Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ lo kʼai tuˬ Yawˇdanˍ iˉ kaˆ lawˬ htaꞈ hpanˍ kʼai te htaˇ, chaw teˇ hpaˍ hpaˍ yawˇ hui geh laˬ ve yoˬ. Chaw oˇ ve teˇ hpaˍ lehˬ buiˇ shaˆ aˉ naˆ yaˇ miˇ hpehꞈ leh yawˇ hui ve pawehˇ hkʼaw kʼai tuˬ hawˉ hkʼaˆ teˇ hpaˍ htaꞈ ca jehˬ la ve yoˬ. Chi nyi˗a kʼo pyawˍ jaˇ ve awˬ yanˇ hpehꞈ ve yoˬ hehˉ. Yawˇ hui awˬ chawˇ awˬ suhˉ, pawehˇ kaˆ ve, leh caˇ tuˬ daꞈ ve htaꞈ caˇ ve yoˬ. Yaˇ miˇ chi teˇ hpaˍ ve chaw liˇ vaˇ liˇ leh awˬ liˇ tawˇ hkawˇ Gʼuiˬ sha Iˉsaˍreˍlaˆ chaw htaꞈ te tcuh ve hkʼe maˇ shuˍ ve htawˇ, hawˉ hkʼaˆ teˇ hpaˍ hpaˍ dawˇ ve, ‘ngaˬ hui teꞈ chiˉ maˇ heˆ taˬ. Shaˍ tiꞈ te tuˬ yoˬ.’

 Aˬ htoꞈ ma hpehꞈ la ve le? Liꞈ hpu hkʼaw kʼoˆ laˇ ve, “yawˇ hui teˇ hpaˍ hpaˍ oˇ kaˬ lo chehˇ taˍ ve Mawˇbaˆ chaw htaꞈ haˉ chawˇ te ve yoˬ.” Awˬ tehˬ kʼo yaˇ miˇ oˇ ve teˇ hpaˍ maˇ heˆ heˆ ve gʼuiˬ sha htaꞈ Iˉsaˍreˍlaˆ chaw oˉ kʼoˍ pui tcuh gaˇ ve yoˬ. Yawˇ hui awˬ tehˬ te ve yoˬ! Chi htaꞈ pa taw, Yaˬhoˉvaˬ Iˉsaˍreˍlaˆ chaw htaꞈ nyi ma zuhˆ jaˇ.—Heh puiˉ hkʼaw 25:1-3.

Iˉsaˍreˍlaˆ chaw teˇ hpaˍ Gʼuiˬ sha ve awˬ liˇ tawˇ hkawˇ nyiˇ ceuˬ htaꞈ maˇ gʼaꞈ te. Yawˇ hui shaˉ hoꞈ htaꞈ oˉ kʼoˍ pui leh pehꞈ ve tzuhˆ ve te ve yoˬ. Maˇ na yuˬ ve pa taw laiˉ hinˉ gʼaˇ gʼa suh ve yoˬ. (Tawˆ kʼai ve 20:4, 5, 14; Bon maˍ ve 13:6-9) Chi aˬ htoꞈ ma te sheˉ lai jaˇ ve le? Hawˉ hkʼaˆ chi ve teˇ hpaˍ Gʼuiˬ sha ve awˬ liˇ tawˇ hkawˇ htaꞈ maˇ te yaꞈ ve kʼo, Iˉsaˍreˍlaˆ chaw laiˉ hinˉ gʼaˇ Yawˇdanˍ iˉ kaˆ lawˬ htaꞈ hpanˍ kʼai leh Gʼuiˬ sha ka tiꞈ te taˍ piˇ ve mvuhˇ miˬ lo gaˬ˗e tuˬ yoˬ.—Heh puiˉ hkʼaw 25:5, 9.

