VAAVAA Aisarayeli yiireherenryaaya olapuwa Muhice Yortano wi evolowe mu elapo yeeyo Muluku aaroromelinheiye, achu akina yaahirwa wi yaasekurye. Alipa ooxekurya awo yaari athiyana a elapo yookhopela yaawo yaawompe alopwana o Isarayeli wi yalye efesta. Eyo yaahaala wooniwa ntoko ekari etokotoko ni yavameekhaaya. Waapaka asinthamwene avyaani, wiina, ni opuha yoolya yaphaama yaamukhala echu yoochuneyaxa. Meecelo ni sookhovelela sa athiyana ale saari soohiyana ni seiyo Aisarayeli yaahusenryaaya mu Nlamulo na Mose. Naamwi hiiha, alopwana akina yaawo yaari Aisarayeli akhweya yaahuupuwela wi: ‘Hinni nivoloweliwe ni seiho. Nnahaala wiikasopa.’

 Tiheeni yeeren’ye? Masu ooveereliwa annanleela: “Akina yaapacerya oraruwa ni athiyana o Mowape.” Mweeparipari , athiyana ale yaachuna wi Alopwana yaawo yaari Aisarayeli yaalapeke amuluku atheru. Nave awo yaaheerano! Ni mathowa aphaama, “Apwiya [Yehova] yaananariwano.”—Nam. 25:1-3.

Aisarayeli ale yaananariha Nlamulo na Muluku mmikhalelo miili: Awo yaahikokhorela soophwaniherya, nave yaahipaka ocapaheya. Macikhwi a yaawo yaahikhwa nthowa na ohiiwelela waya. (Muk. 20:4, 5, 14; Malam. 13:6-9) Tiheeni yaaceerenrye wiicela wa epahu yeela? Yaari elukuluku. Waakhanle wi alopwana ale hiyaananarinhe Nlamulo na Muluku, macikhwi a Aisarayeli ale moohilekela yaahaala olapuwa Muhice Yortano ni ovolowa mu Elapo ya Nlakano.—Nam. 25:5, 9.

Uupuwelaka saweereya seiyo, murummwa Paulo oorepa: “Ichu seiya saawerela yaawo wi sooniherye nave saarempwa wi sinlopole, yeehu makuchuwelo a ilukuluku [sa mutano] aniphiyenre.” (1 Kor. 10:7-11) Moohikhwa minikwa, Satana aahitepa ohakalala owoona Aisarayeli akina ale emuchekelaka Yehova vatokovene nave wa nthowa nenla awo hiyeemereryiwe ni Yehova ovolowa mu Elapo ya Nlakano. Enamukhala yaphaama wa hiyo wakhala wi noomakelela olopola yoola vamurimani vahu, nsuwelaka wi Satana onamutepa weeliwa murima awerya onihiiha ovolowa mu elapo evyaani ya Muluku!

Satana onachuna waapahula Akristu, mwa yeeyo onnapharihela miraakho seiho osuwenleiye phaama nave seiho opharihenleiye wa ancipale. Hiiha ntoko eenreiye ni Aisarayeli, owo aahipharihela ocapaheya. Mu elukuluku ahu, ocapaheya onamvira okhalaka muraakho wawoopiha. Mukhalelo mmoha onahaala oneeriha wuuwela va muraakho yoola, ori woona epwitikiri.

Olelo muchu onanwerya woona epwitikiri muchu mukina ahisuwenle sa yeeyo. Mu iyaakha makhumi muculi, muchu yoowo aachuna woona epwitikiri aaphwanela oya o nipuro inooniwawo ixilema wi oone iruku soohiphwanelela naari oya mu elooxa enaatumiha aliivuru anooneiha epwitikiri. Achu akina akhweya hiyaaya mmapuro sintoko yaawo nthowa na wuuliwa muru wi akina yaahaala owoona. Nyenya hiihaano muchu yoole onavolowa mu interneti onanwerya woona epwitikiri omutekoni naari mpuro vyakala. Nave mu ilapo sincipale, mulopwana naari muthiyana onanwerya woona epwitikiri ari vaate vawe.

