ИЗРАИЛӔГТӔ лӕудтӕнцӕ Зӕрдӕвӕрд зӕнхи къӕсӕрбӕл. Ӕрмӕстдӕр ма сӕ Иорданбӕл бахезун гъудӕй. Фал сӕмӕ еци рӕстӕг фӕззиндтӕнцӕ иуазгутӕ. Етӕ адтӕнцӕ ӕндӕрбӕстаг силгоймӕгтӕ, ӕма израилаг нӕлгоймӕгти сӕ бӕрӕгбонмӕ худтонцӕ. Ӕвӕдзи, израилӕгтӕмӕ е хуарз фӕккастӕй: нӕуӕг адӕни хӕццӕ базонгӕ ун, ракафун ӕма дзӕбӕх фӕммийнасӕ кӕнун. Кӕд, еци силгоймӕгтӕ ци адӕнихаттӕй адтӕнцӕ, уони ӕгъдӕуттӕ Хуцауи адӕни ӕгъдӕуттӕй хецӕн кодтонцӕ, уӕддӕр кадӕр ба расагъӕс кодтайдӕ: «Цӕй, неци ӕрцӕудзӕй, лӕмбунӕг уодзӕн. Ести, уӕд мӕ бон уодзӕй мӕхебӕл фӕххуӕцун».

 Цума идарддӕр ци ’рцудӕй? «Израилӕгтӕ райдӕдтонцӕ Моави кизгутти хӕццӕ хӕтун»,– финст ӕй Библий. Гъуддаг уой медӕг адтӕй, ӕма еци силгоймӕгти фӕндадтӕй, цӕмӕй израилаг лӕгтӕ уони хуцӕуттӕн ковун райдӕдтайуонцӕ. Ӕма е сӕ къохи бафтудӕй. «Йегови маст иссугъдӕй Израилмӕ» (Ним. 25:1–3).

Еци рӕстӕги израилӕгтӕ дууӕ устур тӕрегъӕди искодтонцӕ. Мӕнгӕ хуцӕуттӕн бакувтонцӕ ӕма хӕтун райдӕдтонцӕ. Мингай нӕлгоймӕгтӕ уой туххӕй сӕ цард бабун кодтонцӕ (Рац. 20:4, 5, 14; Дук. з. 13:6–9). Гъе уӕд Хуцауи закъони сӕрти ку нӕ рахизтайуонцӕ, уӕд ма сӕ ӕрмӕстдӕр гъудайдӕ Иорданбӕл бахезун, ӕма Зӕрдӕвӕрд зӕнхӕбӕл адтайуонцӕ (Ним. 25:5, 9).

Еци хабари кой кӕнгӕй апостол Павел финста: «Ци хабӕрттӕ сӕбӕл ӕрцудӕй, етӕ ба ӕнцӕ цӕветтонтӕ, ӕма финст ӕрцудӕнцӕ, цӕмӕй си мах, аци доги кӕрон ка цӕруй, етӕ, нӕхецӕн зунд райсӕн» (1 Кор. 10:7–11). Сайтан кунӕг нӕ цийнӕ кодта, еци израилӕгтӕ уӕхӕн устур тӕрегъӕд ке искодтонцӕ ӕма Зӕрдӕвӕрд зӕнхӕмӕ ке нӕ бацудӕнцӕ, уобӕл. Аци хабар гъӕуама ма иронх кӕнӕн, уомӕн ӕма абони дӕр Сайтан уобӕл архайуй, цӕмӕй, Хуцау зӕрдӕ кӕмӕй байвардта, еци нӕуӕг дуйне ма фӕууинӕн.

Киристӕнтти расайунмӕ Сайтан пайда кӕнуй, берӕ адӕни ке фӕрци басайдта, еци мадзӕлттӕй. Уӕлдӕр куд дзурдтан, уотемӕй израилӕгтӕ хӕтундзийнади скъӕппӕги бахаудтӕнцӕ. Абони дӕр еци скъӕппӕги бахаунӕй уотӕ тӕссаг ӕй. Беретӕ си бахаудтӕнцӕ, порнографимӕ кӕсун ке райдӕдтонцӕ, уой туххӕй.

