NO LAFAʼANÖ ira iraono Gizaraʼeli ba woʼötö Nidanö Yoridano. Aefa daʼö, larugi ba danö si no ifabuʼu Lowalangi khöra. Hizaʼi ba zi lö ladöna-döna, tohare domera yaʼia daʼö ira alawe moroi ba soi böʼö. Lakaoni ndra matua ndraono Gizaraʼeli enaʼö möi ba gowasa nifaluara. Na mufaigi, no inötö si sökhi sibai daʼa si tebai alua ba zi dua kali. Tola lasöndra nawöra si bohou, lalau manari, ba tola laʼa gö sami. Hulö möi faʼomuso dödö fefu daʼö. Hizaʼi sindruhunia, si toʼölö nifalua ira alawe andrö hegöi amuatara no aröu faehu moroi ba nifahaʼö Goroisa Lowalangi ba ndraono Gizaraʼeli. Hewaʼae simanö, tola manö so ba wangera-ngera ndra matua ndraono Gizaraʼeli, ’Lö möi nidönisi ndraʼaga. Mangelama ndraʼaga dania.’

 Hadia zalua? Imane Sura Niʼamoniʼö, ”Ba ibörötaigö lahorö-horöni nono alawe ndraono Moabi.” Sindruhunia, ohitö dödö ira alawe andrö enaʼö mangalulu ndra matua ndraono Gizaraʼeli khö lowalangira. Daʼö göi zalua! Börö daʼö, ”Mofönu Yehowa ba ndraono Gizaraʼeli.”​—4 Moz. 25:1-3.

No lasawö Goroisa Lowalangi iraono Gizaraʼeli ba zi dombua ngawalö: Mangalulu ira ba nadu, ba lafalua gamuata fohorö. Börö me lö laʼoʼö niwaʼö Lowalangi, lua-luania ngahönö ndraono Gizaraʼeli si mate. (2 Moz. 20:4, 5, 14; 5 Moz. 13:7-10) Tobali fangabu dödö zalua andre börö me lö ara tö larugi Danö Amabuʼula. Na lö lasawö Goroisa Lowalangi ndra matua ndraono Gizaraʼeli, tatu manö lö mate ndraono Gizaraʼeli si ngahönö faʼato ba tola laʼötö Nungo Nidanö Yoridano ba larugi Danö Amabuʼula.​—4 Moz. 25:5, 9.

Ba gafuriata, ifuli isura Waulo zalua andre, ”Fefu zalua andrö tobali famahaʼö, ba tesura ia si möi famangelama khöda yaʼita sauri ba götö safuria andre.” (1 Kor. 10:7-11) Tatu omuso sibai dödö Zatana börö me no lafalua horö sebua iraono Gizaraʼeli, irege lö latehegö khöra ba weʼamöi ba Danö Amabuʼula. Tobali famahaʼö khöda zalua andre, taʼila wa omuso sibai dödö Zatana na lö takhamö gulidanö si bohou khö Lowalangi!

Omasi Zatana wamaʼala niha Keriso, ba iʼogunaʼö lala sasese mofozu ba wamaʼala niha sato. Simane nitutunö moroi yawa ba zalua khö ndraono Gizaraʼeli me föna. Iʼogunaʼö Zatana gamuata fohorö. Ba götöda iadaʼa, amuata wohorö no dandrawa si möi famaʼala. Ba aoha sibai ba wamaʼala yaʼita, duma-dumania iʼogunaʼö pornografi.

Iadaʼa, tola lö laʼila niha böʼö ba ginötö ifaigi pornografi zi samösa niha. Ba zilalö, na omasi niha ba wamaigi pornografi moguna möi ira ba bioskop ba wamaigi film soʼamakhaita ba wohorö mazui möi ira ba toko ba wowöli majalah dewasa. Tola manö lö omasi lafalua daʼö börö me ataʼu ira laʼila niha böʼö. Hizaʼi iadaʼa, na iʼokhögö zi samösa niha akses Internet tola ifaigi pornografi ba nahia wohalöwönia mazui yawa ba moto si no tebato. Oya soi iadaʼa, lö moguna möi baero ba nomo zi samösa ira matua mazui ira alawe ba wamaigi pornografi.

