ISRAELITACUNACA Jehová Dios carasha nishca alpacunaman yaicungapami Jordán yacuta ña yaligrinajurca. Shuj punllaca, Moab llactamanda huarmicunaca israelita jaricunatami shuj fiestaman invitarca. Israelita jaricunaca chai fiestaman rishpaca mushuj amigocunata charishun, ali micushun, bailaitapash bailashun nishpami pensarishcanga. Shinapash Moab llactamanda huarmicunapa costumbrecunaca, Jehová Dios Israel llactaman cushca leycunahuan ricujpica nalipachami carca. Israelita jaricunaca pensarishcangami, chai fiestapica na imapash pasangachu nishpa.

 Shinapash chai fiestapica ¿imata pasarca? Bibliapica ninmi: “Israelcunaca, Moab shuti llactapi causanajuj huarmicunahuan huainayai callarinajurca” nishpa. Chai huarmicunaca yanga dioscunata sirvichunmi munarca. Huaquin jari israelitacunaca chaitallatami rurarca. Chaimandami Jehová Diosca nina japirinshna israelitacunahuanga culirarca (Núm. 25:1-3).

Israelitacunaca Jehová Dios mandashcata na cazushpami paicunaca yanga dioscunapa ñaupajpi cungurishpa chai dioscunata mañanajurca. Shinallata Moab llactamanda huarmicunahuanmi huainayana juchapipash urmarca. Chaimi huaranga huaranga israelitacuna huañurca (Éx. 20:4, 5, 14; Deut. 13:6-9). Israelitacuna Jehovata cazushca cashpaca ¿imatata paicunaca chasquigrinajurca? Israelitacuna Jehovapa mandashcata cazushca cashpaca Jordán yacuta yalishpa Jehová Dios carasha nishca alpacunami chasquina carca (Núm. 25:5, 9).

Caicunamanda yarishpami apóstol Pabloca cashna escribirca: “Chashnataca ñucanchi ama catichunmi, ñucanchi ñaupa taitacuna imashna tucushcatapash, tucurimui punllacunapi causanajuj ñucanchita yachachingapaj escribishcapica, chashna villajun” nishpa (1 Cor. 10:7-11). Israelitacuna Jehovata na cazushpa huainayana juchapi urmajpica Diabloca cushillami sintirishcanga. Shinallata Jehová Dios carasha nishca alpacunaman na yaicujpica Diabloca ninandami cushijushcanga. Shinaca israelitacunashnaca ama cashunchichu. Cunanbipash Jehová Diosca ñucanchicunamanga paraíso alpaguta carasha nishcami. Shinapash ñucanchicuna chai alpaguman yaicuchunga Diabloca na munanllu.

Testigo de Jehovacunataca Diabloca ¿imahuanda umachin? Diabloca imacunahuanlla umachinataca alimi yachan. Tucuicuna nalicunapi urmaj cashcata Diabloca ali alimi yachan. Imashina ña yachajupashcanchi, israelitacunataca huainayana juchahuanmi urmachirca. Cunanbipash huainayana juchahuanllatami urmachijun. ¿Imashinata huainayana juchapi urmaita ushapanchi? Diabloca pornografía nishcahuanmi huainayana juchapi urmachijun.

Cunanbi gentecunaca pipash na cuenta japijtami pornografiataca ricui ushan. Tauca huatacuna huashamanga gentecuna pornografiata ricungapaj munashpaca cineman rishpa, librocunata randishpa o revistacunata randishpami ricui ushan carca. Taucacunaca chaicunata randijujta ricunga yashpa o pingaimandami chai ucucunamanga na yaicun carca. Shinapash cunanbi gentecunaca Internetpi yaicushpa trabajopi, carropi cashpapashmi pornografiataca ricuita ushan. Shuj llactacunapicarin nimaiman na llujshishpallatami paicunapa huasi ucupillata pornografiataca ricuita ushan.

Gentecunaca pornografiata ricungapaca cunanbicarin celurarcunapi, tablet nishcacunapipashmi fácil ricuita ushan. Gentecunaca callepi purinajushpa, buspi rinajushpa, tren nishcapi rinajushpapashmi pornografiata ricushpa rita ushan.

