OBU Abaisraeli baabaire bari haihi kwambuka Omugyera Yorudaani kuza omu nsi eyaaraganisiibwe, haine abantu abaizire kubataayaayira. N’abakazi abanyamahanga abaayetsire abashaija Abaisraeli aha mukoro. Nigubaasa kuba gwareebekire nk’omugisha gw’omuhendo ogu bataine kufeerwa. Okutunga abanywani basya, okuzina, n’okurya eby’okurya birungi nibibaasa kuba byareebekire nk’ebirikushemeza. Kwonka emigyenzo n’emicwe y’abakazi abo ekaba etaine kakwate n’Ebiragiro ebi Ruhanga yaabaire ahaire Abaisraeli. Abashaija Abaisraeli abamwe nibabaasa kuba bateekateekire bati: ‘Tibaraatuhabise. Nitwija kwegyendesereza.’

 Niki ekyabaireho? Ebyahandiikirwe nibigira biti: ‘Bakatandika kushambana n’abaishiki b’Abamoabu.’ Nangwa abakazi abo bakaba nibenda ngu abashaija Abaisraeli baramye baaruhanga b’ebishuba. Kandi buzima bakakikora! Nikyetegyerezibwa ahabw’enki Yehova ‘yaabagiriire ekiniga kingi.’​—Kub. 25:1-3.

Abaisraeli abo bakahenda Ebiragiro bya Ruhanga omu miringo ebiri: Bakainamira ebishushani, kandi bakashambana. Baingi munonga bakafa ahabw’obugomi bwabo. (Kur. 20:4, 5, 14; Bir. 13:6-9) Ahabw’enki eki baakozire kyabaire kiri eky’akabi munonga? N’ahabw’obwire obu baakikoreiremu. Ku ogire ngu abashaija abo tibarahenzire Ebiragiro bya Ruhanga, omu bwire bukye bakaba nibaza kwambuka Omugyera Yorudaani bataahe omu Nsi Eyaaraganisiibwe.​—Kub. 25:5, 9.

Aha bikwatiraine n’ebyabaireho, entumwa Paulo akahandiika ati: “Ebyo bikabahikaho kuba eby’okureeberaho, kandi bikahandiikwa kutuhuguura, itwe abariho omu biro by’aha”mperu y’ensi. (1 Kor. 10:7-11) Hatariho kubangaanisa, Sitaane akashemererwa kureeba bamwe aha Baisraeli abo barikukora ekibi ky’amaani, reero bakaremwa kutaaha omu Nsi Eyaaraganisiibwe. Ka kyakubaire eky’obwengye kwegyera aha kyabahikireho, turikumanya ngu Sitaane tihariho kindi eki arikwenda kureka okuturemesa kutaaha omu nsi ensya!

Sitaane naatega Abakristaayo arikukoresa obukoryo obu arikumanya gye ngu bukozire aha bantu baingi. Obu yaatega Abaisraeli, akakoresa obushambani. Omu bunaku bwaitu, obushambani na hati bukiri omutego gw’akabi. Omuringo gumwe mukuru ogu abantu barikubaasa kugwa omu bushambani n’okurabira omu birikwitsa enshoni.

Obunaku obu, omuntu naabaasa kureeba ebirikwitsa enshoni abandi batarikumanya. Emyaka ey’enyima, omuntu owaabaire naayenda kureeba ebirikwitsa enshoni akaba aza omu myanya y’eby’emizaano kureeba vidiyo z’obushambani, nari omu maduuka g’ebitabo ebirimu ebirikwitsa enshoni kubigura. Abantu baingi bakaba nibanga kuza omu myanya egyo nari haihi nayo ahabw’okutiina kuhemuka baabareebayo. Kwonka hati, omuntu orikukoresa Intaneeti naabaasa kureeba ebirikwitsa enshoni yaaba ari aha murimo, nangwa n’omu motoka. Kandi omu mahanga maingi, omushaija nari omukazi naabaasa kutunga ebirikwitsa enshoni atarugire na mu nju ye.

