YA CHʼIXTOQ kyikʼx aj Israel toj nim aʼ Jordán tuʼntzun kyokx toj txʼotxʼ otoq tzaj ttziyen Dios kye. Jun qʼij, e pon junjun xuʼj te juntl tnam qʼol jun txokbʼil kyiʼj qeju xinaq moqa ichan tuʼn kyxiʼ toj jun matij wabʼj. Jakutoq tzʼok jlu te jun tbʼanel ambʼil kye tuʼn tkanet akʼaj kyamiw, tuʼn kybʼixen ex tuʼn kywan tiʼj jun tbʼanel wabʼj. Tej t-xi tqʼoʼn Jehová Ley kye aj Israel, el kynikʼ tiʼj qa nya bʼaʼn qe kykostumbr xjal ex qa bʼaʼntoq che yaẍin. Maske ikju, kubʼlo kyximen junjun xinaq qa kʼokeltoq kyxqʼuqin kyibʼ ex qa mlaytoq tzaj nya bʼaʼn kyiʼj aj kyxiʼ kyukʼil xuʼj te juntl tnam.

 Pero ¿tiʼ bʼaj? In tzaj tqʼamaʼn Tyol Dios jlu: «E ok ten qe xinaq yaẍil kyukʼil qe xuʼj aj Moab». Kyajtoq xuʼj te tnam Moab tuʼn kykʼulin aj Israel kywitz dios nya ax tok, ex atzun jlu bʼaj. Tuʼntzunju, tzaj tqʼoj Jehová kyiʼj aj Israel (Núm. 25:1-3).

Mintiʼ japun Tley Dios kyuʼn aj Israel toj kabʼe tten: e kʼulin kywitz dios nya ax tok ex e yaẍin. E kyim nim mil aj Israel tuʼnju mintiʼ xi kybʼiʼn tyol Jehová (Éx. 20:4, 5, 14; Deut. 13:6-9). ¿Tiquʼn bʼisbʼajil aju bʼaj? Tuʼnju ateʼtoq toj jun ambʼil nim toklen. Noqwit xi kybʼiʼn aj Israel Tley Jehová, e ikʼxwitlo toj nim aʼ Jordán ex e okxwitlo toj Txʼotxʼ Tziyen maj (Núm. 25:5, 9).

Tej ttzaj tnaʼn apóstol Pablo jlu, kubʼ ttzʼibʼin nabʼil lu: «Tkyaqil jlu o bʼaj kyiʼj qxeʼchel tuʼn tok te jun yekʼbʼil te qe, ex o tzʼibʼanjtz te qʼobʼl qnabʼl, porke ma qo kanun tuj mankbʼil tqʼijlalil» (1 Cor. 10:7-11). Nimlo jaw tzalaj Satanás tej kykubʼ tzʼaq aj Israel tuʼn toj jun matij il ex tuʼn jlu ya mlaytoq che okx toj Txʼotxʼ Tziyen maj. Tbʼanel qa ma tzʼel qiʼn jun xnaqʼtzbʼil tiʼj kypaltil, tuʼnju ax ikx taj Satanás tuʼn miʼn qokx toj akʼaj twitz Txʼotxʼ o tzaj ttziyen Jehová qe.

Tuʼn kykubʼ tzʼaq okslal axix tok tuʼn Satanás, in che ajbʼen sbʼubʼil ya ojtzqiʼn qe tuʼn ex o che kubʼ tzʼaq nim tuʼn sbʼubʼil lu. Ik tzeʼn ma tzʼel qnikʼ tiʼj, e kubʼ tzʼaq aj Israel toj yaẍbʼil tuʼn Satanás. Ax ikx in najbʼen sbʼubʼil lu tuʼn toj ambʼil jaʼlo. Ex jun kyxol qeju sbʼubʼil mas in najbʼen tuʼn, aju kyilbʼilal xjal mintiʼ kyxbʼalun tok.