Nave tahi yeeyoru. A tapleti ni a telefoni akina, anneeriha okhala wookhweya woona epwitikiri. Vaavaa achu aneecaaya muramphani naari mukaaroni, awo ananwerya woona iruku sinavuwiha ocapaheya va nikalaase.

Woona wi onnakhala wookhweya woone epwitikiri ni wiipithiha wa akina, epwitikiri ennatannya wiicela otokweene hiihaano opwaha khalai. Achu ancipale anoona epwitikiri annapahula othela waya, ophwanelela waya, ni yawuupuserya-ya-murima aya. Echu yoothananiha, ti yawi awo annanariha onthamwene aya ni Muluku. Nyuwo munnaphiyerya makuchuwelo wi epwitikiri ennaapahula yaale anoona eyo. Ilukuluku sincipale, eyo ennatannya makhwaca matokotoko mmuupuweloni. Nyenya makhwaca yaawo ananwerya openuwa vakhaani vakhaani nave anamuhiya maharipa oohicakanela.

Nnaphwanela ororomela wi, Yehova onnavahererya okhapelela orweela wa miraakho sa Satana. Wakhala wi ninnachuna okhapeleliwa ni Yehova, nnaphwanela weerano yeeyo Aisarayeli yaahensaaya opaka—‘omwiiwelela’ yoowo. (Muk. 19:5) Nnaphwanela osuwela wi Muluku onniica moomalela epwitikiri. Ntakhara heeni nnalocaahu yeela?

Muupuwele wi malamulo yaawo Muluku aavanheiye nloko nawe yaari oohiyana ni malamulo a nloko vyakala na elukuluku yeele. Ntoko exiri, malamulo awo yaanaavalaanya Aisarayeli ni meerelo  oonanara a achu oorukurerya. (Malam. 4:6-8) Malamulo ale yaahiya vanlakani eparipari yoochuneya: Yehova onniica ocapaheya.

Atharihaka meerelo oocapaheya a achu yaawo yaarukurenrye, Yehova aahaaleela Aisarayeli: “Muhaatakiherye tho achu ooKaanani, elapo yeeyo kinookerihaakaniwo . . . Elapo yoonanara, epahuwa ni achu amankemo. Miyo kinamuwiikaramo.” Wa Muluku aweela a Aisarayeli, meecelo a achu o Kanani yaari oohiphwanelela ophiyerya wi elapo yaakhalaaya yaari yoonanara, ni yoothanyeya.—Onam. 18:3, 25.

Naamwi Yehova aalanke achu o Kanani, achu akina yaahititelela opaka ocapaheya. Iyaakha 1.500 ohoolo waya, Paulo aahithariha nloko nenlo Akristu yaakhalaayawo ariki, “hanoonavo echu yeeraka soonanara.” Mweeparipari, awo “ahiiveleela oraruwa, nave yeerakano sootakhala soothene hanakhwaaneleya.” (Éfe. 4:17-19) Olelo tho achu ancipale hanuuliwano muru ocapaheya. Moohiyana ni yaawo, alapeli eeparipari a Yehova anaphwanela osepa miteko sa ocapaheya sa achu a elapo yeela.

Epwitikiri eri echu yoothanyeya vamiithoni va Muluku. Owo ohaapaka achu moophwanaphwana ni yoowo nave moolikana. Owo oonivaha owerya wa ohiyaniha ichu. Mwa miruku, Muluku ootikitherya mphimo woophwanelela vooloca sa okonihana. Owo onachuna wi okonihana okhale woohakalaliha wa achu athelanne. (Map. 1:26-28; Masi. 5:18, 19) Vano hanka vooloca sa yaale anavuwiha meerelo a ocapaheya? Awo annavaanya moomalela malamulo a meecelo a Muluku. Chiryene achu yaawo anavuwiha epwitikiri annamunyemula Yehova. Muluku onahaala waathoriha yaale ahinachariha malakiheryo awe moorweela wa opaka ikaruma saya seiho sinavuwiha ocapaheya.—Aro. 1:24-27.

