NDYEBAKALINGA pafwiifwi akusubuka mulonga wa Joodani, kwaamba ayi banjile mucishi Lesa ncaakabashomesha, bene Isilaeli bakakumanya bantu mbobatakalinga kushi kabotu. Aba bantu bakalinga banakashi bateshi bene Isilaeli, abo bakesa mukwiita bene Isilaeli basankwa kukusekelela. Bene Isilaeli basankwa balyeelete bakayeeya ayi ici cakalinga coolwe citaboneki boneki. Alimwi cilyeelete kwaamba ayi bakakondwa abuumbi kwiitwa kukusekelela uko nkobakalinga kuya mukucana beshicibusa bapya, kushana, akulya shakulya shibotu. Nabi kwaamba ayi milawo yakalinga kukonkela banakashi aba amibo yabo yakalinga kupusene abuumbi a Milawo Lesa njaakapa bene Isilaeli, bene Isilaeli basankwa bamwi balyeelete bakalinga kuyeeya ayi: tulishi kabotu cibotu acibiibi, aboobo inga tabatuyungiiwo. Tutoocenjela.’

 Ano ino nshiinshi shakacitika? Baibo ilatulwiita ayi: “Bantu bakatalika kucita sha bulale abanakashi bene Moabu.” Alimwi banakashi aba bene Moabu ncobakalinga kusuni ncakwaamba ayi bene Isilaeli aba batalike kupaila balesa bakubeca. Alimwi ishi nsheshakacitika! Aboobo, ‘Yehova wakakalala abuumbi’ ashakacita bene Isilaeli.—Shakube. 25:1-3.

Bene Isilaeli balya bakapwaya Mulawo wakwe Lesa munshila shobilo: Bakalambila shibumbwabumbwa, akucita bulale. Bantu baanji abuumbi bakafwa ceebo cakutanyumfwila Lesa. (Ku. 20:4, 5, 14; Duto. 13:6-9) Ino nceebonshi ishi nshebakacita shakabica abuumbi? Mukwiinga ici ciindi ncebakacitilawo shibiibi, nceciindi ncebakalinga kweelete kusubuka mulonga wa Joodani akunjila mu Cishi Ncobakashomeshekwa.—Shakube. 25:5, 9.

Kulansha kumakani aya, mutumwi Paulo wakalemba ayi: “Shoonse ishi shakacitika kuli mbabo kwaamba ayi shibe shitondesho, alimwi shakalembwa kwaamba ayi shitucenjeshe sotushiite muciindi cino ca mamanino abweende bwashintu.” (1 Koli. 10:7-11) Cakutatoonsha Satana wakasangalala abuumbi kwaamba ayi bene Isilaeli balya bakacita shibiibi shinene akuteelela kunjila mu Cishi Ncobakashomeshekwa. Aboobo aswebo tulyeelete kubikila maano kukucenjesha uku, mukwiinga tulishi kwaamba ayi Satana alisuni ayi tukaalilwe kunjila mucishi cipya cakwe Lesa!

Munshiku shino Satana alisuni kuyunga Beneklistu kwiinda mukusebensesha bucenjeshi bwakwe mbwaakasebenseshawo kale. Satana alasebensesha bulale bweenka mbuli mbwakacita kubene Isilaeli. Amunshiku shino, bulale nkoose kabiibi abuumbi. Nshila yomwi yeenga yapa muntu kucatwa mukoose kabulale, nkweebela shintu shamatakosha.

Munshiku shino, muntu inga weebela shintu shamatakosha bamwi kwakubula akushiba. Mumyaaka yakale kale, muntu wakalinga kweelete kuya kumisena nkobeebelesha mafilimu atabete kabotu kwaamba ayi eebele shamatakosha na kuya nkoboolisha mabuku aamba shamatakosha. Bantu baanji balyeelete tabakalinga kuyaako kumisena iyi ceebo cakunyumfwa nsoni ayi inga bababona. Ano munshiku shino, muntu inga weebela shamatakosha pa intaneti kuncito nabi ndyaashiite mumotoka. Alimwi mushishi shiinji bantu inga beebela shamatakosha muŋanda.