Toj ambʼil jaʼlo, jaku tzʼok kykeʼyin xjal toj ewaj qe kyilbʼilal xjal mintiʼ kyxbʼalun tok. Kyoj qeju abʼqʼi o che ikʼ, qa taj jun xjal tuʼn tok tkeʼyin kyilbʼilal xjal mintiʼ kyxbʼalun tok, iltoq tiʼj tuʼn kyxiʼ keʼyil jun película toj cine moqa iltoq tiʼj tuʼn ttzaj kylaqʼoʼn jun revista moqa jun libro. Atlo junjun xjal mintiʼ bʼant jlu kyuʼn tuʼnju in tzajtoq kychʼixwi qa ma che ok keʼyin kyuʼn txqantl. Pero toj ambʼil jaʼlo, noq alkyexku xjal at t-internet jaku tzʼok tkeʼyin kyilbʼilal xjal mintiʼ kyxbʼalun tok ik tzeʼn toj kyaqʼun ex qa aj tweʼ jun rat kykar. Ex kyoj nim tnam, in bʼant jlu kyuʼn xinaq ex xuʼj tojx kyja.

Nya oʼkxju, ax ikx jaku tzʼok tkeʼyin jun xjal qe nya bʼaʼn tilbʼilal toj jun celular moqa toj jun tableta. Jaku bʼant jlu tuʼn akux in bʼet toj bʼe, toj kamionet ex qa toj tren.

Tuʼnju mas nya kwest tuʼn tok tkeʼyin jun xjal kyilbʼilal xjal mintiʼ kyxbʼalun tok, mas o tzaj tiʼn jlu nya bʼaʼn toj ambʼil jaʼlo. Tuʼn jlu at nim xjal o tzaj nya bʼaʼn toj kymejebʼleʼn, ex in kubʼ kyximen qa mintiʼ kyoklen ex mintiʼ in che anqʼin toj txubʼtxaj. Ex aju mas bʼisbʼajil, in xi kyqʼoʼn ambʼil tuʼn ttzaj nya bʼaʼn tiʼj kyamiwbʼil tukʼil Jehová. Jaku txi qqʼamaʼn qa in tzaj nim bʼis kyiʼj xjal tuʼn jlu. Bʼalo chebʼe chebʼe jaku tzʼetz kyiʼn nya bʼaʼn ximbʼetz toj kywiʼ, pero ateʼ junjuntl jaku txi tiʼn mas ambʼil tuʼn tetz kyiʼn nya bʼaʼn toj kywiʼ.

Noqtzun tuʼnj, bʼaʼn tuʼn ttzaj qnaʼn qa in nonin Jehová qiʼj tuʼn tok qxqʼuqin qibʼ tiʼj tsbʼubʼil Satanás. Qa qaj tuʼn t-xqʼuqin Jehová qiʼj, miʼn qo ok ik tzeʼn kye aj Israel, sino qbʼinx tkyaqilju in tzaj tqʼamaʼn qe (Éx. 19:5). Nim toklen tuʼn tel qnikʼ tiʼj qa in nel tikʼun Jehová qe kyilbʼilal xjal mintiʼ kyxbʼalun tok. ¿Tiquʼn in xi qqʼamaʼn jlu?

Qo ximen tiʼj jlu: junxitl qe kawbʼil xi tqʼoʼn Jehová kye aj Israel kywitz qeju kawbʼil attoq kyoj junjuntl tnam. Iktoq kyten kawbʼil lu ik tzeʼn jun muro in xqʼuqin kyiʼj aj Israel kyiʼj xjal nqayin ateʼ kytxlaj ex tiʼj nya bʼaʼn kybʼinchbʼen (Deut. 4:6-8). In tzaj kyyekʼin ley lu jun tiʼ nim toklen: in nel tikʼun Jehová aju yaẍbʼil.

Tej tyolin Jehová kyiʼj nya bʼaʼn in bʼanttoq kyuʼn xjal in che anqʼintoq kytxlaj aj Israel, tqʼama jlu kye: «Miʼn che ok lpeʼye  kyiʼj kykostumbr aj Canaán, tuj txʼotxʼ jatum che pol wiʼne». ¿Tiquʼn tqʼama jlu? Tuʼnju otoq bʼaj kytzʼilsaʼn kytxʼotxʼ, ex tqʼamatl Jehová: «Kyjaʼtzun ma kubʼ kykastiw wuʼne tiʼj kybʼinchbʼen mya bʼaʼn». Toj twitz Jehová, puro nya bʼaʼn qe tiʼchaq in bʼanttoq kyuʼn aj Canaán ex tuʼntzunju tqʼama qa otoq tzʼilix kytxʼotxʼ (Lev. 18:3, 25).

