SHO oshigwana shaIsraeli sha li pokutaaguluka omulonga gwaJordan shi ye mevi moka Kalunga e shi uvanekela, aantu yamwe oye ya oku shi talela po. Aantu mboka oya li aakiintu kaaye shi Aaisraeli noya li ya hiya aalumentu Aaisraeli koshituthi shawo. Ompito ndjoka oya li tayi monika ya fa ombwanawa noyi ikalekelwa. Ookuume aape, okundanisa nokulya iikulya iiwanawa, iinima mbyoka ya li tayi vulu oku ya nana. Nonando omikalondjigilile noohedhi dhaakiintu mboka hadho Aaisraeli ya li yi ilonga mOmpango yaKalunga, otashi vulika aalumentu yamwe Aaisraeli ya li taya dhiladhila taya ti: ‘Itaye ke tu nwetha mo. Otatu ka kala twe ya kotokela.’

 Oshike sha li sha ningwa po? Ombiimbeli otayi ti: “Aantu oya hondele naakadhona Aamoabi.” Uushili owo kutya aakiintu mboka oya li ya hala aalumentu mboka ya longele iikalunga yawo. Aalumentu mboka osho ya li ya ningi. Oshi shi okuuviwa ko, sho ‘Omuwa a geele Aaisraeli.’ — Num. 25:1-3.

Aaisraeli mboka oya li ya taaguluka Ompango yaKalunga momikalo mbali: Oyi inyongamene kiikalunga yAamoabi noya hondele. Oyendji oya li ya si, molwaashoka inaya vulika kuKalunga. (Eks. 20:4, 5, 14; Deut. 13:6-9) Oshike sha li sha nayipike unene onkalo? Ethimbo ndyoka ya li ye shi ningi. Ando aalumentu mboka kaya li ya taaguluka Ompango yaKalunga, andola Aaisraeli oyendji mboka ya si, oya taaguluka Jordan e taya yi mEvi lyeuvaneko. — Num. 25:5, 9.

Shi na ko nasha niiningwanima mbyoka, omuyapostoli Paulus okwa ti: “Iinima ayihe mbika oye ya adha, yi gune aantu yalwe noya nyolwa, yi tu londodhe. Oshoka otu li methimbo, uuna ehulilo li li popepi.” (1 Kor. 10:7-11) Osha yela kutya Satana okwa li a nyanyukwa, sho Aaisraeli mboka ya yono eyono lya kwata miiti sigo taya kala inaaya gwana we okuya mEvi lyEuvaneko. Oshi li pandunge tu vulike kelondodho ndyoka, notu tseye kutya Satana ota ka kala a nyanyukwa noonkondo, ngele okwe tu kwata ko e tatu kala inaatu ya muuyuni uupe waKalunga.

Satana okwa ninga Aakriste iihakanwa ye, noha longitha omakoto ngoka e shi nawa ngoka a longitha nale mokukwata ko aantu oyendji. Ngaashi sha popiwa metetekelo, okwa li a longitha oluhondelo a kwate ko Aaisraeli. Oluhondelo olwu li natango omwigo gwa nika oshiponga pethimbo lyetu. Omukalo gulwe ngoka hagu shi ningitha oshipu kutse tu ye moluhondelo, okutala omathano giipala.

Kunena, omathano giipala olundji ohaga vulu okutalika nuupu meholamo. Monakuziwa, omuntu ngoka a hala okutala omathano giipala, okwa li ha yi kehala lyokutalela oofilima a ka tale oomuvi inaadhi yogoka nenge a ka lande omambo gomathano giipala koositola dhomambo. Aantu oyendji otashi vulika ya li ihaaya yi ko, molwaashoka ya sa ohoni okumonika kuyalwe. Ihe ngashingeyi aantu mboka haya yi kointaneta, ohaya vulu okutala omathano giipala kiilonga nenge nokuli ye ga talele moohauto dhawo. Miilongo oyindji, aalumentu naakiintu ohaya vulu oku shi ningila momagumbo gawo.

