BAISALELE mubakele hayehi na kujabuka ndonga ya Yondau mangana bakobele mu lifuti lyabakulahesele Njambi, kwezile bangenzi bamo. Obo bangenzi bapwile banakazi baje kubapwile Baisalele. Co balanyele banalume ku cilika. Baje Baisalele bamwene ngwabo babezikile manene. Cuma cabongumwine capwile kulya, kukina na kuwana babusamba babaha. Yoyesi ya baje banakazi na bilika byabo kubyalitombwele na mashiko anene Njambi kuli Baisalele. Oloni baje Baisalele hamo basinganyekele ngwabo: ‘Kutukobela mu bukalu, tuzibuka byuma byabibwa nebi byabibi.’

 Bika byalingiwile? Mbimbiliya ngwayo: “Banalume bashangumukile kulinga bupangala na banakazi ba Bamowabi.” Baje banakazi bashakele ngwabo banalume ba Baisalele balemese binjambi babo ba makuli. Baje banalume balemesele binjambi ba makuli. Ngeci, Yehova “walubalele.”—Kula 25:1-3.

Baje Baisalele bapokolwe mashiko a Njambi mu bingila bibali. Ya kulibanga, balemesele tumponya. Ya mu cibali, balingile bukwizi. Banu babangi batsile mwafwa ya kujeneka kwononoka Njambi. (Kutu 20:4, 5, 14; Kwitu 13:6-9) Byuma bibalingile byapwile byabibi manene. Ha simbu ije bakele hayehi manene na kukobela mu Lifuti lya Cikulaheso. Oloni baje banalume mubapokwele mashiko a Njambi, balingisile Baisalele babangi bonowe kukobela muje mu lifuti.—Kula 25:5, 9.

Kutalesa ku byuma bibalingile, kapositolo Paulu wasonekele ngwendi: “Byuma byoshe ebi byalingiwile kuli bakebo kupwa cimweso ngeci beka bamweneko, co babisonekelele mu kutunangula yetu. Omwo tuli na kuyoya ha simbu ije ili kuyehi na mamaneselelo.” (1 Koli 10:7-11) Satana wabwahelelele manene mwamwene baje Baisalele balinga bubi bwakama na kwonowa kukobela mu lifuti lyabakulahesele Njambi. Tunapande kulilongesa ku kusebuka kwabo, mwafwa tuzibuka ngwetu Satana abwahelela manene nga atwonowesa kukobela mu kaye kakaha.

Satana ali na kushaka kungumuna baka-Kilistu, co ali na kupangesa miheto ije yamona ngwendi ili na kupanga manene. Ngwe mutunamwena kuli Baisalele, Satana wapangesele bukwizi mu kubongumuna. Satana acili na kupangesa bukwizi mu kungumuna banu. Ngila imo itwasa kuwila mu muheto wa Satana inapu kuyongola bikupulo bya bukwizi.

Ano matangwa munu nasa kuyongola bikupulo bya bukwizi oku bakwabo kubazibuka ngwabo akabiyongola. Mu myaka ya kunima, munu uje washakele kuyongola bikupulo bya bukwizi waile kuje kubamwesele mafilimu a bukwizi, nambe kuje kubalandesele mabulu a bikupulo bya bukwizi. Bwingi bwa banu kubakele na kuyako mwafwa bakele na kuziba shwamwa ngwabo bakwabo babamona. Oloni ano matangwa munu uje apangesa intaneti asa kukenga bikupulo bya bukwizi oku ali ku bipangi nambe mu munyau. Co mu mafuti amangi munalume nambe munakazi asa kukenga bikupulo bya bukwizi mu njubo yendi.

Kutundaho lalo, banu babangi bawana ngila yayasi ya kuyongwela bikupulo bya bukwizi ha mafoni nambe ha matabuleti abo. Banu basa kuyongola bikupulo bya bukwizi ha mafoni nambe ha matabuleti oku bali na kwenda, oku bali mu mbasi nambe oku bali mu kumboyo.

Banu babangi kunabapwila kwakwasi kuyongola bikupulo bya bukwizi ano matangwa oku bakwabo kubazibuka ngwabo bakabiyongola. Ngeci, bili na kubanenela bukalu bwakama. Baka-kuyongola bikupulo bya bukwizi malo abo ali na kutsa, bakalimono kupwa bangoco, co lalo bali na kubiisa bitakutaku byabo. Maneneni bakabiisa busamba bwabo na Njambi. Bikupulo bya bukwizi bikakobelesa mu bukalu baje bakabiyongola. Co lalo bili na kubiisa bisinganyeka byabo. Mu kwita kwa simbu, basa kukala na bisinganyeka byabibwa, oloni basa kutwalelelaho kwanuka byuma bibayongwele.

Zibukeni ngweni Yehova ali na kutunyungilila ku muheto wa Satana. Nga tushaka ngwetu Yehova atunyungilile, co tunapande kumwononoka. Eci cikeco cuma cibonowele kulinga baje banalume ba Baisalele. (Kutu 19:5) Tunapande kuzibuka ngwetu Njambi wazinda manene bikupulo bya bukwizi. Bika bitwendekela ngoco?

