ISRAYƐLL nebã sẽn wa n segend n na n pasg Zʋrdẽ kʋɩlgã n kẽ kãab tẽngẽ wã, daar a ye, neb n wa b nengẽ. Yaa pagb sẽn yaa bu-zẽmse. B waame n na n bool Israyɛll rapã tɩ b wa naag-b n maan tigri. Ra wõnda segb Israyɛll rapã sẽn paam n tõe n yõg zood ne-ba, n sao la b rɩ rɩ-noodo. Wã fãa yamleoog ra tõe n kẽe Israyɛll rapã. Pʋg-kãensã minimdã la b sẽn zãad b mens to-to wã yaool n pa zems ne tõog ning Wẽnnaam sẽn kõ Israyɛll nebã ye. La tõe tɩ rap kẽer tagsa b sũurẽ yaa: ‘D mii sẽn yaa sõma ne wẽng n bake. D na n maana gũusgu.’

Baasa wãna? Biiblã yeelame tɩ “bãmb maana yoob ne Moaab kom-pugli wã.” La togs sɩdã, pagbã sẽn da ratã yaa Israyɛll rapã naag-b n pʋʋs b wẽn-naandsã. B sɩd tõogame tɩ b maan woto! Be bʋʋm la a Zeova ‘sũurã sẽn puug ne Israyɛll nebã.’—Sõd. 25:1-3.

Nin-kãensã kɩɩsa hal Wẽnnaam noy a yiibu. B wõgemd n pʋʋsa wẽn-naandse, la b yo. Bãmb tus ka tɛk n ki rẽ yĩnga. (Yik. 20:4, 5, 14; Tõo. 13:7-10) Ad sɩd yaa kaeto! Bõe yĩnga? Bala, ra keta bilf bal tɩ Israyɛll nin-buiidã kẽ kãabg tẽngẽ wã. Nin-kãensã sã n da pa kɩɩs Wẽnnaam, b ra na n pasga Zʋrdẽ kʋɩlgã, n kẽ kãabg tẽngẽ wã.—Sõd. 25:5, 9.

Tʋm-tʋmd a Poll goma yel-kãngã yelle, n yeel yaa: “Bõn-kãens paama bãmb sẽn na yɩl tɩ tõnd dɩk yam, la b gʋlsa rẽ n na n keoog tõnd sẽn yaa neb nins sẽn vɩ dũniyã saab wakatã.” (1 Kor. 10:7-11) Sãmbg kae tɩ Israyɛll neb kẽer sẽn maan yel-wẽn-kãseng woto, n pa paam n kẽ kãabg tẽngẽ wã yɩɩ a Sʋɩtãan noog wʋsgo. D segd n dɩka yam kibarã pʋgẽ, bala d miime t’a Sʋɩtãan sẽn dat n tɩ yɩɩd yaa a belg tõnd me tɩ d ra paam n kẽ dũni-paalgã pʋgẽ ye.

A Sʋɩtãan baood n na n sãama kiris-nebã tẽebo. A tũnugda ne sɩlem buud toor-toor a sẽn zoe n tũnug ne n paam neb wʋsgo. Wa sẽn yɩ to-to ne Israyɛll nebã, a tũnugda ne yoobã. Hal ne rũndã, yoobã ket n yaa bẽdg meng-menga. Bũmb a ye a sẽn tolg n tũnugd ne n paamdẽ tɩ nebã lʋɩt yoobã pʋgẽ yaa pornogarfi wã.

Rũndã-rũndã, ned tõe n gesa pornogarfi tɩ ned pa bãng meng ye. Pĩndã, ned sã n da rat n ges pornogarfi, a ra tog n kẽnga sinema wã roogẽ, wall a tɩ ra sɛb sẽn wilgd yel-yood a woto. Neb wʋsg ra zoeta yãnd n pa rat n kẽng zĩ-kãens ye. La masã wã, ne ẽntɛrnetã maasem, ned tõe n gesa pornogarfi wã a tʋʋmã zĩigẽ, wall mobill pʋgẽ menga. Tẽns wʋsgo, f yaa rao tɩ f yaa paga, f tõe n zĩnda f zakẽ n ges pornogarfi.

Pa tek woto bal ye. Ne portaabl-dãmbã la taablɛt-rãmbã maasem, nebã tõe n paama pornogarfi wã n ges nana-nana. Ned tõe n kẽnda sor zugu, wall a be biis bɩ tẽr pʋgẽ, la a get pornogarfi ne portaabl wall taablɛte.

