OMU vaIsalele vapwile nakulizanga vazauke Kalwiji Yotau mangana vengile mulifuchi lize Kalunga avashikile, kwejile vangeji nakuvameneka. Ava vangeji vapwile mapwevo vakulifuchi lyeka, kaha vejile nakusanyika malunga vavaIsalele mangana vayenga kuchiwanyino chakulya nakunwa. Ava malunga vavaIsalele vevwile kuwaha chikuma, mwomwo chuma kana vachimwene kupwa chakulipwila. Vawahililile chikuma kupwa namasepa vavahya, nakulihizumuna nakukina. Numba tuhu visemwa navilinga vyavaze mapwevo vyalimbalakile naJishimbi jize Kalunga ahanyine vaIsalele, oloze malunga vavaIsalele vashinganyekele ngwavo vanahase tuhu kuya kaveshi kuhasa kuvahungumwisako.

 Jino vyuma muka vyasolokele? Mazu aKalunga atulweza ngwawo: “Vamwe vaputukile kulinga ujila navana vavaMowave vamapwevo.” Kaha nawa vaze mapwevo vasakile malunga vavaIsalele vaputuke kulemesa tulunga vamakuli. Kahomu mukiko valingile. Shikaho “Yehova akwachilile vaIsalele matoto.”—Kula. 25:1-3.

Ava vaIsalele vahokwele Jishimbi jaKalunga mujijila jivali: Valifukwile kumakombelo kaha nawa valingile ujila. Vatu vavavulu vafwile mwomwo yakulikanga kuli Kalunga. (Kulo. 20:4, 5, 14; Lushi. 13:6-9) Mwomwo ika natwambila ngwetu chuma valingile chapihile chikuma? Mwomwo vapwile hakamwihi nakwingila mulifuchi lyalushiko. Kachi nge ava malunga kavahokwele Jishimbi jaKalungako, kachi vaIsalele vosena vazaukile Yotau nakwingila muLifuchi lyaLushiko.—Kula. 25:5, 9.

Kaposetolo Paulu asonekele havyuma kanevi ngwenyi: “Vyumevi vyasolokele kuli vakiko mangana vipwenga vyakutalilaho, kaha vavisonekelele kutuhuhumuna etu, etu vene tuli nakuyoyela kukukuma chakatwamino kamyaka yino.” (Koli. 1, 10:7-11) Chikupu vene, Satana awahililile chikuma hakumona vaIsalele navalinga shili kaneyi yayinene, nakuvalingisa vahone kwingila muLifuchi lyaLushiko. Shikaho, nachipwa chamwaza kukavangiza mazu kana awa akuhuhumuna mwomwo Satana ali nakusaka kutuhonesa nayetu kwingila mulifuchi lyalihya.

Satana ali nakuhungumwisa vaka-Kulishitu kuzachisa tufuta vaze nazachisanga kunyima hakuhungumwisa vatu vavavulu. Ngana muze tunashimutwila, Satana ahungumwishile vaIsalele valinge ujila. Namakumbi ano nawa achili lika nakuhungumwisa vatu valinge ujila. Kutanga chipwe kutala mivwimbimbi yavatu vali uselesele hijila yimwe yize Satana anakuhungumwishilamo vatu.

Makumbi ano vatu vanahase kutanga chipwe kutala mivwimbimbi yavatu vali uselesele chakuzeneka vakwavo kutachikiza. Kunyima, mutu uze asakilenga kutanga chipwe kutala mivwimbimbi yavatu vali uselesele, ayilenga kuchihela kuze vatalishilenga mivwimbimbi kana chipwe kulanda mikanda yize yahanjikilenga havatu vali uselesele. Vatu vavavulu vevwilenga sonyi kuya kuvihela kana, mwomwo vashinganyekelenga ngwavo navavamona kuvatu. Oloze makumbi ano vatu vaze vali naInternet vanahase kutanga chipwe kutala mivwimbimbi yavatu vali uselesele kala kweshokwo vali. Kaha nawa mumafuchi amavulu lunga chipwe pwevo nahase kutala mivwimbimbi yavatu vali uselesele oku ali hazuvo.

Kaha nawa jishinga jinalingisa vatu vachiwane kupwa chachashi chikuma kutala chipwe kutanga vyavatu vali uselesele. Vatu vanahase jino kutala vyuma kana hajishinga javo hakutambuka mujijila chipwe mujiminyau.