Maske kubʼ tqʼoʼn Jehová kykastiw aj Canaán, mintiʼ kubʼ naʼj yaẍbʼil kyxol xjal. Tej tikʼ juntl 1,500 abʼqʼi, tqʼama Pablo qa puro nya bʼaʼn kybʼinchbʼen xjal in che anqʼintoq kytxlaj okslal. Axpe ikx, otoq «txi kyqʼon kyibʼ tuj achbʼil, tuʼn kybʼinchante tkyaqil ttzʼilil aju in ponxix kykʼuʼj tiʼj» (Efes. 4:17-19). Ax ikx toj ambʼil jaʼlo, at junjun xjal mintiʼ in che tzaj chʼixwi tuʼn tkubʼ kybʼinchaʼn nya bʼaʼn. Atzun kye okslal axix tok, in nok tilil kyuʼn tuʼn miʼn tok kyqʼoʼn kywitz tiʼj nya bʼaʼn in bʼant kyuʼn xjal in che yaẍin.

Aj tetz kyyekʼin xjal kyilbʼilal xjal mintiʼ kyxbʼalun tok, in kubʼ kyyekʼin qa mintiʼ in nok kyqʼoʼn toklen Dios. O qo kubʼ tbʼinchaʼn Jehová ik tzeʼn te tilbʼilal ex taj tuʼn tok qqʼoʼn qoklen. Tukʼil nim tnabʼil, tqʼama qa oʼkx jaku kubʼ kuẍe jun xinaq tukʼil jun xuʼj qa o che kubʼ mojeʼ tuʼntzun kytzalaj (Gén. 1:26-28; Prov. 5:18, 19). Noqtzun tuʼnj, aqeju xjal in bʼaj kybʼinchaʼn ex in netz kyyekʼin kyilbʼilal xjal mintiʼ kyxbʼalun tok, in nel kyikʼun qe tkawbʼil Jehová ex in nel kyiʼn toklen. Tuʼntzunju, kbʼel tqʼoʼn Jehová kykastiw xjal lu (Rom. 1:24-27).

¿Yajtzun qe xjal in kubʼ kyximen tuʼn tok kykeʼyin moqa tuʼn tjaw kyuʼjin qe uʼj jatumel in che etz yekʼin xjal mintiʼ kyxbʼalun tok? Jakulo kubʼ kyximen junjun qa mlay tzaj jun nya bʼaʼn tuʼn jlu. Noqtzun tuʼnj, in che onin kyiʼj xjal in nel kyikʼen qe tkawbʼil Jehová. Mintiʼlo kubʼ kyximen jlu tej kyok ten keʼyil kyilbʼilal xjal mintiʼ kyxbʼalun tok. In nel qnikʼ tiʼj qa il tiʼj tuʼn tel kyikʼen tmajen Jehová jlu. In tzaj tqʼamaʼn Xjan Uʼj jlu: «Aqeye at kykʼujlalile tiʼj Qman, kyikʼun ele aju mya bʼaʼn» (Sal. 97:10).

Axpe ikx qeju in nok tilil kyuʼn tuʼn miʼn tok kyqʼoʼn kywitz kyiʼj xjal mintiʼ kyxbʼalun tok, in nel kynikʼ tiʼj qa jaku che kubʼ tzʼaq toj sbʼubʼil lu. Tuʼnju aj il qoʼ, atlo maj in nok tilil quʼn tuʼn miʼn txi qqʼoʼn ambʼil te yaẍbʼil. Ax ikx, jaku qo kubʼ sbʼuʼn tuʼn qanmi aj tkubʼ qximen qa mlay tzaj nya bʼaʼn qiʼj qa mintiʼ ma qo nimen te Jehová  (Jer. 17:9). Pero ateʼ junjun ya o kubʼ tiʼj nya bʼaʼn lu kyuʼn, atzun jaʼlo in che ajbʼen te Jehová. In nonin tqanil lu kyiʼj qeju in nok tilil kyuʼn tuʼn tkubʼ tiʼj nya bʼaʼn lu kyuʼn. Qo xnaqʼtzan tiʼj tzeʼn jaku tzʼonin Tyol Dios qiʼj tuʼn miʼn tok qkeʼyin kyilbʼilal xjal mintiʼ kyxbʼalun tok.

