MPINJI yadiloñesheleñawu aIsarela kuzambuka Kaloña Yodana nakwiñila mwituña dayikaniniyi Nzambi, kwenjili antu nakuyitala. Awa antu adiña ambanda akwacheñi nawa ayilili aIsarela nawu ayi nawu kuchawija. Chamwekeni neyi hikukoleka kwabulaña kumwekana. Kukwata mabwambu, kuhañana, kuda yakuda yayiwahi kwatiyishaña kuwaha. Hela chakwila tushidikilu niyilwilu yanawa ambanda hiyadiña neyi yayilejeliwu aIsarela muNshimbi jaNzambiku, amayala amakwawu aIsarela atoñojokeli nawu: ‘Akutuluwañesha wanyi, tukwikala asoñama.’

 Yumanyi yamwekeni? Bayibolu yashimuna nawu: “Antu atachikili kwila wuvumbi nawanyana kawaMowabi awambanda.” Kafwampi awa ambanda akeñeleña aIsarela kudifukula kudi anzambi akutwamba. Nawa adifukwili! Kuhosha hohu walala, “Yehova wazuwili nawaIsarela.”—Kuch. 25:1-3.

Awa aIsarela amotokeli Nshimbi jaNzambi munjila jiyedi: Adifukwili kudi ankishi nawa elili wuvumbi. Amavulu afwili muloña wukubula kumwovwahila Nzambi. (Kwid. 20:4, 5, 14; Kuhit. 13:6-9) Muloñadi yilwilu yawu chiyaleteli yihuñu? Muloña wampinji. Neyi awa amayala abulili kufumpa Nshimbi jaNzambi, kachi awa makombakaji awaIsarela azambukili Yodana nakwiñila Mwituña daChikaninu.—Kuch. 25:5, 9.

Kutalisha haniyi yuma yamwekeni, kapostolu Pawulu wasonekeli nindi: “Iyi yuma yayimwekeneni kulonda yiikali yakutalilahu kudi etu, nawa ayisonekeli kulonda yiikali yakutusoñamisha etu tunakushakama kukukuma kwanshakaminu yamakonu.” (1 Kor. 10:7-11) Chakadi nikujina, Satana wazañaleli hakumona aIsarela anakoñi nshidi nawa chakwila akañenyi kwiñila Mwituña daChikaninu. Twatela kudizila kuyiluwa yawu yakoñeliwu, muloña tuneluki netu Satana nateli kutiya kuwaha neyi yatukañesha kwiñila mwituña daNzambi dadiha.

Satana walukukaña akaKristu, kuzatisha tufuta twelukayi nawa tunazatishiyi nankashi kudi antu amavulu. Neyi chitwadiza hakusambila hadi aIsarela, Satana wazatishili wuvumbi. Makonu, wuvumbi wunatwalekihu kwikala muhetu wafwana wunakuzatishayi. Njila yimu yabadika mutunateli kufwila mumuhetu wawuvumbi hikutala nyevulu yanzekesi.

Makonu, muntu nateli kutala nyevulu yanzekesi chakadi akwawu kwiluka. Yaaka yayivulu yinahitihu, antu akeñeleña kutala nyevulu yanzekesi ayileña kwatalishileñawu nyivwimbimbi nakutala nyevulu yanzekesi hela kwalandishileñawu nyikanda nakulanda nyivwimbimbi yanzekesi hela nyikanda yanyevulu yanzekesi. Antu amavulu ayileña wanyi kunawa maluña muloña atiyileña nsonyi nawu akuyimona kudi antu. Ilaña yinu mpinji, antu anakuya haintaneti anateli kutala nyevulu yanzekesi kunyidimu hela tuhu adi mumotoka. Nawa mumatuña amavulu, muntu wudi wejima nateli kutala nyevulu yanzekesi chakadi kufuma hetala.

Cheñi, chidi chaswayi kutala nyevulu yanzekesi kuzatisha mafoni nimatabuleti. Hampinji yinakwendawu antu munyotoka hela hamaseki chidi chaswayi kutala nyevulu yanzekesi hamafoni hela hamatabuleti.

Chineli chidi chaswayi kutala nyevulu yanzekesi chakadi antu amakwawu kwiluka, nyevulu yanzekesi yinakisi antu amavulu makonu kubadika kunyima. Antu amavulu atalaña nyevulu yanzekesi wulu wawu wafwaña, adisawishaña nawa akisaña chinleji chawu. Chuma chasweja kutama, akisaña wubwambu wawu naNzambi. Munateli kwiluka nenu nyevulu yanzekesi yakisaña antu ayitalaña. Kakavulu, antu atalaña nyevulu yanzekesi ekalaña nachilonda muyitoñojoka. Yilonda yeniyi yinateli kukusuka chovu-chovu, ilaña yashiyaña chibata cheneni muwoñu.

Hela chochu, twatela kwiluka netu Yehova watukiñaña kuniwu muhetu waSatana. Neyi tunakukeña netu Yehova yatukiñi, twatela kwila chuma chakañenyi kwilawu aIsarela, ‘kumwovwahila.’ (Kwid. 19:5) Twatela kwiluka chikupu netu Nzambi wahela nyevulu yanzekesi. Muloñadi chitunahosheli mwenimu?

