TAEM olketa Israelite redi for akrosim Jordan River for go lo land wea God promisim, samfala visitor kam. Olketa visitor hia, hem olketa woman from difren nation, and olketa invaetem olketa man blo Israel for go lo wanfala feast. Maet olketa man hia tingse diswan hem chance for savve lo olketa nara pipol, for dance, and enjoyim naes kaikai. Nomata kastom and wei blo olketa woman hia no followim Law blo God for olketa Israelite, maet olketa man hia ting olsem: ‘Mifala savve wanem for duim. Bae mifala olraet nomoa ia.’

 Wanem nao happen? Bible sei: “Samfala man blong Israel i stat fo durong wetem olketa woman blong Moab.” Really, olketa woman hia laekem olketa man blo Israel for worshipim olketa false god blo olketa. And hem nao wanem olketa duim! From datwan, Jehovah “barava kros tumas” lo olketa.—Nambas 25:1-3.

Tufala samting nao olketa Israelite hia duim wea brekem Law blo God. Olketa baodaon lo olketa idol, and olketa durong. Staka thousand pipol dae bikos olketa no obeyim God. (Eksodas 20:4, 5, 14; Diutronomi 13:6-9) Why nao disfala samting wea happen hem barava nogud tumas? Hem bikos olketa barava klosap nao for go insaed Promis Land. Sapos olketa no brekem Law blo God, staka thousand Israelite hia wea dae bae akrosim nomoa Jordan and go insaed lo Promis Land.—Nambas 25:5, 9.

Taem aposol Paul storyim datfala samting wea happen, hem sei: “Olketa samting wea happen long olketa [hia] hem for teachim iumi, and hem stap long olketa Holy Raeting for warnim iumi wea stap long disfala taem wea world hem klosap for finis.” (1 Cor. 10:7-11) For sure Satan barava hapi taem samfala lo olketa Israelite hia foldaon lo olketa serious sin olsem and olketa no fit nao for go insaed lo Promis Land. So hem barava important for iumi followim datfala warning, bikos iumi savve Satan barava laekem tumas for iumi no go insaed lo niu world!

Satan laek for trapim olketa Christian, hem iusim olketa teknik wea hem savve tumas for iusim, and wea hem iusim finis for spoelem staka pipol. Olsem iumi storyim, hem iusim wei for durong for spoelem olketa Israelite. Distaem tu, hem gohed for iusim sex olsem trap wea barava danger. Wanfala trap wea staka foldaon lo hem nao, hem for lukluk lo olketa rabis piksa or pornography.

Distaem, hem isi for lukluk lo olketa rabis piksa and no eniwan bae savve. Lo bifor, sapos eniwan laek for watchim movie wea showim pornography, hem mas go lo wanfala movie cinema, or sapos hem laek for lukluk lo olketa rabis piksa, hem mas go lo stoa for baem kaen buk olsem. Bat, staka bae feel shame for go lo olketa kaen ples olsem nogud eniwan lukim olketa. Bat distaem, sapos samwan laek for lukluk lo pornography hem savve kasem from Internet, maet lo ples hem waka or nomata insaed lo car. And tu lo staka kantri, nomata wanfala man or woman stap nomoa lo haos blo hem, hem savve go lo Internet for lukluk lo pornography.

And nara samting tu. Olketa moblie and tablet hem mekem hem isi for lukluk lo olketa rabis piksa. Nomata pipol wakabaot lo road, or go lo bas or train, olketa savve lukluk lo olketa rabis piksa lo moblie or tablet wea olketa holem.

From hem kamap isi for pipol lukim olketa rabis piksa and for haedem datwan, pornography spoelem staka pipol winim enitaem bifor. Pornography spoelem olketa marit, hao pipol ting lo olketa seleva, and hem spoelem konsens blo olketa. And worse go moa, hem spoelem wei wea man fren witim God. Tru nao, pornography savve barava spoelem olketa wea lukluk lo hem. Staka taem diswan savve kosim problem saed lo feeling. Samting wea kamaot from diswan hem olsem garekil wea tek longtaem for heal and wea gogo hem garem scar.

Bat, iumi need for luksavve Jehovah savve help for protectim iumi from disfala trap blo Satan. Sapos iumi laekem Jehovah for protectim iumi, iumi mas no olsem olketa man lo Israel bifor. Bat, iumi mas barava obeyim Jehovah. (Eksodas 19:5) Iumi need for luksavve God barava heitim pornography. Why nao iumi sei olsem?