Chi Pawˇluꞈ kʼoˆ htaˇ, “awˬ ceuˬ oˇ ve teˇ hpaˍ lehˬ, shu shaˍ tiꞈ gʼa tuˬ awˬ pon yawˇ hui awˬ hkʼaw hpehꞈ la leh, awˬ leh meuˇ ve awˬ yanˇ awˬ hkʼaw lo chehˇ ve ngaˬ hui htaꞈ maˍ laˇ tuˬ awˬ pon Liꞈ hpu hkʼaw lo bvuhꞈ taˍ ve yoˬ.” (1 Kawˇrenˍhtuˆ 10:7-11) Iˉsaˍreˍlaˆ chaw teˇ hpaˍ venˇ baˆ uiˍ jaˇ ve htaꞈ te yaꞈ leh ka tiꞈ te taˍ piˇ ve mvuhˇ miˬ hkʼaw maˇ gʼa loꞈ˗e ve Saˍtanˍ ha lehˬ jaˇ tehꞈ ngaˬ hui hkʼa dehꞈ shiˍ ve yoˬ. Chi htaꞈ pa taw, shaˍ tiꞈ peꞈ laˇ ve chi htaꞈ tawnˇ taˍ ve kʼo, ngaˬ hui cuˇ yiˍ cawˬ ve chaw hpehꞈ tuˬ yoˬ. Saˍtanˍ ngaˬ hui miˬ guiˬ awˬ suhˉ hkʼaw maˇ gʼa loꞈ˗e tuˬ te laˇ tcuh ve kʼo, yawˇ ha lehˬ jaˇ tuˬ tehꞈ ngaˬ hui hkʼa dehꞈ shiˍ ve yoˬ!

Chi beuꞈ teˇ co˗e ve Hkriꞈ yaˇ htaꞈ Saˍtanˍ va htaw yuˬ gaˇ ve yoˬ. Chi hkʼe te tuˬ yawˇ te jaw ve awˬ hkʼaˇ htaꞈ yehˇ ve yoˬ. Iˉsaˍreˍlaˆ chaw htaꞈ te tcuh ve awˬ hkʼaˇ hkʼe pehꞈ ve tzuhˆ ve htaꞈ yehˇ ve yoˬ. Chi beuꞈ teˇ co˗e pehꞈ ve tzuhˆ ve kawˆ tuˬ uiˍ jaˇ ve va hpehꞈ ve yoˬ. Awˉ lawˉ teˇ ceuˬ pehꞈ ve tzuhˆ ve va htaꞈ yaw tuˬ te laˇ ve lehˬ awˬ ku nyi ve awˬ han htaꞈ nyi ve yoˬ.

Chi beuꞈ teˇ co˗e awˬ ku nyi ve awˬ han nyi ve lehˬ chaw maˇ mawˬ kuiˬ lo kaꞈ nyi gʼa ve yoˬ. Ponˬ laˬ ve laiˉ chi hkʼawꞈ htaˇ a shu teˇ gʼaˇ awˬ ku nyi ve awˬ han nyi gaˇ ve kʼo, maˇ keunˍ ve awˬ han lonˉ maˍ kuiˬ lo, chaw mawˇ awˬ pon liꞈ kʼoˆ hawˇ kuiˬ lo gʼa kʼai ve yoˬ. Chaw teˇ hpaˍ shu mawˬ la ve htaꞈ kawˆ ve pa taw, yawˇ hui oˇ kaˬ lo maˇ kʼai. Yaꞈ hkʼaˇ chi beuꞈ teˇ co˗e, a shu teˇ gʼaˇ awˬ ku nyi ve awˬ han htaꞈ nyi gaˇ ve kʼo, in˗teu˗neꞈ hkʼaw loꞈ˗e leh kanˉ te kuiˬ lo maˇ heˆ leh kaˇ jehˇ htaˇ nyi gʼa ve yoˬ. Laiˉ mvuhˇ miˬ hkʼaw chaw teˇ hpaˍ awˬ ku ve awˬ han nyi gaˇ ve kʼo aˉ hkʼaw kaꞈ nyi gʼa ve yoˬ.