Cunanbi gentecunaca pipash na ricujtami fácil pornografiataca ricuita ushan. Chaimandami ashtaca llaquicunata charishca. Pornografiata ricuimandami huaquingunaca cusahuarmi causaita huaglichishca, nimapa na sirvij, paicunapa concienciapipash na ali sintirishca. Ashtahuanbash Jehová Dioshuan ali amigo cashpa catichunbash na saquishcachu. Shinaca pornografiata ricujcunaca gentecunapa yuyaicunata huaglichishcatami ricupanchi. Huaquinbicarin chaicunata ricushcacunata na cungaita ushaimandami nalipacha sintirishpa causan. Shinapash chai ricushcacunataca asha ashami cungashpa rita ushapangui. Shina cajpipash chai ricushcacunaca tal vez ashtaca huatacunatami umapi paraita ushan.

Diabloca pornografiata ricuchunmi munan. Shinapash Jehová Dios ñucanchicuna pornografiata ama ricuna munaita charichun ayudajtaca siempre yarina capanchi. Shinaca Jehová Dios ñucanchita ayudachunga ¿imatata rurana capanchi? Israelitacunaca Jehovapa mandashcataca na cazurcachu. Cutin ñucanchica Jehovapa mandashcacunataca maimandami cazushpa causana capanchi (Éx. 19:5). Pornografiata ricunataca Jehová Diosca ninandami millanayachin. Chaitami ñucanchicunaca ali intindina capanchi. ¿Imamandata shina nipanchi?

Cunanga caipi pensaripashunchi. Punda tiempopi israelitacunaman Jehová Dios cushca leycunaca alipachami carca. Chai leycunami israelitacunataca shuj jatun pirca cuenda Moab llactamanda ladolla causajcunahuan paicunapa nali ruraicunahuan ama chapurichun ayudan carca (Deut. 4:6-8).  Huainayana juchata Jehová Dios nimamanda na ricunayachishcatami israelitacunaman cushca leypica ricuchijurca.

Moab llactamanda gentecunapa nali ruraimandaca Jehová Diosca israelitacunamanga cashnami nishca carca: ‘Canaán llactapi causajcunashnapash na ruranachu canguichi. [...] Chai llactaca mapayashcami. Paicuna chashna jatun nalita ruranajujtaca ñucami ricurcani. Chaipi causajcunataca shungu tigrachinshnami shitarcani’ nishpa. Canaán llactamanda gentecunaca nalipacha, millanayai ruraicunatami rurashpa causanajurca. Chaipi causaj gentecunaca Jehová Diospa ñaupajpica nalipachami carca (Lev. 18:3, 25).

Canaán llactamanda gentecunata Jehová Dios castigajpipash huanayana juchataca rurashpami catirca. 1500 huatacuna yalishca jipapash Jehovata sirvijcunamanda parlashpaca apóstol Pabloca cashnami nirca: “Paicunaca, juizupash tucurijpimi, ima nalita ruranatapash na pinganayachin. Chashna cashpami Diospaj ñaupajpica, imatapash mapatalla cushijushpa ruranajun” nishpa (Efes. 4:17-19). Cunanbipash huainayana juchata ruraj gentecunaca pingaitapash na charinllu. Chaimandami Jehovata sirvijcunaca cai mundomanda gentecunashna huainayana juchacunata ama ricungapami ninanda cuidarina capanchi.

Pornografiata ricujcunaca Jehová Diosta na respetashcatami ricuchin. Jehová Diosca paiman rijchajtami ñucanchicunataca rurashca. Chaimandami ñucanchillata respetarishpa causana capanchi. Chaimandami Jehová Diosca huainayana juchapi ama urmachun chai leyta curca. Ashtahuangarin cusahuarmi pacta puñuna ali cashcatami Jehová Diosca nirca (Gén. 1:26-28; Prov. 5:18, 19). Cutin pornografía nishca videota rurajcuna, chaicunata ricuchun animaj gentecunapash cusahuarmi pacta puñunataca nimapa na sirvishcatami ricuchin. Shinami Jehová Dios cushca leytapash na respetashcatami ricuchin. Chai leyta na cazujcunataca Jehová Diosca llaquichingami (Rom. 1:24-27).

