GE Baisiraele ba be ba le kgauswi le go tshela Noka ya Jorodane gore ba tsene nageng yeo Modimo a bego a ba holofeditše yona, go ile gwa tšwelela baeng. Baeng bao e be e le basadi bao e bego e se Baisiraele, gomme ba ile ba laletša banna ba Baisiraele go tla monyanyeng o itšego. Banna bao ba be ba ka bona taletšo yeo e le sebaka se sebotse sa go ithabiša. Ba be ba ka ipotša gore e tla ba mo go kgahlišago kudu go dira bagwera, go bina le go ja dijo tše dibose. Gaešita le ge basadi bao ba be ba sa phele ka melao yeo Modimo a bego a e neile Baisiraele, go ka direga gore ba bangwe ba banna ba Baisiraele ba ile ba no re: ‘Ba ka se re dire selo. Re tseba seo re se dirago.’

 Go ile gwa direga’ng? Beibele e re: “Setšhaba sa thoma go dira bootswa le barwedi ba Moaba.” Ge e le gabotse, basadi bao ba Bamoaba ba be ba nyaka gore banna bao ba Baisiraele ba rapele medimo ya maaka. Leano la basadi bao le ile la šoma. Ke ka baka leo “bogale bja Jehofa [bo ilego] bja tukela Isiraele.”—Num. 25:1-3.

Baisiraele bao ba ile ba tshela Molao wa Modimo ka ditsela tše tše pedi: Ba ile ba rapela medimo ya maaka, e bile ba itshwara ka tsela e sa hlwekago. Baisiraele ba dikete ba ile ba hwa ka ge ba se ba kwa Modimo. (Ek. 20:4, 5, 14; Doit. 13:6-9) Ke’ng seo se ilego sa dira gore taba ye e kweše bohloko le go feta? Ke nako yeo e diragetšego ka yona. Ge nkabe banna bao ba se ba ka ba tshela Molao wa Modimo, kgauswinyane Baisiraele bao ba dikete ba be ba tla tshela Noka ya Jorodane gomme ba tsena Nageng ya Kholofetšo.—Num. 25:5, 9.

Moapostola Paulo o ngwadile mabapi le ditiragalo tšeo gore: “Dilo tše di ile tša ba diragalela e le mehlala gomme di ngwaletšwe go ba temošo go rena bao re fihletšwego ke bofelo bja mehla ye.” (1 Bakor. 10:7-11) Ga go pelaelo gore Sathane o ile a thaba kudu gore ba bangwe ba Baisiraele bao ba ile ba dira sebe se segolo gomme ba se kgone go tsena Nageng ya Kholofetšo. Re swanetše go ithuta phošong yeo ba ilego ba e dira ka gobane re a tseba gore Sathane o tla thaba kudu ge a ka re thibela go tsena lefaseng le lefsa.

Sathane o nyaka go senya tswalano ya rena le Jehofa, gomme o diriša molaba woo a ilego a o diriša go tanya batho ba bantši. Go etša ge re sa tšwa go bona seo se ilego sa diragalela Baisiraele, Sathane o ile a diriša boitshwaro bjo bo sa hlwekago bja thobalano. Le lehono, boitshwaro bjo bo sa hlwekago e sa dutše e le molaba o kotsi kudu. Tsela e nngwe yeo e šomago kudu yeo molaba wo o ka re tanyago ka yona ke ka go bogela diswantšho tša batho ba sa aparago.

Lehono go a kgonega gore motho a bogele diswantšho tša batho ba sa aparago gomme gwa se be le motho yo mongwe yo a tsebago ka taba yeo. Kgale ge motho a be a nyaka go bogela diswantšho tša batho ba sa aparago, o be a swanelwa ke go ya mafelong a go bogela dimubi goba a ye mafelong a go rekiša dipuku tšeo di nago le diswantšho tša batho sa aparago ke moka a reke dipuku tšeo. Batho ba bantši ba be ba sa ye mafelong ao ka gobane ba be ba lewa ke dihlong tša gore batho ba tla ba bona. Eupša lehono motho yo a kgonago go tsena Inthaneteng a ka bogela diswantšho tša batho ba sa aparago ge a le mošomong goba a phakile koloi. Le gona dinageng tše dintši, monna goba mosadi a ka kgona go bogela diswantšho tša batho ba sa aparago a le ka ntlong ya gagwe.

