ǃKHARU ge ǁaeb Israelǁîn Jordan ǃāba ra ǃgâu în Elob ge mîmâiba nî ǃhūb ǃnâ sī ǂgâ hîna di ge sari-aode ge sī. Nē sari-aodi ge ge Israelǁî tama hâ i tsî aoga ǁaxasiba ǃoa gere ǁkhau. Nēs ge ga ǃgâi ǃē hâ. ǀAsa ǀhōsana kuru, ǂnā tsî ǁkhoaxa ǂû-e ǂûs ge kaise ga ǃgâi hâ. ǁNā khoedi ge Elob ǂhanub daoǁgaudi ǃoagu ûi tama hâ i xawe gu ge ǁnā khoega ǀnîsi ge ǂâi: ‘Sige ge nē khoedi tanisen ǀgaub xa tsâǀkhāhe tide. Kaise ge ge nî ǃgaoǃgâxa i.’

 Tae-e ge ī? ǁNā ǃnaeǃkhais ge ra mî: “ǁAes ge Moabǁîn di ôadi ǀkha ge ǀaitsoatsoa.” ǁNā khoedi ge Israelǁî khoegu ama tama eloga nî ǃoabasa gere ǂgao. ǁÎgu ge ǁnāti ge dī. ‘Ob ge Jehovab di ǁaiba ge ǂhubi Israeliǀî.’—Num. 25:1-3.

ǁNā Israelǁîn ge Elob ǂhanuba ǀgam ǀgaukha ǃnâ ge khôa: ǁÎn ge ama tama eloga gere ǃoaba tsî ǀais tsîna ge dī. ǂGuin ge ge ǁō Eloban ge ǁnâuǀnam tama hâ i amaga. (Eks. 20:4, 5, 14; Deu. 13:6-9) ǁÎn di dīga tae-i ǃaroma ge tsū i? ǁAeb ǃgao o. Nē khoegu ga Elob ǂhanuba khôa tama hâ o, on ge ǂgui Israelǁîna Jordan ǃāba ga ǃgâu hâ.—Num. 25:5, 9.

Apostel Paulub ge nē ǃnaeǃkhaidi xa ge xoa: “Nēn hoan ge ǁîna aiǁgause ge hāǂam; tsîn ge sada, ǃhūbaib di ǀkhâuǀamdi ge hāǂamda ǁnamase ge xoamâibahe.” (1Kor. 10:7-11) ǁGâuab ge kaise gere ǃgâiaǂgao ǁnā Israelǁîn ge ǁore o tsîn ge mîmâisa ǃhūb ǃnâ ǂgâ tama hâ io. ǁNā Israelǁîna xu da ge nî ǁkhāǁkhāsen, ǁGâuab Elob ǀasa ǃhūbaib ǃnâ da nî ǂgâ ǃkhaisa ǂgao tama hâ amaga.

ǁGâuab ge Xristeǁîna nētsē ra ǃâitsâ, ǀnaib ge ǃkharu ge ǁaeb ǃnâ a sîsen-ū ǀgauga sîsen-ūs ǃnâ-ū. Israelǁîn tsēdi ǃnâb ge ǁîba ǁgauoǃnâ ǁgoe-ūgusa ge sîsen-ū. Sida tsēdi ǃnâs tsînab ge nē ǀgauba kaise a ǁkhōǁkhōsa. Nē ǀgaub ge ǀōǀkhā khoen vidioga kōs ǃnâ-ūs tsîna a tsâǀkhā da ǁkhā.

Nētsē i ge khoe-e ǀōǀkhā khoen vidioga kō ǁkhā nau khoen mû tama hâ hîna. ǂGui kuriga ǃkharu hâse i ge khoe-i hîna ǀōǀkhā khoen vidioga ra kō ǂgao-e ǂkhanin tamas ka io muvin ra ǁnamaxū-e ǃkhaiba ǃoa gere ī. ǂGui khoen ge nē ǃkhaiba ǃoa ge ī tama hâ i, taon gere amaga. Xawe nētsē i ge khoe-e internetsa mâ ǃkhai-i hoa-i tawa ūhâ, sîsenni tawas tamas ka io audos ǃnâ. Tsî ǂgui ǃhūgu ǃnân ge khoena ǁîn omdi ǃnâs tsîna ǀōǀkhā khoen vidioga a kō ǁkhā.

Nēs ǀgui tamas ge. Tanimâ-e ra ǁâǁawagu ge hoa xūna ge supu kai. Khoen ge ǃgûn kas tamas ka ion treins ai hâ hînas tsîna ǀōǀkhā khoen vidioga a kō ǁkhā.