Toñojokenu hachumichi: Nshimbi jaNzambi jayinkeliwu aIsarela jadiña jambukaku nanyuza yikwawu. Kufwana mpwembu, nshimbi yayikiñileña aIsarela kuyuma yatama yakoñeleñawu antu ayinyeñumukili. (Kuhit. 4:6-8)  Nshimbi jeniji jalumbulwili chalala hatooka nawu: Yehova wahela wuvumbi.

Hakushimuna yilwilu yatama yakoñeleña nyunza yashakamineña kwakwihi, Yehova wayilejeli aIsarela nindi: “Mwelañawu mwituña daKenani munukuyitwala, bayi mwakelaña mwokuku. . . Ituña dineli dehi damajilu dichi chinukushikijilamu kuluwa kwadu.” Kudi Nzambi yawaIsarela wajila, chihandilu chawaKenani chadiña chatama chakwila ituña mwashakamineñawu dekalili damajilu, datamini chikupu.—Lev. 18:3, 25.

Antu amakwawu atwalekelihu kwila wuvumbi hela chakwila Yehova wayibabesheli aKenani. Hadi yaaka 1,500 yahitilihu, Pawulu walumbulwili matuña mwashakamineñawu akaKristu nindi “chalekeliwu kutiya nsonyi.” Kafwampi, “adihanini awenawu kuyilwilu yawukapwa nsonyi nikwila yuma yawuzondu yejima nalwisu.” (Efwe. 4:17-19) Antu amavulu makonu, ayivumbi nawa atiyaña nsonyi wanyi. Dichi akwakudifukula alala atela kutondolwela yilwilu yatama yawuvumbi yakoñañawu antu amukanu kaayi.

Kukwata nikutala nyevulu yanzekesi chamwekeshaña kubula kumulemesha Nzambi. Nzambi waleñeli antu muchifwanisha chindi nawa neyi chekalayi. Watuleña nawuswa wakwiluka chuma chachiwahi nichatama. Nzambi welukili chashililiku nshimbi hansañu yawuvumbi. Washiliku kubulakana kulonda antu adisumbula adizañalesheña. (Kutach. 1:26-28; Yish. 5:18, 19) Yumanyi yinakwilawu antu atuñaña nikutandisha nyevulu yanzekesi? Adiwulaña nshimbi jaNzambi jaloña. Antu atiyakeshaña nyevulu yanzekesi amusawulaña Yehova. Nzambi wakasompesha antu adiwulaña nshimbi jindi, anakutuña hela kutandisha yuma yawuzondu.—Rom. 1:24-27.

Indochu antu atañaña hela kutala nyevulu yanzekesi iku aneluki nawu chatama? Amakwawu anateli kuhosha nawu yafwana wanyi. Hela chochu, anakukwasha antu abulaña kulemesha nshimbi jaYehova. Hadaha hichadiña muyitoñojoka yawu kutala nyevulu yanzekesiku. Hela chochu, Bayibolu yahosha hatoka nawu akwakudifukula aNzambi atela kuhela chikupu nyevulu yanzekesi. Bayibolu yakonkomwenaña nawu: “Enu mwamukeña Yehova helenu yatama.”—Mas. 97:10.

 Niantu akeñaña kuleka kutala nyevulu yanzekesi chinateli kuyikalila kuleka. Twawanina wanyi, dichi twatela kuzata nañovu kulonda tutondolweleña mpwila yatama yawuvumbi. Kubombelahu, chineli twawanina wanyi, tunateli kutachika kutoñojoka netu chatama wanyi kutala nyevulu yanzekesi. (Yere. 17:9) Ilaña antu amavulu anekali akaKristu anashindi iku kukala. Neyi mwiluka chumichi, chikuyikwashaku ninenu kutondolwela kutala nyevulu yanzekesi. Talenu Izu daNzambi chidinateli kuyikwasha kutondolwela kutala nyevulu yanzekesi.

Neyi chitwashimuna hakusambila, aIsarela amavulu etejeli yilwilu yatama yaletesheli kukala kuyimwekeni. Chumichi chinateli kumwekana nimakonu. ManakwaYesu wakuwanamu Yakoba walumbulwili iwu wubanji nindi: “Muntu wejima . . . [amukokolaña] nikumudimbeka kukufwila kwindi yomweni. Kufumahu, neyi kufwila kusweja chikupu, kwaleñelaña muntu kukoña nshidi.” (Yak. 1:14, 15) Neyi yilwilu yatama yitachika mumuchima wamuntu, washimbulaña wanyi nakukoña nshidi. Dichi twatela kuleka kutoñojoka hayuma yatama nawa bayi tushaña maana hayuma yeniyiku.