Vano hanka vooloca sa achu yaale analakelela waalakhanya naari woona epwitikiri? Achu akina anoona wi awo mathatelo oophwanelela. Mwawiihiiha, awo anaakhaviherya yaale ahinakhapelela malamulo a Yehova. Akhweya henakhala yoolakelelaaya vaavaa anapaceryaaya woona epwitikiri. Nyenya Piipiliya onnahiya vanlakani wi alapeli a Muluku eeparipari annathanya moomalela epwitikiri. Piipiliya onnalopola: “Nyuwo munamusivela Yehova, mwichanekeno yonanara.”—Sal. 97:10, NN

Ophiyerya wi yaale anachuna osepa  woona epwitikiri onamukhala woovila wa yaawo ohiya weerano. Naachu oohiphaameya, nave nnaphwanela wiilipiserya okhooca nchuno nooriipiheya na okonihana. Navetho, nthowa na ohiphaameya nnanwerya wuupuwela wi woona epwitikiri tahi echu yoonanara. (Yer. 17:9) Nyenya ancipale yaawo ari Akristu aavootha minkhela seiya soonanara. Osuwela yeela enamoolipihaani wakhala wi munnawaniha wi mvoothe woona epwitikiri. Moone mukhalelo Masu a Muluku eneeraaya yookhaviheryeeni osepa muraakho wa Satana wa woona epwitikiri.

Ntoko noonnaahu woopaceryani, Aisarayeli ancipale yaaheemererya nchuno noonanara nenlo naakerinhe mu epahu. Echu ntoko yeeyo enanwerya weereya ni hiyo. Munna oomaayi a Yesu Yakopo oothariha yawoopiha ene: “Muchu ni muchu, oneereriwa ni yeeyo enamureerela mminkhela awe . . . hiihaa minkhela seekeya, sinnayara ocheka.” (Tiy. 1:14, 15) Wakhala wi muchu onneemererya nchuno vyakala na ocapaheya wunnuwa mmurimani mwawe, onanwerya opaka yoocheka mu elukuluku aya. Mwawiihiiha nnaphwanela wiilipiserya ohiya muupuwelo woocapaheya ni osepa meerelo yaawo.

Wakhala wi munnoona wi nlelo mookhalano muupuwelo oocapaheya, mweerevo echu ntakhara yeeyo mwawaakuveya. Yesu ooloca: “Ntata naa naari nnaani naa nookwaculiha, kwasa orihe. . . . [navetho] niitho naa nookwaculiha, wosola orihe.” (Mat. 18:8, 9) Tahi wi Yesu aaloca sa okwasa ntata naari niitho mmukhalelo wawooneya. Owo aalikanyiha ochuneya waya okakhela okhwipi sookhovelela soonanara mwawaakuveya nave ni murima woothene. Nni nipharihele hai ekano yeela vooloca sa epwitikiri?

Wakhala wi mohoona epwitikiri muhuupuwele wi, ‘kinanwerya ovootha ela.’ Mperuse miitho mwawaakuveya. Mutoroke mwawaakuveya nikupa na televisau. Munwale mwawaakuveya komputatore naari tapleti. Muupuwelele mwa yeeyo eri yaphaama. Weerano yeela enahaala wookhaviheryaani ovareryela muupuwelo anyu, ohiya weemererya wi nchuno noonanara noohooleleeni.

Hanka waakhanle wi moowerya ovootha woona epwitikiri, nyenya ikwaha ikina munnuupuwela yeeyo monnaanyu? Iruku sa epwitikiri naari  sa ocapaheya, inanwerya otitelela mmuupuweloni mwa muchu mu elukuluku yincipale. Eyo enanwerya weereya mu elukuluku vyakala. Wakhala wi eyo enneereya, enanwerya oweerihaani opaka echu vyakala yooriipiheya, ntoko oceha. Nyenya, musuwele wi mootutusa munahaala okhalano muupuwelo yoowo, nave mukhale ooreheryeya wi mvoothe seiyo.

