TANGUA enya Isalele akhalele gudilondega ha guzawuga Muta wa Yordani hagula angine mu Mavu a Gutendelela, ngenji jiasendesele guza guatala. Ngenji jiene jiakhalele akhetu a ifutshi iko, nu akhalele mutamega mala a enya Isalele gu feti jiawo. Mala ene atangijile egi guya gu fete jiene guakhalele ndaga yabonga. Handaga gukuata mafuta ahe-ahe, gukina nu gudia ima yabonga, guakhalele guasuanguluisa. Kutime nu makalegelo a akhetu ene akhalelego gudivua nu Mikhuala Nzambi wahanele enya Isalele, uvi enya Isalele ako akhalele mutangiza egi: ‘Mbatushigo gudinginyisa mu ndaga jiawo. Mbatudibamba.’

 Ndaga tshi yabuile gungima? Biblia idi muzuela egi: ‘Athu asendesele gukalagala uthambi nu ana a akhetu a gu Moaba.’ Akhetu ene akhalele mutshigina egi mala a gu Isalele akombelele nzambi jia mambo. Ajikombelele nji! Hene, ‘Yehowa waavuidile jikhabu jiabala sha.’—Lutang. 25:1-3.

Enya Isalele ashiyile Mukhuala wa Nzambi mu maluholo mbadi: Afugamele Nzambi jia isongo nu akalegele uthambi. Athu avula atunyile gutumagela Nzambi afile. (Guz. 20:4, 5, 14; Mikh. 13:6-9) Mukunda natshi ndaga atshitshile yakhalele yabola diago? Yakhalele yabola ha gutadila tangua atshitshile ndaga yene. Gula nga ashiyilego mukhuala wa Yehowa, nga enya Isalele anyi afile akhalele naye guzawuga muta wa Yordani ha gungina mu Mavu a Gutendelela.—Lutang. 25:5, 9.

Ha gutadila ndaga jiene, mupostolo Phaula wasonegele egi: ‘Ndaga eji jiaabuidile gifua njimbu ya gutemesa athu ako, jiasonegewe ha gututemesa handaga tudi mujinga mu masugu a gisugishilo.’ (1 Kol. 10:7-11) Tuajiya guzuela egi Satana wasuangulugile luholo enya Isalele abuile mu gubola guakoma, nu luholo ahetelego luendu lua gungima mu Mavu a Gutendelela. Ndaga jiabola jiatshitshile athu ene jidi naye gutukuatesa ha gujiya egi, Satana mbawusuanguluga gula tuahetelego luendu lua gungina mu mavu ahe-ahe alayele Nzambi!

Mangino Satana wana gutela Aklisto miheto. Ha guakuata, wana gukalegela miheto yamukuatesele ha gukuata athu avula mu tangua dikulu. Tuamonyi egi, ha gubuisa enya Isalele, Satana waatelele muheto mu njila ya uthambi. Uu nu mangino, uthambi wakhala muheto wabalega gubola. Muheto wene wajiya gutukuata muabonga mu njila ya pornografi.

Mangino, muthu wajiya gutala pornografi uvi athu ako gujiya ndo. Mu ivo yabalega, ha gutala pornografi, athu akhalele muya mu mafundo ana gutalesewa video, ha gutala filme jiabola nga ha gusumba mikanda yana guzuelela pornografi. Athu avula akhalelego muya mu mafundo ene handaga akhalele muvua musonyi egi athu ako ajiya guamona. Uvi mangino, muthu wagasue udi nu luholo lua gungina mu Internet, wajiya gutala pornografi gu mudimo nga mu gamiyo. Mu ifutshi yavula, yala nga mukhetu wajiya gutala pornografi monzo yenji.

Yasugilego hanyanyi. Mangino, athu ana gutala pornografie muavula mu telefone. Tangua adi muwenda munjila, nga tangua adi mutshita vuayaje mu bus nga mu train, ana guya nu gutala ifuanesa yabola mu jitelefone jiawo.

Sendese mualeha, yanago gukhala lamba ha gutala pornografi nga gusuegela athu ako egi wana guyitala. Ndaga yene idi mubuisa athu avula mangino gubalega mu tangua dia thomo. Athu avula ana gutala pornografi ana gubolesa ulo wawo, ana gudikatula ginemua nu ana gubolesela matangi awo. Ndaga iko yabola idi egi ajiya gubolesa ufuta wawo nu Nzambi. Jiya egi, pornografi yana guzangela athu ana guyitala. Matangua ako, yana guasagesa muavula mu matangi. Gikenene ana guvua giajiya guhua mage-mage, uvi giana guzula matangua avula.

Hene, tudi naye gujiya egi Yehowa wana gutubamba mu miheto eyi ya Satana. Uvi gula tuatshigina egi Yehowa atubambe, tudi naye ‘gumutumagela nu mutshima umoshi,’ nu tushigo naye gutshita ndaga gifua muatshitshile enya Isalele. (Guz. 19:5) Tudi naye gujiya egi Nzambi gana tshigina ndo nga hazonda pornografi. Mukunda natshi tuazuela ngenyi?