Baero daʼö, tola göi aoha ba niha wamaigi pornografi ba HP hegöi tablet. Ba ginötö latörö tanö, latörö moto mazui kereta api, tola lafaigi gambara soʼamakhaita ba wohorö moroi ba HP mazui tablet niʼokhögöra.

Börö me aoha iadaʼa ba wamaigi pornografi ba tola lö laʼila niha böʼö, itugu ato niha sorasoi lua-lua waʼalösökhi moroi ba zilalö. Niha samaigi pornografi tola tekiko wongambatöra, lö khöra faʼasinangea hegöi tetutu dödöra side-ide. Sabölö-bölönia, tekiko wahuwusara khö Lowalangi. Niha samaigi pornografi oya lataögö wangabu dödö. Sasesenia, möi famakiko na mufaigi pornografi, ba moguna ginötö sara ba wamadöhö zi samösa niha. Itaria, sindruhu-ndruhu tebai mufadöhö zi samösa niha.

Hizaʼi, omasi Yehowa ba wolumöʼö yaʼita moroi ba dandrawa Zatana andre. Na omasi tatema wolumöʼö moroi khö Yehowa, moguna ’tafondrondrongo’ niwaʼönia, tenga simane ira matua ndraono Gizaraʼeli me föna. (2 Moz. 19:5) Moguna aboto ba dödöda wa fatuwu khö Lowalangi pornografi. Hana wa tola faduhu dödöda wa fatuwu khö Lowalangi pornografi?

Tandraigö angerönusi daʼa: Oroisa nibeʼe Lowalangi ba ndraono Gizaraʼeli no aröu faehu ba goroisa niʼokhögö ngawalö soi ba götö daʼö. Oroisa Lowalangi no amaedola dowa si tola molumöʼö iraono Gizaraʼeli ba lafahaʼö ira enaʼö lö lafalua ngawalö zogoro simane nifalua soi ba zi fasuira. (5 Moz. 4:6-8) Fefu nösi goroisa andrö zangoromaʼö sindruhu andre: Fatuwu khö Yehowa gamuata fohorö.

 Me itutunö Yehowa ngawalö zogoro nifalua soi ba zi fasui ndraono Gizaraʼeli, imane khöra, ”Böi göi miʼoʼö wolau ba danö Ganaʼana, ba niʼohegu yaʼami dania; . . . Ba daʼö raʼiö danö, ba ba khönia uhuku golalöwania.” Ba wamaigi Lowalangi Gizaraʼeli niʼamoniʼö, no sogoro sibai gamuata niha Ganaʼana irege ba wamaigi Lowalangi no raʼiö danöra.​—3 Moz. 18:3, 25.

Hewaʼae no ihuku niha Ganaʼana Yehowa, ato nasa niha samalua amuata wohorö. Töra 1.500 fakhe aefa daʼö, isura Waulo wa no toröi niha Keriso ba gotalua niha si ’lö ola ba wamalua horö’. Ira niha daʼö laʼokhögö ”gamuata si lö faʼaila” ba ”lö irai ibönö dödöra ba wamalua si raʼiö”. (Ef. 4:17-19) Iadaʼa, ato göi niha samalua amuata wohorö ba lö irai aila ira ba wamalua daʼö. Börö me ono mbanua Yehowa ita, moguna taʼodödögö enaʼö böi tafaigi gambara soʼamakhaita ba wohorö gofu hezoso manö.

Pornografi, no fangoʼaya khö Lowalangi. Me iwöwöi niha Lowalangi, ifazökhi ira si fakhili-khili khönia. Ba no ibeʼe khöda waʼatua-tua ba wamaehusi hezo si sökhi hegöi si lö sökhi. Börö me atua-tua Lowalangi ibeʼe nola-ola si tefaudu ba wamalua faʼorudu. Omasi Lowalangi enaʼö ha niha si no mangowalu zamalua faʼorudu. (1 Moz. 1:26-28; Gamd. 5:18, 19) Hizaʼi, hadia nifalua niha samazökhi pornografi hegöi sotuhini yaʼia mazui niha sameʼe famarou dödö ba niha böʼö wamalua daʼö? Sindruhu-ndruhu lö laʼameʼegö tödö goi-goi nibeʼe Lowalangi sanandrösa ba gamuata. Niha simane daʼö, lö lafosumange Yehowa. Ihori Lowalangi dania niha sangosilöʼögö goi-goinia, si no mamazökhi pornografi hegöi sotuhini daʼö mazui samarou niha böʼö ba wamaigi yaʼia.​—Rom. 1:24-27.