Ekyo tikyo kyonka. Hati kyorobi kureeba ebirikwitsa enshoni ahabw’okukoresa ebyoma by’omu ngaro nk’esimu nari tabuleti. Abantu baaba nibagyenda omu muhanda, bari omu baasi nari egaari y’omwika, nibabaasa kureeba ebirikwitsa enshoni barikukoresa ebyoma ebyo.

Ahabw’okugira ngu hati kyorobi kureeba ebirikwitsa enshoni bwesherekye, bireetaire abantu baingi akabi k’amaani kukira ira. Abantu baingi abarikureeba ebirikwitsa enshoni nibashiisha obushwere bwabo, ekitiinisa kyabo, n’omuntu waabo ow’omunda. Kandi eky’akabi munonga, nibabaasa kushiisha omukago gwabo na Ruhanga. N’ahabw’ekyo ebirikwitsa enshoni n’eby’akabi aha barikubireeba. Emirundi mingi, nibireeta obusaasi bw’amaani omu nyehurira. Obusaasi obwo nibubaasa kukira mporampora, kwonka omuntu agume aine enkojo kumara obwire buraingwa.

Kwonka twine kumanya ngu Yehova naaturinda kutagwa omu mutego gwa Sitaane ogu. Twaba turi ab’okutunga oburinzi bwa Yehova, twine kukora eki abashaija Abaisraeli ira baremirwe kukora, ‘okuhurira’ Yehova nari okumworobera. (Kur. 19:5) Twine kukimanya gye ngu Yehova naayangira kimwe ebirikwitsa enshoni. Ahabw’enki nitugira tutyo?

Teekateeka ahari eki: Ebiragiro ebi Ruhanga yaahaire Abaisraeli bikaba nibitaana n’eby’amahanga agandi. Bikaba nibikora nk’ekisiika kutaanisa Abaisraeli aha bantu b’amahanga ago n’ebikorwa byabo bigwire. (Bir. 4:6-8) Ebiragiro ebyo bikaba  nibyoreka butunu ngu buzima, Yehova naayanga obushambani.

Yehova akagamba ebikorwa bibi ebi amahanga agandi gaabaire nigakora, reero yaagambira Abaisraeli ati: “Mutarikora nk’oku Abanyakanaani barikukora omu nsi yaabo ei ndikubatwaramu. . . . Ensi yaabo ekasiisikara; nikyo ndikugitura ahabw’okutahikiirira kwayo.” Aha Baisraeli ba Ruhanga abarikwera, emitwarize y’Abanyakanaani ekaba esiisikaire kyareetera n’ensi ei baabaire nibatuuramu kuba esiisikaire.​—Lev. 18:3, 25.

N’obu Yehova araabe yaafubiire Abanyakanaani, abantu abandi bakagumizamu nibakora eby’obushambani. Bwanyima y’emyaka erengire 1,500, Paulo akagamba aha mahanga agu Abakristaayo baabaire nibatuuramu ngu “bari nk’ebiti” nari tibaine micwe na kakye. Nangwa bakaba, “beetaahize omu by’okurigira okubi, n’omu mururu gw’okukora ebihagaro eby’emiringo yoona.” (Efe. 4:17-19) Obunaku obu, abantu baingi baine emicwe mibi munonga. Abakristaayo ab’amazima bashemereire kwetantarira kimwe kureeba ebirikwitsa enshoni ebiri omu nsi egi nk’oku kirikubaasika.

Ebirikwitsa enshoni tibirikuhaisa Ruhanga ekitiinisa. Akahanga abantu omu kishushani kye kandi bari nkawe. Akatuhanga twine okubaasa kw’okukora ekihikire. Omu muringo gw’obwengye Ruhanga akatuteeraho emitindo erikukwata aha kuteerana. Akaba agyendereire ngu omushaija n’omukazi abari omu bushwere obuhikire babe nibo baateerana. (Kut. 1:26-28; Enf. 5:18, 19) Kandi shi abo abarikushohoza ebirikwitsa enshoni nari abarikubijanjaaza? Nibaba nibeehuzya emitindo ya Ruhanga erikukwata aha micwe. Eego, abantu abarikwenegyeza ebirikwitsa enshoni tibarikuhaisa Ruhanga ekitiinisa. Ruhanga naija kucwera orubanja abarikwehuzya emitindo ye barikushohoza ebirikwitsa enshoni nari barikubishagika.​—Rom. 1:24-27.