Tingim diswan: Olketa law wea God givim lo nation blo Israel hem barava difren from olketa nara nation lo datfala taem. Olketa law hia hem olsem wall wea separatem olketa blo Israel from olketa nation wea stap raonem olketa wea gohed duim olketa barava nogud samting. (Diutronomi 4:6-8) Olketa law hia showimaot klia hao Jehovah heitim evri wei for duim sex wea no stret.

 Taem Jehovah storyim olketa nogud samting wea olketa nara nation wea stap raonem olketa Israelite duim, hem sei: “Mi tekem yufala go long Kenan, bat yufala mas no falom olketa ravis wei blong olketa. . . . Diskaen wei blong olketa hemi mekem lan ya fo no klin long ae blong mi, so mi [bae] panisim [olketa].” From God blo Israel hem holy, taem hem lukim wei blo olketa Canaanite hem barava nogud tumas, hem olsem olketa barava spoelem datfala land and mekem land hia for no klin.—Levitikas 18:3, 25.

Nomata Jehovah panisim pipol blo Canaan, olketa nara nation gohed for duim sex wea barava no stret. Winim 1,500 year bihaen, Paul storyim hao olketa nation wea olketa Christian stap lo hem lo datfala taem, “olketa no savve long wanem hem stret and wanem hem no stret.” And tu, “olketa no hol bak for duim rong samting and nating shame for duim rong samting. Olketa gohed for duim evri difren kaen samting wea no klin and olketa greedy witim tu.” (Eph. 4:17-19) Distaem tu, pipol barava no savve shame for duim samting wea no stret. Dastawe, olketa wea worshipim Jehovah mas traem best for stap klia lo wei for lukluk lo olketa nogud samting wea pipol lo world duim.

Pornography hem barava no showimaot respect lo God. God creatim iumi for garem olketa wei blo hem and wakem iumi witim feeling for luksavve lo samting wea gud and nogud. From God hem wise, hem givim olketa law abaotem sex. Hem sei sex hem for enjoyim insaed lo marit nomoa. (Jenesis 1:26-28; Provebs 5:18, 19) Taem pipol sei hem olraet nomoa for lukluk lo pornography, or taem pipol wakem pornography, wanem nao olketa really duim? Olketa barava no laek followim standard blo God. So pipol wea sei pornography hem olraet nomoa olketa barava no respectim Jehovah. God bae judgem olketa wea wakem and givimaot olketa buk and movie wea mekhae lo sex bikos samting wea olketa duim hem againstim olketa standard blo God.—Rome 1:24-27.

Bat hao nao olketa pipol wea chus for readim and lukluk lo olketa rabis piksa? Samfala maet sei wei for duim datwan no savve spoelem man. Bat really, samting wea olketa duim hem sapotim pipol wea againstim standard blo Jehovah. Maet olketa no tingim datwan bifor olketa start for lukluk lo pornography. Nomata olsem, hem barava klia hao olketa wea worshipim tru God mas barava heitim pornography. Dastawe Bible hem sei:  “Iufala wea lovem Jehovah, heitim nogud samting.”—Ps. 97:10, NW.

Nomata olketa wea laek for stap klia lo wei for lukluk lo pornography, maet faendem hem hard. From iumi no perfect, maet iumi mas waka hard for faet againstim feeling for laekem sex wea no stret. And tu, from heart blo iumi no perfect maet hem mekem iumi go difren from olketa law blo Jehovah. (Jeremaea 17:9) Nomata olsem, staka wea kamap Christian win for faet againstim datwan. Wei for tingim diswan savve helpem iu sapos iu tu faet againstim disfala feeling. Tingim hao Bible savve helpem iu for stap klia lo pornography wea hem wanfala trap blo Satan.

Olsem iumi storyim finis, from staka Israelite letem feeling blo olketa for laek for sex bossim olketa, olketa kasem barava nogud samting. Sem samting savve happen distaem tu. James, haf brata blo Jesus storyim why nao diswan hem danger, hem sei: “Samting wea man seleva laekem nao savve traem hem. Taem datfala feeling for laekem samting hem kamap strong tumas, hem mekem man for duim sin.” (Jas. 1:14, 15) Sapos wanfala man start for garem rong tingting and hem letem datwan for grow insaed lo heart blo hem, gogo bae datfala man bae sin. So iumi need for kwiktaem aotem olketa rong tingting, and no gohed for ting abaotem.