Kwiilikaawo, ncuubu muntu kweebela shamatakosha pafooni nabi patabuleti. Bantu inga beebela shamatakosha ndyebatokweenda munshila, ndyebali mubaasi na musitiima kwiinda mukusebensesha fooni na tabuleti.

Mukwiinga ncuubu bantu kweebela shamatakosha bamwi kwakubula kushiba, kweebela shamatakosha kwanyonyoola bantu baanji kwiinda kale kale. Bantu baanji beebela shamatakosha balanyonyoola shikwati shabo, kulisuula, akunyonyoola njeelacaamba yabo. Cibiibi kwiindaawo, inga banyonyoola abushicibusa bwabo a Lesa. Cakutatoonsha kweebela shamatakosha kulanyonyoola muntu. Alimwi liinji muntu weebela shamatakosha alayeeyabo sheenka isho. Nabi kwaamba ayi wacileka kusheebela, paleenda ciindi cilaamfu kwaamba ayi acileeke kuyeeyawo alimwi cimwi ciindi inga taacileeki akuyeeyawo.

Nacibi boobo, tulyeelete kushiba kwaamba ayi Yehova inga watucafwa kuleya koose kakwe Satana aka. Na tulisuni kwaamba ayi Yehova atucaafwe, tulyeelete kuleya shakacitika kubene Isilaeli—Tulyeelete kunyumfwila Yehova. (Ku. 19:5) Tulyeelete kushiba kwaamba ayi Yehova alishipatite abuumbi shamatakosha. Ino nciinshi ncetwaambila boobo?

Amuyeeye cancine cakwaamba ayi milawo Lesa njaakalinga apa bene Isilaeli, yakalinga kupusene amilawo yakalinga kukonkela mishobo imwi paciindi cilya. Bweenka mbuli lubumbu mbolushitilisha bantu bekala mundabala, milawo yakwe Lesa mboyakalinga kushitilisha bene Isilaeli kushibiibi  shakalinga kucita bantu bamishobo imwi. (Duto. 4:6-8) Milawo iyo yakacafwa bene Isilaeli kushiba kwaamba ayi Yehova alipatite bulale.

Yehova ndyaakalinga kulwiita bene Isilaeli pashintu shibiibi shakalinga kucita mishobo imwi wakaamba ayi: “Tamweelete kucita shintu shicita bantu ba mucishi ca Kenani, umo moontoomutola. . . . Cishi ici tacisalalite, alimwi ndaakubapa mulandu bantu bekalaamo ceebo ca shibiibi shabo.” Mukwiinga Lesa wa bene Isilaeli wakalinga kusalalite, wakalinga kubona shintu shakalinga kucita bene Kenani kuba shintu shibiibi abuumbi cakwaamba ayi cishi cabo wakalinga kucibona kuba citasalalite.—Lefi. 18:3, 25.

Nabi kwaamba ayi Yehova wakapa mulandu bene Kenani, bantu bamwi bakatolelela kucita bulale. Pesule lya myaaka iindilila 1,500, Paulo wakaamba ayi shishi mwakalinga kukala Beneklistu mwakalinga bantu ‘batacite nsoni nabi paniini mubukaalo bwabo. Alimwi bakalinga bantu, “balyaaba kubukaalo bulensha bunya akushintu shitasalalite sha mushobo uli woonse.” (Efe. 4:17-19) Amunshiku shino bantu baanji balacita bulale kwakubula kufwa ansooni. Basebenshi bakwe Yehova tabeelete kunokweebela shintu shibiibi shicita bantu ba mucishi.

Bantu beshikweebela shamatakosha balatondesha ayi tabacitewo bulemu kuli Lesa nabibo paniini. Lesa wakalenga bantu mucikoshanyo cakwe. Wakatulenga amaano akushiba ayi ici ncibiibi, ici ncibotu. Lesa alicishi ncaakabikilako milawo pamakani akoonana. Koonana ncipo Lesa ncakapangila baabo bali mucikwati. (Mata. 1:26-28; Tus. 5:18, 19) Ano ino mbuyani abo beshikupanga mafilimu ashamatakosha abaabo beshikuyuminisha bantu kusheebela? Balatondesha kwaamba ayi bakasuula milawo yakwe Lesa pamakani akoonana. Ncakwiila bantu beshikuyuminisha shintu sha mushobo uyu, tabacitewo bulemu kuli Yehova nabibo paniini. Lesa alaakupa mulandu abo boonse batakonkeli milawo yakwe na abo bayuminisha shintu sha bulale.—Loma. 1:24-27.