Hasho owala shoka. Iikwaelektronika oye shi ningitha oshipu kaantu ya tale omathano giipala. Aantu ohaya vulu okutala omathano giipala kiikwaelektronika yawo yopeke, uuna taye ende momapandaanda, ye li moombesa nenge momashina.

Molwaashoka kunena oshipu okutala omathano giipala noku shi ninga meholamo, shoka osha tula aantu oyendji moshiponga shi vulithe nale. Aantu oyendji mboka haye ga tala, ohaya yono po oondjokana dhawo, uuyogoki wawo neiyuvo lyawo. Shoka oshiwinayi unene, ohaya yono po ekwatathano lyawo naKalunga. Oshi li mondjila okuthika pehulithodhiladhilo kutya omathano giipala ohaga tula moshiponga mboka haye ga tala. Poompito odhindji, oku ga tala, ohashi ehameke omuntu nayi pamaiyuvo. Uuwehame mboka ohashi vulika wu ende tawu polo kashona nakashona, ihe otashi vulika wu ku thige niiyadhi pathaneko.

Nonando Jehova ohe tu gamene komwigo nguka gwaSatana, otu na okukala twa kotoka. Ngele otwa hala Jehova e tu gamene, otu na okukala hatu “vulika” kuye, oshinima shoka aalumentu Aaisraeli ya li inaaya ninga. (Eks. 19:5) Otu na okutseya kutya Kalunga oku tonde lela omathano giipala. Omolwashike tatu tile ngawo?

Dhiladhila kwaashika: Oompango ndhoka Kalunga a li a pe Aaisraeli odha li dha yooloka ko kwaandhoka dhiigwana yilwe yopethimbo lyawo. Otadhi yelekanithwa nekuma ndyoka lya li lye ya gamena. Odha li dhe ya gamene kaaya nwethwe mo nayi kiigwana yilwe mbyoka ya li ye ya kundukidha nosho wo kiilonga yawo iiwinayi. (Deut. 4:6-8) Oompango ndhoka odha li dhe  shi ulike sha yela kutya Jehova oku tonde oluhondelo.

Mokupopya iinima iiwinayi mbyoka ya li tayi ningwa kiigwana yopuushiinda, Jehova okwa li a lombwele Aaisraeli a ti: “Inamu holela iilonga . . . yaantu mboka ye li muKaanan, hoka tandi mu fala. Iilonga yawo oya nyateke oshilongo. Nomolwashoka Omuwa ta geele oshilongo.” Onkalamwenyo yAakaanana oya li ombwinayi momeho gaKalunga kaIsraeli omuyapuki, shoka sha ningitha oshilongo moka ya li, shi kale sha nyata. — Lev. 18:3, 25.

Nonando Jehova okwa li a geele Aakaanana, aantu yamwe oya li ya tsikile okuya moluhondelo. Konima yomimvo dhi vulithe 1 500, Paulus okwa popi kutya aantu yomiilongo moka mwa li Aakriste “ihaa si ohoni.” Oya li yi “iyethele yo yene moonyata dhuulunde kaaye na eidhiliko noyaa na nando onge.” (Ef. 4:17-19). Nokunena aantu oyendji ihaya si ohoni. Onkee ano, Aakriste yashili naya yande okutala iinima yi na ko nasha nomilalo, mbyoka tayi ningwa kaantu yomuuyuni mbuka.

Kalunga ina hokwa omathano giipala. Okwa shita aantu oshifetha she noye mu fa. Okwe tu shita hatu vulu okumona kutya oshinima oshi li mondjila nenge osha puka. Oshi li pandunge, sho Kalunga a gandja oompango dhi na ko nasha nomilalo. Omilalo odha nuninwa owala okunyanyukilwa kwaamboka ye li mondjokana. (Gen. 1:26-28; Omayel. 5:18, 19) Ihe mboka haya ningi omathano giipala noku ga humitha komeho, otaya ningi shike? Otayi ipwililikile thiluthilu omithikampango dhaKalunga dhopamikalo. Odhoshili kutya aantu mboka haya humitha komeho omathano giipala, ohaya shekitha Jehova. Kalunga ota ka geela mboka hayi ipwililikile omithikampango dhe, sho haya ningi nenge haya humitha komeho iinima yi na ko nasha nomilalo. — Rom. 1:24-27.