Chi hkʼoˆ kaꞈ tawˇ yaw tuˬ awˬ hkʼeun hkʼaw awˬ ku ve awˬ han nyi tuˬ sha ve yoˬ. Yawˇ hui yaꞈ kʼaw jaˇ lo te toˇ htaˇ, chaw gʼawˬ caˇ ve kaˇ hkʼaw maˇ heˆ leh aˬ miˍ lawˬ hkʼaw mui˗aꞈ htaˇ kaꞈ maˇ keunˍ ve awˬ han nyi gʼa ve yoˬ.

Awˬ ku nyi ve awˬ han nyi tuˬ sha ve pa taw, chi ve htaꞈ faˉ taˍ ve kaꞈ sha ve yoˬ. Hkʼe te leh chi laiˉ gʼaˇ htaꞈ oˇ htaˇ aꞈ kehˉ heuˆ la kuiˬ cawˬ jaˇ. Awˬ ku nyi ve awˬ han nyi ve chi lehˬ yehˬ kʼa, a shu yawˇ awˬ to htaꞈ yawˆ yan ve, leh laiˉ gʼaˇ dawˇ shiˍ puiˉ ve nyi ma htaꞈ te luˬ piˇ ve yoˬ. Chi aꞈ kehˉ luˬ jaˇ ve lehˬ yawˇ Yaˬhoˉvaˬ geh maˇ meuˆ daꞈ tuˬ te piˇ ve yoˬ. Awˬ ku nyi ve awˬ han lehˬ nyi ve chaw htaꞈ heuˆ la kuiˬ cawˬ jaˇ. Chi lehˬ yawˇ maw chaweh tawnˇ gʼa ve yoˬ. Yaꞈ hkʼaˇ, teˇ hpaˍ chi htaꞈ yuˬ baˬ tuˬ maˇ sha.

Yaꞈ hkʼaˇ, Saˍtanˍ ve va htaꞈ ponˬ tuˬ Yaˬhoˉvaˬ awˬ hkʼaˇ kʼoˆ maˍ laˇ ve yoˬ. Yaˬhoˉvaˬ ngaˬ hui htaꞈ haꞈ shaˉ tcuh gaˇ ve kʼo, Iˉsaˍreˍlaˆ chaw te ve hkʼe ngaˬ hui te cawˇ ve yoˬ. Oˇ ve lehˬ Yaˬhoˉvaˬ hkawˇ hkʼa dehꞈ “na yuˬ” ve htaꞈ kʼoˆ gaˇ ve yoˬ. (Tawˆ kʼai ve 19:5) Gʼuiˬ sha lehˬ awˬ ku nyi ve awˬ han htaꞈ canˇ ve tehꞈ ngaˬ hui hkʼa dehꞈ shiˍ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le?

Chi htaꞈ dawˇ nyi sheˍ: Gʼuiˬ sha Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve lehˬ, oˇ ve teˇ yanˇ awˬ nu ve chaw ceuˬ htaꞈ peunˍ daꞈ jaˇ. Awˬ liˇ tawˇ hkawˇ chi lanˇ venˇ hkʼe hpehꞈ leh yawˇ hui awˬ nu ve chaw ceuˬ ve kanˇ paˆ maˇ gʼa heuˆ la tuˬ haꞈ shaˉ piˇ taˍ ve yoˬ. (Bon maˍ ve 4:6-8) Awˬ liˇ tawˇ hkawˇ chi lehˬ Yaˬhoˉvaˬ pehꞈ ve tzuhˆ ve htaꞈ canˇ jaˇ ve tehꞈ hpeuꞈ maw laˇ ve yoˬ.