Ga go felele moo. Difouno le dithabolete di dirile gore go be bonolo go bogela diswantšho tša batho ba sa aparago. Ge batho ba sepela seterateng goba ba sepela ka dipese goba diterene, ba ka bogela diswantšho tša batho ba sa aparago difounong goba dithaboleteng tša bona.

Ka ge go le bonolo gore motho a bogele diswantšho tša batho ba sa aparago gomme gwa se be le motho yo a tsebago ka taba yeo, mokgwa wo o gobatša batho ba bantši lehono go feta nakong e fetilego. Batho ba bantši bao ba bogelago diswantšho tša batho ba sa aparago ba senya manyalo a bona, ga ba sa na seriti e bile matswalo a bona a a ba tshwenya. Se bohloko le go feta ke gore ba ka senya tswalano ya bona le Modimo. Le gona diswantšho tša batho ba sa aparago di gobatša batho bao ba di bogelago. Gantši mokgwa wo o gobatša motho maikwelong ka tsela e tseneletšego. Gaešita le ge mafelelong motho yoo a ka ikwa a le kaone, eupša go ka direga gore a se folele ruri.

Lega go le bjalo, re swanetše go tseba gore Jehofa o nyaka go re šireletša molabeng wo wa Sathane. Ge e ba re nyaka gore Jehofa a re šireletše, ga se ra swanela go dira seo banna ba Baisiraele ba ilego ba palelwa ke go se dira. Eupša re swanetše ‘go kwa’ dilo ka moka tšeo Modimo a re laelago tšona. (Ek. 19:5) Le gona re swanetše go lemoga gore Modimo o tloga a hloile diswantšho tša batho ba sa aparago. Ke ka baka la’ng re re’alo?

Nagana ka se: Melao yeo Modimo a bego a e neile  Baisiraele e be e sa swane le melao ya ditšhaba tša mehleng yeo. Melao yeo e swantšhwa le leboto leo le bego le šireletša Baisiraele gore ba se itshware ka tsela e sa hlwekago go swana le ditšhaba tše dingwe. (Doit. 4:6-8) Melao yeo e ile ya dira gore Baisiraele ba kwešiše gabotse gore Jehofa o hloile kudu boitshwaro bjo bo sa hlwekago bja thobalano.

Jehofa o ile a bolela ka mekgwa e sa hlwekago ya ditšhaba tšeo di bego di dula kgauswi le Baisiraele. O itše: “Le se ke la dira dilo kamoo naga ya Kanana yeo ke le tlišago go yona e di dirago ka gona. . . . Naga ye ga se ya hlweka gomme ke tla e otlela molato wa yona.” Go ya ka Modimo yo mokgethwa wa Isiraele e lego Jehofa, Bakanana ba be ba gobogile kudu moo e lego gore le naga yeo ba bego ba dula go yona e be e se ya hlweka. Ruri e be e šilafetše.—Lef. 18:3, 25.

Le ge Jehofa a ile a otla Bakanana, batho ba bangwe ba ile ba no tšwela pele ba itshwere ka tsela e sa hlwekago. Ka morago ga mengwaga ya ka godimo ga e 1 500, Paulo o ile a hlalosa ditšhaba tšeo Bakriste ba bego ba phela gare ga tšona ka gore “di lahlegetšwe ke maikwelo ohle a boitshwaro.” Ge e le gabotse, di be “di ikgafetše [boitshwarong] bjo bo hlephilego go dira ditšhila tša mohuta o mongwe le o mongwe ka megabaru.” (Baef. 4:17-19) Le lehono batho ba bantši ba itshwere ka tsela e sa hlwekago e bile ga ba lewe le ke dihlong. Bakriste ba therešo ba swanetše go leka go dira sohle seo ba ka se kgonago gore ba se bogele dilo le ge e le dife tše di gobogilego tšeo di dirwago ke batho ba lefase le.