Anukeni ngweni mashiko anene Yehova kuli Baisalele alisezele na mashiko a baka-mafuti.  Aje mashiko apwile ngwe cibumbe cije cikanyungilila banu. Abanyungililile na kubalongesa ngwabo kubapandele kulinga byuma byabibi bibakele na kulinga baje kubalemesele Yehova. (Kwitu 4:6-8) Aje mashiko amwesele mwamubwa ngwawo Yehova wazinda bukwizi.

Yehova watumbwile byuma byabibi bibakele na kulinga baje balyatele na Baisalele, co walekele Baisalele ngwendi: ‘Keti mukakabangeye bilinga bya banu ba mu lifuti lya Kanana, kuje kunjili na kumitwala. Bilinga byabo binabiisa lifuti, ngeci bene njikabana kashitiko.’ Yehova ha kupwa Njambi wa kujela, wamwene lifuti lya Kanana kupwa lya mazilo nambe ngwetu lya kujwala mwafwa ya bilinga byabo byabibi.—Levi 18:3, 25.

Yehova wanene Bakanana kashitiko, oloni banu batwaleleleleho kulinga bukwizi. Hanima ya myaka ya 1,500, Paulu wendekele ha banu baje babayoyele nabo baka-Kilistu ngwendi “banakundwila na shwamwa yahi.” Aba banu ‘banalyecelela na kulyumbila mu bubi na kulinga byoshe bya mazilo kwa kujeneka kulikela.’ (Efeso 4:17-19) Bwingi bwa banu ano matangwa kubesi kuziba shwamwa ya kulinga byuma byabibi. Baka-Kilistu ba busunga banapande kubyana kutala byuma byabibi bibali na kukundwiya muno mu kaye.

Kuyongola bikupulo bya bukwizi kunapu kushaula Njambi. Njambi watutangele mu cifwa cendi. Co watwanene mana a kuzibuka byuma byabibwa nebi byabibi. Co lalo watwanene mashiko aje endeka ha ñanda ya kulilala. Wayongwele ngwendi baje bali mu bulo bakebo lika banapande kulikuwa kulilala. (Kusha 1:26-28; Visi 5:18, 19) Oloni bika bibali na kulinga baje bali na kukundwiya bikupulo bya bukwizi? Bali na kubyana mashiko a Njambi. Baje bakundwiya bikupulo bya bukwizi bali na kushaula Yehova. Njambi akasompa baje bali na kukundwiya byuma bya mazilo, mwafwa bali na kubyana mashiko endi.—Loma 1:24-27.

Batico baje bakakenge bikupulo bya bukwizi kuma kubesi na mulonga ndi? Bamo banasa kusinganyeka ngwabo kukenga bikupulo bya bukwizi kunapu lika kulizima buli. Oloni bali ku mutambela umo na baje banabyana mashiko a Yehova. Hamo mubashangumukile kuyongola bikupulo bya bukwizi kubasinganyekele ngwabo bakala ku mutambela wa baje babyana mashiko a Njambi. Oloni Mbimbiliya inatuleka ngwayo bangamba ba Njambi banapande  kuzinda bikupulo bya bukwizi. Mbimbiliya ngwayo: “Yeni mwazema Shukulu Kalunga, munapande kuzinda bubi.”—Myaso 97:10.

Nameme baje bashaka kubyana kuyongola bikupulo bya bukwizi kunasa kubakaluwila kubibyana. Ha kupwa banu ba kujeneka kulumbunuka tunapande kulifwita mangana tubyane mashungu a kulinga bukwizi. Co lalo mbunge yetu ya kujeneka kulumbunuka, yasa kutukwisa ngwayo kukwabihile kuyongola bikupulo bya bukwizi. (Njele 17:9) Oloni baka-Kilistu babangi banecela kuyongola ebi bikupulo. Kuzibuka ngoco kwasa kumitakamesa nga bukebwo bukalu bumuli nabwo. Tumoneni muyasa kumikwasela Mbimbiliya mangana muhyane muheto wa Satana wa kuyongola bikupulo bya bukwizi.

Baisalele babangi becelelele mashungu amabi abendese, ngeci balingile bubi bwakama. Eci casa kulingiwa na kuli yetu. Yakomba, ndolome ya Yesu wendekele ngwendi munu na munu mashungu endi babenya akewo amungumuna. Nga lishungu linakolo, co lisema bubi. (Yako 1:14, 15) Nga munu ecelela bisinganyeka byabibi kukola mu mbunge yendi, mamaneselelo alinga bubi. Ngeci, keti twecelele bisinganyeka byabibi mu bimbunge byetu, oloni tubitundisenimo.