Kandi abantu abarikubishoma nari bakabireeba bakigyendereire? Abamwe nibabaasa kuteekateeka ngu n’eby’okweshemeza ebitaine kabi. Kwonka, buzima nibaba nibashagika abo abarikwehuzya emitindo ya Yehova. Eki nikibaasa kuba kyabaire kitari kigyendererwa kyabo obu baatandika kureeba ebirikwitsa enshoni. Kwonka, Baibuli neekyoreka butunu ngu abaheereza ba Ruhanga ab’amazima baine kwangira kimwe ebirikwitsa enshoni. Baibuli neetweshengyereza ngu itwe abarikukunda Yehova twangye “obubi.”​—Zab. 97:10.

 Nangwa n’abo abarikwenda kwetantara kureeba ebirikwitsa enshoni nibashanga kigumire kukikora. Turi abatahikiriire, kandi nitubaasa kuba nituteeraho munonga kusingura ebyetengo bibi eby’okuteerana. Kandi emitima yaitu etahikiriire neebaasa kuba neetubeihabeiha ngu ti kibi kureeba aha birikwitsa enshoni. (Yer. 17:9) Kwonka Abakristaayo baingi babaasize kusingura okurwana oku. Okumanya eki nikibaasa kutugaruramu amaani naitwe twaba twine oburemeezi nk’obu. Yetegyereze oku Ekigambo kya Ruhanga kirikubaasa kukuhwera kwetantara omutego gw’ebirikwitsa enshoni.

Nk’oku kirikworekwa aha ruguru, ebyetengo bibi bikarugiramu Abaisraeli akabi k’amaani. Eki na hati nikibaasa kubaho. Mwene ishe Yesu orikwetwa Yakobo akagamba aha kabi ati: “Omuntu weena ayohibwa . . . okwetenga kwe. Bwanyima okwetenga okwo ku kuheza kutwara enda, kuzaara ekibi.” (Yak. 1:14, 15) Omuntu yaikiriza ekyetengo kibi kumuguma omu mutima, naabaasa kurugaho naakora ekibi. N’ahabw’ekyo, tushemereire kweihamu ebiteekateeko bibi, tutaguma nitubiteekateekaho.

Waashanga ngu nooguma nooteekateeka aha bintu bibi, gira eki waakora ahonaaho kubyeyihamu. Yesu akagira ati: “Omukono gwawe nari shi ekigyere kyawe ku kiraakureetere kukora ekibi, okitemeho, okinagye hare. . . . Kandi n’eriisho ryawe ku riraakureetere kukora ekibi, oriihemu orinagye hare.” (Mat. 18:8, 9) Yesu akaba atarikumanyisa okwesharaho ekicweka ky’omubiri. Akaba naaha eky’okureeberaho kworeka obukuru bw’okucwamu kugira eki twakora ahonaaho kwihaho ebirikuteeza entsibo. Nitubaasa kugyendera tuta aha buhabuzi obu aha bikwatiraine n’ebirikwitsa enshoni?

Ku oraagwe aha birikwitsa enshoni, otateekateeka oti: ‘Tibiraampabise.’ Ahonaaho reeba aha rubaju. Ihaho tiivi otarikweziringa. Kiinga kompyuta nari esimu omu kaanya ako. Ta omutima aha kintu ekishemeire. Okukora eki nikiija kukuhwera kurinda emiteekateekyere yaawe omu mwanya gw’okwikiriza ebyetengo bibi kukutegyeka.