Нури рӕстӕги адӕймаг порнографимӕ ку кӕса, уӕд ӕй зонгӕ дӕр неке бакӕндзӕй. Раздӕр ӕнӕгъдау киномӕ бакӕсӕн адтӕй ӕрмӕстдӕр киной кенӕ видеосалони, уӕхӕн журнал балхӕнӕн ба адтӕй, ӕрмӕстдӕр сӕрмагонд тукӕнтти. Ӕма беретӕ уӕхӕн рауӕнтӕмӕ нӕ цудӕнцӕ, еске сӕ ке фӕууиндзӕй, уой тӕссӕй. Фал абони интернет кӕмӕ ес, уонӕй кефӕнди бон дӕр ӕй порнографимӕ кӕсун, фӕнди кусти уа, фӕнди машини. Берӕ бӕстити, порнографимӕ бакӕсуни туххӕй адӕймаги цӕун дӕр некумӕбал гъӕуй.

Телефонтӕй дӕр интернетмӕ бацӕуӕн ке ес, уой туххӕй порнографимӕ бакӕсун никки ӕнцондӕр иссӕй. Беретӕ порнографимӕ фӕккӕсунцӕ гъӕунги цӕугӕй кенӕ автобуси бадгӕй дӕр.

Уомӕ гӕсгӕ порнографи абони ци зиан хӕссуй, уой, раздӕр ци зиан хаста, уой хӕццӕ рабарӕн дӕр нӕййес. Порнографимӕ дуйне адӕн ке кӕсунцӕ, уой туххӕй сӕ бийнонти цард фехӕлуй, еу афони ба син сӕхе цӕсти дӕр кадӕ нӕбал фӕууй, удта се ’фсарӕ ниддор уй. Фал уомӕй фуддӕр ба е ӕй, ӕма уой туххӕй Хуцауӕй раидард унцӕ. Дзубанди дӕр ибӕл нӕййес, порнографи устур зиан хӕссуй, ка имӕ кӕсуй, уонӕн. Еци зиан ӕнгъезуй рабарун, ӕрӕгӕмӕ ка дзӕбӕх кӕнуй ӕма бауӕр ка ниффудконд кӕнуй, уӕхӕн гъӕдгинти хӕццӕ.

Фал нӕ Йегови бон ӕй еци скъӕппӕгӕй багъӕуай кӕнун. Уой туххӕй нӕ гъӕуй кӕнун, израилӕгтӕ ци нӕ бакодтонцӕ, уой – «алли гъуддаги дӕр» Хуцаумӕ игъосун (Рац. 19:5). Гъӕуама ма иронх кӕнӕн, Хуцау порнографийӕй е ’сӕфт ке уинуй. Цӕмӕн ес уотӕ зӕгъӕн?

Расагъӕс кӕнӕ еу гъуддагбӕл: Хуцау израилӕгтӕн ке равардта, еци закъӕнтти хузӕн закъӕнттӕ рагидзаманти некӕмӕн адтӕй. Еци закъӕнттӕ сӕ гъӕуай кодтонцӕ, сӕ алливарс адӕнихӕттитӕмӕ ци илгъаг ӕгъдӕуттӕ адтӕй, уонӕй (Дук. з. 4:6–8). Хуцауи закъӕнттӕй бӕрӕг адтӕй, Йеговӕ хӕтундзийнадӕй е ’сӕфт ке уинуй, е.

Ӕндӕр адӕнихӕттитӕ ци ихӕлд миутӕ кодтонцӕ, етӕ сӕмӕ ӕгъдаубӕл нимад адтӕнцӕ. Фал Йеговӕ ба израилӕгтӕн бафӕдзахста: «Кумӕ [уӕ] кӕнун, еци Ханаани зӕнхӕбӕл куд кӕнунцӕ, уотӕ дӕр ма кӕнтӕ. [...] Зӕнхӕ дӕр ницъцъумур ӕй, ӕма ’й ӕз бафхуӕрдзӕн, ци тӕрегъӕдтӕ ибӕл фӕккодтонцӕ, уони туххӕй»  (Лев. 18:3, 25). Израилӕгти Сугъдӕг Хуцау Йегови цӕсти ханаайнӕгти цард уотӕ илгъаг адтӕй, ӕма ци зӕнхӕбӕл цардӕнцӕ, уой дӕр ма цъумурбӕл банимадта.

Йеговӕ ханаайнӕгти бафхуардта, фал ма уӕддӕр беретӕ ӕнӕгъдау цард кодтонцӕ. Еу 1 500 анзей фӕсте апостол Павел, киристӕнттӕ ци адӕни астӕу цардӕнцӕ, уой туххӕй ниффинста: «Се ’фсарӕ еугур исӕфт фӕккодтонцӕ ӕма ихӕлд миутӕбӕл бафтудӕнцӕ, ӕма ӕнӕфсесӕй алли цъумур гъуддӕгтӕ кӕнунцӕ» (Еф. 4:17–19). Абони дӕр беретӕ уӕхӕн цард кӕнунцӕ. Хуцауи еузӕрдон лӕггадгӕнгути ӕгас хъауритӕй гъӕуй архайун, цӕмӕй ихӕлд ӕма ӕнӕгъдау цӕмӕдӕрти ма кӕсонцӕ.