 Awˬ paˇ awˬ kui pehꞈ ve tzuhˆ ve htaꞈ kʼoˆ htaˇ Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, “nawˬ hui chehˇ jaw taˉ ve Eˇjiˇtuꞈ chaw, maˇ heˆ kʼo chi beuꞈ ngaˬ nawˬ hui htaꞈ shiˍ kʼai laˇ tuˬ ve Hkaˍnanˍ mvuhˇ miˬ hkʼaw chehˇ ve chaw hui te ve hkʼe nawˬ hui taˇ te.” Gʼuiˬ sha awˬ pon kʼo, Hkaˍnanˍ chaw a shaꞈ teꞈ hkʼaˇ maˇ daꞈ ve pa taw, yawˇ hui chehˇ taˍ ve mvuhˇ miˬ oˇ ve lehˬ chaꞈ chiˆ kuiˬ hpehꞈ la ve yoˬ.—Oˉ kʼoˍ pui ve 18:3, 25.

Yaˬhoˉvaˬ Hkaˍnanˍ chaw htaꞈ ciˍ yanˍ piˇ ve htawˇ, awˬ nu ve chaw kaꞈ pehꞈ ve tzuhˆ ve te chehˇ sheˍ. Ponˬ laˬ ve 1,500 hkʼawꞈ htaˇ, Hkriꞈ yaˇ awˬ nu ve mvuhˇ miˬ hkʼaw ca chehˇ˗e ve htaꞈ Pawˇluꞈ kʼoˆ ve, “pehꞈ ve tzuhˆ ve htaꞈ te tuˬ yawˇ hui a shu yawˇ awˬ to chiˇ aꞈ piˇ ve yoˬ.” Yawˇ hui lehˬ “yaꞈ taw puiˉ ve teˇ ceuˬ maˇ cawˬ leh, chaꞈ chiˆ ve teˇ ceuˬ le le htaꞈ te gaˇ jaˇ” ve yoˬ.(Eˇfeˇsuꞈ 4:17-19) Chi beuꞈ teˇ co˗e kaꞈ hkʼa shuˍ laiˉ gʼaˇ pehꞈ ve tzuhˆ ve htaꞈ te ve yaꞈ taw ve maˇ cawˬ. Awˬ tehˬ ve htaꞈ oˉ kʼoˍ pui ve chaw, pehꞈ ve tzuhˆ ve miˬ guiˬ yaˇ te ve hkʼe maˇ te tuˬ, te gʼa ve hkʼe te ve yoˬ.

Awˬ ku nyi ve awˬ han nyi ve lehˬ Gʼuiˬ sha ve awˬ meh luˬ tuˬ te piˇ jaˇ. Gʼuiˬ sha chaw yaˇ htaꞈ hpanˍ htaˇ yawˇ ve awˬ hoꞈ awˬ han hkʼe leˇ te hpanˍ taˍ ve yoˬ. Yawˇ chaw yaˇ htaꞈ aˬ htoꞈ ma cawˇ maˇ cawˇ ve kʼoˆ tcuh gʼa ve yoˬ. Gʼuiˬ sha cuˇ yiˍ cawˬ ve hkʼaw teˇ geh zuhꞈ ve keunˍ lawꞈ cawˇ lawꞈ ve yawˇ gu taˍ ve yoˬ. Chi lehˬ heuˆ daꞈ˗oˬ ve chaw ha lehˬ tuˬ awˬ pon gu taˍ ve yoˬ. (Awˬ hkuiˉ puiˍ 1:26-28; Tawˇ naˉ ve 5:18, 19) Yaꞈ hkʼaˇ, awˬ ku nyi ve awˬ han te ve chaw leh chi htaꞈ ga piˇ ve chaw hkʼaˬ hkʼe te ve le? Yawˇ hui Gʼuiˬ sha ve awˬ liˇ tawˇ hkawˇ htaꞈ a yeˇ maˇ te. Yaˬhoˉvaˬ htaꞈ maˇ yawˆ yan. Gʼuiˬ sha ve awˬ liˇ tawˇ hkawˇ htaꞈ a yeˇ maˇ te ve chaw leh, pehꞈ ve tzuhˆ ve te ve maˇ heˆ leh chi hkʼe te ve chaw htaꞈ ga piˇ ve kʼo Gʼuiˬ sha ciˍ yanˍ piˇ tuˬ yoˬ.—Roˉmaꞈ 1:24-27.

