I TE au Iseraela e akapapa ra no te tikoti i te Kauvai o Ioridana ki te enua taputouia e te Atua no ratou, kua aere mai tetai au manuiri. E au vaine ke tei pati mai i te au tane ki tetai kaikaianga. E atianga manea teia. Te aravei anga i te au oa ou, te uraura, e te kaikai kapiti. Noatu e tuke ta ratou peu e ta ratou akonoanga ki ta te tamariki Iseraela tei aru i te Ture a te Atua, kua manako tetai au tane: ‘Māmā ua. Kare matou e ereereia.’

 Eaa tei tupu? Akakite maira te tuatua akauruia e: “Kua timata iora taua au tangata i te akaturi ki te au vaine Moabi ra.” Kua inangaro te reira au vaine e kia akamori te au tane Iseraela i to ratou au atua pikikaa. Kua pera atu rai ratou! No reira, “tupu akera te riri o Iehova ia Iseraela.”—Nume. 25:1-3.

E rua tumu kare te tamariki Iseraela i akarongo ana i te Ture a te Atua: Kua tupou ratou ki mua i te itoro e kua rave i te akaturi. E tauatini ua atu tei mate no to ratou akarongo kore. (Exo. 20:4, 5, 14; Deu. 13:6-9) Eaa teia i riro ei ei tumatetenga maata? Kua tupu tetai apinga. Naringa kare te reira au tane i aati i te Ture a te Atua, kua tikoti rai te tauatini ua atu Iseraela ki Ioridana ki te Enua Taputouia.—Nume. 25:5, 9.

No teia i tupu, tata te apotetoro ko Paulo e: “Rokoia iora ratou e taua au mea katoa ra, ei akaraanga: e ei ako mai oki ia tatou, i te aronga i rokoia mai i te openga o te au tuatau nei, i tataiaʼi.” (1 Kori. 10:7-11) Kua mareka a Satani e kua rave te au Iseraela i te au ara kino e kare ratou i akatikaia ki roto i te Enua Taputouia. Mei teaa atura te meitaki kia akarongo tatou, me kare ra ka mataora a Satani me kare tatou e tae ki te ao ou o te Atua!

Te taangaanga ra a Satani i te au puereere no te opu i te au Kerititiano. Mei tana i rave ki te tamariki Iseraela, kua taangaanga aia i te peu tau kore o te ainga. E te angaanga nei rai teia ereere kino o te peu tau kore o te ainga i to tatou tuatau. Tetai ravenga kino, na roto i te au peu viivii o te ainga.

I teia tuatau, te raveia nei teia au peu viivii o te ainga, e kare te mata tangata e kite mai ana i te reira. I te taime mua, ka aere tetai tangata ki te teata no te akarakara i te au peu viivii o te ainga me kore ki te au are puka no te oko i te au tutu viivii o te ainga. No te akama e ka kitea mai e te mata tangata, kare te maata anga e aere ana ki reira. Inara i teianei, ka māmā ua i tetai tangata i te akarakara i teia au tutu viivii o te ainga na runga i te initaneti, i te angaanga e i roto i te motoka. E i tetai au enua, ka akara ua tetai tane me kore vaine i te au tutu viivii o te ainga i roto i to ratou ngutuare.

Kare ko tera ua. Ka akara katoa ratou i te au tutu viivii o te ainga ki runga i ta ratou au apinga apaipai. I te au tangata e aaere ra na runga i te mataara, na runga i te bus e te rerue, ka akara ratou i te au tutu viivii o te ainga i runga i ta ratou au apinga apaipai.

Mei te mea ka māmā ua i te akarakara i te au tutu viivii o te ainga kia kore e kiteaia mai, ka akatupu teia peu viivii o te ainga i te kino maata i teia tuatau. Te takino ra te aronga akarakara i teia au tutu viivii o te ainga i to ratou oraanga akaipoipo, to ratou turanga ngateitei, e to ratou akava ngakau. Tei kino roa atu, ka takore ratou i to ratou pirianga oa ki te Atua. Ka akatupu teia peu viivii o te ainga i te kino ki te aronga e akarakara ra i te reira. Te maata anga o te taime, ka akatupu te reira i te au mamae ngakau. Penei ka kore aere te mamae, inara ka vai rai te oonu anga o te mamae ngakau no tetai tuatau roa.