Hakuwana nge chinapu jino chachashi vatu kutanga chipwe kutala mivwimbimbi yavatu vali uselesele chakuzeneka kuvamona, ngocho vatu vavavulu makumbi ano vali muukalu chikuma mwomwo yakutala chipwe kutanga vyuma kana kuhambakana nomu chapwile kunyima. Vatu vavavulu vali nakujiha malo avo, nakuhona kulivumbika vavene, kaha nawa vivezu vyavo vili nakufwa. Chachinenenyi veji kujihanga usepa wavo naKalunga. Shikaho, nachipwa chakutamo kukukulula ngwetu kutanganga chipwe kutalanga mivwimbimbi yavatu vali uselesele cheji kunehanga ukalu waunene chikuma. Numba tuhu mutu nahase kwecha tato yakutanganga chipwe kutalanga mivwimbimbi yavatu vali uselesele, oloze nahase kumonanga lika ukalu hatando yayisuku.

Twatela kutachikiza ngwetu Yehova mwatukafwa mangana tufungulule aka kafuta kaSatana. Kachi nge tuli nakusaka Yehova atukinge kaha twatela ‘kumwononoka,’ keshi nge muze valingile malunga vavaIsaleleko. (Kulo. 19:5) Shikaho twatela kutachikiza ngwetu Yehova ahunga kutanga chipwe kutala mivwimbimbi yavatu vali uselesele. Mwomwo ika tunambila ngocho?

Anukenu ngwenu jishimbi jize Kalunga ahanyine vaIsalele japwile jamwaza chikuma kuhambakana javaka-mafuchi eka aze apwileko halwola kana. Jishimbi kana jakingilenga vaIsalele kuvilinga vyavipi vize valingilenga vatu vaze vavajingilikile. (Lushi. 4:6-8) Kaha nawa jasolwele hatoma nge, Yehova ahunga ujila.

 Yehova alwezele vaIsalele valihende kuvilinga vyavipi vapwile nakulinga vaka-mafuchi valihachile navo, avahuhumwine ngwenyi: “Kanda namukalinga vyuma vize veji kulinganga vatu vamulifuchi lyaKanane muze nguli nakumitwalako. . . Lifuchi lyavo lyosena linapihi, ngocho nanguvazangamisa hakuhenga chavo.” Hakuwana nge Kalunga apwa wajila, shikaho vilinga vyavaKanane avimwene kupwa vyavipi chikuma nakumulingisa amone lifuchi lyavo kupwa lyaunyengwe.—Levi 18:3, 25.

Numba tuhu Yehova azangamishile vaKanane, oloze vatu vatwalileho lika kulinga ujila. Omu mwahichile myaka yakuhambakana 1, 500, Paulu alumbunwine vyuma vyapwile nakusoloka mumafuchi muze mwapwile vaka-Kulishitu ngwenyi: “Hakuwana nge vivezu vyavo vinambumbula lyehi, ngocho vanalihane vavene kuvilinga vyakuzunguma mangana vazatenga vyuma vyamajilo vyeka navyeka nakupwa nachipululu.” (Efwe. 4:17-19) Namakumbi ano nawa, vatu vavavulu vali nakulinga vilinga vyamajilo chakuzeneka kwivwa sonyi. Shikaho, vaka-Kulishitu vatela kulihenda kuvilinga vyamajilo vali nakulinga vatu muno mukaye.

Kutanga chipwe kutalanga mivwimbimbi yauselesele kachaneha kavumbi hali Kalungako. Yehova atengele vatu muchifwanyisa chenyi kaha nawa vakulifwana naikiye. Atutengele nauhashi wakutachikiza vyuma vyakwoloka nevi vyakuhenga. Shikaho chapwile chakutamo kuli ikiye kuhakako jishimbi jakutalisa kukulisavala chalunga napwevo. Kulisavala achihakileko mangana vatu vaze valimbata valivwisenga kuwaha muulo wavo. (Kupu. 1:26-28; Vishi. 5:18, 19) Nyi ngachilihi vatu vaze vali nakulovolanga mivwimbimbi yauselesele chipwe vaze veji kuyikundwizanga? Vatu kana veji kuhokolanga lushimbi lwaKalunga lwakwoloka. Chikupu vene, vatu vaze veji kukundwizanga mivwimbimbi kana veji kuneha kasautu kakanene hali Yehova. Shikaho Yehova mwakasopesa vosena vaze veji kulovolanga mivwimbimbi kana, chipwe vaze veji kuyikundwizanga.—Loma 1:24-27.

