شايتاننىڭ تۇزاعىنان ساق ٴجۇرىڭىز!
يسرايل حالقى يوردان وزەنىن كەسىپ وتۋگە دايىندالىپ جاتتى. ولار قۇداي ۋادە ەتكەن جەردىڭ تابالدىرىعىندا تۇرعان ەدى. وسى ارادا جۇرتقا جاتجەرلىك ايەلدەر كەلىپ، يسرايلدىك ەر كىسىلەردى مەرەكەلەرىنە شاقىردى. يسرايلدىكتەر ٷشىن جاڭا دوستار تابۋعا، ٸشىپ-جەپ، بي بيلەپ، كوڭىل كوتەرۋگە كەرەمەت مۇمكىندىك تۋعانداي كورىندى. الگى ايەلدەر قۇداي زاڭىن ۇستانبايتىن، ادەت-عۇرىپتارى مەن مورالدىق ۇستانىمدارى وزگەشە بولاتىن. ٴبىراق يسرايلدىك ەرلەردىڭ كەيبىرى: «ەشتەڭە ەتپەيدى، ٴبىز اباي بولامىز»،— دەپ ويلاسا كەرەك.
مۇنىڭ ارتى نەگە ۇلاستى؟ «يسرايلدىكتەر مواب قىزدارىمەن ازعىندىق جاساي باستادى». موابتىق ايەلدەردىڭ تۇپكى ماقساتى يسرايلدىك ەرلەردى جالعان تاڭىرلەرگە باس ۇرعىزۋ بولاتىن. ولار دەگەندەرىنە جەتتى دە! «سوندا ەحوبانىڭ يسرايلگە قاھارى لاۋلادى» (مۇس. 4-ج. 25:1—3).
يسرايلدىك ەرلەر قۇدايدىڭ ەكى زاڭىن بۇزدى: پۇتتارعا تابىندى جانە جىنىستىق ازعىندىق جاسادى. مويىنسۇنباعاندارى ٷشىن مىڭداعان ادام ٶلدى (مۇس. 2-ج. 20:4، 5، 14؛ مۇس. 5-ج. 13:6—9). وسى جاعدايدا وزەگىڭدى ورتەيتىن ٴبىر جايت — قۇداي زاڭىن بۇزباعاندا، ٴسال عانا ۋاقىتتان كەيىن الگى مىڭداعان يسرايلدىك يورداننان ٶتىپ، ۋادە ەتىلگەن جەرگە كىرەر ەدى! (مۇس. 4-ج. 25:5، 9).
بۇل وقيعا جايىندا ەلشى پاۋىل بىلاي دەدى: «سولاردىڭ باستارىنان وتكىزگەندەرى باسقالارعا ساباق بولدى جانە زامانداردىڭ سوڭىندا ٶمىر ٴسۇرىپ جاتقان بىزدەرگە ەسكەرتۋ رەتىندە جازىلىپ قالدىرىلدى» (قور. 1-ح. 10:7—11). ەجەلدەگى يسرايلدىكتەردىڭ اۋىر كۇناعا باتىپ، ۋادە ەتىلگەن جەرگە كىرە الماي قالعاندارى شايتاننىڭ كوڭىلىنە مايداي جاقتى. پاۋىل ايتقان ەسكەرتۋگە بارىنشا دەن قويعانىمىز ابزال. ويتكەنى شايتان ٴبىزدىڭ دە قۇداي ۇسىنىپ وتىرعان جاڭا دۇنيەگە كىرە الماي قالعانىمىزدى كوكسەيدى!
جويقىن تۇزاق
ٶز ىسىنىڭ قاس شەبەرى بولىپ العان، تالاي ادامدى ۋىسىنا تۇسىرگەن شايتان ماسىحشىلەردى دە تۇزاققا تۇسىرگىسى كەلەدى. يسرايلدىكتەرمەن بولعان جاعدايداعىداي، بۇگىندە دە ول جىنىستىق ازعىندىقپەن الدايدى. ونىڭ ازعىندىققا ارباۋ ٷشىن قولداناتىن ەڭ كۇشتى قارۋى — پورنوگرافيا (اروتيكالىق ماتەريال).