Ongiini kombinga yaantu mboka haya lesha kombinga yomathano giipala owina noku ga tala? Yamwe oye uvite kutya oku ga tala inaku nika oshiponga. Onkee ano, kungawo otaya ambidhidha mboka hayi ipwililikile omithikampango dhaJehova. Otashi vulika shoka hasho sha li elalakano lyawo, sho ya tameke okutala omathano giipala. Ihe Ombiimbeli oye shi ulika sha yela kutya mboka taya longele Kalunga kashili, oye na oku ga tonda. Ombiimbeli otayi ti: “Omuwa oku hole mboka haa tondo uuwinayi.” — Eps. 97:10.

 Nokuli naamboka ya hala okuyanda okutala omathano giipala, otashi vulika shi kale oshidhigu kuyo oku shi ninga. Inatu gwanenena, notashi vulika twa pumbwa okukondjitha omahalo ga puka gopamilalo twa mana mo. Niishewe, molwaashono inatu gwanenena, omitima dhetu otashi vulika dhi tu heke tu dhiladhile kutya inashi puka okutala omathano giipala. (Jer. 17:9) Oyendji mboka ya ninga Aakriste, oya pondola okukondjitha oshinima shoka. Oku shi tseya, otashi vulu oku ku tsa omukumo, ngele nangoye oto kondjo noshinima sha faathana. Ndhindhilika nkene Oohapu dhaKalunga tadhi vulu oku ku kwathela wu yande omwigo gwaSatana gwokutala omathano giipala.

Ngaashi sha popiwa metetekelo, Aaisraeli oyendji oya li ya etha omahalo ga puka ga koke muyo sigo ge ya ningitha ya yone sha kwata miiti. Oshinima shoka otashi vulu oku tu ningilwa nokunena. Omumwayina gwaJesus, Jakob, okwa popi nkene shoka tashi vulu okuningwa, a ti: “Omuntu oha makelwa kuuhalu we mwene, mboka tau mu hekaheka e tau mu yulu. Uuhalu ngele wa ningi uusimba, otau vala uulunde.” (Jak. 1:14, 15) Ngele omuntu okwa etha omahalo gopamilalo ga koke muye, mokweendela ko kwethimbo, otashi vulika a gwile meyono. Onkee ano, otwa pumbwa okweetha po okudhiladhila iinima inaayi yogoka.

Ngele mungoye omwi iyakele omadhiladhilo inaaga yogoka, ninga po sha meendelelo. Jesus okwa ti: “Oshikaha shoye nenge ompadhi yoye ngele tayi ku hongolola, yi teta ko, ngoye u yi ekelehi. . . . Eho lyoye ngele tali ku hongolola, li tsipula mo, ngu u li ekelehi.” (Mat. 18:8, 9) Jesus ka li ta ti kutya otu na okuteta ko iilyo mbyoka yolutu yo yeneyene. Pehala lyaashono, okwa li te tu kwathele owala tu mone kutya oshike tashi tu pundukitha noku shi vudha mo nziya. Ongiini tatu vulu okutula miilonga omayele ngoka, ngele tashi ya pomathano giipala?

Ngele owe ga mono, ino tya: ‘Itaga nwetha ndje mo.’ Pehala lyaashono, tala nziya kulwe. Ngele owe ga mona kotiivii, yi dhima nziya. Ngele okokompiuta nenge kongodhi, yi dhima nziya. Gandja ishewe eitulomo kiinima mbyoka ya yogoka. Ngele owe shi ningi, otashi vulu oku ku kwathela wu pangele okudhiladhila kwoye, pehala lyokweetha wu pangelwe komahalo ga puka.

