ISRAELITACUNAPAJCA Dios cusha nishca allpaman yaicungapajca ashallami faltarca. Paicuna yacu Jordanta manaraj pasajpimi shujtaj llajtamanta huarmicunaca paicunata jatun micuiman invitangapaj shamurcacuna. Israelitacunapajca shujtaj llajtamanta huarmicunahuan bienta micuna, bailanaca alli shinami ricurishcanga. Chai huarmicunaca huainayashpa, maipish cachunmi causajcuna carca. Paicunaca Dios mandashcacunataca mana cazujcunachu carca. Shinapish maijan israelitacunaca paicunahuan tandanacushpaca jatun juchapica mana urmashunchu nishpami yuyashcangacuna.

 ¿Pero cai israelitacunahuanca imataj tucurca? Bibliapica: ‘Moabita huarmicunahuanmi huainayarcacuna’ ninmi. Shinallataj cai huarmicuna pandachijpimi israelitacunaca yanga dioscunata adorai callarircacuna. Chaita yachaj chayashpami Jehová Diosca paicunahuanca achcata colerarca (Números 25:1-3).

Diospaj mandashcacunata mana cazushpami israelitacunaca yanga dioscunata adorarcacuna. Shujtaj llajtamanta huarmicunahuanpishmi huainayarcacuna. Chaimantami Yaya Diosca paicunata tucuchirca (Éxodo 20:4, 5, 14; Deuteronomio 13:6-9). Paita cazushca cashpaca Jordán yacuta pasashpami Dios cusha nishca llajtaman yaicuncunaman carca (Números 25:5, 9).

Apóstol Pabloca israelitacunahuan ima tucushcata yuyarishpami: “Tucui caicunaca ñucanchij ricuchunmi chashna tucurca. Cai tucuri punllacunapi ñucanchij causacujcunata sinchita cunangapajmi, chashna quillcashca tiyacun” nirca (1 Corintios 10:7-11). Israelitacuna jatun juchapi urmashpa, Dios cusha nishca allpaman mana yaicujpica Diabloca contentomi sintirishcanga. Ñucanchijtapish Diablo pandachichunca mana saquinachu canchij. Paica paraíso Allpapi causachunca mana munanchu.

Diabloca huaquin trampacunata churashpami achca gentecunata pandachishca. Diosta sirvijcunatapish pandachingapajca tucui laya trampacunatami churan. Ña ricushca shinaca Diabloca israelitacunataca huainayana juchapimi urmachirca. Ñucanchijtapish huainayana juchapi urmachingapajmi pornografiata utilizacun.

Ñaupa punllacunapica gentecunaca mapa cosascunata ricungapajca peliculacunata ricuchij lugarcunamanmi rijcuna carca. Mana cashpaca librocunata, revistacunatami randijcuna carca. Maijancunaca randinata munashpapish pingaimantami mana randijcuna carca. Pero cunan punllacunapica Internet tiyashcamantami huaquin gentecunaca trabajopi, carropi, huasipipish paicunalla pornografiata ricuncuna.

Shinallataj maijancunaca celularpi, tabletpimi mapa cosascunata ricuncuna. Paicunaca callepi puricushpapish, buspi viajacushpapish chaicunatami ricuncuna.

Cunan punllacunapica gentecunaca maipi cashpapish pacallami pornografiata ricuncuna. Mapa cosascunata ricushcamantami Diosmantapish caruyashcacuna. Paicunapaj cusahuan o huarmihuanpish pꞌiñanacushpami causancuna. Shinallataj imapaj mana valishca shinami sintirincuna. Paicunaca achca huatacunatami llaquilla causancuna.

Israelitacunaca Diosta mana cazurcacunachu. Pero ñucanchijca tucuipimi Jehová Diosta cazuna canchij (Éxodo 19:5). Diosta tucuipi cazujpica paillatajmi Diablopaj trampacunapi ama urmachun ayudanga. Puntaca pornografiata Jehová Dios imamanta millashcatami intindina canchij.

Israel llajta cꞌuchullapi causajcunaca huainayashpami causajcuna carca. Pero Jehová Diosca huainayanataca manataj ricunayachinchu. Chaimantami israelitacunapish huainayanapi ama urmachunca huaquin leycunata curca. Chai leycunaca shujtaj llajtacunamanta leycunata yallimi carca (Deuteronomio 4:6-8).