Порнографи Хуцауи ӕгадӕ кӕнуй. Е адӕни ӕхемӕ гӕсгӕ сфӕлдиста ӕма син ӕфсарӕ равардта. Хуцау адӕнӕн ӕгъдаудзийнади туххӕй закъӕнттӕ ке равардта, е ӕ устур зундбӕл дзорӕг ӕй. Ӕ фӕндонмӕ гӕсгӕ лӕг ӕма уосӕн сӕ сосӕг цард гъӕуама цийнӕдзийнадӕ хастайдӕ (Райд. 1:26–28; Ӕмб. 5:18, 19). Порнографи ка уадзуй ӕма ’й ка парахат кӕнуй, уонӕй ба ци ес зӕгъӕн? Етӕ Хуцауи уагӕвӕрдтӕ нецӕмӕ дарунцӕ ӕма ’й ӕгадӕ кӕнунцӕ. Йеговӕ тӕрхон кӕндзӕй, порнографи ка уадзуй ӕма ’й ка парахат кӕнуй, уонӕн (Ром. 1:24–27).

Зонгӕ-зонгӕй порнографимӕ ка кӕсуй кенӕ уӕхӕн литературӕ ка кӕсуй, уонӕй ба ци ес зӕгъӕн? Кедӕрти гъудимӕ гӕсгӕ уоми лӕгъузӕй неци ес. Фал ӕцӕгӕй ба уӕхӕн адӕн уомӕй, Хуцауи закъӕнттӕ ӕ къӕхти буни ка кӕнуй, уони къох аразунцӕ, кӕд ӕй лӕдӕргӕ дӕр нӕ фӕккӕнунцӕ, уӕддӕр. Бӕрӕг ӕй: ӕцӕг Хуцауи лӕггадгӕнгутӕ гъӕуама порнографийӕй се ’сӕфт уинонцӕ. Библи нӕ разӕнгард кӕнуй: «Йегови ка уарзуй, етӕ, лӕгъуздзийнадӕй уе ’сӕфт уинетӕ» (Пс. 97:10).

Адӕймагӕн порнографимӕ кӕсунӕй ӕхе багъӕуай кӕнун ӕнцон нӕй. Ӕнӕнхӕст ке ан, уомӕ гӕсгӕ нин ӕнӕгъдау фӕндти хӕццӕ тох кӕнун зин фӕууй. Уомӕй уӕлдай ма нӕ нӕ зӕрдӕ дӕр сайун райдайуй, зӕгъгӕ, лӕгъузӕй си неци ес (Йер. 17:9). Фал уотемӕй дӕр беретӕ киристӕнттӕ ку иссӕнцӕ, уӕд еци тохи фӕууӕлахез ӕнцӕ. Уой дӕ зӕрдӕбӕл куд дарай, уӕд дӕу бон дӕр исуодзӕй, уӕхӕн фӕлварӕнбӕл  ку исӕмбӕлай, уӕд ӕ сӕрти рахезун. Гъӕйдӕ ӕркӕсӕн, Хуцауи Дзурд нин куд банхус кӕндзӕй, цӕмӕй Сайтани скъӕппӕги ма бахауӕн.

Израилӕгтӕ се ’нӕгъдау фӕндти фӕдбӕл ке рацудӕнцӕ, е сӕ фидбилизмӕ ӕркодта. Уӕхӕн фидбилизи бахаунӕй махӕн дӕр тӕссаг ӕй. Киристей ӕнсувӕр Иаков финста: «Алкӕмӕндӕр фӕлварӕн фӕууй, ӕхе зӕрди фӕндӕ ’й ке ’сцирен кӕнуй ӕма ӕ фӕдбӕл ке рандӕ уй. Еци фӕндӕ ба едагӕ ку рауадзуй, уӕд ӕркӕнуй тӕрегъӕдмӕ» (Иак. 1:14, 15). Адӕймаг ку бауадза, цӕмӕй ӕнӕгъдау фӕндтӕ ӕ зӕрди едӕгтӕ рауадзонцӕ, уӕд ӕй е еу афони ӕнӕмӕнгӕй тӕрегъӕдмӕ ӕркӕндзӕй. Мадта ӕнӕгъдау сагъӕстӕ гъӕуама нӕ сӕрмӕ уадзгӕ дӕр ма кӕнӕн.