Diswantšho tša batho ba sa aparago di dira gore batho ba se hlomphe Modimo. Modimo o re bopile ka seswantšho sa gagwe. O re neile bokgoni bja go tseba se se nepagetšego le se fošagetšego. Le gona Modimo o re beetše melao e kwagalago ya mabapi le thobalano. O be a rerile gore banyalani ba thabele thobalano. (Gen. 1:26-28; Die. 5:18, 19) Eupša morero wa batho bao ba tšweletšago diswantšho tša batho ba sa aparago ke ofe? Ke go se hlomphe melao ya Modimo ya boitshwaro. Ruri batho bao ba nyatša Jehofa! Modimo o tla ahlola batho bao ba sa hlomphego melao ya gagwe ka go tšweletša diswantšho tša batho ba sa aparago goba tšeo di kgothaletšago boitshwaro bjo bo sa hlwekago.—Baroma 1:24-27.

Eupša go thwe’ng ka batho bao ba bogelago ka boomo diswantšho tša batho ba sa aparago goba bao ba balago ka tšona? Ba bangwe ba ka nagana gore e no ba boithabišo bjo bo se nago molato. Eupša, ge e le gabotse ba thekga batho bao ba se nago taba le melao ya Jehofa ya boitshwaro. Mohlomongwe  ba be ba se ba ikemišetša go dira se ge ba be ba thoma go bogela diswantšho tša batho ba sa aparago. Eupša go molaleng gore batho bao ba hlankelago Modimo wa therešo ba swanetše go hloya diswantšho tša batho ba sa aparago. Beibele e re kgothaletša gore: “Lena bao ba ratago Jehofa, hloyang se sebe.”—Ps. 97:10.

Gaešita le bao ba sa nyakego go bogela diswantšho tša batho ba sa aparago, ba ka hwetša go le thata go se di bogele. Ka ge re se ra phethagala, re ka swanelwa ke go lwantšha dikganyogo tše sa hlwekago tša thobalano. Le gona go se phethagale ga rena go ka dira gore re ipotše gore go bogela diswantšho tša batho ba sa aparago ga se phošo. (Jer. 17:9) Eupša batho ba bantši bao gona bjale e lego Bakriste ba kgonne go fenya bothata bjo. Go tseba se go ka go kgothatša ge e ba le wena o leka go lwa le mokgwa wa go bogela diswantšho tša batho ba sa aparago. Bona kamoo Lentšu la Modimo le ka go thušago ka gona go phema molaba wo wa Sathane wa go bogela diswantšho tša batho ba sa aparago.

Go etša ge re boletše pejana, Baisiraele ba bantši ba ile ba dumelela dikganyogo tše sa hlwekago di ba laola. Selo se se swanago se ka re diragalela lehono. Ngwanabo Jesu e lego Jakobo o ile a hlalosa kotsi ye ka gore: “Yo mongwe le yo mongwe o . . . gogwa le go goketšwa ke kganyogo ya gagwe. Ke moka kganyogo ge e gotše e tswala sebe.” (Jak. 1:14, 15) Ge e ba motho a dumelela kganyogo e fošagetšego e gola ka pelong ya gagwe, go na le kgonagalo e kgolo ya gore motho yoo mafelelong a dire sebe. Ka gona re swanetše go dira sohle seo re ka se kgonago gore re se nagane ka dilo tše di sa hlwekago.

Ge e ba o ka lemoga gore o dula o nagana ka dilo tše di sa hlwekago, dira se sengwe kapejana. Jesu o itše: “Ge e ba seatla sa gago goba lenao la gago le go diriša sebe, le kgaole o le lahle. . . . Le gona, ge e ba leihlo la gago le go diriša sebe, le gonye o le lahlele kgole le wena.” (Mat. 18:8, 9) Jesu o be a sa re gore re ikgobatše. O ile a diriša mohlala wo go re thuša go bona seo se dirago gore re nagane dilo tše sa hlwekago, gomme re dire diphetogo kapejana. Re ka diriša bjang keletšo ye tabeng ya go bogela diswantšho tša batho ba sa aparago?

Ge ka phošo o ka wela diswantšho tša batho ba sa aparago, o se ke wa no ipotša gore, ‘Di ka se ntire selo.’ Gateetee lebelela thoko. Tima thelebišene ka yona nako yeo. Tima khomphutha goba sedirišwa sa elektroniki gateetee. Nagana ka selo se  itšego se se hlwekilego. Go dira seo go tla go thuša go laola tsela yeo o naganago ka yona go e na le go dumelela dikganyogo tše di fošagetšego di go laola.

