, i el ka ten ninhun puder sobri mi.’ (João 14:30 ) Pamodi ki Jizus tinha kel sertéza li? Na un otu situason el flaba: ‘Kel ki manda-m sta ku mi; el ka dexa-m mi sô, pamodi sénpri N ta faze kuzas ki ta dexa-l kontenti.’ (João 8:29 ) Si bu faze kuzas ki ta poi Jeová kontenti, nunka el ka ta bandona-u. Ivita kel armadilha di pornografia, i Satanás ka ta ten ninhun puder sobri bo.