Ano ino bantu babelenga na kweebela kashanga shintu shamatakosha? Bamwi balabona ayi nshakulikondelesha shilibo kabotu. Nacibi boobo, kucita boobo nkuyuminisha baabo batakonkeli milawo yakwe Yehova. Mpashi ndyebakatalika kweebela shamatakosha tabakalinga kucishiwo ayi ncibiibi. Ano Baibo ilaamba cakuteenda mweela ayi basebenshi bakwe Lesa balyeelete kupata shamatakosha. Baibo ilaamba ayi: “Mwebo nomusuni Yehova, amupate shibiibi.”—Kulu. 97:10.

 Inga caba ciyumu kuleya kulanga shamatakosha nabi kubaabo basuni kushileya. Mukwiinga tatusalalite, aboobo inga twayandika kulwana cankusu kwaamba ayi tuleye lunkumbwa lwakucita bulale. Kwiilikaawo, moyo wesu utasalalite inga watalika kutulwiita ayi teshi cibiibi kweebela shamatakosha. (Jele. 17:9) Ano buunji bwa baabo bakaba Beneklistu bakacikonsha kukoma nkondo iyi. Kushiba sheeshi inga kwamucafwa kushiba kwaamba ayi amwebo inga mwacikonsha kukoma, na mulicite lipenshi lyakweebela shamatakosha. Atubone mbweenga Maswi akwe Lesa amucafwa kuleya koose aka.

Bweenka mbuli mbotwaambawo kale, bene Isilaeli baanji bakalekela lunkumbwa kukomena mumyoyo yabo akubapa kucita shibiibi. Ishi nsheenga shacitika amunshiku shino. Jemusi mwanike wakwe Yesu wakucanaamo wakaamba ayi: “Sombi muntu woonse . . . alayungoolwa akucenjeekwa alunkumbwa lwakwe. Ano lunkumbwa ulo na lwakula, lulashala cibiibi.” (Jemu. 1:14, 15) Na lunkumbwa lwakucita cibiibi lwakomena mumoyo wa muntu, mukuya kwaciindi alacita cibiibi. Aboobo tulyeelete kulikasha cankusu kwaamba ayi tutanooyeeya pashintu sha bulale.

Na mwabona ayi miyeeyo ibiibi yatolelela, amufwambaane kucitawo comwi. Yesu wakaamba ayi: “Na lyaansa nabi mweendo wako wakulengesha ayi ubishe, utimbuleeko akuusowa. . . . Na liinso lyako lyakulengesha ayi ubishe, liloboleemo ulisoowe.” (Mate. 18:8, 9) Yesu taakalinga kwaamba ayi tulyeelete kunootimbula shipansha sha mibili yesu sobwe. Sombi wakalinga kututondesha cikoshanyo ca nshotweelete kucita na twatalika kuyeeya pashintu shibiibi. Tulyeelete kushiba catupa kutalika kuyeeya pashintu isho akufwambaana kucitawo comwi. Ino inga twacita buyani kwaamba ayi tukonkele Yesu nshakaamba?

Na mwabona shamatakosha, mutalibeci ayi, ‘Inga ndalilama.’ Amufwambaane kulanga kumwi. Mulyeelete kushimya TV peenkapo. Amushimye kompyuta na fooni kwakubula kusowa ciindi. Amutalike kuyeeya pashintu shisalalite. Kucita boobo inga kwamucafwa kutatolelela kuyeeya shibiibi.

Ino inga mwacita buyani na mwakacileka kweebela shamatakosha, sombi cimwi ciindi shilesa mumiyeeyo? Paleenda ciindi cilaamfu abuumbi  kwaamba ayi muntu acileeke kwiibaluka shamatakosha nshakeebelaawo. Cimwi ciindi shikope isho shilesabo shiine mumiyeeyo. Na ishi shacitika, mpashi inga mwayeeya kucita shitasalalite mbuli kutalika kulisekanya kubusankwa na kubwanakashi. Anu mulyeelete kulibambila kwaamba ayi miyeeyo ibiibi inga yesa kaciindi kali koonse, aboobo mulyeelete kushibila limwi mbweenga mwaikoma.