Ngachilihi vatu vaze veji kutanganga chipwe kutala eyi mivwimbimbi chakusakula kumichima yavo? Vatu vamwe vanahase kushinganyeka ngwavo kulinga chuma kana kachapwa chapondeko. Chipwe ngocho, vatela kutachikiza ngwavo navakiko vali nakukundwiza vatu vaze veji kuhokolanga jishimbi jaYehova, numba tuhu halwola vaputukile kutala mivwimbimbi kana kavashinganyekele ngochoko. Shikaho, Mbimbiliya yasolola hatoma ngwayo vaka-kulemesa Kalunga vamuchano vatela kuhunga mivwimbimbi yauselesele. Mbimbiliya yahuhumuna nawa ngwayo: “Enu mwazanga Yehova, hungenunga vyuma vyavipi.”—Samu 97:10.

Navatu vaze kavasaka kutala mivwimbimbi yauselesele vanahase kuchiwana kupwa chachikalu kulinga  ngocho. Etu vatu katwakupukako, shikaho twatela kukilikita chikuma hakusaka kuhonesa peha yayipi yakusaka kulisavala. Kaha nawa michima yetu yakuhona kukupuka yinahase kutulingisa tushinganyeke ngwetu kutala mivwimbimbi yauselesele kachahengako. (Yele. 17:9) Chipwe ngocho vatu vavavulu vaze vanalinangula muchano nakupwa vaka-Kulishitu vanahonesa tato kana. Kutachikiza ngwenu kuli vatu vamwe vanahonesa tato kaneyi chinahase kumikolezeza nayenu kachi nge muli nakufwila kwecha tato kana. Talenu omu Mazu aKalunga anahase kumikafwa mufungulule aka kafuta kaSatana.

Ngana muze twavulukanga lyehi, vaIsalele vechelelele vishinganyeka vyavipi vivengise muukalu waunene. Chuma kana chinahase kusoloka nakuli etu makumbi ano. Yakova songo yaYesu alumbunwine ngwenyi: “Mutu himutu . . . kufwila chamumuchima wenyi ivene nachimwonga nakumuzondola. Jino kufwila kana omu nachimita, cheji kusemanga shili.” (Yako. 1:14, 15) Kachi nge mutu mwechelela vishinganyeka vyavipi mumuchima wenyi, kaha chinahase kumulingisa avulumune shili. Shikaho katwatela kushinganyekanga havyuma vyavipiko.

Kachi nge mweji kushinganyekanga vyuma vyavipi, kaha mwatela kuzachilaho washiwashi. Yesu ambile ngwenyi: “Kachi nge livoko lyove, chipwe lihinji lyove lili nakukuhukanyisa, livatuleko nakulimbila. . . . Kaha nawa kachi nge liso lyove lili nakukuhukanyisa, litombongonyemo nakulimbila.” (Mateu 18:8, 9) Yesu kapwile nakuvuluka ngwenyi, twatela kuvatula chilyo chimwe chamujimbako. Oloze apwile nakulumbununa ovyo chapwila chachilemu kuhonesa washi vyuma vize vyeji kulingisanga mutu apwenga navishinganyeka vyavipi. Uno tunahase kukavangiza ngachilihi awa mazu kutalisa kuchihande chakutanga chipwe kutala mivwimbimbi yauselesele?

Kachi nge munawane mivwimbimbi yauselesele, kaha kanda kwamba ngwenu, ‘kayeshi kuhasa kungwenyekako.’ Oloze mwatela kutala kweka hahaze vene. Kachi nge yineza hachisaji chenu chamivwimbimbi kaha mwatela kuchijima washiwashi. Kaha nawa nge munayiwane hashinga chipwe hakopyuta yenu mwatela kujima chakuzeneka kukwata kumashinde, nakushinganyeka havyuma vyamwaza. Kulinga ngocho nachimikafwa muhone kwechelela vishinganyeka vyavipi vimifungulule.