Canaán llajtapi causajcunaca mapa cosascunata rurashpami causajcuna carca. Jucha illaj Jehová Diosca chai ruraicunataca manataj ricunayachircachu. Chaimantami israelitacunataca cashna nishpa advertirca: ‘Ñuca cancunata cunan Canaán llajtaman pushacun llajtacuna ruraj cashca shinapish ama ruranguichijchu. Chai llajtaca yallitaj mapami tucushca. Paicuna mana cazushcamantami tucuchigrini’ nircami (Levítico 18:3, 25).

Cananeocunataca paicuna huainayashpa causashcamantami Jehová Diosca castigarca. Pero  huainayana ruraicunaca mana tucurishcachu. Mil quinientos huatacuna huashaca apóstol Pabloca: ‘Gentecunaca mana pingaj, cacharishcacuna tucushpami tucui laya mapacunata rurancuna’ nircami (Efesios 4:17-19). Cunan punlla gentecunacarin pinganana juchacunatami rurancuna. Pero Diosta sirvijcunapish chaicunapi ama urmangapajmi cuidarina canchij.

Diosca ñucanchijtaca paiman rijchajtami rurarca. Paica ima alli cashcata, ima mana alli cashcata yachachunmi rurashca. Shinallataj cazarashcacunalla chayarina munaicunata pajtachichunmi mandarca (Génesis 1:26-28; Proverbios 5:18, 19). Huainayanahuan chagrushca peliculacunata, fotocunata, librocunata llujchijcunaca Diospaj mandashcacunataca mana valichincunachu. Chaimantami Jehová Diosca paicunata juzganga (Romanos 1:24-27).

Gentecunaca, mapa cosascunata ricuna, liyinaca mana juchachu can nishpami yuyancuna. Pero huainayanahuan chagrushca peliculacunata, fotocunata ricushpaca chaicunata llujchijcunatami apoyacuncuna. Bibliapica: “Mandaj Diosta cꞌuyajcunaca, millaita ruranataca pꞌiñaichigari” ninmi (Salmo 97:10). Chaimantami Diosta sirvijcunaca mapa cosascunataca manataj ricuna canchij.

Tucuicunami juchayujcuna canchij. Chaimantami aicha munaicunamanta jarcarinaca sinchi can. Huaquinpicarin ñucanchij shungu pandachijpimi mana allitaca allita shina ricui callarishun (Jeremías 17:9). Achca huauqui panicunami Jehová Diosta manaraj rijsishpa pornografiata ricujcuna carca. Pero Diospaj ayudahuanmi chaita ricunata saquishcacuna. Paicuna layallatajmi ñucanchijpish mapa munaicunata mishai tucunchij. Cai trampapi ama urmangapaj Diospaj Shimi ima shina ayudashcata ricushun.

Israelitacunaca paicunapaj shungu pandachichunmi saquircacuna. Ñucanchijpish paicuna shina ama pandaringapajmi cuidarina canchij. Santiagoca: “Millaita rurana yuyaica quiquinllapitaj tiyashpami, pita cashpapish chashna mana allitaca rurachin. Chai millai yuyaicunata chichushca qꞌuipami, juchaca huacharin” nircami (Santiago 1:14, 15). Shungupi mana alli munaicunata huiñachun saquishpaca jatun juchatami rurashun.  Chaimantami huainayanahuan chagrushca yuyaicunamanta caruyana canchij.

Mapa yuyaicunata mana utca anchuchi tucushpaca Jesús nishca shina rurashunchij. Paica: ‘Chaimanta cambaj maqui cashpa, chaqui cashpa maipi pandachisha nijpica, pꞌitishpa shitangui. Cambaj ñahui maipi urmachisha nijpica, surcushpa shitangui’ nircami (Mateo 18:8, 9). Jesusca chaquita pꞌitishpa shitanata o ñahuita llujchishpa shitanataca mana nisha nicurcachu. Ashtahuanpish mana alli yuyaicunata chai rato anchuchina cashcatami nisha nicurca. Pornografía viciopi ama urmangapajca ¿Jesús nishcacunata ima shinataj pajtachina canchij?