بۇگىندە پورنوگرافيانى ەشكىمگە بىلدىرتپەي كورۋگە بولادى. ونداعان جىل بۇرىن ادامدار پورنوگرافيا كورۋ ٷشىن ۇياتسىز فيلم كورسەتىلەتىن كينوتەاترعا نەمەسە پورنوگرافيالىق كىتاپ-جۋرنال ساتاتىن دۇكەنگە بارۋى كەرەك-ٴتىن. ادامدار وسىنداي جەرلەرگە كىرمەك تۇگىلى ماڭىندا تۇرۋعا ۇيالاتىن. ال قازىر عالامتورعا قوسىلعان كەز كەلگەن ادام جۇمىسىندا نەمەسە كولىگىندە وتىرىپ-اق انايى بەينەلەردى كورە الادى. كوپتەگەن ەلدە ادامدار ٴتىپتى ۇيلەرىنەن شىقپاي-اق كورە بەرەدى.
بۇل تەك بەرگى جاعى. ٴموبيلدى قۇرىلعىلاردىڭ كەسىرىنەن پورنوگرافيا كورۋ تىپتەن وڭاي. ادامدار ونى كوشەدە، اۆتوبۋسپەن نە پويىزبەن كەتىپ بارا جاتىپ قالتاسىنداعى قۇرىلعىدان كورە الادى.
پورنوگرافيانى كورۋ دە، جاسىرۋ دا وڭاي بولعان سايىن ونىڭ زيانى دا ادام ايتقىسىز بولىپ وتىر. مۇنداي بەينەلەردى كورەتىن ادامدار وتباسىلارىن، ٶز ادامي قادىرلەرىن جانە ار-ۇياتتارىن ويران ەتەدى. ەڭ جامانى، ولار قۇدايمەن دوستىق قارىم-قاتىناستارىن بۇزادى. ٴيا، پورنوگرافيانىڭ زيانى جويقىن. كوپ جاعدايدا ول ادامنىڭ جانىنا تەرەڭ جارا سالادى. بۇل جارا ۋاقىت وتە جازىلعانىمەن، ونىڭ ورنىندا تىرتىق قالۋى مۇمكىن.
ٴبىراق مىنا ماڭىزدى شىندىقتى ۇمىتپايىق: ەحوبا ٴبىزدى شايتاننىڭ تۇزاعىنان قورعاي الادى. الايدا ٴبىر شارت بار. ٴبىز ەجەلگى يسرايلدىك ەرلەردىڭ قاتەلىكتەرىن قايتالاماي، ەحوبانىڭ «ايتقانىنىڭ بارىنە قۇلاق اسۋىمىز» كەرەك (مۇس. 2-ج. 19:5). ول پورنوگرافيانى قاتتى جەك كورەتىنىن جەتە ٴتۇسىنۋىمىز قاجەت. ال ونىڭ پورنوگرافيانى جەك كورەتىنىن قايدان بىلەمىز؟
ەحوبا سياقتى جەك كورىڭىز
مىنا جايتقا نازار اۋدارىپ كورەيىك: ەجەلگى زاماندا قۇدايدىڭ يسرايلگە بەرگەن زاڭدارى سياقتى زاڭدار باسقا ەشقانداي حالىقتا بولماعان. ول زاڭدار يسرايل حالقىن جان-جاعىنداعى ەلدەر مەن ولاردىڭ لاس، ارام ارەكەتتەرىنەن بەينە ٴبىر قورعانداي ساقتاپ تۇرعان (مۇس. 5-ج. 4:6—8). وندا اسىرەسە مىنا شىندىققا ايرىقشا ٴمان بەرىلدى: ەحوبا جىنىستىق ازعىندىقتى جەك كورەدى.
اينالاسىنداعى ەلدەردىڭ ازعىن ىستەرىن ايتا كەلە ەحوبا حالقىنا بىلاي دەدى: «مەن سەندەردى الىپ بارا جاتقان قاناحان ەلىنىڭ ادامدارىنداي ارەكەت ەتپەڭدەر... سولاردىڭ كەسىرىنەن جەرلەرى دە ارامدالدى. مەن ونىڭ تۇرعىندارىن كۇناسى ٷشىن جازالايمىن». قاناحاندىقتار لاس، ازعىن ٶمىر سۇرگەندەرى سونشا — ولاردىڭ جەرى يسرايلدىڭ كيەلى قۇدايى ٷشىن ارام، بۇلىنگەن جەر بولعان (مۇس. 3-ج. 18:3، 25).