Ngachilihi nge munalitwamina kutanga chipwe kutala mivwimbimbi yauselesele oloze muchili nakwanukanga mivwimbimbi kana? Cheji kumbatanga  lwola numba mutu avulyame mivwimbimbi yauselesele yize atalilenga, chipwe kuvulyama vishinganyeka vyavipi vize apwilenga navyo. Vyuma kana vinahase kwiza muvishinganyeka vyamutu kala lwola. Echi chinahase kulingisa mutu aputuke kushinganyeka kulinga vyuma vyakufwana nge kulisokota kuusonyi. Shikaho tachikizenu ngwenu vishinganyeka kana vinahase kwiza, oloze mwatela kwijiva mwakuvifungulwila.

Fwilenunga kuzata nangolo mangana mupwenga navishinganyeka navilinga vize navivwisanga Yehova kuwaha. Mwatela kupwa ngana mwakaposetolo Paulu uze afwililile “kulukulanga mujimba [wenyi] nakuwingisa muundungo.” (Koli. 1, 9:27) Kamwatela kwechelela vishinganyeka vyavipi vimingise muundungoko. Oloze “alumukenu hakulingisa vishinganyeka vyenu kupwa vyavihya, mangana mutachikize kanawa mwaya muchima waKalunga, ngwenu mwamwaza, mukiko vetavila, kaha mwakukupuka.” (Loma 12:2) Tachikizenu ngwenu: Kulinga mwaya muchima waKalunga cheji kunehanga kuwahilila chikuma, oloze kulinga vyuma vyauvumbi kachaneha kuwahililako.

Laminenunga Visoneka vimwe mumutwe. Kachi nge namuputuka kushinganyeka vyuma vyavipi, kaha anukenu visoneka kana. Visoneka vyakufwana nge Samu 119:37; Isaya 52:11; Mateu 5:28; Wavaka-Efwesu 5:3; Wavaka-Kolose 3:5; naWavaka-Tesolonyika 1, 4:4-8 navimikafwa mupwenga navishinganyeka vize navivwisa Yehova kuwaha nakutachikiza vyuma vize asaka mulingenga.

Nyi ngachilihi nge shimbu jimwe munakuchiwana kupwa chachikalu kwecha kushinganyekanga chipwe kutalanga vyuma vyauvumbi vize mwalingilenga kunyima? Fwilenunga kukavangiza chakutalilaho chaYesu. (Petu. 1, 2:21) Omu valingile Yesu hivanamumbapachisa lyehi, Satana atwalilileho lika kumweseka. Uno Yesu alingile vyuma muka? Yesu azachishilenga visoneka mangana afungulule vyeseko vyaLiyavolo. Kufumaho, Yesu ambile ngwenyi: “Fumaha, ove Satana!” Kaha Satana amusezele. Yesu kazeyele kufungulula vyeseko vyaLiyavoloko, shikaho nayetu katwatela kuzeyako. (Mateu 4:1-11) Satana nakaye kenyi navatwalaho lika kumilingisa mushinganyekenga havyuma vyauvumbi, oloze kanda kuzeya kufungulula tufuta twenyiko. Munahase kufungulula cheseko chakutanganga chipwe kutalanga mivwimbimbi yauselesele. Yehova nahase kumikafwa mufungulule muka-kole wenu.

Fwilenunga kupendamina hali Yehova mukulomba. Paulu ambile ngwenyi: “Mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu kuhichila muli Kulishitu Yesu.” (Fwili. 4:6, 7) Kuunda chaKalunga nachimikafwa mulihende kukulinga shili. Nge namupandama kuli Yehova, “kaha mwapandama kuli enu.”—Yako. 4:8.

Chuma chachinene chikuma nachitukinga kuvilinga vyavipi, shina kupandama kuli Mwata wavyuma vyakutenga vyosena. Yesu ambile ngwenyi: “Muka-kuyula kano kaye [Satana] ali nakwiza, kaha keshi nangolo hali amiko.” (Yowa. 14:30) Mwomwo ika Yesu ahanjikilile mazu kana nakumika? Ambile ngwenyi: “Uze angutumine ali nayami. Kangusezele uka wamiko, mwomwo shimbu yosena ngweji kulinganga vyuma vyakumwivwisa kuwaha.” (Yowa. 8:29) Kachi nge namulinganga mwaya muchima waYehova, kaha keshi kukamisezako. Ngocho, fwilenunga kulihenda kukutanga chipwe kukutalanga mivwimbimbi yauselesele, kaha Satana keshi kupwa nangolo hali enuko.