ǀŌǀkhā khoen vidioga kōs nētsē kaise a supu amaga î ge nēsa kai ǂkhôaba a ǃaroma ǁkhā ǃkharu ge ǁaeb xa ǃnāsase. ǂGui khoen hîna ǀōǀkhā khoen vidioga ra kōn ge ǁîn ǃgamegu, aitsama ǃgôasens tsî ǃgâiǂâis tsîna ra khôa. Tsî ǃgōsase ǁîn ǀhōsagusis Elob ǀkhan ūhâs tsîna ǁkhōǁkhōsasib ǃnâ ra mâi. ǁNās ǀkha da ge a mî ǁkhā ǀōǀkhā khoen vidioga ra kō khoen ge ǁnās xa ra tsûtsû-e. Nēs ge emosioneel tsûb tsîna a ǃaroma ǁkhā. Nē tsûb ge kaise ǂause ra ǂgau.

ǂAnǃgâ da ge nî Jehovab nē ǁkhōǁkhōsasiba xu ra sâu da ǂgaosa. Jehovab nî sâu da ǃkhaisa da ga ǂgao o, o da ge Israelǁî khoegu ge ǃkharu ge ǁaeb ǃnâ dī tama hâ i xū-e nî dī, ǁîba da ge nî “ǁnâuǀnam.” (Eks. 19:5) Elob ǀōǀkhā khoen vidioga ǃhui hâ ǃkhaisa da ge nî mûǂan. Tae-i ǃaroma da di ra mî?

Nēs xa ǂâi re: Elob ǂhanub hînab ge Israelǁîna a māb ge kaise ge ǂoaǂamsa i ǁnā ǁaeb ǃnâ. Nē ǂhanugu ge Israelǁîna gere ǁkhauba tsî ǁîna gere ǃkhâikhom ǁîn ǂnamipe hâ khoen ra dī ǁgai xūna dīsa xu. (Deu. 4:6-8) Nē ǂhanugu ge sao ra amaba gere ǁkhāǁkhā: Jehovab ge ǁgauoǃnâ ǁgoe-ūgusa ǃhui hâ.

Jehovab ge Israelǁîn ǂnamipe ge hâ i khoen gere dī xūn xa ge ǃhoa tsî ǁîna ge  mîba: “Tsî Kanaanǃhūb, ǁîb ǃoa ta nî ūsī dub di sîsengu ǃoa du ge dī tide.  . . ǃhūb a ǃanuoǃnâ tsî tita ge ǂhanuoǃnâsib ǃaroma nî ǁkharani.” ǃAnu Elob Israelǁîn dib ǃoagu î ge Kanaanǁîn di ûiǀgauba kaise ge ǁgai i, ǁîn ǃās ge ǁnā ǀgaub xa a tsâǀkhāhes kōse.—Lev. 18:3, 25.

Jehovab ge Kanaanǁîna a ǁkhara xawen ge nau khoena noxoba ge ǁgauoǃnâ i. 1500 Kuriga ǃkharu hâseb ge Pauluba nē Xristeǁîn ǁaesa sao rase ge ǁguiǃā ‘ǁîn karokarosensa xu ǁî-aitsama ǁgaiǁgaisens ǃnâ ge māǁnâsen.’ ǁÎn ge “ǂguiǃnâgu ǃanuoǃnâ dīgan nî turaxase” ge ī. (Efe. 4:17-19) Nētsēs tsînan ge khoena ǁgauoǃnâ ûiga ra ûi tsî nēs ǀkha a ǂkhîǂâixa. Ama Xristeǁîn ge tā nē ǃhūbaib di ǁgauoǃnâ xūna kōs ǃnâ nî ǁhao.

ǀŌǀkhā khoen vidioga kōs ge Eloba ǃgôasiba ǁgau tama hâ. ǁÎb ge khoena ǁîb īsib ǃnâ ge kuru. ǁÎb ge tae-i a tsū tsî tae-i a ǃgâis tsîna mûǂans ǁkhāsiba ge mā da. Elob ge gā-aisib ǀkha ǂhanuga ge mā ǁgoe-ūgus xa. ǁÎb ge nēsa ǃgameb ǃnâ ge ǂnuiǂgā î-i ǃgâi ǀgaub ǃnâ sîsen-ūhe. (Gen. 1:26-28; ǂKhm. 5:18, 19) Xawe khoen hîna ǀōǀkhā khoen vidioga kōsa ra ǂkhâǃnâna tae-e ra dī? ǁÎn ge Elob di ǃanu ǁgaraga ǁnâuǀnam tama hâ. Tsî Jehovaba ǃgôasiba ǁgau tama. Elob ge ǁnān hîna ǁîb ǁgaraga ǁnâuǀnam tama hâna nî ǀgoraǃgâ.—Rom. 1:24-27.