Awˬ ku nyi ve awˬ han htaꞈ nyi leh gʼaw ve chaw kʼo˗ehꞈ? Pyawˍ ve chi kawˆ tuˬ maˇ cawˬ tehꞈ teˇ hpaˍ dawˇ ve yoˬ. Awˬ tehˬ kʼo, yawˇ hui Yaˬhoˉvaˬ ve awˬ liˇ tawˇ hkawˇ htaꞈ maˇ yawˆ yan ve chaw htaꞈ ga piˇ chehˇ ve yoˬ. Awˬ ku nyi ve awˬ han htaꞈ yawˇ hui awˉ lawˉ tanˬ nyi htaˇ, chi hkʼe maˇ dawˇ. Yaꞈ hkʼaˇ, awˬ tehˬ ve Gʼuiˬ sha htaꞈ oˉ kʼoˍ pui ve chaw lehˬ awˬ ku nyi ve awˬ han htaꞈ canˇ cawˇ ve tehꞈ ngaˬ hui hkʼa dehꞈ shiˍ ve yoˬ. Liꞈ hpu hkʼaw kʼoˆ ve, “haiˬ ve awˬ ceuˬ htaꞈ canˇ ve chaw teˇ hpaˍ htaꞈ Gʼuiˬ sha haꞈ ve yoˬ.”—Chiˇ mvuh ve 97:10.

Chaw teˇ hpaˍ awˬ ku nyi ve awˬ han htaꞈ maˇ nyi tuˬ coˇ caˇ ve htawˇ, chi lehˬ maˇ sha. Ngaˬ hui  teˇ gʼaˇ le le maˇ biˇ ve chaw hpehꞈ ve pa taw, pehꞈ ve tzuhˆ ve te gaˇ ve nyi ma htaꞈ gʼa tawˍ daꞈ ve yoˬ. Chi hkʼoˆ kaꞈ a shu yawˇ awˬ to htaꞈ awˬ ku ve awˬ han nyi ve maˇ yaꞈ dawˇ tcuh ve yoˬ. (Yeˍraˍmiˆ 17:9) Yaꞈ hkʼaˇ, laiˉ gʼaˇ Hkriꞈ yaˇ hpehꞈ la htaˇ, chi htaꞈ tawˍ daꞈ gʼaˇ ve yoˬ. Nawˬ chi hkʼe leˇ gʼa hpuˇ chehˇ ve kʼo, awˬ lawn chi nawˬ htaꞈ awˬ gʼaˇ peꞈ laˇ ve yoˬ. Saˍtanˍ va htaw taˍ ve awˬ ku nyi ve awˬ han nyi ve htaꞈ nawˬ maˇ gʼa yaw tuˬ, Liꞈ hpu nawˬ htaꞈ ga laˇ gʼa ve teˇ geh nyi sheˍ.

Chi awˬ gʼuˇ suhˍ htaˇ kʼoˆ peuˬ ve hkʼa shuˍ, Iˉsaˍreˍlaˆ chaw maˇ cawˇ ve dawˇ hkʼaˇ cawˬ tcuh leh venˇ baˆ uiˍ jaˇ ve htaꞈ te yaꞈ ve yoˬ. Awˬ lawn chi hkʼe ve hpehꞈ la gʼa ve yoˬ. Yeˍsuˆ ve awˬ nyi paˍ Yaˍkoˆ kawˆ tuˬ uiˍ ve chi htaꞈ kʼoˆ htaˇ, “sheˉ lai puiˉ ve nyi ma lehˬ, yaˇ hu ve hkʼe yawˇ awˬ hkʼaw lo hu la leh, venˇ baˆ htaꞈ paw la piˇ ve yoˬ. Venˇ baˆ htawˇ, uiˍ la biˇ la ve teˇ yanˇ, suh ve teˇ ceuˬ htaꞈ paw la piˇ ve yoˬ.” (Yaˍkoˆ 1:14, 15) Chaw teˇ gʼaˇ ve nyi ma hkʼaw sheˉ lai puiˉ ve cawˬ maˇ la ve kʼo, tawˍ daꞈ gʼaˇ tuˬ haˍ jaˇ. Chi htaꞈ pa taw, ngaˬ hui pehꞈ ve tzuhˆ ve dawˇ hkʼaˇ htaꞈ yuˬ baˬ cawˇ ve yoˬ. Maˇ kʼawꞈ dawˇ nyi˗o.