Kia kite tatou e te oronga maira a Iehova i te paruru anga mei ta Satani ereere. Me inangaro tatou i ta Iehova paruru anga, “kia akarongo tikai” tatou iaia, no te mea kare te au tane Iseraela i pera ana. (Exo. 19:5) Ka anoanoia tatou kia kite kare te Atua e mareka ana i te peu viivii o te ainga. Eaa te tumu?

Akamanako ana i teia: E meitaki tikai te au ture a te Atua ki te iti tangata Iseraela. Mei te paruru tei akatakake i te au Iseraela  mei te au angaanga viivii a te au iti tangata ke. (Deu. 4:6-8) Taka meitaki te reira au ture: Rikarika a Iehova i te peu tau kore o te ainga.

I te akakite anga i te au peu viivii a te au iti tangata ke, akakite a Iehova ki te au Iseraela: “Auraka kotou e rave i te au peu o te enua nei o Kanaana, taku e arataki ia kotou nei; . . . Kua viivii oki te enua: ka tutaki ei au i tana ara ki runga iaia uaorai.” Ki te Atua tapu o Iseraela, viivii tikai te oraanga o te iti tangata Kanaana e kua akataero i te enua ki te au tu viivii e te tau kore.—Levi. 18:3, 25.

Noatu kua akautunga a Iehova i te iti tangata Kanaana, kua rave ua atu tetai aronga ke i te peu viivii o te ainga. E tere atu i te 1,500 mataiti i muri mai, kua akakite mai a Paulo i te au pa enua e noo ra te au Kerititiano e “kite kore [to ratou] i te akama.” Te tika, “kua oronga ia ratou uaorai i te peu kanga ra, ei rave i te au mea viivii katoa ra, ma te anoano maata.” (Ephe. 4:17-19) I teia tuatau katoa, e maata te au tangata kare e akama i te rave i te au peu viivii. Ka kopae te aronga akamori mou i te au angaanga tau kore a teianei ao.

Te rikarika ra te Atua i te au peu viivii o te ainga. Kua anga aia i te au tangata i tona tu e kua anga ia tatou kia kite i te meitaki e me tupu te kino. Ma te pakari, kua tuku aia i te au kotinga no te pirianga ainga. Kia raveia teia ma te tau e te rekareka i roto i te oraanga akaipoipo. (Gene. 1:26-28; Mase. 5:18, 19) Inara eaa ta te aronga akatupu i te peu viivii o te ainga e rave ra? Te patoi ra ratou i ta te Atua au turanga tau. Ae, te akakino ra te aronga e akatupu ra i te peu viivii o te ainga ia Iehova. Ka akava te Atua i te aronga tei kopae i tona au turanga e tei akatupu maata i te au peu viivii o te ainga.—Roma 1:24-27.

Inara akapeea te au tangata tei akakoro i te tatau e te akara i te au tutu viivii o te ainga? Penei ka manako tetai pae e kare teia e kino ana. Inara, te turu ra ratou i te aronga tei kopae i ta Iehova au turanga. Penei kare ratou i akakoro ana i te akara i te au tutu viivii o te ainga. Kia rikarika te aronga akamori  i te Atua mou i te peu viivii o te ainga. Te ako maira te Pipiria: “Ko kotou, tei inangaro ia Iehova, kia rikarika i te kino ra.”—Sala. 97:10.

Kare i te mea māmā no te aronga tei kopae i te akara i te au tutu viivii o te ainga i te rave i teia. E tu apa ua to tatou, e ka anoanoia tatou kia aruaru i te kopae i teia au anoano viivii o te ainga. Pera katoa, ka tauta to tatou ngakau apa ua i te kimi i tetai ravenga no te patoi i te ture a te Atua. (Iere. 17:9) Inara kua autu tetai au taeake Kerititiano i teia tamaki anga. Ka akamaroiroi teia ia tatou kia autu. Akara akapeea ta te Atua Tuatua me tauturu ia tatou kia patoi i ta Satani ereere no te peu viivii o te ainga.

Mei tei akakiteia atu, kua tuku te au Iseraela i te au anoano tau kore kia akatatipake ia ratou. Ka tupu rai teia kia tatou. Akakite mai te teina o Iesu ko Iakobo i te kino: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara.” (Iako. 1:14, 15) Me tupu tetai anoano tau kore i roto i te ngakau o tetai tangata, papu ka tupu rai te ara. No reira kia akakore tatou i te au manako tau kore, auraka e manako ua i te reira.