Tangiza ndaga eyi: Mikhuala Yehowa wahanele enya Isalele yakhalele yagudisha nu mikhuala ya enya ifutshi iko ya mu sungi yawo. Mikhuala yene yakhalele gifua gibayi giakhalele guabamba hagula abolesewago gu makalegelo abola a athu a ifutshi iko. (Mikh. 4:6-8) Mikhuala yene yana gumonesa haphelo egi:  Yehowa ganago gutshigina nga hazonda uthambi.

Hatangele Yehowa ndaga jiabola jiakhalele mutshita enya ifutshi iko, wawambelele enya Isalele egi: ‘Mushigo naye gutshita ndaga jiana gutshita enya gu Kanana, gifutshi ngudi gumituala. . . . Gifutshi gidi nu usala, mbangugihana ndola mukunda nu gubola guagio.’ Lujingu lua enya Kanana luakhalele lua majilo gu meso a Yehowa Nzambi wa Isalele, hene gifutshi giawo giabuile gia usala.—Levi 18:3, 25.

Ngatshima Yehowa wahanele enya Kanana ndola, athu ako alandudile gawo gutshita uthambi. Gungima dia ivo 1500, Phaula wamonesele egi mafundo akhalele Aklisto mujinga akhalelego ‘luko nu makalegelo abonga.’ Hene, “adihanele gale gu ndaga jia uthambi, adi nu ngina ya gukalagala ndaga jia usala jia miho yagasue.” (Ef. 4:17-19) Mangino nji, athu avula anago guvua musonyi ha gutshita uthambi. Hene, akombeledi a giamatshidia ashigo naye gutala video nga filme jia musonyi jia enya ha mavu awa.

Gutala pornografi gudi gubola gu meso a Nzambi. Wafugile athu mu gifuanesa gienji nu watuhanele ndunge jia gukhaphumuna ndaga jiabonga nu jiabola. Wahanele nji mikhuala yatadila gubungisa muila. Wahanele njila phamba gudi athu adizudile gale mu ulo ha gusuanguluga gubungisa muila. (Gis. 1:26-28; Ish. 5:18, 19) Uvi itshi tuajiya guzuela mukunda nu athu ana guzola filme jia pornografi, nga anyi ana guyisunzula? Ana gutuna nu mutshima umoshi mikhuala ya Nzambi. Yadiago, athu ene anago gunemesa Yehowa nga hazonda. Nzambi mbawusophesa athu agasue anago gunemesa mikhuala yenji mu luholo ana gutshita nu gusunzula ndaga jia musonyi.—Lomo 1:24-27.

Uvi itshi tuajiya guzuela mukunda nu athu ana gutanga nga gutala pornografi? Ako ajiya gumona gifua gutala pornografi gushigo ndaga yabola. Hene, tangua ana guyitala ana gusuanguluisa athu ana tuna gunemesa mikhuala ya Yehowa. Uvi mu gisendeselo anago gukotelesa egi adi musuanguluisa athu ana gushiya mikhuala. Biblia idi mumonesa haphelo egi, akombeledi a giamatshidia a Nzambi adi naye gutuna pornografi. Yana guzuela egi: ‘O enue muana guzumba Yehowa, tunenu ndaga jiabola.’—Ngi. 97:10.

 Yajiya gukhala lamba gudi athu ashigo mutshigina gutala pornografi ha gubinga khadilo diene. Handaga tushigo athu atagana nu tuana gulua nu nzala jiabola jia gubungisa muila. Luko, tuajiya gusendesa gutangiza egi gutala pornografi gushigo ndaga yabola. (Yel. 17:9) Athu avula abuile Aklisto abingile khadilo diene. Gujiya ndaga yene guajiya gugukuatesa gula aye nji udi mulua nu ndaga ya luholo lumoshi. Tala luholo Mbimbi ya Nzambi yajiya gugukuatesa ha gubinga muheto wa Satana wa gutala pornografi.

Tuamonyi egi, luholo enya Isalele avula akudishile nzala jiabola, atshitshile ndaga yabola diago. Ndaga yene nji yajiya gukalegewa mangino. Yakoba phangi’a Yesu wazuelele egi: “Muthu wagasue wana . . . gunanewa gu ngina yenji yabola. Gungima, gula ngina yakola, yana gubata gu gubola.” (Yak. 1:14, 15) Gula nzala jiabola jiakula mu mutshima wa muthu, muthu muene wajiya gutshita gubola. Hene, tudi naye gutshita ngolo ha gubemba gutangiza ndaga jia musonyi.

Gula matangi abola adi gugujila, tshita ngolo ha guakatula. Yesu wazuelele egi: ‘Gula koko diaye nga kulu diaye didi gugubuisa mu gubola dibatule udibishile gualeha. . . . Luko, gula diso diaye didi mugubuisa mu gubola dikatule, dibishile gualeha.’ (Mat. 18:8, 9) Yesu gazuelelego egi tudi naye gudibatula itshinyi ya muila. Uvi watshiginyile guzuela egi tudi naye gujiya ndaga jiana gututuma ha gukhala nu matangi abola. Luholo lutshi tuajiya gukalegela longo edi mu ndaga yatadila pornografi?