Nawˬ maˇ cawˇ ve dawˇ hkʼaˇ cawˬ ve kʼo, laꞈ haˉ yuˬ baˬ sheˍ. Yeˍsuˆ kʼoˆ ve, “nawˬ ve laꞈ sheh teˇ paˉ maˇ kʼoˆ, nawˬ ve hkui sheh teˇ paˉ maˇ kʼoˆ, nawˬ htaꞈ te yaꞈ piˇ lawˬ ve kʼo, tawˆ baˬ˗oꞈ. . . . Nawˬ ve mehˆ shiˍ teˇ paˉ nawˬ htaꞈ te yaꞈ piˇ lawˬ ve kʼo, mehˆ shiˍ oˇ ve htaꞈ kʼehˉ baˬ sheˍ.” (Maꞈhtehˍ 18:8, 9) Yeˍsuˆ kʼoˆ ve, a shu yawˇ awˬ to htaꞈ gʼa te luˬ ve tehꞈ kʼoˆ gaˇ ve maˇ heˆ. Yawˇ tawˇ pa haˉ chi htaꞈ yehˇ ve lehˬ ngaˬ hui laꞈ haˉ gʼa yuˬ baˬ ve htaꞈ kʼoˆ gaˇ ve yoˬ. Awˬ ku nyi ve awˬ han nyi ve htaꞈ kʼoˆ htaˇ, beˆ maˍ laˇ hkawˇ chi hkʼaˬ hkʼe gʼaꞈ te gʼa tuˬ le?

Nawˬ awˬ ku nyi ve awˬ han htaꞈ mawˬ htaˇ, ‘teꞈ chiˉ maˇ heˆ hehˉ’ tehꞈ taˇ dawˇ. Nawˬ teˇ paˉ lo laꞈ haˉ hpfuhˆ peu sheˍ. Awˬ han laꞈ haˉ hoˆ sheˍ. Hkaw hpi˗u teuˇ maˇ heˆ leh tawˇ yaw tuˬ awˬ hkʼeun laꞈ haˉ hoˆ leh, daꞈ ve awˬ ceuˬ htaꞈ dawˇ nyi sheˍ. Chi hkʼe te ve kʼo, maˇ cawˇ ve dawˇ hkʼaˇ nawˬ htaꞈ uˉ peunˍ maˇ gʼa. Yaꞈ hkʼaˇ, nawˬ chi teˇ hpaˍ htaꞈ uˉ peunˍ gʼa ve yoˬ.

Nawˬ awˬ ku nyi ve awˬ han htaꞈ nyi jaw leh maˇ nyi˗o ve kʼo, teˇ pawˆ pawˆ kʼo maˇ dawˇ maˇ gaˇ ve hkʼaw kʼawꞈ dawˇ ve kʼo nawˬ hkʼaˬ hkʼe te  tuˬ le? Awˬ ku nyi ve awˬ han leh maˇ cawˇ ve dawˇ hkʼaˇ, chaw yaˇ ve nyi ma hkʼaw maw chaweh cawˬ gʼa ve yoˬ. Maˇ dawˇ maˇ gaˇ ve hkʼaw kʼawꞈ dawˇ la ve yoˬ. Chi hkʼe hpehꞈ ve kʼo nawˬ maˇ daꞈ ve htaꞈ te la ve yoˬ. Tawˇ pa haˉ te kʼo, a shu yawˇ awˬ to htaꞈ ga ve, leh awˬ nu ve chaꞈ chiˆ jaˇ ve htaꞈ te la ve yoˬ. Chi htaꞈ pa taw, nawˬ maˇ dawˇ maˇ gaˇ ve hkʼaw dawˇ hkʼaˇ chi hkʼe ve kʼawꞈ cawˬ la gʼa ve htaꞈ tawnˇ taˍ leh tawˍ daꞈ gʼaˇ tuˬ gu hehnˇ taˍ sheˍ.