Nga mushangumuka kusinganyeka byuma byabibi, co lingeniko bimo bwasi bwasi. Yesu wendekele ngwendi: ‘Nga liboko lyobe nambe lindi lyobe likutanwisa, libatuleko ulyumbile kuti. Nga lisho lyobe likutanwisa, licakubulemo ulyumbile kuti.’ (Mateo 18:8, 9) Yesu kalumbunwine ngwendi tulibulumune yetu babenya embwe. Oloni wapangesele ou mwanja mu kumwesa ngwendi tunapande kutundisa bwasi bisinganyeka byabibi bije bitutanwisa. Twasa kupangesa bati eci cinangulo mangana tubyane bikupulo bya bukwizi?

Nga mumona bikupulo bya bukwizi keti musinganyeke ngweni: ‘Yange kunjasa kukobela mu bukalu.’ Oloni bwasi bwasi taleni kweka. Zimeni TV Oho bene. Zambuleni kuzima kompyuta yeni nambe foni yeni. Singanyekeni ha byuma byabibwa. Nga mulinga ngoco, co kumwecelela mashungu amabi amyendese.

Batico nga munalikele kuyongola bikupulo bya bukwizi, oloni bisimbu bimo mucikanuka  byuma bimwayongwele? Bikupulo bya bukwizi byasa kukala simbu yailaha mu bwongo bwa munu. Co simbu yoshe yoshe munu nasa kubyanuka. Nga abyecelela, co nasa kukala na kalingo-lingo ka kulyesesa ku bushwamwa nambe kulinga bubi bwakama. Ngeci, libwaheseleni mangana ha simbu yoshe imubyanuka mubibyane bwasi bwasi.

Kaleni na bisinganyeka bije byashaka Njambi. Pweni ngwe kapositolo Paulu uje walintwile mubila wendi mangana awake mu bundungo. (1 Koli 9:27) Keti mutabese mashungu amabi amyendese. Tengululeni bisinganyeka byeni, mangana muzibuke cizango ca Njambi cije capwa cacibwa, co lalo ca kulumbunuka. (Loma 12:2) Zibukeni ngweni mupwa ba kubwahelela nga mulinga byatonda Njambi. Oloni nga mukabangangeya mashugu amabi kumupu ba kubwahelela.

Kwateni mikanda imo ya mu Mbimbiliya mu mutwe. Nga mushangumuka kusinganyeka byuma byabibi, co anukeni oyo mikanda. Mikanda ya kufwa ngwe Myaso 119:37; Isaya 52:11; Mateo 5:28; Efeso 5:3; Kolose 3:5; na 1 Tesalonika 4:4-8, imikwasa mumone kuyongola bikupulo bya bukwizi ngwe mwacimwena Yehova, co lalo mulinge byuma byashaka.

Batico nga muliziba ngweni kumwasa kulikela kuyongola bikupulo bya bukwizi nambe kumwasa kulikela kusinganyeka byuma byabibi? Nga mukemwo, co tembwinineni Yesu. (1 Petu 2:21) Yesu mubamumbwitikile, Satana watwaleleleleho kumweseka. Bika byalingile Yesu? Watwaleleleleho kubyanena Satana. Yesu mwabyanenene Satana wapangesele bisoneka bya kulisezaseza. Yesu wendekele ngwendi: “Tunda kuli yange, Satana.” Co Satana wamusezele. Yesu watwaleleleleho kubyanena Satana, neni twaleleleniho kumubyanena. (Mateo 4:1-11) Satana ali na kupangesa byuma bya muno mu kaye mangana atulingise tukale na bisinganyeka byabibi, oloni tutwaleleleniho kubibyana. Mwasa kulikela kuyongola bikupulo bya bukwizi. Yehova asa kumikwasa mwecele kuyongola bikupulo bya bukwizi.

Twaleleleniho kulombela kuli Yehova mangana amikwase. Paulu wendekele ngwendi: ‘Mu malombelo eni oshe lombeni ha bije munajeneka, co kwoloka kwa Njambi, kuje munu naumo wahi asa kuzibisisa, kukanyunga bimbunge byeni na biyongola byeni mwamubwa muli Kilistu Yesu.’ (Fili 4:6, 7) Njambi amyana kwoloka kwendi mangana mubyane kulinga byuma byabibi. Nga mushwenya kuyehi na Yehova, co ‘naikeye lalo ashwenya kuyehi neni.’—Yako 4:8.

Nga tukanyamesa busamba bwetu na Mwene yetu wa mwilu na hasi, co atunyungilila ku miheto ya Satana. Yesu wendekele ngwendi: “Muka-kuswana wa hano ha kaye [Satana] ali na kwija. Kesi na nzili hali yange.” (Yowa 14:30) Bika byalingisile Yesu endeke ngoco? Wendekele ngwendi: ‘Uje wanjitumine ali hamo nange, kanjisezele likalyange embwe, mwafwa simbu yoshe njikalingi bije bimuzibisa kubwaha.’ (Yowa 8:29) Nga neni mulinga byuma bije bizibisa Yehova kubwaha, co mukulahela ngweni Yehova kamiseze likalyeni embwe. Byaneni kuyongola bikupulo bya bukwizi, co kumutsi mu muheto wa Satana.