Mapa cosascunata ricushpaca mana ima tucushachu nishpaca mana yuyanachu canchij. Chaimantami televisionpi, computadorapi, celularpi mapa fotocuna, videocuna ñapish ricurijpica chai rato shujtaj ladoman ricuna canchij. Televisionta o computadoratapish chai ratomi huañuchina canchij. Shinallataj mapa ruraicunapi yuyanapaj randica allicunapimi yuyana canchij. Chashnami mapa munaicuna pandachichunca mana saquishun.

Televisionpi, computadorapi mapa cosascunata ricushcacunaca achca tiempocunatami ñucanchij yuyaipi saquiri tucun. Imata ricushcacunata yuyarishpaca maijancunaca paicunapaj charishcacunata japirishpami mapa cosascunata ruranata munangacuna. Canchari pornografiata ricunata saquishcangui. Pero pornografiata ña mana ricushpapish ñaupaman imalla ricushcacunami menos pensado cambaj yuyaiman shamunga. Chaimantami chai mapa yuyaicunata mishangapaj listo cana cangui.

Imatapish Jehová Dios shina yuyangapaj esforzarishunchij. Shinallataj Apóstol Pablopaj ejemplota catishunchij. Paica: “Ashtahuanpish ñuca cuerpotaca huajtashpatajmi cazuchini” nircami (1 Corintios 9:27). Millai munaicuna pandachichunca mana saquinachu canchij. Romanos 12:2-pica: “Ashtahuanpish cancunapaj yuyaita mushujyachirashpa, shujtaj causaita causaichij. Chashna cashpami Diospaj munai ima cashcata, ima mana paipaj munai cashcata, ima shina cashcatataj alli agllai tucunguichij”  ninmi. Huainayana juchapi urmashpaca achca llaquicunatami charishun. Pero Diospaj mandashcacunata cazushpaca cushillami causashun.

Jehová Dios shina yuyangapaj, pornografiatapish pai shina pꞌiñangapajmi huaquin textocunata de memoria yachana canchij. Mana alli yuyaicuna shamujpica cai textocunapi yuyashunchij: Salmo 119:37, Isaías 52:11, Mateo 5:28, Efesios 5:3, Colosenses 3:5 y 1 Tesalonicenses 4:4-8.

Mapa cosascunata ricunamanta, yuyanamanta jarcarina sinchi cajpica ¿imatataj rurana canchij? Jesuspaj ejemplotami catina canchij (1 Pedro 2:21). Jesús bautizarishca huashami Diabloca cutin cutin pandachisha nirca. ¿Jesusca imatataj rurarca? Diablo tentacioncunata churajpimi Jesusca huaquin versocunata nishpa chai tentacioncunata misharca. Shinallataj: ‘Caimanta anchui Satanás’ nijpica Diabloca anchurcallami. Jesusca Diablo pandachichunca mana saquircachu. Ñucanchijpish Diablo pandachichunca mana saquinachu canchij (Mateo 4:1-11). Diablopish paita catijcunapish mapa yuyaicunahuanmi ñucanchijta pandachisha nin. Pero Jehová Diospaj ayudahuanmi paicunataca mishai tucunchij.

Yaya Diostaca ayudahuai nishpami mañana canchij. Pabloca: “Diosta mañacushpaca paiman tucuita huillaichij. Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga” nircami (Filipenses 4:6, 7). Mana alli yuyaicunata ama yuyangapajmi Jehová Diosllataj ayudanga. Shinallataj Diospajman cꞌuchuyajpimi paipish ñucanchijpajman cꞌuchuyanga (Santiago 4:8).

Diablomanta parlashpami Jesusca: “Cai pachata mandajca ñamari shamucun. Pai shamushpapish ñucataca mana mishangachu” nirca (Juan 14:30). Jesusca Jehová Dios paita ayudanatami yacharca. Chaimantami paica: “Ñucata cachaj Yayaca ñucahuanmi. Ñucaca pai munashcallatami rurani. Chaimantami ñucallataca mana saquin” nircami (Juan 8:29). Ñucanchijtapish Diosta tucuipi cazujpica Diabloca mana pandachingachu. Diablopaj trampacunapi ama urmachunca Jehovami ayudanga. Chaimanta, pornografiata amataj ricushunchij.