Gʼuiˬ sha nawˬ htaꞈ te tcuh gaˇ ve dawˇ nyi leh coˇ caˇ sheˍ. Pawˇluꞈ kʼoˆ ve, “ngaˬ ve awˬ to htaꞈ chu˗iˬ leh, ngaˬ ve awˬ to htaꞈ uˉ peunˍ tuˬ te” ve yoˬ. (1 Kawˇrenˍhtuˆ 9:27) Dawˇ hkʼaˇ maˇ daꞈ ve awˬ ceˬ taˇ te tcuh. “Gʼuiˬ sha . . . a loˍ htaꞈ nawˬ hui shiˍ leh fuiˍ daꞈ gʼa tuˬ, nyi ma awˬ suhˉ kʼawꞈ pa leh, chaw awˬ suhˉ hpehꞈ la piˇ˗oˆ.” (Roˉmaꞈ 12:2) Awˬ to venˇ baˆ cawˬ ve hkawˇ na yuˬ ve aꞈ kehˉ, dawˇ ve leh te ve Gʼuiˬ sha loˍ ve hkʼe te ve kʼo ha lehˬ jaˇ tuˬ yoˬ tehꞈ tawnˇ taˍ sheˍ.

Maˇ cawˇ ve dawˇ hkʼaˇ cawˬ htaˇ, a shu yawˇ awˬ to Liꞈ hpu teˇ tawn tawn tawnˇ gʼa tcuh sheˍ. Tawˇ pa haˉ te kʼo, Chiˇ mvuh ve 119:37; Iˉsaˍyaˆ 52:11; Maꞈhtehˍ 5:28; Eˇfeˇsuꞈ 5:3; Kawˇlawˇsehˇ 3:5; leh 1 Hteˇsaˍlawˇniˆ 4:4-8 chi teˇ hpaˍ yoˬ. Nawˬ awˬ ku nyi ve awˬ han htaꞈ Yaˬhoˉvaˬ dawˇ ve hkʼe dawˇ ve kʼo, Yaˬhoˉvaˬ nawˬ htaꞈ hkʼaˬ hkʼe te tcuh gaˇ ve na gʼa tuˬ, Liꞈ hpu chi teˇ hpaˍ ga laˇ gʼa ve yoˬ.

Nawˬ pehꞈ ve tzuhˆ ve awˬ han nyi leh maˇ daꞈ ve dawˇ hkʼaˇ cawˬ leh tawˍ daꞈ maˇ gʼaˇ tehꞈ dawˇ ve kʼo˗ehꞈ? Yeˍsuˆ ve awˬ lawn htaꞈ nawˬ hkʼa dehꞈ henˇ yuˬ sheˍ. (1 Peˍtruˆ 2:21) Yeˍsuˆ Baˆtiˆsaˬ haꞈ yuˬ peuˬ leh Saˍtanˍ yawˇ htaꞈ laiˉ pawˆ lawˇ nyi piˇ ve yoˬ. Yeˍsuˆ hkʼaˬ hkʼe te ve le? Yawˇ beˬ ve lawˇ ve teˇ pawˆ le le tawˍ daꞈ gʼaˇ ve yoˬ. Beˬ ve lawˇ ve htaꞈ tawˍ daꞈ tuˬ yawˇ Liꞈ hpu laiˉ tawn yehˇ ve yoˬ. Yawˇ kʼoˆ ve, “Saˍtanˍ˗oˬ, kʼai loˬ!” Leh Saˍtanˍ kaꞈ kʼai ve yoˬ. Neˇ haiˬ htaꞈ tawˍ daꞈ tuˬ Yeˍsuˆ coˇ caˇ jaˇ. Nawˬ kaꞈ chi hkʼe te cawˇ ve yoˬ. (Maꞈhtehˍ 4:1-11) Saˍtanˍ leh yawˇ ve miˬ guiˬ nawˬ pehꞈ ve tzuhˆ ve dawˇ hkʼaˇ cawˬ tcuh gaˇ ve yoˬ. Yaꞈ hkʼaˇ, nawˬ caˉ leh tawˍ daꞈ sheˍ. Yaˬhoˉvaˬ ga laˇ tcuh ve kʼo, nawˬ awˬ ku nyi ve awˬ han nyi ve htaꞈ tawˍ daꞈ gʼaˇ tuˬ yoˬ.