Me akavare te au manako tau kore ia koe, e akamutu i te akamanako i te reira. Karanga a Iesu: “E teianei te apa ra koe i to rima e to vaevae, ka tipu atu, e akaruke ke atu; . . . E te apa ra koe i to mata, koiti atu, e akaruke ke atu.” (Mata. 18:8, 9) Kare a Iesu i tuatua ana e kia tipupu tatou i to tatou kopapa. Te akatutu maira aia i te anoano kia kopae viviki ma te papu, i te au mea te ka akatatipake ia tatou. Akapeea tatou me aru i teia akoanga no te kopae i te peu viivii o te ainga?

Me kite tatou i te au tutu viivii o te ainga, auraka e manako, ‘Mama ua iaku.’ Mari ra, e uri ke. E tamate viviki i te tivi. E tamate viviki i taau roro uira e te apinga apaipai. E akamanako i tetai au mea meitaki. Ka paruru teia i toou manako, e kare te au anoano tau kore e akatatipake ia koe.

Akapeea me kua akamutu koe i te akara i te au tutu viivii o te ainga, inara i tetai taime ka ata akaou mai te au manako tau kore? Ka vai ua te au tutu e te au manako viivii o te ainga ki roto i te manako o tetai tangata no tetai tuatau roa. Ka tupu teia i tetai ua atu taime. Me tupu teia, penei ka akakeuia koe kia rave i tetai peu viivii, mei te amirimiri i te au mero kopapa. No reira kia matakite me ata akaou mai teia au manako, e kia tamaki atu i te reira.

E tauta ua atu i te akono i to te Atua manako. Kia aite mei te apotetoro ko Paulo, “te moto nei ra [aia i tona] kopapa kia vi.” (1 Kori. 9:27) Auraka e tuku i te au anoano viivii kia akatere ia koe. “Ei tu ke ra to kotou i te akaou anga o to kotou ngakau, kia taka tikai ia [koe] i to te Atua ra anoano, tei meitaki, e te tau, e te apa kore oki.” (Roma 12:2) E akamaara: Kare koe e mataora me rave koe i te au peu viivii o te ainga, inara ka mataora koe me akamanako e me rave koe i to te Atua anoano.

E tamou ngakau i tetai au irava Pipiria. Me ata akaou mai te au manako viivii, e akamanako i teia au irava. Te au irava mei ia Salamo 119:37; Isaia 52:11; Mataio 5:28; Ephesia 5:3; Kolosa 3:5; e 1 Tesalonia 4:4-8, ka tauturu ia koe kia akatano i toou manako ki to Iehova manako e te rave i tona anoano.

Akapeea me tupu pakari mai te au anoano no te akara i te au peu viivii o te ainga? E aru vaitata i te takainga o to tatou Akaraanga, ko Iesu. (1 Pete. 2:21) I muri ake i to Iesu papetito anga, kua timata a Satani iaia. Eaa ta Iesu i rave? Kua patoi pakari aia. Kua taiku aia i te au irava e kua patoi i te au timata anga a Satani. Karanga aia: “E aere ke atu koe e Satani,” e kua akaruke atura a Satani iaia. Kare a Iesu i tuku ana i te au no te tamaki atu i te Tiaporo, auraka katoa koe. (Mata. 4:1-11) Ka tauta a Satani e tona ao i te akaki i toou manako ki te au manako tau kore, inara auraka e tuku i te au. Ka re koe i taau tamaki anga i te peu viivii o te ainga. Ma te tauturu a Iehova, ka autu koe i toou enemi.

E irinaki kia Iehova na roto i te pure. Karanga a Paulo: “E te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Phili. 4:6, 7) Ka riro te au o te Atua i te akamaru i taau tamaki anga i te ara. Me akavaitata koe kia Iehova, “e nana e akavaitata mai kia [koe] na.”—Iako. 4:8.

Te paruru anga meitaki mei te kino, ko te Atu Ngateitei o teianei ao e pini ua ake. Karanga a Iesu: “Te aere mai nei te ariki o teianei ao, kare ra ana i roto iaku nei.” (Ioa. 14:30) Eaa te tumu i papu ei ia Iesu? Akamārama mai aia: “Ko tei tono mai iaku nei, tei vaitata uaorai ïa iaku nei; kare te Metua i akaruke ua iaku nei ko au anake ra; kare oki au i tukumoe i te rave i te mea e mareka mai ei aia.” (Ioa. 8:29) Me rave koe i te au angaanga ei akamareka ia Iehova, kare rava aia e akaruke ia koe. E kopae i te ereere no te peu viivii o te ainga, e kare koe e opuia e Satani.