Sẽn mik tɩ masã, nebã tõe n paama pornogarfi wã nana-nana n ges tɩ neb a taabã pa bãngã, neb nins pornogarfi wã sẽn wãadã sõor tara paasg n yɩɩd pĩndã. Neb tus ka tɛk sẽn get pornogarfi wã sãamda b kãadmã, b pa le nand b mense, b sũur-kasetã me ningd-b-la taale. La sẽn yɩɩd fãa, tõe n sãama bãmb ne Wẽnnaam zoodã. Hakɩɩka, sẽn get-b pornogarfi wã wãada b mense. Naoor wʋsgo, namsda bãmb mensã hal sõma, wa sãmpogr sẽn namsd ned to-to wã. Yaa sɩd tɩ bilf-bilfã nodrã tõe n wa maagame, la nod-dãoongã na n kaoosame.

D bãng t’a Zeova rat n sõnga tõnd tɩ d kogl d meng ne a Sʋɩtãan bẽd-kãngã. La d sã n dat t’a sõng-do, d pa segd n maan wa Israyɛll rapã ye. D segd n ‘kelga a koɛɛgã,’ la d sak n tũ a sẽn yetã. (Yik. 19:5) Segd n yɩɩ vẽeneg d yamẽ tɩ Wẽnnaam tolg n kisa pornogarfi wã. Bõe yĩng tɩ d yet woto?

Tags-y n ges-y: Noy nins Wẽnnaam sẽn da kõ Israyɛll nebã ra yaa toor fasɩ ne noy nins buud a taabã nebã sẽn da tũudã. Noy nins Wẽnnaam sẽn kõ Israyɛllã yɩɩ wa lalg sẽn da kogend-ba, la sẽn sõng-b tɩ b bãng tɩ b pa segd n dɩk bu-zẽmsã minim-wẽnsã ye. (Tõo. 4:6-8) No-kãens wilgda vẽeneg t’a Zeova kisa yoob la raglem buud fãa.

A Zeova goma tʋʋm-dẽgd nins bu-zẽmsã sẽn da maandã yelle, n bas n yeel Israyɛll nebã yaa: “Da maan-y wa Kana tẽngã, zĩig ning mam sẽn tar yãmb n dabdã nebã sẽn maandã ye.” A paasame tɩ b tẽngã ‘rẽgmame,’ la tɩ yẽ na n sɩbg-b-la b “yel-wẽnã yĩnga.” Israyɛll nebã Wẽnnaamã sẽn yaa sõngã nifẽ, Kanaã nebã vɩɩmã sẽn da yaa yookã kɩtame tɩ yaa wa b tẽngã meng rẽgmame.—Maan. 18:3, 25.

Baa ne a Zeova sẽn sɩbg Kanaã nebã, buud a taab ra ket n maanda yoob la raglem tʋʋm a taaba. Na maan yʋʋm 1500 poore, a Poll goma tẽns nins pʋsẽ kiris-nebã sẽn da be wã yelle, n yeel tɩ b nebã “basa b mens n na n tʋm nin-yoolem tʋʋma.” Sɩd me, b maana “dẽgd buud fãa tɩ pa tol n sekd-ba, b sũur-kasetã sẽn diglmã yĩnga.” (Efɛ. 4:17-19) Rũndã-rũndã, neb wʋsg yoodame la b tʋmd raglem tʋʋm a taaba, n pa zoet yãnd meng ye. Kiris-neb hakɩɩkã segd n maoo wa b sẽn tõe tɛka, n da ges dũniyã nebã yel-yoodã ye.

Pornogarfi wã yaa bũmb sẽn paoogd Wẽnnaam wʋsgo. Wẽnnaam naana ninsaal n wõneg a menga. A naana tõnd tɩ d tõe n bãng sõma ne wẽng n bake. A yamã sẽn ka to wã yĩnga, a lugla noy pag ne rao lagengã wɛɛngẽ. A wilgame tɩ segd n yɩɩ pag ne rao sẽn kẽ kãadem ne taab bal n tõe n kẽ ne taaba. Rẽ, kõt-b-la sũ-noogo, tɩ yell me kae ye. (Sɩng. 1:26-28; Yel. 5:18, 19) La sẽn yiisd-b pornogarfi wã, wall b pirsd nebã tɩ b gesã sẽn maandã wilgdame tɩ b toog pʋd n kae ne Wẽnnaam noyã ye. Sɩd-sɩdã, b paoogda a Zeova. A na n wa bʋʋ ne neb nins fãa sẽn kɩɩsd yẽ noyã, n yiisd yel-yood wall b pirsd b taab tɩ b get rẽ wã.—Rom. 1:24-27.