Ik tzeʼn sel qnikʼ tiʼj tej saj tzyet xnaqʼtzbʼil, nim aj Israel xi kyqʼoʼn ambʼil tuʼn ttzaj nya bʼaʼn kyiʼj kyuʼn nya bʼaʼn achbʼil. Axju jaku bʼaj qiʼj. Kubʼ ttzʼibʼin Santiago aju medio terman Jesús tiʼ jaku tzaj qiʼj tuʼn il lu, tqʼama: «Teyle junjun nnoʼk tuj joybʼil tiʼj, ax tnabʼl in xmoxin te tuʼn tpon tkʼuʼj tiʼj ju mya bʼaʼn, [...] oktzun tchʼiy ju mya bʼaʼn tuj tanmi, in tbʼinchaʼn il» (Sant. 1:14, 15). Jaku kubʼ tbʼinchaʼn jun xjal il qa ma txi tqʼoʼn ambʼil tuʼn tchʼiy nya bʼaʼn toj tanmi. Tuʼntzunju, miʼn qo ximen tiʼj yaẍbʼil ex qikʼumel qe nya bʼaʼn ximbʼetz.

Qa in nel qnikʼ tiʼj qa kukx ateʼ nya bʼaʼn qximbʼetz, bʼaʼn tuʼn tbʼant jun tiʼ quʼn. Tqʼama Jesús jlu: «Qa tuʼn tqʼabʼa ex qa tuʼn tqana kbʼel tzʼaqa tuj il, txʼemin ela ex xoʼmixa; [...]. Ex qa tuʼn tbʼaqʼ twitza kbʼel tzʼaqa tuj il, qʼiʼmetza ex xoʼmixa» (Mat. 18:8, 9). ¿Tiʼ tajtoq Jesús tuʼn ttzaj tqʼamaʼn kyuʼn yol lu? Tuʼn jlu tqʼama qa nim toklen tuʼn tel qiʼn naj alkyexku tiʼ jaku qo kubʼ tzʼaq tuʼn. ¿Alkye tten jaku txi qbʼiʼn nabʼil lu tiʼjju tuʼn miʼn tok qkeʼyin kyilbʼilal xjal mintiʼ kyxbʼalun tok?

Qa noq minabʼen in netz yekʼin kyilbʼilal xjal mintiʼ kyxbʼalun tok, miʼn kubʼ qximen qa mlay tzaj nya bʼaʼn qiʼj tuʼn jlu. Tbʼanel qa jun rat ma tzʼel qpaʼn qwitz tiʼj ex bʼaʼn tuʼn tkubʼ qyupin naj televisión, computadora moqa qcelular. Ex qo ximen kyiʼj tbʼanel tiʼchaq. Kʼonil jlu qiʼj tuʼn tok qxqʼuqin qximbʼetz ex tuʼn miʼn qkubʼ tuʼn nya bʼaʼn achbʼil.

Aqeju kyilbʼilal xjal mintiʼ kyxbʼalun tok ex qeju ximbʼetz tiʼj jlu, jaku che ten toj nim abʼqʼi toj twiʼ jun xjal ex jaku che ul juntl maj maske mintiʼ in ximen kyiʼj. Aj tbʼaj jlu, jaku kubʼ t-ximen xjal tuʼn tbʼaj t-xqʼuyen ttzʼalbʼil. Qa o kyaj ttzaqpiʼna tuʼn ya miʼn tok tkeʼyina kyilbʼilal xjal mintiʼ kyxbʼalun pero atlo maj jaku che ul  toj twiʼya, ¿tiʼ jaku tzʼonin tiʼja aj tbʼaj jlu? Tbʼanel qa ma ximana tiʼj tiʼ jaku bʼant tuʼna tuʼn tkubʼ kyiʼj nya bʼaʼn ximbʼetz.

Ximinkuya tuʼn tanqʼina ex tuʼn t-ximana kyiʼj tiʼchaq ik tzeʼn tajbʼil Jehová. Lepeʼka tiʼj techel kyaj tqʼoʼn Pablo. Tqʼama jlu: «Nnoʼk nkʼixbʼisaʼne nximlale ex nnoʼk nqʼoʼne te nmajene» (1 Cor. 9:27). Miʼn txi tqʼoʼna ambʼil tuʼn tkubʼ tiʼja kyuʼn nya bʼaʼn ximbʼetz. Bʼinchama aju in tzaj tqʼamaʼn Romanos 12:2: «Kychʼexpum kynabʼle tuʼn kyoke te akʼaj, tuʼntzun kyojtzqinteye alkye tajbʼil Dios, tuʼn tel kynikʼe tiʼj alkye bʼaʼn, ex alkye in tzalaj Dios tiʼj ex alkye ju tzʼaqlxix». Miʼn tzikʼ tnaʼl tuʼna qa mas ktzalajela qa ma kubʼ tbʼinchaʼna aju tajbʼil Jehová ex qa ma ximana tiʼj twitzju tuʼn t-xi tqʼoʼna ambʼil tuʼn tkubʼ tzʼaqa toj il.