Hizaʼi, hewisa niha si no mangodödögö ba wombaso mazui ba wamaigi pornografi? Tola manö lawaʼö tödöra wa daʼö ha hiburan si lö möi famaʼala. Hizaʼi, sindruhunia no latuhini niha sangosilöʼögö goi-goi Yehowa. Tola manö, tenga daʼö gohitö dödöra me labörögö ba wamaigi pornografi. Hizaʼi, no ihaogö itutunö Sura Niʼamoniʼö ba niha samosumange Lowalangi enaʼö sindruhu-ndruhu laʼogorofi pornografi. Imane Sura Niʼamoniʼö, ”Miʼogorofi zi lö sökhi, yaʼami sangomasiʼö Yehowa!”​—Zin. 97:10.

Tola manö lö omasi ita ba wamaigi pornografi, hizaʼi te abua ba wamalua yaʼia. Yaʼita niha si lö moʼahonoa, ba moguna talawa  gisö-isö dödö sanandrösa ba wohorö. Baero daʼö, tödöda si lö moʼahonoa tola manö iʼalui lala enaʼö isawö goroisa Lowalangi. (Yer. 17:9) Hizaʼi, ato niha si no tobali niha Keriso, mofozu ira ba wolawa gisö-isö dödö si fasala. Tobali, yafaduhu dödömö hasambalö tola mofozu ndraʼugö ba wanimbagö pornografi. Datafaigi hewisa Daromali Lowalangi ba wanolo yaʼugö ba wanimbagö dandrawa Zatana andrö.

Simane nitutunöda moroi yawa, latehegö tumbu ba dödöra giso-isö dödö si fasala iraono Gizaraʼeli. Lua-luania möi fangabu dödö. Iadaʼa, tola göi alua zimane daʼö. Isura nakhi tiri Yesu sotöi Yakobo sanandrösa ba wamaʼala andrö, ”Dozi niha . . . tedönisi ba teböbö ia ba gisö-isö dödönia samösa. Aefa daʼö, na no abölö wangisönia andrö, ifalua horö.” (Yak. 1:14, 15) Na itehegö tumbu ba dödönia gisö-isö dödö si fasala zi samösa niha ba no itugu aro, tola manö ifalua horö. Tobali moguna taheta fefu ba wangera-ngerada zoʼamakhaita ba wohorö, böi taʼangeragö daʼö.

Na lö aetu so ba wangera-ngerada zi taʼunö, anemaiʼö timbagö daʼö. Imane Yesu, ”Na iʼalani ndraʼugö tangau ba ma aheu, taba ia ba tiboʼö. . . . Simanö göi na iʼalani ndraʼugö höröu, koe ia ba tiboʼö.” (Mat. 18:8, 9) Lö irai ifarou ita Yesu enaʼö sindruhu-ndruhu tataba ndroto-ndroto mbotoda. Hizaʼi, eluaha wehedenia zangoromaʼö wa moguna taʼanemaiʼö tatimbagö ngawalö zi tola möi börö wangalada. Hewisa woloʼöda mene-mene daʼa sanandrösa ba pornografi?

Na öʼila pornografi ba zi lö öʼodödögö böi irai so ba wangera-ngeramö, ’Hasambalö lö tedönisi ndraʼo.’ Anemaiʼö holeʼö ndraʼugö. Na öʼila daʼö ba TV, anemaiʼö bunu TV daʼö, na öʼila daʼö ba komputer mazui HP, anemaiʼö bunu perangkat daʼö. Osambuaʼö dödömö ba zi lö raʼiö. Na öfalua daʼö, tola öfatörö lala wangera-ngeramö ba lö ifatörö ndraʼugö gisö-isö dödö si fasala.

Hewisa na no tabato ba wamaigi pornografi, hizaʼi itaria tumbu ba wangera-ngerada zoʼamakhaita ba wohorö si no irai tafaigi ba  zilalö? Tola ara aheta ba wangera-ngera zi samösa niha sanandrösa ba gambara soʼamakhaita ba wohorö. Tola manö tumbu daʼö ba wangera-ngerada ba zi lö tadöna-döna. Ba tola iʼasogö ba dödöda ba wamalua si raʼiö simane masturbasi. Tobali, moguna aboto ba dödöda wa ba zi lö tadöna-döna tola manö tumbu ba wangera-ngerada zoʼamakhaita ba wohorö ba moguna taʼanemaiʼö tatimbagö ia.