Gula wanona pornografi, uzuedigo egi: ‘Ngajiya guyibinga.’ Katula meso mbala imoshi. Kanga televizio muphushi. Kanga mashinyi nga telefone mu tangua diene. Sha matangi aye mu ndaga jiabonga. Gutshita ngenyi guajiya gugukuatesa ha gutangigiza muabonga ha fundo dia gubemba egi nzala jiabola jigutuameze.

Itshi wajiya gutshita gula wabembele gale gutala pornografi, uvi matangua ako wasendesa gutangiza luko ndaga wamonele? Muthu  wajiya gulandula gutangiza ifuanesa ya pornografi yatalele muene masugu avula. Matangi ene ajiya gugujila tangua diagasue. Gula agujila, ajiya gugutuma ha gutshita ndaga imoshi yabola gifua gukenesa itshinyi yaye ya gubungishila muila ha gudisuanguluisa. Jiya egi matangi a luholo elu ajiya gugujila mu gisagumuisa, khala ya gudilondega ha gualuisa.

Zula desizio dia gutshita ndaga jiana gutshigina Nzambi. Khala gifua mupostolo Phaula, yago wakhalele “muwasa muila [wenji] nu guwubuisa gifua muhiga.” (1 Kol. 9:27, NWT) Ubuigo muhiga wa nzala jiabola. ‘Uvi balumugienu athu ahe-ahe nu matangi ahe-ahe, hagula mutshigine enue hakhenu ndaga jiabonga, jinyi jiajiya gutshiginyiwa nu jiatagana jidi gudivua nu matangi a Nzambi.’ (Lomo 12:2) Jiya egi wajiyilego gukhala nu gusuanguluga gula udi mutangiza ndaga jiabola uvi wajiya gusuanguluga gula udi mutangiza nu gutshita ndaga jiana gutshigina Nzambi.

Kamba gukuata verse jia Biblia mu muto. Gula matangi abola agujila, tshita ngolo ha guwunguluga verse jiene. Verse gifua Ngimbo 119:37; Yeshaya 52:11; Matayo 5:28; Efeso 5:3; Kolosai 3:5; nu 1 Tesalonike 4:4-8 jiajiya gugukuatesa ha gujiya matangi a Yehowa gu ndaga yatadila pornografi, nu ndaga yana gugutoga muene ha gutshita.

Itshi wajiya gutshita gula udi mumona gifua wajiyilego gubemba gutangiza nga gutala ndaga jia musonyi? Landula muabonga gifezegeselo gia Yesu. (1 Phet. 2:21) Habatijiwe Yesu, Satana wamulolele mbala jiavula. Itshi Yesu watshitshile? Walandudile gutuna ndaga jia Satana. Wakhalele mukalegela Mbimbi ya Nzambi ha gutuna ndaga Satana wakhalele gumuwambela ha gutshita. Wazuelele egi: “Satana, katuga!” Satana wamubembele. Luholo Yesu walandudile gulua ha gubinga miheto ya Diabulu, aye nji wajiya gubinga. (Mat. 4:1-11) Satana nu mavu enji mbaalandula guzalesa matangi aye nu ndaga jia musonyi, uvi ubembigo gulua nu matangi ene abola. Wajiya nji gubinga khadilo dia gutala pornografi. Yehowa wajiya gugukuatesa ha gubinga mbalagaji waye.

Landula gutshita gisambu gudi Yehowa ha gumutoga ukuateshi. Phaula wazuelele egi: ‘Dijigenu Nzambi ndaga jienu jiagasue mu gisambu; nu guhuima gua Nzambi gudi mubalega ndunge jiagasue jia muthu mbagubamba mitshima yenu nu matangi enu mu njila ya Klisto Yesu.’ (Fili. 4:6, 7) Nzambi mbawumihana guhuima gua matangi guajiya gumikuatesa ha gutuna gutshita ndaga jiabola. Gula muasuena hehi nu Yehowa, “muene mbawusuene hehi nu anue.”—Yak. 4:8.

Yehowa Fumu wa ima yagasue mbawutubamba gu miheto ya Satana gula tudi mubamba ufuta wabonga nenji. Yesu wazuelele egi: ‘Fumu ya ha mavu awa [Satana] yowu muza, nu muene gashigo nu ngolo gudi ame.’ (Yone 14:30) Mukunda natshi Yesu wakhalele nu gutshigina egi Satana gashigo nu ngolo gudi muene? Wadiangele guzuela egi: ‘Muthu wangutumine udi nu ame, gangubembelego hakhami handaga ngana gutshita ndaga jiana gumusuanguluisa muene.’ (Yone 8:29) Gula udi mutshita ndaga jiana gusuanguluisa Yehowa, muene mbagashigo gugubemba nga hazonda. Lenga muheto wa gutala pornografi, ngenyi Satana mbagashigo gugukuata ha muheto wenji.