ەحوبا قاناحان ەلىن كەزىندە جازاعا تارتقانمەن، وزگە حالىقتار جىنىستىق ازعىندىققا سالىنۋدى جالعاستىرا بەردى. 1500 جىلدان اسا ۋاقىتتان كەيىن پاۋىل ٶز زامانىنىڭ ادامدارىن «ۇياتتان ابدەن بەزگەن» دەپ سيپاتتاعان. «ولار ورەسكەل قىلىقتار جاساپ، ٵرقيلى ارام ىستەردى تويىمسىزدىقپەن ىستەدى» (ەفەس. 4:17—19). ٴبىزدىڭ زامانىمىزدا دا ورەسكەل ازعىندىق جاسايتىن ادامدار كوپ. سوندىقتان شىنايى ماسىحشىلەر ولاردىڭ ىستەرىنە كوز سالۋدان مۇمكىندىگىنشە ساق بولۋلارى قاجەت.
پورنوگرافيا — قۇدايعا قارسى جاسالعان جەكسۇرىندىق. قۇداي ادامداردى وزىنە ۇقساس ەتىپ جاراتقان، ٵرى ولارعا ۇيات سەزىمىن بەرگەن. ول جىنىستىق جاقىندىققا قاتىستى ورىندى شەكتەۋلەر ورناتقان. قۇدايدىڭ نيەتى بويىنشا، مۇنداي جاقىندىق نەكەدەگى جۇپتارعا ٴلاززات اكەلۋ ٷشىن بەرىلگەن ەدى (مۇس. 1-ج. 1:26—28؛ ناق. س. 5:18، 19). ال پورنوگرافيانى ناسيحاتتايتىندار جايلى نە دەۋگە بولادى؟ ولار قۇدايدىڭ مورالدىق نورمالارىن اياقاستى ەتىپ تاپتايدى. ٴيا، ولار ەحوبانى قورلايدى. ازعىن مالىمەتتەر شىعارىپ، ولاردى ناسيحاتتاپ، مورالدىق نورمالاردان اتتاپ وتەتىندەردى قۇداي جازاسىز قالدىرمايدى (ريم. 1:24—27).
پورنوگرافيانى اشىقتان-اشىق، ەرمەك ٷشىن كورەتىندەر دە بار. ولار مۇندا تۇرعان ەش جاماندىق جوق دەپ ويلار. ٴبىراق شىندىعىنا كەلگەندە، ولار ەحوبانىڭ نورمالارىن اياقاستى ەتەتىندەردى قولداپ-قولپاشتاپ جاتىر. وسىلاي ەتىپ جاتقاندارىن باسىندا تۇسىنبەگەن شىعار. ٴبىراق ٴبىر جايت ايدان انىق: شىنايى قۇدايعا قىزمەت ەتەتىن ادام پورنوگرافيانى جەك كورۋى قاجەت. جازبالار: «ەي، ەحوبانى جاقسى كورەتىندەر، جاماندىقتى جەك كورىڭدەر»،— دەپ ۇندەيدى (ٴزاب. 97:10).
پورنوگرافيادان اۋلاق بولعىلارى كەلسە دە، كەيبىرەۋلەرگە بۇل قيىنعا سوعۋى مۇمكىن. ويتكەنى ٴبىز كەمەلسىز پەندەلەرمىز، ٵرى ازعىن قالاۋلارعا بوي الدىرماۋ ٷشىن كۇرەسۋىمىز قاجەت. بۇل ازداي، كۇناكار جۇرەگىمىز ٶزىمىزدى اقتاپ، قۇدايدىڭ زاڭىنان اتتاپ كەتۋگە ازعىرۋى مۇمكىن (ەرم. 17:9). ٴبىراق وسى ارپالىستا جەڭىپ شىققان ماسىحشىلەر از ەمەس. وسىنداي كۇرەس جۇرگىزىپ جاتقان بولساڭىز، جالعىز ەمەسسىز. جەڭىسكە ٴسىز دە جەتە الاسىز. قازىر شايتاننىڭ تۇزاعىنان قۇداي ٴسوزى قالاي قورعايتىنىنا كوڭىل بولەيىك.