La sẽn yãk-b yam n get pornogarfi wã, wall b karemd sɛb sẽn wilgd yel-yood a woto wã yẽ? Kẽer tõe n tagsdame tɩ yaa sẽn na n deem bala, la tɩ pa maand ned wẽng ye. La togs sɩdã, b wilgdame tɩ b bee ne neb nins toog sẽn kae ne a Zeova noyã. Tõe tɩ b sẽn wa n sɩng pornogarfi wã gesgã, b raabã ra pa b teel nin-kãensã ye. La Biiblã pʋd n wilgdame tɩ sẽn tũud-b Wẽnnaam sɩd-sɩdã segd n kisga pornogarfi wã ne b sũur fãa. Ad Biiblã sẽn yete: “Yãmb fãa sẽn nong Sẽn-Ka-Saabã, kisg-y wẽnga!”—Yɩɩn. 97:10.

Baa ned sã n pa rat n ges pornogarfi, yɩl n tõog n da gesã tõeeme n pa yɩ nana ye. D yaa neb sẽn pa zems zãnga, tɩ mi n yaa tɩlɛ tɩ d mao n tõog yoobã tʋlsem. Sẽn paase, d sũurã tõe n belg-d lame tɩ d bao padems n kɩɩs Wẽnnaam, n ges pornogarfi wã. (Zer. 17:9) La neb wʋsg sẽn lebg kiris-neb tõogame n pa get pornogarfi wã ye. Tõnd me sã n maood n pa rat n ges pornogarfi wã, d sẽn mi tɩ neb n tõogã kengda d raoodo. D ges Wẽnnaam Gomdã sẽn tõe n sõng-d to-to, tɩ pornogarfi wã sẽn yaa a Sʋɩtãan bẽdgã ra yõk-d ye.

Wa d sẽn zoe n yeelã, Israyɛll neb wʋsg basame tɩ b tʋls-wẽns kɩt tɩ b maan bũmb sẽn wa ne yel-beedo. Rũndã-rũndã me, a buud tõe n paama neda. A Zeezi ma-biig a Zak ra yeelame yaa: “Ned kam fãa paamda makr a mengã ratem sẽn tusd-a la a belgd-a wã yĩnga. La ratmã sã n wa rɩk pʋga, a rogda yel-wẽnde.” (Zak 1:14, 15) Tʋls-wẽng sã n paam pãng ned sũurẽ, a wat n baas n maana yel-wẽnde. Rẽ n so tɩ d segd n mao n yiis yoob tʋlsem buud fãa d sũurẽ, n da wa tagsd a yell ye.

Y sã n wa mik tɩ yoob tʋlsem n be y sũurẽ, bɩ y maan bũmb tao-tao tɩ sõng-yã. Ad a Zeezi sẽn yeele: “Fo nug wall fo naoor sã n kʋɩɩbd foom, bɩ f fiuug-a n lob yɩɩga. . . . Sẽn paase, fo nifã sã n kʋɩɩbd foom, bɩ f feoog-a n lob yɩɩga.” (Mat. 18:8, 9) A Zeezi gomdã pa rat n yeel tɩ d segd n sɩd pogenda d yĩngã ye. Yaa sẽn na n wilg tɩ bũmb sã n wa rat n kɩt tɩ d kɩɩs Wẽnnaam noore, d segd n maana d sẽn tõe fãa, n zãag d meng ne bõn-kãng tao-tao. Pornogarfi wã wɛɛngẽ, wãn to la d tõe n tũ saglgã?

Y ninã sã n seg yel-yood a woto, ra n tags-y tɩ pa tõe n maan-y bũmb ye. Wẽnemd-y y neng zĩig pʋgẽ. Sã n yaa tele, ordinatɛɛr bɩ portaabl wall taablɛt pʋgẽ, bɩ y kiis tao-tao. Tags-y bũmb a to sẽn yaa sõma yelle. Y sã n maand woto, na n sõngame tɩ y tõog n da tagsd sẽn pa sõma yelle, tɩ tʋls-wẽns ra wa soog-y ye.

Yãmb sã n basa pornogarfi wã gesgo, tɩ y sẽn da ges bũmb ninsã mi n lebg n wa y yamẽ, y maanda wãna? Baa ned wa n tõog n bas pornogarfi wã gesgo, a sẽn zoe n gesã tõe n paa a yamẽ n kaoose. Tõe n wa tiig n lebg n waa a yamẽ. Sã n wa yaa woto, a tõe n wa rat n maana bũmb sẽn pa segde. Wala makre, n salem a raoolmã bɩ a poglmã, wall n maan bũmb wẽnem sẽn yɩɩd rẽ. Woto wã, bãng-y tɩ tags-yood a woto tõe n wa tiig n lebg n waa y yamẽ, la y segl y menga, tɩ ra wa kɩt tɩ y maan sẽn pa segd ye.