Amube bashinishite kutolelela kuyeeya akucita shintu kweelana akuyanda kwakwe Lesa. Amube mbuli mutumwi Paulo, uyo wakalinga kulibambite ‘kuma uma mubili wakwe akuulenga busha.’ (1 Koli. 9:27 nwt) Mutalekeli lunkumbwa lutabete kabotu kumweendelesha. Baibo ilatulwiita ayi; ‘Amwaalule miyeeyo yanu kwaamba ayi mushinishe nobeene “kuyanda kwakwe Lesa kubotu kutambulika alimwi kutacite kampenda.’ (Loma. 12:2 nwt) Mutaluubi kwaamba ayi kukonkela shibiibi takuleti lusangalalo sombi kuyeeya akucita shintu kweelana akuyanda kwakwe Lesa.

Amweeleshe kwiibalukaako Malembo amwi. Lyalo na miyeeyo ibiibi yesa, amulikaashe akutalika kuyeeya Malembo ayo. Malembo mbuli Kulumbaisha 119:37; Isaya 52:11; Mateyo 5:28; Bene Efeso 5:3; Bene Kolose 3:5; alimwi a 1 Bene Tesalonika 4:4-8 inga amucafwa kubona shamatakosha kweelana a Yehova mbwashibona akushiba nshaasuni kwaamba ayi mucite.

Ino nshiinshi nsheenga mwaciita na camuyumina abuumbi kukalabo kwakubula kweebela shamatakosha na kushiyeeyawo? Amukonkele cakubonenaako cakwe Yesu. (1 Pita 2:21) Yesu ndyaakabombekwa, Satana wakatolelela kumweelesha. Ino Yesu wakacita buyani? Wakatolelela kukaka kucita nshaakalinga kusuni Satana. Yesu wakaka meelesho akwe Satana kwiinda mukusebensesha malembo apusenepusene. Wakaamba ayi: “Swaawo apa Satana!” lyalo Satana wakaswaawo. Bweenka mbuli Yesu mbwatakwe kuboolela mwisule mukulwana Satana, amwebo mbomweelete kucita. (Mate. 4:1-11) Satana acishi cakwe balaakutolelela kutuyunga kwaamba ayi tunoyeeya pashibiibi, sombi tatweelete kucileka kubalwana. Inga mwacikonsha kulwana nkondo yakukaka kweebela shamatakosha. Yehova inga wamucafwa kumukoma mulwani wanu.

Amutolelele kupaila kuli Yehova akumusenga ayi amucaafwe. Paulo wakaamba ayi: “Amusenge shintu shoonse nshemutacite kuli Lesa; aboobo luumuno lwakwe Lesa ulo lwiinda pabusongo bwa bantu boonse lulaakulama myoyo yanu alimwi amiyeeyo yanu muli Klistu Yesu.” (Fili. 4:6, 7) Lesa alaakumupa luumuno lweshi lukamucaafwe kukaka shintu shibiibi. Na mwasena pafwiifwi a Yehova, “alakwe alaakusena pafwiifwi andimwe.”—Jemu. 4:8.

Na twatolelela kuba beshicibusa bakwe Yehova uyo ucite nkusu shakweendelesha kwiculu apacishi ca panshi, alaakunootucafwa kuleya toose twakwe Satana. Yesu wakaamba ayi: “Mwaami wa mucishi ca panshi [Satana] utoosa, taacite nkusu pali ndime.” (Joni 14:30) Ino nciinshi cakapa Yesu kushoma cakutatoonsha ayi Satana taacite nkusu pali nguwe? Paciindi cimwi wakaambawo ayi: “Uyo wakantuma ali anebo, taakwe kunshiya neenka mukwiinga lyoonse ndacita shimukondelesha.” (Joni 8:29) Amwebo na kamucita shintu shikondelesha Yehova, teshi akamushiyewo. Amuleye koose kakweebela shamatakosha, lyalo Satana teshi akabewo ankusu pali ndimwe.