Neyi mumona nenu himukutachika kutoñojoka hawuvumbi, zatilenuhu swayi-swayi. Yesu wahosheli nindi: “Dichi neyi chikasa cheyi hela mwendu weyi wakuhukeshaña, wuketuli wuwunatili kwakulehi. . . . Cheñi, neyi disu deyi dakuhukeshaña, difumishi wudinatili kwakulehi.” (Mat. 18:8, 9) Yesu hahosheleña nindi tunoni mpoku nakudikatisha etu aweniku. Wazatishileña chishimu kulonda yatukwashi kutiyishisha muloña waweni waleteshaña tutoñojokeña hayuma yatama, nikuzatilahu swayi-swayi nakuhimpa yitoñojoka. Tunateli kuzatisha ñahi iku kufumba sweje-e kutalisha kunsañu yanyevulu yanzekesi?

Neyi mumona nyevulu yanzekesi bayi mutoñojoka nenu ‘mukuumikaku.’ Shikenenu kutala mumbadi. Jimenu Tv swayi-swayi. Jimenu kompyuta, foni hela tabuleti yenu. Toñojokenuña hayuma yayiwahi. Kwila mwenimu kukuyikwasha kubula kwiteja yitoñojoka yatama kwikala muyitoñojoka yenu.

Indi neyi chakwila mwaleka dehi kutala nyevulu yanzekesi, ilaña mwanukaña yumiyi mumpinji-mumpinji? Nyevulu yanzekesi hela yitoñojoka yinateli kushakama muyitoñojoka yamuntu hadi mpinji yayilehi. Yinateli kuvumbuka kala mpinji. Neyi chuma chamuchidiwu chinamwekani, muntu nateli kutachika kutoñojoka kukoña yuma yawuzondu, yidi neyi kudichuka. Mwatela kwiluka nenu yitoñojoka yamuchidiwu yinateli kwinza, dichi mwatela kudiloñesha kulonda muyishindi.

Dichi toñojokenuña nikwila yuma neyi chakeñañayi Nzambi nindi mwileña. Ikalenu neyi kapostolu Pawulu, wafwilileña ‘kubabesha mujimba [windi] nakuwutwala muwuduñu.’ (1 Kor. 9:27) Bayi mwiteja yitoñojoka yatama yiyitwali muwuduñuku. “Balumukenu kuhitila mukuhimpa yitoñojoka yenu kulonda mwiluki nkeñelu yaNzambi nenu yayiwahi.” (Rom. 12:2) Mwatela kwanuka nenu: Kutoñojoka nikwila yuma kwesekeja nankeñelu yaNzambi kwabadika kwovwahila yitoñojoka yatama.

Anukenuñahu mavasi amakwawu amuBayibolu. Neyi yitoñojoka yatama hiyikwinza mumutu wenu, tachikenu kutoñojoka haniji nsona. Nsona jidi neyi Masamu 119:37; Isaya 52:11; Matewu 5:28; Aefwesesa 5:3; Akolosi 3:5; 1 Atesalonika 4:4-8 jikuyikwasha kumona nyevulu yanzekesi neyi chayimonañayi Nzambi nawa chuma chakeñañayi nindi mwileña.

Munateli kwila ñahi neyi mpinji yikwawu munakukañanya kuleka kutala hela kutoñojoka hayuma yatama? Imbujolenu yuma yeliliyi Yesu nakanañachima. (1 Pet. 2:21) Hanyima yakwila Yesu anamupapatishi dehi, Satana watwalekelihu kumweseka. Yesu welili ñahi? Watwalekelihu kukaana. Wazatishileña jinsona hakukaana kweseka kwejima kwamwesekeliwu kudi Satana. Wahosheli nindi: “Fumaku aha, eyi Satana!” nawa Satana wamushiyili. Neyi chabuliliyi Yesu kuzeya kuzuña naDiyabolu, ninenu bayi muzeya kuzuña nindiku. (Mat. 4:1-11) Satana nikaayi kindi akutwalekahu kwinzesha yitoñojoka yenu nayuma yatama, ilaña bayi muleka kulwishaku. Mukutwesha kuleka kutala hela kutoñojoka hanyevulu yanzekesi. Yehova nateli kuyikwasha kushinda chilumbu chenu.

Twalekenuhu kulomba kudi Yehova kulonda yayikwashi. Pawulu wasonekeli nindi: “Mulejenuña Nzambi yuma yonsu yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu kuhitila mudi Kristu Yesu.” (Fwi. 4:6, 7) Kuwunda kwaNzambi kukuyikwasha kubula kwila yuma yaheña. Neyi muswina kwakwihi naYehova, “niyena wukuswina kwakwihi nanenu.”—Yak. 4:8.

Anateli kutukiña kunyihetu yaSatana neyi tuhemba wubwambu wetu naMwanta wakuleña kwayuma yejima. Yesu wahosheli nindi: “Nyuuli wakaayi [Satana] nakwinza nawa hakweti ñovu hadi amiku.” (Yow. 14:30) Muloñadi Yesu chakuhweleleliyi mwenimu? Walumbulwili nindi: “Owu wantemesheli wudi nanami; hanlekeli kankawamiku, muloña mpinji yejima nelaña yuma yamutiyishaña kuwaha.” (Yow. 8:29) Neyi mwilaña yuma yikumuzañalesha Yehova muyuma yejima yimwelaña, yena hamba kayishiyaku. Tondolwelenuña kutala nyevulu yanzekesi nawa Satana hakuyilawulaku.