O ka dira’ng ge e ba o kgonne go tlogela go bogela diswantšho tša batho ba sa aparago, eupša o sa fela o gopola tšeo o kilego wa di bona? Go ka tšea nako e telele gore motho a se lebale diswantšho tša batho ba sa aparago tšeo a kilego a di bona. Di ka no boa o sa itebetše. Ge e ba se se ka direga, o ka ikwa o nyaka go dira selo se itšego se sa hlwekago, se bjalo ka go tsoša ditho tša pelego. Ka gona dula o gopola gore o ka ba le dikgopolo tša mohuta woo o sa itebetše, gomme o ikemišetše go di lwantšha.

Ikemišetše go dula o nagana le go dira dilo tšeo Modimo a di nyakago. Ekiša moapostola Paulo yoo a bego a ikemišeditše go ‘tula mmele wa gagwe le go o laola bjalo ka lekgoba.’ (1 Bakor. 9:27) O se ke wa dumelela dikganyogo tše di fošagetšego di go laola. Beibele e re: ‘Fetoga ka go fetola monagano wa gago, e le gore o itlhatselele thato e botse le e amogelegago le e phethegilego ya Modimo.’ (Baroma 12:2) Gopola gore go nagana le go dira dilo ka go dumelelana le thato ya Modimo go tla dira gore o thabe, eupša go ineela dikganyogong tša nama go ka se go thabiše.

Leka go swara ditemana tše itšego tša Beibele ka hlogo. Ke moka ge o thoma go tlelwa ke dikgopolo tše di fošagetšego, gapeletša monagano wa gago go nagana ka mangwalo ao o tla bego o a swere ka hlogo. Ditemana tše bjalo ka Psalme 119:37; Jesaya 52:11; Mateo 5:28; Baefeso 5:3; Bakolose 3:5 le Bathesalonika ba Pele 4:4-8 di tla go thuša go kwešiša kamoo Jehofa a hloilego diswantšho tša batho ba sa aparago le seo a nyakago o se dira.

O swanetše go dira’ng ge e ba o sa kgone go tlogela go bogela dilo tšeo di sa hlwekago goba go nagana ka tšona? Ekiša mohlala wo Jesu a re beetšego wona. (1 Pet. 2:21) Ka morago ga gore Jesu a kolobetšwe, Sathane o ile a dulela go mo leka. Jesu o ile a dira’ng? Ga se a ka a ineela tekong. O be a tsopola Mangwalo ge Sathane a mo leka. O ile a re: “Tloga, Sathane!” ke moka Sathane a tloga. Go no swana le ge Jesu a ile a se tlogele go ganetša Diabolo ge a be a mo leka, le wena o se ke wa tlogela go lwa le yena. (Mat. 4:1-11) Sathane le lefase la gagwe ba tla dulela go leka go dira gore o nagane ka dilo tše sa hlwekago, eupša o se ke wa fela matla. O ka kgona go fenya mokgwa wa go bogela diswantšho tša batho ba sa aparago. Jehofa a ka go thuša gore o fenye lenaba la gago.

Tšwela pele o rapela Jehofa gomme o mo kgopele gore a go thuše. Paulo o itše: “Tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.” (Bafil. 4:6, 7) Modimo o tla go nea khutšo ya monagano go go thuša gore o se ke wa dira sebe. Ge o ka batamela kgauswi le Jehofa, le yena ‘o tla go batamela.’—Jak. 4:8.

Go ba le tswalano e tiilego le Jehofa Modimo go tla go šireletša melabeng ya Sathane. Jesu o itše: “Mmuši wa lefase [Sathane] o etla. Le gona a ka se ntire selo.” (Joh. 14:30) Ke ka baka la’ng Jesu a be a kgodišegile ka se? Lebakeng le lengwe o itše: “Yo a nthomilego o na le nna; ga se a ntlogela ke nnoši, gobane ka mehla ke dira dilo tše di mo kgahlago.” (Joh. 8:29) Le wena ge e ba o dira dilo tšeo di kgahlago Jehofa, a ka se tsoge a go tlogetše. Ge o ka phema molaba wa go bogela diswantšho tša batho ba sa aparago, o tla ba o fentše Sathane.