O ǁnān hîna ǂganǃgâsib ǃnâ ǀōǀkhā khoen vidioga ra kōn? ǀNîn ge nēs ge ǁkhoaxa ǁaeba ūhâs ǀguisa i di ra mî. Xawen ge ǁîna ǁnān hîna Jehovab ǁgaraga ǃgôaǃgâ tama hâna ra ǂkhâǃnâ. Nēs xan ge ǀnîsi ge ǂâi tama hâ i ǀōǀkhā khoen vidiogan ge kō tsoatsoa o. Xawe Elobmîs ge ǃgāsase ra ǁgau Elob ǃoaba-aon ge ǀōǀkhā khoen vidioga kōsa xu nî ǂgōsen. Elobmîs ge ra mî: ‘Jehovaba ǀnam hâdo, ǁkhan re ǂkhababa.’—Psa. 97:10.

ǁNān hîna ǀōǀkhā khoen vidioga kōsa xu ra ǂgōsen ǂgaon ge nēs xa kaise a ǃgomba-e. ǀOasa kurusa da ūhâ tama hâ amaga  tsî da ge nî ǃkham ǁgai turaga xu ǂgōsensa. Tsî ǀoasa kurusa da ūhâ tama hâ amagas tsîna da ge nau khoena a mîba ǁkhā ǀōǀkhā khoen vidioga kōs ge tsū tama hâ di. (Jer. 17:9) ǂGuin hîna ge Xristeǁî kain ge nē ǃkhamsa ge dan. Nēsa ǂans ge ǂgomǃgâsiba nî mā da ǀōǀkhā khoen vidioga kōsa xu ǂgōsensa. Kō re Elobmîs mati nî huidasa nēsa ǃkhams ǃnâ.

Mû da go khamin ge Israelǁîna ǁgai turaga ge mā-am, ǁoren nîs kōse. Nēs ge sida ǀkhas tsîna a ī ǁkhā. Jesub ǃgâb Jakobub ge ra ǁguiǃā: “Mâ-i hoa-i ge ra ǃâitsâhe, ǁî-i di turab ǂûb xa i ra ǂgaeǁnâhe tsî nanaheo. ǁNās khaoǃgâ, turab ga ǃkhōǃoao, ob ra ǁoreba ǁora.” (Jak. 1:14, 15) ǁGai turagu ga khoe-i ǂgaob ǃnâ hā o, o i ge ǁî-e ǃhaese a ǁore ǁkhā. ǁNā-amaga da ge ǁgai ǂâiǀgauga xu nî ǂgōsen tsî nēs xa tā nî ǂâiǃgâ.

ǁGai turaga da ga hō o, o da ge ǃhaese xū-e nî dī. Jesub ge ge mî: “Sa ǃommi tsî ǂais tsîra ga ǁnâi a ǁgonǁgonǃnâ tsio, ǁîra ǁhāǁnâ, î aoxū.  . . Tsî mûs âts ga ǁgonǁgonǃnâ tsio, ǁîsa ǁhoroǂui, î aoxū si.” (Mat. 18:8, 9) Jesub ge ge mî tama hâ i, i da sida sorode tsûtsû. ǁÎb ge ǂkhōsa gere sîsen-ū huidasa î da ǃnôa kai da ra xūna ǃhaese ūbē. Mati da nēsa nî sîsenǂui ǀōǀkhā khoen vidioga kōs tawa i ga hā o?

ǀŌǀkhā khoen vidioga da ga mû o, o da ge tā ‘nēsa ta ge a dīhō ǁkhā’ di nî ǂâi. ǃHaese kō bē re. Ai-īsiǂhôaǂgaresa da ge ǃhaese nî ǀari. Tsî komputers tamas ka io tanimâ-e ra ǁâǁawab tsîna ǃhaese nî ǀari. Tsî ǀnî hâ ǃgâi xūn ai sada ǂâide nî ǂnûi. Nēs ge nî huida sida ǂâiǀgauga sîsenǂamsa tsî ǁgai turaga tā sida ǂgaob ǃnâ mā-amsa.

ǀNîsi du ga ǀōǀkhā khoen vidioga kō ǀû xawe di ga nē ǂâide sadu ǃnâ ǁaeba xu ǁaeb ǀkha oaǀkhī os? Khoe-i ge ǀōǀkhā khoen vidioga gaxu ǁaeba ǂâis ǃnâ a ūhâ ǁkhā. Nēs ge ǃkhâikhom tama hâse ra hā.  Nēs ga ra ī o, o du ge aitsama ǃgâi tama ǀgaugu ǃnâ ǃkhōsens turaga nî hō. Nē ǂâiǀgauga da ge nî ǂanbasen tsî nēsa da nî ǃkham ǃoa ǀgausa nî ǁkhāǁkhāsen.