Ongiini ngele owa etha po okutala omathano giipala, ihe natango omathimbo gamwe, oho ga dhimbulukwa? Omathano giipala nenge okudhiladhila kugo, otayi vulu okukala momadhiladhilo gomuntu ethimbo ele. Shoka otashi vulu okuningwa kehe ethimbo. Ngele shoka oshe ku ningilwa, otashi vulika shi ku ningithe iinima inaayi yogoka, ngaashi okwiidhanena kiilyo yoluvalo. Onkee ano, kala wu shi kutya omadhiladhilo ga tya ngawo, otashi vulika gi iyakele mungoye, nowa pumbwa okukala aluhe wi ilongekidha oku ga kondjitha.

Kala wa tokola toko okukaleka omadhiladhilo goye noonkatu dhoye metsokumwe nehalo lyaKalunga. Kala ngaashi omuyapostoli Paulus, ngoka a li a ‘kolondeke olutu lwe noku lu dhenga, e lu vulikithe.’ (1 Kor. 9:27) Ino etha wu pikwe komahalo ga puka. Ombiimbeli otayi ti: “Kalunga ne mu shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” (Rom. 12:2) Dhimbulukwa kutya okudhiladhila nokukatuka metsokumwe nehalo lyaKalunga, pehala lyokulandula uuhalu wuulunde, ohaku etele omuntu enyanyu enene.

Kambadhala okukoneka omanyolo gontumba. Opo nduno, uuna omadhiladhilo ga puka tagi iyakele mungoye, kambadhala oku ga dhimbulukwa. Omanyolo ngaashi Episalomi 119:37; Jesaja 52:11; Mateus 5:28; Aaefeso 5:3; Aakolossa 3:5 nosho wo 1 Aatessalonika 4:4-8, otage ke ku kwathela wu tale ko omathano giipala ngaashi Jehova e ga tala ko nowu tseye omukalo moka a hala wu ihumbate.

Oshike wu na okuninga, ngele owu uvite kutya ito vulu okukala inoo tala omathano giipala nenge oku ga dhiladhila? Landula oshiholelwa shaJesus. (1 Pet. 2:21) Konima sho Jesus a ninginithwa, okwa kala ta makelwa kuSatana. Jesus okwa ningi po shike? Okwa kala te mu kondjitha. Okwa kala ta longitha omanyolo gi ili nogi ili, a kondjithe omamakelo gaSatana. Okwa li a ti: “Za po, Satana,” Satana e te mu yi ontuku. Ngaashi owala Jesus a li inaa teka omukumo mokukondjitha Omuhindadhi, nangoye ino teka omukumo. (Mat. 4:1-11) Satana nuuyuni we, otaya tsikile okukambadhala okunwetha mo omadhiladhilo getu niinima inaayi yogoka, ihe ino teka omukumo oku ya kondjitha. Oto vulu okusindana mokukondjitha egamo lyokutala omathano giipala.

Tsikila okugalikana kuJehova noku mu pula ekwatho. Paulus okwa ti: “Oompumbwe dheni dhi tseyithileni Kalunga momagalikano geni agehe. . . . Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Fil. 4:6, 7) Kalunga ote ke ku pa ombili yopamadhiladhilo, wu vule okukondjitha omahalo ga puka. Ngele owa hedha kuJehova, ‘naye ota ka hedha kungoye.’ — Jak. 4:8.

Shoka sha dhenga mbanda moku ku gamena komwigo kehe gwaSatana, okukala wu na ekwatathano ewanawa nOmunamapangelo agehe, Jehova. Jesus okwa ti: “Omupangeli gwuuyuni mbuka [Satana] oku li pokuya. Ye ke na nando oonkondo dhasha dhi vule dhandje.” (Joh. 14:30) Omolwashike Jesus a li e na uushili mwaashoka? Okwa yelitha a ti: “Oongoka a tuma ndje, oku li pamwe nangame. Ye ine etha ndje, ndi kale awike, oshoka ngame otandi longo aluhe shoka she mu opalela.” (Joh. 8:29) Ngele to longo ehalo lyaJehova, nangoye ke na esiku e ke ku ethe. Yanda omwigo gwokutala omathano giipala, opo Satana kaa vule oku ku kwata ko.