Paicunapa munai pornografiata ricujcuna o liijcunaca pensanbashchari, pornografiata ricunaca imapash nalica na canllu nishpa. Shina pensajcunaca Jehovapa mandashcacunata na cazuj gentecunata alicachishcatami ricuchinajun. Shinapash paicunaca pornografiata ricui callarishpaca Jehovapa mandashcacunata nalicachijushcataca tal vez na cuenta japishcangachu. Jehovata sirvijcunaca pornografiata nimamanda na ricunayachinachu capanchi. Bibliapica cashnami mandan: “Mandaj Diosta juyajcunaca, nalita ruranataca millanayachinami canguichi” nishpa (Sal. 97:10).

 Pornografiata na ricushcacunapashmi chaicunata ricuna munaipi facil urmai ushashcata cuenta japishca. Ñucanchicuna juchayu caimandami nali munaicuna ñucanchita ama mishachun ninanda esforzarinajupanchi. Shinallata juchayu shunguta charimandami tal vez pensarinchiman, Taita Diospa leycunata na cazunaca imashpa nalica na canllu nishpa (Jer. 17:9). Shinapash ashtaca Jesusta ali catijcunaca pornografiata ricunata saquita ushashcami. Chaita yachanami pornografiata ricunata saquingapaj munajcunata animan. Cunanga pornografiata ama ricungapaj imata rurana cashcata Bibliapi yachajupashun.

Callari parrafocunapi ricushca shinaca, ashtaca israelitacuna paicunapa nali munaicuna mishachun saquimandami llaquipi urmarca. Cunanbipashmi shinallata pasaita ushan. Jesuspa huauqui Santiagoca cashnami nirca: “Nali munaica nalita rurachun yarichishpa urmachijun. Chai nali munaita rurajpimi, juchaca ninanda miran” nishpa (Sant. 1:14, 15). Pipash paipa nali munaicuna shungu ucupi mishachun saquishpaca juchapimi urmaita ushan. Chaimandami nali munaicunapica na pensarijunachu capanchi. Nali pensamientocunata charishpaca uchallami saquina capanchi.

Nali pensamientocunata na saqui ushashpaca ¿imatata rurana capanchi? Jesusca nircami: “cambaj maqui cashpa, chaqui cashpapash, imatapash nalita rurachingapaj munajpica, muchushpa shitana cangui. [...] Cambaj ñavi, imatapash nalita ricushpa rurachingapaj munajpica, surcushpa shitangui” nishpa (Mat. 18:8, 9). Jesusca maquita o chaquita muchunatapachaca na nijurcachu. Ashtahuangarin nali munaicunata uchalla saquinatami Jesusca nijurca. Shinaca pornografiata ama ricungapaca ¿imashinata Jesuspa consejota pactachi ushapanchi?

Cai pensaripashunchi, telepi, computadorapi o Internetpi imatapash ricujushpa na yashcapi shuj jari shuj huarmihuan nalicunata ruranajujta ricurishcanman. Shina pasajpica ¿imatata rurana capanchi? Chaita ricushpaca na imatapash pasangachu nishpaca na pensanachu capanchi. Chaicunata ricujunapa randica jaicatami shuj ladoman ricuna capanchi. Shinallata teleta, computadorata, tabletta o celularta uchallami apagana capanchi. Shina apagashpaca ali cosascunapimi pensarina capanchi. Shinami nali munaicunapica na pensarishun. Chaimi nali munaicuna ñucanchita mishachunga na saquishun.

Pornografiata ricujcunaca ricushcataca nunca na cungaita ushanllu. Na yashcapimi chai ricushcacunaca cutin yuyaiman shamun. Chai nali munaicuna cutin shamujpimi tal vez huarmi o jari cashpa paicunapatallata tacarishpa nalicunata rurangapaj munanga. Quiquin pornografiata ricunata saquishca cashpapash cutin cutin chai ricushcata yuyaiman shamujpica ¿imatata rurana capangui? Chai ricushcata yuyaiman cutin cutin shamun cashcataca na cungachu capangui. Shinallata nali pensamientocuna ama mishachun imata ruranata ña pensarishcallami cana capangui.