Yãk-y yam n na n kell n modg tɩ y tagsa wã la y tʋʋm-tʋmdɩ wã zemsd ne Wẽnnaam daabã. Rɩk-y tʋm-tʋmd a Poll togs-n-taare. Ad a sẽn yeele: “Mam pãbda m yĩngã, la m kɩtdẽ t’a lebgd mam yamba.” (1 Kor. 9:27) Ra n bas-y tɩ tʋls-wẽnsã soog-y ye. Biiblã yetame yaa: “Bɩ y maneg y yamã tɩ kɩt tɩ y toeeme, n tõog n kɩs sɩd tɩ Wẽnnaam daabã yaa sõma, tɩ sakda ne bãmba, la tɩ zemsa zãnga.” (Rom. 12:2) Tẽeg-y tɩ d tagsa wã la d tʋʋm-tʋmdɩ wã sã n zemsd ne Wẽnnaam daabã, rẽ kõta sũ-noog n yɩɩd tʋls-wẽnsã pidsg sẽn kõt sũ-noog ningã hal zĩig sẽn zãre.

Mao-y n zãms-y Biiblã vɛrse kẽer ne zugu, tɩ tags-yood sã n wa wa y yamẽ, bɩ y modg n tẽeg vɛrse-kãens sẽn yetã. Ad vɛrse-rãmb a wãn sẽn tõe n sõng-y tɩ y kisg pornogarfi wã wa a Zeova, la y bãng a sẽn dat tɩ y maanã: Yaa Yɩɩn-sõamyã 119:37, Ezayi 52:11, Matiye 5:28, Efɛɛz rãmb 5:3, Kolos rãmb 3:5 la 1 Tesalonik rãmb 4:4-8.

La sã n wa tolg n lebg toog ne-y tɩ y ra ges pornogarfi, wall n tags yel-yood yelle, y segd n maana wãna? Rɩk-y-yã a Zeezi togs-n-taare, n tũ a naoã neere, bala a yaa mak-sõng sẽn ka to. (1 Pɩy. 2:21) A Zeezi lisgã poore, a Sʋɩtãan mak-a-la naoor wʋsgo. A Zeezi maana wãna? A pa tol n bas t’a Sʋɩtãan tõog-a ye. A Sʋɩtãan sã n da yeel bũmb n na n mak a Zeezi, a Zeezi ra lebgd n togsa vɛrse sẽn be Wẽnnaam Gomdã pʋgẽ, n kɩɩs a sẽn yeelã. A pʋd n wa n yeel-a lame yaa: “Sʋɩtãana, looge!” A sɩd loog n bas-a lame. Wa a Zeezi sẽn pa tol n bas t’a Sʋɩtãan tõog-a wã, yãmb me pa segd n bas t’a tõog-y ye. (Mat. 4:1-11) A Sʋɩtãan ne a dũniyã na n kell n maoo sẽn na yɩl n paam tɩ y tagsd yel-yood yelle, la y pa segd n bas tɩ b tõog ye. Baa yaa toogo, tõeeme. Ne a Zeova sõngre, y na n tõoga y bɛ wã.

Teeg-y-yã a Zeova, n pʋʋsd-a wakat fãa n kot sõngre. Ad a Poll sẽn yeele: “Bɩ y . . . wilg Wẽnnaam bũmb nins y sẽn kotã, tɩ rẽ la Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ yãmb sũyã la y tagsa wã, Kirist Zeezi maasem yĩnga.” (Fili. 4:6, 7) Wẽnnaam laafɩ wã na n kõ-y-la sũur pʋgẽ bãane, tɩ sõng-y tɩ y ra wa maan yel-wẽnd ye. Y sã n kolg a Zeova, yẽ me “na kolg yãmba.”—Zak 4:8.

Yaa d sã n tar zood sõma ne a Zeova sẽn yaa yĩngr la tẽng Naandã la d na n paam koglgo, n da wa lʋɩ a Sʋɩtãan bẽdg baa a ye pʋgẽ ye. A Zeezi ra yeelame yaa: “Dũniyã naab watame, la a pa tar pãng mam zug ye.” (Zã 14:30) Bõe yĩng t’a Zeezi ra tõe n bas a yam woto? Daar a ye, a yeelame: “Sẽn tʋm-a maamã bee ne maam. B pa bas maam m yembr ye. Bala, mam maanda bũmb nins sẽn noom bãmbã wakat fãa.” (Zã 8:29) Yãmb me sã n maand bũmb nins sẽn noom a Zeova wã, a kõn tol n bas-y ye. Zãag-y y meng ne pornogarfi wã sẽn yaa bẽdgã. Woto, a Sʋɩtãan pa na n paam yãmb ye.