Aroʼö gangetulamö ba woʼangeragö hegöi ba wamalua somasi Lowalangi. Oʼö nifalua zinenge sotöi Faulo, itehegö ’ifakao mbotonia ba iʼosawuyu’. (1 Kor. 9:27) Böi irai ötehegö iʼosawuyu ndraʼugö gisö-isö dödö si fasala. ”Mibulöʼö lala wangera-ngerami, enaʼö miʼila mitimba tödömi zomasi Lowalangi, soʼahonoa ba sangomusoiʼö tödönia.” (Rom. 12:2) Törö tödöu: Lö khöu faʼomuso dödö na öʼoʼö gisö-isö dödö si fasala. Hizaʼi, so khöu waʼomuso dödö na öʼangeragö ba öfalua zomasi Lowalangi.

Törö tödömö mato hauga ayati Zura Niʼamoniʼö. Aefa daʼö, na tumbu ba wangera-ngeramö zi fasala, faso ndraʼugö ba woʼangeragö ayati daʼö. Ayati simane Zinunö 119:37; Yesaya 52:11; Mataiʼo 5:28; Efeso 5:3; Kolose 3:5; ba 1 Tesalonika 4:4-8, tobali fanolomö ba woloʼö lala wangera-ngera Yehowa hegöi fatuwu ba pornografi. Tola tobali fanolomö göi ayati daʼö ba wangiʼila hadia zomasi Yehowa enaʼö öfalua.

Hewisa na abua khöu wanimbagö ba wamaigi mazui ba woʼangeragö zoʼamakhaita ba wohorö? Haogö ba woloʼö Duma-Duma Yesu. (1 Fet. 2:21) Me no aefa tebayagö idanö Yesu, lö aetu Zatana ba wondrönisi yaʼia. Hadia nifalua Yesu? Lö tebulö ia ba wanimbagö fondrönisi andrö. Iʼogunaʼö ayati ba wanimbagö fefu wondrönisi nibeʼe Zatana. Imane, ”Betaʼögö Satana!” Ba iröi ia Satana. Lö irai awuwu Yesu ba wolawa Gafökha. Simanö göi ndraʼugö böi awuwu. (Mat. 4:1-11) Lö tebulö Zatana hegöi ulidanönia ba wofönui fangera-ngeramö ngawalö zoʼamakhaita ba wohorö. Hizaʼi, böi irai awuwu. Tola möna ndraʼugö ba wolawa pornografi. Itolo ndraʼugö Yehowa ba wokalaisi nudu andrö.

Böi böhöli wangandrö khö Yehowa ba andrö khönia enaʼö itolo ndraʼugö. Imane Faulo, ”Mibokai khö Lowalangi ba wangandrö . . . irorogö dödömi awö gera-erami faʼohahau dödö andrö khö Lowalangi, sabölö moroi ba gera-era niha fefu ba khö Keriso Yesu.” (Fil. 4:6, 7) Irorogö wangera-ngeramö Lowalangi enaʼö tola ötimbagö ngawalö zi fasala. Na öʼondrasi Yehowa, ’iʼondrasi ndraʼugö’.​—Yak. 4:8.

Tola telumöʼö ita moroi ba ngawalö dandrawa Zatana na lö aetu tahatöʼö ita khö Wondrege Zalawa ba mbanua si yawa awö danö. Imane Yesu, ”Tohare zamatörö ulidanö andre [Zatana] hewaʼae lö faʼabölö khönia ba wamatörö yaʼo.” (Yoh. 14:30) Hana wa tola faduhu dödö Yesu ba daʼö? No irai itutunö, ”Fao khögu zamatenge yaʼo. Lö iröi ndraʼo börö me lö uböhöli wamalua somasi ia.” (Yoh. 8:29) Na öʼodödögö ba wamalua somasi Yehowa yafaduhu dödömö wa lö irai iröi ndraʼugö. Aröuʼö ndraʼugö ba dandrawa Zatana simane pornografi, ba hasambalö lö mofozu Zatana ba wamaʼala yaʼugö.