Jehová Dios munashcashna pensangapaj, rurangapami esforzarina capanchi. Apóstol Pabloshnami cana capanchi. Paica nircami: “ñuca cuerpotami macanshna cazuchishpa, servishpa causajuni” nishpa (1 Cor. 9:27). Nali munaicuna mishachunga na saquinachu capangui. Romanos 12:2​pi nishca shina rurapangui. Chaipica ninmi: “Cangunapaj yuyaita Dios mushujyachishcamandami, mushujta causana canguichi. Shina causashpami, imami Taita Diospaj munai cajta, paita cushichinata, ima pandatapash na rurashpa causanata yachanguichi” nishpa. Jehová Dios munashcashna pensashpa, rurashpaca cushillami causashun. Cutin nali munaicunata mishachun saquishpaca llaquillami causashun.

Shinaca nali pensamientocuna shamujpica cai textocunapi pensarina capangui: Salmo 119:37, Isaías 52:11, Mateo 5:28, Efesios 5:3, Colosenses 3:5, 1 Tesalonicenses 4:4-8, NM. Chai textocunami Jehová Dioshna pornografiata millanayachichun, Jehová Dios munashcashna alita rurachun ayudanga.

Pornografiata ricunata ña saquishca cashpapash cutin ricungapaj munai shamujpi, o nali pensamientocuna ashtahuan shamujpica ¿imatata rurana capanchi? Chaipaca Jesuspa chaquitami catina capanchi (1 Ped. 2:21). Jesús bautizarishca jipallami Diabloca tauca viajemi paitaca tentarca. Jesusca ¿imatata rurarca? Jesusca Diablo tentachunga na saquircachu. Shinallata tentaciongunapi ama urmangapami Taita Diospa Shimimanda huaquin textocunata utilizarca. Chaimi Jesusca nirca: “Satanás, caimanda anchuri” nishpa. Jesús shina nijpimi Diabloca paipa ladomanda anchurishpa rirca. Jesushnami quiquindapash Diablo ama umachichunmi ninanda esforzarina capangui (Mat. 4:1-11). Diablopash, cai mundopashmi ñucanchicuna nali pensamientocuna charichunmi cutin cutin umachingapaj munan. Shinapash ali pensamientocunata charingapami ninanda esforzarina capanchi. Pornografiata ricunataca saquita ushapanguimi. Jehová Dios ayudajpimi Diablotaca mishai ushashun.

Jehovata mañashpa ayudahuai nishpa cutin cutin mañapashunchi. Apóstol Pablo nircami: “Taita Diosmanmi, imatapash villashpa ninanda mañana canguichi. Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapaj shungutapash, yuyaicunatapash, Cristo Jesushuan shujlla tucushcamanda huacaichijunga” nishpa (Filip. 4:6, 7). Jehová Diosca ñucanchi yuyaicunapi tranquilo sintirichunmi ayudanga. Shinami juchapi ama urmachunbash ayudanga. Chaimi “Taita Diospajman quimirina” capanchi. Shina “quimirijpica, paipash” ñucanchipaman quimiringami (Sant. 4:8).

Tucuita Ruraj Diospa ayudata mascashpallami Diablo ñucanchicunata umachichunga na saquishun. Diablomanda Jesusca nircami: “Cai pachapajtalla rurachishpa mandajmi, ña shamujun. Chai mandaj shamushpapash, ñucataca na imatapash rurai ushangachu” nishpa (Juan 14:30). Cai shimicunamandaca ¿imamandata Jesusca seguro carca? Shuj punlla Jesusca nircami: “Ñucata Cachamushcami, ñucahuanga causajun. Pai alicachishcata punllandi rurajujpimi, ñuca Taitaca na ñucatalla saquihuashca” nishpa (Juan 8:29). Shinaca Jehová Dios munashcashna imagutapash rurajpica paica ñucanchitaca na saquingachu. Chaimi pornografiata ama ricungapaj esforzarina capanchi. Shinami Diabloca ñucanchitaca na umachi ushangachu.