Bʼaʼn tuʼn kykyaj junjun taqikʼ Tyol Dios toj twiʼya tuʼntzun tel tikʼuna qe nya bʼaʼn tilbʼilal ik tzeʼn te Jehová ex tuʼn tel tnikʼa tiʼj tiʼ taj tuʼn tbʼant tuʼna. Iktzun tten jaku tzʼok tilil tuʼna tuʼn t-ximana kyiʼj texto lu aj kyul nya bʼaʼn ximbʼetz toj twiʼya. Kyxol qeju taqikʼ Tyol Dios lu, at Salmo 119:37, Isaías 52:11, Mateo 5:28, Efesios 5:3, Colosenses 3:5 ex 1 Tesalonicenses 4:4-8.

¿Yajtzun qa in kubʼ t-ximana qa kwest in nela toj twitza tuʼn miʼn tok tkeʼyina moqa tuʼn miʼn t-ximana kyiʼj xjal mintiʼ kyxbʼalun tok? Bʼaʼn tuʼn tok lepeʼya tiʼj techel kyaj tqʼoʼn Jesús (1 Ped. 2:21). Tej otoqxi jaw aʼ twiʼ, nim maj ok toj joybʼil tuʼn Satanás. ¿Tiʼ bʼant tuʼn Jesús? Ok tilil tuʼn tuʼn tkubʼ tiʼj Satanás tej tajbʼen jun ex juntl maj qe taqikʼ Tyol Dios tuʼn tej tok toj joybʼil. Xi tqʼamaʼn jlu te: «Txiʼya Satanás», ex el oq tiʼj. Ik tzeʼn te Jesús, mintiʼ xi tqʼoʼn ambʼil tuʼn tkubʼ tiʼj tuʼn Satanás, ax jlu jaku bʼant tuʼna (Mat. 4:1-11). Kukx kʼokel tilil tuʼn Satanás ex kyuʼn xjal ateʼ tjaqʼ tkawbʼil tuʼn qximen kyiʼj nya bʼaʼn tilbʼilal, pero miʼn txi qqʼoʼn ambʼil te. Jaku kubʼ tiʼj nya bʼaʼn lu quʼn tuʼn tonbʼil Jehová.

Kukx qo naʼn Dios te Jehová ex qqaninx te tuʼn qtzaj tonin. Tqʼama Pablo jlu: «Tkyaqil kymanxe te Dios tuj kynaʼj Diose; [...] kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze, tuʼnju at kymojbʼabʼl kyibʼe tukʼil Jesucrist» (Filip. 4:6, 7). Ikju, ktel qximbʼetz toj txubʼtxaj tuʼn Jehová. A jlu kʼonil qiʼj tuʼn tok tilil quʼn tuʼn miʼn tkubʼ qbʼinchaʼn jun il. Qa ma qox laqʼeʼ ttxlaj Jehová, ax ikx te tzul laqʼeʼ qtxlaj (Sant. 4:8).

Qa at jun tbʼanel qamiwbʼil tukʼil Jehová, atzun jlu kxqʼuqil qiʼj tiʼj alkyexku nya bʼaʼn. Tqʼama Jesús jlu tiʼj Satanás: «Porke tzul ju nejenel, aju in kawin kyibʼaj kykyaqil xjal twitz txʼotxʼ. Mintiʼ toklen wiʼje» (Juan 14:30). ¿Tiquʼn ok qeʼ tkʼuʼj Jesús tiʼj jlu? Tuʼnju tqʼama jlu: «Aju tzaj samante weye ax taʼ wukʼile; mintiʼ ma chin kyaj koline tuʼn Nmane, porke kukx in nbʼinchaʼne aju bʼaʼn nneʼla tuj twitz» (Juan 8:29). Ax ikx mlay kyaj ttzaqpiʼn Jehová qoʼ qa ma kubʼ qbʼinchaʼn aju in tzalaj tiʼj. Miʼn tzʼok qkeʼyin qe kyilbʼilal xjal mintiʼ kyxbʼalun tok tuʼntzun miʼn tkubʼ qiʼj tuʼn Satanás.