Mîǁgui re Elob khami ǂâi tsî ǁîb ǂâis ǃoagu tanisensa. Apostel Paulub khami ī re hîna ge ǁîb ‘sorosa dā tsî a ǃgādība.’ (1Kor. 9:27) Tā ǁgai turagu xa ǃgādī-e re. “Î du sadu ǂâis di ǀasa kaisis ǃnâ ǀkhara, ǃâitsâ ǁkhā du nîga, mâs a Elob di ǃgâi tsî ǃgâiǃgâibasensa tsî dīǀoaǀoasa ǂâi ǃkhaisa.” (Rom. 12:2) ǂÂis ǃnâ ūhâ re: Elob khami ǂâi tsî ǁîb ǂâis ǃoagu ûis ge ǂkhîba nî mā da.

Elobmîs xoade ǂâiǃgâ re. ǁNās ǀkha da ge ǁgai ǂâide da ga hō o, o nē xoade nî ǂâiǃgâ. Sao ra xoadi ge nî huida Jehovab ǀōǀkhā khoen vidioga kōsa ra mû ǀgaus tsî ǁîb tae-e sida xu ra ǂgaoǀkhās tsîna mûǂansa, Psalmdi 119:37; Jesajab 52:11; Mateub 5:28; Efeseǁîn 5:3; Koloseǁîn 3:5 tsî 1 Tesalonikaǁîn 4:4-8.

Tae-e da nî dī ǀōǀkhā khoen vidioga kōs turaga da ga mâǃoa hō tama io? ǃGaoǃgâxase Jesub di aiǁgaude sao re. (1Pet. 2:21) Jesub ge ǁāǁnâhes khaoǃgâb ge ǁGâuba ǁîba gere ǃâitsâ. Jesuba tae-e ge dī? ǁÎb ge ge ǂkhā ǀgara. Tsî xoadi tsîna gere sîsen-ū ǁGâuab ǃâitsâde ǂkhāsa. ǁÎb ge ge mî: “Bēxū te, Satantse!” tsîb ge ǁGâuaba ge bē. Jesub ge māǁnâsen tama hâ i khami da ge sada tsîna tā nî māǁnâsen. (Mat. 4:1-11) ǁGâuab tsî ǁîb ǃhūbaib tsîn ge nî dī i da ǁgai ǂâide ūhâ xawe da ge tā nēs ǃnâ nî māǁnâsen. Nē ǁgai ǂâide da ge dansa a hōba ǁkhā. Jehovab huib ǀkha da ge sida khākhoeba a ǃkham ǃoa ǁkhā.

Jehovaba ǃoa ǀgore ǀgara tsî ǂgan re îb huida. Paulub ge ge mî: “ǂGande ǀgores tsî ǀkhomas tsîra ǃnâ gangans ǀkha Elob aiǃâ ǂhaisa kai. Tsî Elob di ǂkhîb, ǁnâuǃāb hoaba ǃnā hâba, ab sadu ǂgaogu tsî ǂâidi tsîna Xristub Jesub ǃnâ sâu.” (Fil. 4:6, 7) Elob ge ǃgâi ǂâisa nî mā da ǁgai xūna dīsa xu ǂgōsensa. Jehovaba ǃoa du ga ǀgū o, “ob ge sado nî ǀgū.”—Jak. 4:8.

Sida ǀhōsagusisa da ga Jehovab ǀkha ǀgaisase ga ra ūhâ o, o da ge ǁGâuab ǃâitsâde xu nî ǁkhaubahe. Jesub ge ge mî: “ǂAmsab nē ǃhūbaib dib ǃgoaxa xui-ao, tsîb ge tita ai xū-i xare-e ūhâ tama.” (Jhn. 14:30) Jesuba tae-i ǃaroma ǂgomǃgâsiba ge ūhâ i? ǁÎb ge ra ǁguiǃā: “Tsî tita ge sîb ge tita ǀkha hâ; Abob ge tita ǀguri hâ kai tama hâ, ǃgâiba bi ana ta hugaǀgui ra dī xui-ao.” (Jhn. 8:29) Jehovaba ra ǃgâiaǂgao kai xūna da ga dī o, ob ge ǁîba ǁnāxū da tide. ǀŌǀkhā khoen vidioga kōsa xu ǂgōsen re, ob ge ǁGâuaba ǃâitsâ hō da tide.