ازعىن ويلارعا باتپاڭىز
ماقالانىڭ باسىندا ايتىلعانداي، كوپ يسرايلدىك جىنىستىق ناپسىلەرىن تيماي، مۇنىڭ سۇمدىق سالدارىن تارتتى. بۇگىندە دە سولاي بولۋى مۇمكىن. يسانىڭ باۋىرى جاقىپ مىنانداي قاۋىپ بار ەكەنىن ايتقان: «ٵربىر ادام ٶز قۇمارلىعىنا ەلىگىپ، تورعا تۇسكەندىكتەن سىنالادى. ال قۇمارلىق دامىپ جەتىلگەندە، كۇنا تۋدىرادى» (جاق. 1:14، 15). ادام جۇرەگىندە ورىنسىز ٴبىر قالاۋ دامىپ، بەلگىلى ٴبىر دەڭگەيگە جەتكەندە، ونىڭ كۇنا جاساۋى ابدەن مۇمكىن. سوندىقتان ازعىن ويلارعا باتپاي، ولاردى سانامىزدان شىعارىپ تاستاۋ كەرەك.
سىزگە جامان ويلار كەلە باستاسا، دەرەۋ ارەكەت ەتىڭىز. يسا: «قولىڭ نە اياعىڭ كۇناعا ازعىرسا، ونى كەسىپ ال دا، لاقتىرىپ تاستا... ال كوزىڭ كۇناعا ازعىرسا، ويىپ ال دا، لاقتىرىپ تاستا»،— دەگەن (مات. 18:8، 9). يسا مۇندا ٶز دەنەمىزگە زاقىم كەلتىرۋ جايىندا ەمەس، ٴبىزدى ازعىرىپ جاتقان نارسەنى بىردەن ٵرى باتىل جويۋدى ايتىپ تۇر. بۇل كەڭەستىڭ پورنوگرافيانى كورۋگە قانداي قاتىسى بار؟
ەگەر الدىڭىزدان ۇياتسىز بەينە شىعا كەلسە، «ەشتەڭە ەتپەيدى» دەپ ويلاماڭىز. ودان بىردەن نازارىڭىزدى تايدىرىڭىز. تەلەديداردى دەرەۋ باسقا ارناعا اۋىستىرىڭىز. كومپيۋتەردى، تەلەفوندى بىردەن ٶشىرىڭىز. نازارىڭىزدى تازا نارسەگە اۋدارىڭىز. سوندا بۇرىس قالاۋلاردىڭ جەتەگىندە كەتپەي، وي-ساناڭىزدى قاداعالاي الاسىز.
سانادا ازعىن بەينەلەر قالعان بولسا...
پورنوگرافيا كورۋدى دوعارساڭىز دا، سول بەينەلەر اراگىدىك ەسىڭىزگە ٴتۇسىپ تۇرسا شە؟ ۇياتسىز بەينەلەر مەن ويلار ادامنىڭ ساناسىنان ۇزاق ۋاقىت بويى وشپەي، ويدا جوق تا ەسكە ٴتۇسىپ كەتۋى مۇمكىن. مۇنداي كەزدە كەيبىرەۋلەر ماستۋرباسيا سياقتى لاس ارەكەتكە بارۋعا ازعىرىلادى. وسىنداي قاۋىپ بار ەكەنىن ٵردايىم ەستە ۇستاپ، بۇرىس ويلاردى باعىندىرۋعا دايىن بولىڭىز.
ويىڭىزدى دا، ٸس-ارەكەتىڭىزدى دە قۇدايعا جاعىمدى ەتۋگە نىق بەكىنىڭىز. «دەنەمدى ۇرعىلاپ، وزىمە قۇل ىسپەتتى باعىندىرۋدامىن» دەگەن ەلشى پاۋىلدى ۇلگى ەتىڭىز (قور. 1-ح. 9:27). ازعىن قالاۋلارعا قۇل بولماڭىز. «وي-سانالارىڭدى جاڭارتىپ، تۇبەگەيلى وزگەرىڭدەر. سوندا قۇدايدىڭ ىزگى دە ۇنامدى ٵرى كەمەلدى ەركىنە نە جاتاتىنىنا كوز جەتكىزە الاسىڭدار»،— دەيدى قۇداي ٴسوزى (ريم. 12:2). مىنانى ۇمىتپاڭىز: كۇناكار قالاۋىمىزعا جول بەرۋدەن گورى، قۇدايدىڭ ەركىنە ساي ويلاپ، ارەكەت ەتۋ اناعۇرلىم كوپ قاناعات اكەلەدى.