Mbwenu shi ku waakuba waarekire kureeba ebirikwitsa enshoni, kwonka okaguma nobiijuka obumwe n’obumwe? Omuntu naabaasa kuguma naijuka ebishushani ebirikwitsa enshoni nari kuguma  naabiteekateekaho kumara obwire buraingwa. Obwire bwona nibibaasa kwija omu biteekateeko byawe. Ekyo kyabaho, noobaasa kuhurira nooyenda kukora ekintu kitashemeire, nk’okwemarisa. N’ahabw’ekyo guma noomanya ngu ebiteekateeko nk’ebyo nibibaasa kwija eshaaha yoona, kandi ba oyetebeekaniise kubirwanisa.

Ebiteekateeko byawe n’ebikorwa byawe mariirira kubihikaanisa n’ebi Ruhanga arikukunda. Ba nk’entumwa Paulo, owaabaire ayeteekateekire kuteera omubiri gwe n’okugutegyeka nk’omuhuuku. (1 Kor. 9:27) Otaikiriza ebyetengo bibi kukuhindura omuhuuku waabyo. Garura busya ‘ebiteekateeko byawe, obone kumanya gye ebi Ruhanga arikukunda, oku biri birungi, ebirikusiimwa, kandi ebihikire buzima.’ (Rom. 12:2) Ijuka ngu, okuteekateeka n’okutwaza omu muringo ogurikuhikaana n’ebi Ruhanga arikukunda, nikureeta okumarwa kukirira kimwe okukora ebibi.

Teeraho kugira Ebyahandiikirwe ebi waakwata omu mutwe, reero waagira ebiteekateeko bibi, teekateeka aha byahandiikirwe ebyo. Ebyahandiikirwe nka Zaaburi 119:37; Isaaya 52:11; Matayo 5:28; Abaefeso 5:3; Abakolosai 3:5; na 1 Abatesalonika 4:4-8, nibiija kukuhwera kureeba ebirikwitsa enshoni nk’oku Yehova arikubireeba, n’okumanya eki arikwenda ngu okore.

Noija kukora ki waaba otarikubaasa kwezibira kuteekateeka aha bintu bibi nari kubireeba? Tooreza gye Yesu eky’okureeberaho kyaitu. (1 Pet. 2:21) Yesu ku yaaherize kubatizibwa, Sitaane akaguma naamugyeza. Yesu akakora ki? Akaguma naamwangira. Ahabw’okuguma naakoresa ebyahandiikirwe, akabaasa kusingura okwohibwa oku Sitaane yaareetsireho. Akagira ati: “Rugaho, Sitaane!” kandi Sitaane akamurugaho. Nk’oku Yesu atararekyeire aho kurwanisa Omuregi, naiwe toshemereire kurekyera aho. (Mat. 4:1-11) Sitaane n’abarikumushagika nibaija kugumizamu nibateeraho kukureetera kuteekateeka aha birikwitsa enshoni, kwonka gumizamu noorwana. Noobaasa kurwanisa omuze gw’okureeba ebirikwitsa enshoni kandi ogusingure. Orikuhwerwa Yehova, noobaasa kusingura omuzigu waawe.

Yesigire kimwe Yehova kurabira omu kushaba. Paulo akagira ati: ‘Mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, nibwija kuguma niburinda emitima yaanyu n’obwengye bwanyu omuri Kristo Yesu.’ (Fil. 4:6, 7) Obusingye bwa Ruhanga nibureeta oburuhuuko waarwanisa ekibi okasingura. Waaguma nooyirira haihi Yehova, ‘nawe naija kukwirira haihi.’​—Yak. 4:8.

Oburinzi oburikukirayo kutuhwera kutahikwaho kabi koona, n’okwirira haihi na Rukira Boona. Yesu akagira ati: “Omutegyeki w’ensi egi [Sitaane] naija, kwonka taanyineho bushoboorozi.” (Yoh. 14:30) Ahabw’enki Yesu yaabaire aine obuhame obu? Eizooba rimwe akashoboorora ati: “Owantumire turi hamwe; takantsigahoga nyenka, ahabw’okuba obutoosha nkora ebimushemeza.” (Yoh. 8:29) Waaba nookora ebirikushemeza Yehova, naiwe tarikwija kukutsigaho. Yetantare omutego gw’ebirikwitsa enshoni, obwo Sitaane tarikwija kubaasa kukukwatsa omu mutego gwe.