Цъумур сагъӕстӕ дӕмӕ ку фӕззинна, уӕд ӕвӕстиатӕй архайӕ. Киристе загъта: «Мадта дӕ кӕд дӕ къох кенӕ дӕ къах рӕдуйун кӕнуй, уӕд ӕй ралух кӕнӕ ӕма ’й рагӕлдзӕ... Кӕд дӕ дӕ цӕстӕ рӕдуйун кӕнуй, уӕд уой дӕр искъахӕ ӕма ’й рагӕлдзӕ» (Матф. 18:8, 9). Киристе уомӕ нӕ разӕнгард кодта, цӕмӕй нӕхецӕн зиан хӕссӕн, фал ӕй фӕндадтӕй балӕдӕрун кӕнун, къахкъуӕрӕн нин ци исуй, уой еци фӕдбӕл рандӕ кӕнун куд ӕхсидзгӕ ’й, уой. Киристей дзурдтӕ нин куд ӕнхус кӕнунцӕ, цӕмӕй нӕхе порнографимӕ кӕсунӕй багъӕуай кӕнӕн?

Ӕнӕгъдау ести ку рауинай, уӕд дӕмӕ уотӕ ма кӕсӕд, ӕма дин е неци зиан ӕрхӕсдзӕй? Дӕхе уайтагъд разелӕ. Телевизор, компьютер кенӕ дӕ телефон еци фӕдбӕл ракъипп кӕнӕ. Дӕ гъудитӕ кӕдзос естӕмӕ исаразӕ. Ӕма гъе уӕд лӕгъуз фӕндти фӕдбӕл нӕ рацӕудзӕнӕ, фал сӕбӕл фӕхъхъӕбӕрдӕр уодзӕнӕ.

Кӕд нур порнографимӕ нӕбал кӕсис, уӕддӕр, ӕвӕдзи, рӕстӕгӕй-рӕстӕгмӕ дӕ цӕститӕбӕл еци ӕнӕгъдау хузтӕ рауайунцӕ. Цума уӕхӕн уавӕри ци кӕнгӕ ’й? Ихӕлд хузтӕ кенӕ сагъӕстӕ адӕймаги сӕри хъӕбӕр арф ниббадунцӕ ӕма хатгай ӕвваст ӕ цӕститӕбӕл дӕр рауайунцӕ. Уӕхӕн уавӕри адӕймагӕн тӕссаг  фӕууй ӕ цъумур фӕндти фӕдбӕл рацӕунӕй, ӕма ’й е ба ӕркӕнуй мастурбацимӕ. Мадта цӕттӕ уо, рӕстӕгӕй-рӕстӕгмӕ дӕ уӕхӕн гъудити хӕццӕ тох кӕнун ке гъӕудзӕй, уомӕ.

Уӕ федар фӕндӕ уӕд, уӕ сагъӕстӕй ӕма уӕ гъуӕддӕгтӕй Хуцауи зӕрдӕ рохс кӕнун. Апостол Павел уин фӕнзуйнаг уӕд. Е ӕхе туххӕй финста: «Мӕ бауӕр гъезӕмарӕй марун ӕма си цагъар аразун» (1 Кор. 9:27). Ӕнӕгъдау фӕндтӕ уӕбӕл ма фӕхъхъӕбӕрдӕр уӕнтӕ. Архайетӕ Библий унаффӕмӕ гӕсгӕ: «Уӕ зунд нӕуӕг кӕнтӕ ӕма уӕ уодигъӕдӕ ӕййеветӕ, цӕмӕй лӕдӕрайтӕ, ци ӕй Хуцауи фӕндон: ци имӕ кӕсуй хуарз, ци ин ӕй ӕхцӕуӕн ӕма ци ӕй ӕ цӕсти ӕнхӕст» (Ром. 12:2). Ма иронх кӕнтӕ: тӕрегъӕдгун фӕндти фӕдбӕл цӕун адӕймаги амондгундӕр нӕ кӕнуй. Адӕймаги амонд кӕнгӕ ’й, ӕ сагъӕстӕ ӕма ӕ гъуддӕгтӕ Хуцауи зӕрдӕмӕ цӕунцӕ, ӕви нӕ, уомӕй.