Mwiilipiserye wiiwananiha muupuwelo ni saweera sanyu ni yookhwela ya Muluku. Mukhale ntoko murummwa Paulo, yoowo aari oolakelela ‘owithiraniha mwiili awe apaka okapuro.’ (1 Kor. 9:27) Muheemererye wi nchuno noocapaheya noopakeeni kapuro. “Mutatushiwe mmuupuwelo ahiihaano, wi mweererye moone okhwela wa Muluku, wi ti waphaama woohakalaliha ni wa waakhwanela.” (Aro. 12:2) Muupuwele: Wuupuwela ni opaka ichu mwawiiwanana ni yookhwela ya Muluku ennaruuha weeliwa murima otokotoko opwaha wiiwelela nchuno na yoocheka.

Mweererye wuupuwelela iversikulu sooluluwanya sa Mpiipiliya. Voocharela vaavaa muupuwelo woonanara onaphiyaaya, muupuwelele soorepa seiyo. Soorepa ntoko Salumu 119:37; Isaiya 52:11; Mateu 5:28; Éfeso 5:3; Kolosi 3:5; ni 1 Tesalónika 4:4-8 inamookhaviheryaani wiiwananiha muupuwelo anyu ni moonelo wa Yehova vooloca sa epwitikiri ni yeeyo owo onaweheryeiye wa nyuwo.

Tiheeni munaphwanelaanyu opaka wakhala wi munnoona okhala woovila okhooca woona naari wuupuwela vooloca sa ocapaheya? Mucharihe vakhivirukhiviru yootakiherya yaphaama ya Yesu. (1 Ped. 2:21) Yesu amanle opatisiwa, Satana aahititelela omweererya. Tiheeni Yesu aapankeiye? Owo aahititelela okhoma ni Satana. Apharihelaka yoorepa ni yoorepa, owo aahikhooca saweeha sa Satana. Owo aahiloca: “Vinyavo Satana,” nave Satana aamuhiya. Hiiha ntoko Yesu ahaavelavenleiye owaniha ni Musaserya, nyuwotho munaphwanela weerano emohamoha. (Mat. 4:1-11) Satana ni elapo awe onahaala otitelela osareiha muupuwelo anyu ni nchuno noocapaheya, nyenya muhivelavele owaniha. Nyuwo munanwerya ovootha epwitikiri. Nnikhaviheryo na Yehova, munanwerya omvootha mwiicani anyu.

Mutitelele ovekela wa Yehova nave mumveke nikhaviheryo. Paulo ooloca: “Mmuleeleke Muluku seiyo munavekaanyu, mmavekelo ni ophara meco, muthamalaka. Hiihaa, murecele wa Muluku, yoowo opwanhe wuupuwela wahu woothene, onarwa waakiha murima anyu ni muupuwelo anyu mwa Yeesu ori Kristu.” (Fil. 4:6, 7) Muluku onahaala woovahaani murecele wa mmuupuweloni wi wookhaviheryeeni ohipaka yoonanara. Wakhala wi moomwaacamela Yehova, owotho “onarwa awaacamelaani nyuwo.”—Tiy. 4: 8.

Nnahaala okhala ookhapeleleya wa miraakho sa Satana pahiru wakhala wi nookhapelela onthamwene ahu ni Mwene a soopatusiwa soothene. Yesu ooloca: “Mutokweene eelapo yeela ya vathi [Satana] onnarwa iwo. Owo haanonovo echu ni miyo.” (Yoh. 14:30) Ntakhara heeni Yesu aahikhalano nroromelo nenla? Mu ekwaha emoha owo aahithariha: “Yoowo okirumme ori ni miyo. Hakihin’yeru meekhaaka, ntakhara kineera yeeyoru enamuhakalaliha.” (Yoh. 8:29) Vavaa munapakaanyu ichu seiyo inamuhakalaliha Yehova, owo harwa oohiyaani tho nyuwo. Murapele muraakho wa epwitikiri, nave Satana harwa awerya woopharaani.