كۇناكار قالاۋىمىزعا جول بەرۋدەن گورى، قۇدايدىڭ ەركىنە ساي ويلاپ، ارەكەت ەتۋ اناعۇرلىم كوپ قاناعات اكەلەدى
جازبالارداعى كەيبىر تارماقتاردى جاتتاپ الىڭىز. جامان ويلار كەلگەندە، ٶزىڭىزدى كۇشتەپ، سول تارماقتار تۋرالى ويلانىڭىز. ٴزابۇر 119:37؛ يشايا 52:11؛ ماتاي 5:28؛ ەفەستىكتەرگە 5:3؛ قولوستىقتارعا 3:5؛ سالونيكالىقتارعا 1-حات 4:4—8 سياقتى تارماقتار ەحوبانىڭ پورنوگرافياعا قالاي قارايتىنىن جانە سىزدەن نەنى تالاپ ەتەتىنىن ويىڭىزعا سالادى.
ۇياتسىز نارسەلەردى كورۋگە نە ويلاۋعا دەگەن قۇشتارلىعىڭىز توزە الماستاي قاتتى بولسا، نە ىستەۋ كەرەك؟ مۇندايدا يسانىڭ ارەكەتىنە ەلىكتەڭىز (پەت. 1-ح. 2:21). يسا شومىلدىرۋ راسىمىنەن وتكەننەن كەيىن، شايتان ونى قايتا-قايتا سىناۋمەن بولدى. ٴبىراق ول ەش بوي بەرمەدى. قايتا-قايتا جازبالارمەن جاۋاپ بەرىپ، شايتاننىڭ شىرماۋىنا ىلىكپەدى. ول: «كەت قاسىمنان، شايتان!»— دەگەندە، شايتان ودان كەتىپ قالدى. ىبىلىسكە قارسى كۇرەستە يسا ٴبىر رەت تە تىزە بۇكپەگەندەي، ٴسىز دە ەش بەرىلمەڭىز (مات. 4:1—11). شايتان مەن ونىڭ دۇنيەسى اقىل-ساناڭىزعا ازعىن ويلاردى كىرگىزۋگە ۇزدىكسىز تىرىسادى. ٴبىراق قايتپاس قايسار بولىڭىز. پورنوگرافياعا قارسى كۇرەستە ەحوبانىڭ كومەگىمەن جەڭىسكە جەتە الاسىز.
ەحوباعا دۇعا ايتىڭىز جانە وعان مويىنسۇنىڭىز
ەحوباعا تالماي دۇعا ەتىڭىز. پاۋىل بىلاي دەگەن: «ەش نارسەنى ۋايىمداماڭدار، بارلىق وتىنىشتەرىڭدى دۇعا ەتىپ، جالبارىنىپ، ريزاشىلىقپەن قۇدايعا بىلدىرىڭدەر. سوندا قۇدايدىڭ ادام اقىلىنان اسقان تىنىشتىعى جۇرەكتەرىڭ مەن وي-سانالارىڭدى ٴماسىح يسا ارقىلى ساقتايدى» (ٴفىلىپ. 4:6، 7). كۇناعا بەرىلىپ قالماۋىڭىز ٷشىن، قۇداي وي-ساناڭىزعا تىنىشتىق سيلاپ، سىزگە كومەكتەسەدى. ەحوباعا جاقىنداساڭىز، ول دا سىزگە جاقىندايدى (جاق. 4:8).
شايتاننىڭ تۇزاقتارىنان قورعانۋدىڭ ەڭ مىقتى جولى — الەمنىڭ امىرشىسىنە ەتەنە جاقىن بولۋ. يسا: «وسى دۇنيەنىڭ بيلەۋشىسى [شايتان] كەلە جاتىر. الايدا ماعان ونىڭ بيلىگى جۇرمەيدى»،— دەگەن (جوح. 14:30). يسا بۇعان نەلىكتەن سەنىمدى بولدى؟ ول: «مەنى جىبەرگەن وزىممەن بىرگە. ول مەنى جالعىز قالدىرعان جوق، ويتكەنى مەن ٵرقاشان وعان ۇنايتىندى ىستەيمىن»،— دەپ ٴتۇسىندىردى (جوح. 8:29). ٴسىز دە ەحوباعا ۇنايتىندى ىستەسەڭىز، ول ٴسىزدى ەشقاشان جالعىز قالدىرمايدى. پورنوگرافيا دەگەن تۇزاقتان اۋلاق ٴجۇرىڭىز، سوندا شايتاننىڭ قاقپانىنا تۇسپەيسىز.