Бавзарӕ Библийӕй цалдӕр стихи нигъгъуди кӕнун, зӕгъӕн, Псалом 119:37; Исай 52:11; Матфеййи 5:28; Ефесӕгтӕмӕ 5:3; Колоссӕгтӕмӕ 3:5 ӕма 1 Фессалоникӕгтӕмӕ 4:4–8. Аци стихтӕ дин банхус кӕндзӕнцӕ порнографимӕ Йегови цӕстӕй кӕсун, удта ’й зондзӕнӕ, цӕмӕ дӕмӕ ӕнгъӕлмӕ кӕсуй, уой. Ӕнӕгъдау сагъӕстӕ дӕмӕ ку фӕззинна, уӕд байархайӕ аци стихтӕбӕл расагъӕс кӕнун.

Ка ’й зонуй нӕмӕ уотӕ дӕр кӕсдзӕй, ӕма нӕ бон не ’суодзӕй нӕхе порнографимӕ кӕсунӕй кенӕ ӕнӕгъдау сагъӕстӕй багъӕуай кӕнун. Цума уӕд нӕ бон ци ӕй кӕнун? Нӕ бон ӕй Киристей хузӕн архайун (1 Пет. 2:21). Киристе донаргъуд ку райста, уӕд ӕй Сайтан фӕлварун райдӕдта. Ӕма уӕд Йесо ци бакодта? Ӕ къохтӕ не ’руагъта, фал ин ӕ алли загъдбӕл дӕр Библийӕй дзуапп лӕвардта. Уой фӕсте ба ин загъта: «Рандӕ мӕ разӕй, Сайтан!» Ӕма ’й Сайтан ниууагъта. Йесо Сайтани нихмӕ федар лӕудтӕй, ӕма дӕу дӕр уотӕ кӕнун гъӕуй (Матф. 4:1–11). Сайтан ӕма, ӕ дӕлбарӕ ка ӕй, еци дуйне идарддӕр дӕр архайдзӕнцӕ, цӕмӕй дин дӕ сӕр идарддӕр дӕр цъумур сагъӕстӕй идзаг кӕнонцӕ. Фал дӕ къохтӕ ма уадзӕ! Йегови фӕрци дӕ бон ӕй порнографий скъӕппӕгӕй исуӕгъдӕ ун ӕма еци тохи фӕууӕлахез ун.

Йеговӕмӕ ӕдзох ковӕ ӕма си ӕнхус корӕ. Павел загъта: «Алли уавӕри дӕр Хуцаумӕ коветӕ, лигъстӕ ин кӕнтӕ, арфӕ ин кӕнтӕ ӕма си уотемӕй коретӕ, ци уӕ гъӕуй, уой. Ӕма уин Хуцауи фарнӕ, зунд кӕбӕл нӕ хъӕртуй, еци фарнӕ, Йесо Киристей фӕрци багъӕуай кӕндзӕй уӕ зӕрдитӕ ӕма уӕ зунд» (Фил. 4:6, 7). Хуцауи фарнӕй ку исхайгин уай, уӕд дӕ бон уодзӕй, цъумур сагъӕсти хӕццӕ тох кӕнун. Дӕхе Йеговӕмӕ ку хӕстӕг кӕнай, уӕд дӕмӕ «е дӕр ӕрбахӕстӕг уодзӕй» (Иак. 4:8).

Дун-дуйней Хецауи ӕмбал ку уай, уӕд дӕ уомӕй хуӕздӕр неци багъӕуай кӕндзӕй Сайтани скъӕппӕгутӕй. Йесо загъта: «Ӕрбацӕуй аци дуйней хецау [Сайтан]. Мӕнбӕл ӕ барӕ нӕ цӕуй» (Иоан. 14:30). Цума Йесо уотӕ федарӕй цӕмӕн дзурдта? Ӕхуӕдӕг ӕй уотӕ балӕдӕрун кодта: «Ка мӕ рарвиста, е мӕ хӕццӕ ӕй – еунӕгӕй мӕ нӕ ниууагъта, уомӕн ӕма ӕз алкӕддӕр кӕнун, уомӕн ӕхцӕуӕн ци ӕй, уой» (Иоан. 8:29). Алкӕддӕр Йегови зӕрдӕ рохс кӕнунбӕл ку архайай, уӕд дӕ е дӕр некӕд ниууадздзӕй. Порнографимӕ кӕсунӕй дӕхе гъӕуай кӕнӕ ӕма Сайтани скъӕппӕги нӕ бахаудзӕнӕ.