Yaˬhoˉvaˬ ga laˇ tuˬ caˉ leh bon lawˬ sheˍ. Pawˇluꞈ kʼoˆ ve, “teˇ ceuˬ le le awˬ hkʼaw lo nawˬ hui bon lawˬ ve, lawˬ hkawˉ ve leh chiˇ mvuh ve awˬ hkʼaw lo, nawˬ hui hkʼa lawˬ gaˇ ve teˇ hpaˍ Gʼuiˬ sha htaꞈ hto piˇ˗oˆ. Oˇ hkʼe te ve kʼo, Gʼuiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ, nawˬ hui ve nyi ma leh nawˬ hui ve dawˇ hkʼaˇ teˇ hpaˍ htaꞈ Yeˍsuˆ Hkriꞈ awˬ hkʼaw lo haꞈ shaˉ laˇ tuˬ yoˬ.” (Hpiˇliˇpiˆ 4:6, 7) Nawˬ yaꞈ ve htaꞈ tawˍ daꞈ gʼaˇ tuˬ Gʼuiˬ sha nawˬ htaꞈ nyi ma gawˬ lehˍ ve peꞈ laˇ gʼa ve yoˬ. Nawˬ Gʼuiˬ sha geh jiˆ kʼai ve kʼo, “yawˇ nawˬ hui geh jiˆ laˬ tuˬ yoˬ.”—Yaˍkoˆ 4:8.

Saˍtanˍ ve va htaꞈ maˇ gʼa yaw tuˬ a shu yawˇ awˬ to htaꞈ haꞈ shaˉ ve kʼo, Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ yoˬ. Yeˍsuˆ kʼoˆ ve, “chi miˬ guiˬ htaꞈ uˉ peunˍ shehˍ hpaˇ [Saˍtanˍ] laˬ chehˇ ve yoˬ. Yawˇ lehˬ ngaˬ awˬ hkʼoˆ teꞈ chiˉ kanˇ paˆ maˇ cawˬ.” (Yoˇhanˬ 14:30) Aˬ htoꞈ ma te Yeˍsuˆ chi hkʼe kʼoˆ ve le? Yawˇ kʼawꞈ kʼoˆ ve, “ngaˬ htaꞈ peu laˇ shehˍ hpaˇ lehˬ, ngaˬ geh teˇ geh chehˇ taˍ ve yoˬ. Ngaˬ teˇ gʼaˇ tiˉ gʼa chehˇ tuˬ, yawˇ ngaˬ htaꞈ maˇ baˬ taˉ laˇ. Awˬ lawn kʼo, yawˇ nyi ma cawˇ ve awˬ ceuˬ teˇ hpaˍ htaꞈ ngaˬ hkʼaˬ htaˆ kaꞈ te chehˇ ve yoˬ.” (Yoˇhanˬ 8:29) Nawˬ Yaˬhoˉvaˬ nyi hkʼaˇ suh tuˬ te ve kʼo, yawˇ nawˬ htaꞈ maˇ baˬ taˉ. Saˍtanˍ va htaw taˍ ve awˬ ku nyi ve awˬ han nyi ve htaꞈ jaw hpaw˗e ve kʼo, nawˬ htaꞈ yawˇ hpeh yuˬ maˇ gʼa taˬ.