Sapos iu start for garem tingting wea no klin, kwiktaem duim samting. Jesus hem sei: “Sapos hand or leg bilong iu mekem iu for sin, katem and torowem. . . . And sapos eye bilong iu mekem iu for sin, aotem datwan and torowem.” (Matt. 18:8, 9) Jesus no minim for iumi really katem body blo iumi. Hem storyim datwan olsem tokpiksa for helpem iumi luksavve sapos eni samting bae kosim iumi for sin, iumi need for kwiktaem duim samting. Hao nao datfala kaonsel savve helpem iumi for stap klia lo pornography?

Sapos seke nomoa iu lukim wanfala rabis piksa, no tingse, ‘Bae mi olraet nomoa.’ Iu mas stretawe luk difren. Kwiktaem offem television. Semtaem offem computer, mobile, or tablet. Tanem mind blo iu for tingim samting wea klin. Taem iu duim olsem, bae iu savve kontrolem tingting blo iu and bae iu no letem olketa rong tingting for bossim iu.

Hao sapos iu stop finis for lukluk lo olketa rabis piksa, bat samfala taem iu rememberim samting wea iu lukim bifor? Olketa rabis piksa and rong tingting savve stap lo mind blo man for longfala taem. And enitaem nomoa hem savve kamap lo mind blo man. Sapos samting olsem happen, datwan maet mekem iu for garem feeling for duim samting wea no klin, olsem for nanali. So iumi mas luksavve datfala tingting savve kamap enitaem nomoa, and iumi mas redi for faet againstim datwan.

Iu mas disaed strong for garem tingting and duim samting wea followim wanem Jehovah laekem. Iu mas olsem aposol Paul wea willing for “whipim body bilong [hem] and bossim olsem slave.” (1 Cor. 9:27) No letem olketa rong tingting for bossim iu. “Changem wei bilong [iu] long wei for changem tingting, mekem [iu] luksavve long samting wea God laekem iumi for duim, wea hem gudfala and stret and wea hem hapi long hem.” (Rome 12:2) Mas tingim diswan: Taem tingting and samting wea iu duim hem followim wanem God laekem bae iu barava hapi and satisfae winim wei for letem feeling for duim sin for bossim iu.

Trae for memorizim samfala verse lo Bible, mekem nomata sapos samfala rong tingting hem kamap lo mind, forcem mind blo iu for ting raonem olketa scripture hia. Olketa scripture olsem Sams 119:37; Aesaea 52:11; Matthew 5:28; Ephesus 5:3; Colossae 3:5; and 1 Thessalonica 4:4-8 bae helpem iu for savve hao Jehovah ting lo pornography and wanem Jehovah hem laekem iumi for duim.

Waswe sapos feeling for laek lukluk lo olketa rabis piksa or for ting abaotem olketa rabis samting hem kamap strong tumas? Traem best for barava followim example blo Jesus. (1 Pet. 2:21) Bihaen Jesus baptaes, Satan gohed for testim hem. Wanem nao Jesus duim? Hem gohed for againstim. Jesus gohed iusim olketa scripture for againstim olketa samting wea Satan iusim for testim hem. Hem sei: “Iu go nao Satan!” and Satan lusim hem. Olsem Jesus wea no givap for faet againstim Devil, iu tu savve duim datwan. (Matt. 4:1-11) Satan and world blo hem gohed trae for mekem mind blo iu for ting abaotem sex, bat iu mas no givap for faet againstim. Iu savve win for againstim pornography. Jehovah savve helpem iu for winim disfala enemy.

Barava depend lo Jehovah thru lo prea. Paul hem sei: “Barava askem help bilong hem and for talem thankiu tu. Taem iufala duim olsem, peace bilong God wea winim nao wanem man savve minim bae gaedem heart and tingting bilong iufala bikos long Christ Jesus.” (Phil. 4:6, 7) Peace blo God bae helpem iu for no duim samting wea no stret. So sapos iu fren gud witim Jehovah, “bae hem fren gud witim iu.”—Jas. 4:8.

Best protection from olketa trap blo Satan, hem nao for iumi fren gud witim Haefala Ruler blo universe. Jesus sei: “Man wea rulim disfala world [Satan] hem kakam nao. Hem no garem paoa ovarem mi.” (John 14:30) Why nao Jesus hem sure lo diswan? Hem sei olsem: “Man wea sendem mi kam hem stap witim mi. Hem no lusim mi bikos mi evritaem duim samting wea hem laekem.” (John 8:29) Taem iu duim olketa samting wea Jehovah hapi lo hem, iu tu, savve barava sure hem bae no enitaem lusim iu. Stap klia lo pornography wea hem wanfala trap blo Satan, and taem olsem Satan bae no fit for trapim iu.