DŽIKOTE o Izraelcija spreminena pe sine te nakhen i reka Jordan hem te khuven ki phuv koja so o Devel vetingja kaj ka del la lenge, nesave džuvlja kola so na sine Izraelke ale te posetinen len. Ola vikingje e izraelsko muršen ki jekh bari gozba. Adava šaj dikhjola sine sar but šukar prilika. E Izraelconge sigurno sine privlečno i prilika te oven len neve amala, te khelen hem te han šukar hajbe. Iako o običaija hem o moralna merilija adale džuvljengere razlikujnena pe sine taro adava so sine sikavde o Izraelcija preku e Devleskoro zakoni, nesave lendar šaj mislingje peske: „Ola nane te vlijajnen upri amende. Ka pazina“.

 So slučingja pe? O biblisko izveštaj vakerela amenge: „O narodo počmingja te kerel seksualno nemoral e moavska čhaencar“. Ustvari, adala džuvlja mangle te čhiven e Izraelcon te obožavinen hovavne devlen. Hem uspejngje ko adava! Normalno tano adava so o Jehova but holjangja protiv o Izrael (4. Moj. 25:1-3).

Adala Izraelcija phagle e Devleskoro zakoni ko duj načinija: klanjingje pe e idolenge hem kergje seksualno nemoral. But džene mule adaleske so na sine poslušna (2. Moj. 20:4, 5, 14; 5. Moj. 13:6-9). Panda požalno tano ako razmislinaja ko kova vreme slučingja pe akava. Te na phagjen sine e Devleskoro zakoni, adala Izraelcija panda hari ka nakhen sine o Jordan hem ka khuven sine ki Vetimi phuv (4. Moj. 25:5, 9).

Povrzimo akalea, o apostol Pavle pišingja: „Sa adala bukja slučingje pe lenge sar primer hem tane pišime sar predupreduvanje amenge so živinaja ko krajo akale svetoskoro“ (1. Kor. 10:7-11). Sigurno, o Satana sine bahtalo keda nekoj taro adala Izraelcija kergje pharo grevo, hem adaleske o Jehova na dozvolingja lenge te khuven ki Vetimi phuv. Valjani seriozno te haljova adava predupreduvanje soske džanaja kaj o Satana ka ovel but bahtalo ako uspejnela te čhinavel amen te khuva ko e Devleskoro nevo sveto!

O Satana avdive mangela te astarel ki stapica e Devleskere slugen, hem te šaj te uspejnel ko adava ov koristinela taktike kola so angleder uspejngje leske ko but manuša. Sar so dikhlem, ov koristingja o seksualno nemoral te šaj te zavedinel e Izraelcon. Ko amaro da vreme o nemoral tano opasno stapica. Te šaj te uspejnel te astarel amen ki adaja stapica, o Satana koristinela i pornografija.

Avdive nekoj šaj te dikhel pornografija bizo nikoj te džanel bašo adava. Angleder but berša, okova so mangela sine te dikhel pornografija mora sine te džal ko kino kote so sikavena pe nemoralna filmija ili te džal ko posebna dukjane te šaj te kinel lila ili spisanija so isi len pornografska sodržine. But manuša verojatno na džana sine ko asavke thana adaleske so ladžana sine te na dikhel len nekoj. Ama avdive, sekas so isi internet šaj te dikhel pornografija ki buti ili ko savo bilo javer than. A ko but phuvja, hem o murša hem o džuvlja šaj te dikhen pornografija khere.

Ama adava nane sa. O elektronska uredija kerena polokho te avel pe dži ki pornografija. O manuša šaj te dikhen nemoralna slike ko adala uredija džikote phirena ki ulica, ili džikote vozinena pe ko avtobusi ili ko vozi.

Adaleske so avdive tano but polokho garavindor te dikhel pe pornografija, oj kerela šteta but poviše manušenge nego angleder. But manuša so dikhena pornografija uništinena plo brako, na dikhena šukar ki peste hem meljarena pli sovest. Soj panda pološno, šaj te ruminen plo amalipe e Jehovaja. Sprema akava, šaj te ove sigurno kaj i pornografija tani but štetno. Ko but slučaija oj kerela bare emocionalna rane okolenge so dikhena la. Iako asavke rane šaj pohari te sasljon, ola šaj te mukhen belegija so ka ačhoven but vreme.

Ama o Jehova šaj te zaštitinel amen tari akaja stapica e Satanaskiri. Ako mangaja te ovel amen e Jehovaskiri zaštita, mora te kera adava so o Izraelcija ko purano vreme na kergje — verno te šuna e Jehova (2. Moj. 19:5). Mora te ova svesna kaj o Devel mrzinela i pornografija. Soske šaj te ova sigurna ko adava?

Razmislin bašo akava: o zakonija so dengja len o Devel e Izraelconge sine pojaver taro zakonija so sine e javere narodon ko adava vreme. E Devleskere zakonija sine sar jekh zido so zaštitinela sine e Izraelcon taro lošno vlijanie e javere narodongoro (5. Moj. 4:6-8). Adala zakonija jasno sikavgje jekh važno čačipe — o Jehova mrzinela o seksualno nemoral.

 Keda spomningja o nemoralna bukja so kerena sine o narodo so živinena okolu o Izraelcija, o Jehova vakergja: „Ma keren... adava so kerela pe ki hanaansko phuv, kolate so ingarava tumen... I phuv tani melali, hem ka kazninav la bašo lakere greške“ (3. Moj. 18:3, 25) E sveto Izraelsko Devleske, adava so kerena sine o Hanaancija sine doborom but odvratno so čak i phuv kote so živinena sine uli melali.

Iako o Jehova kazningja e Hanaancon, o javera narodija ponadari da kerena sine seksualno nemoral. Poviše taro 1.500 berš palo adava, bašo narodija maškar kolende živinena sine o hristijanja, o Pavle pišingja kaj „našavgje sekova čuvstvo bašo moral“. Ustvari, „ola mukhle pe ko pogrešna postapke bizi nisavi ladž te šaj alčno te keren sekova melalipe“ (Ef. 4:17-19). Avdive da but džene tane but nemoralna hem ni hari na ladžana bašo adava. Adaleske, o čačutne sluge e Devleskere valjani but te pazinen so dikhena hem kobor so šaj poviše te arakhen pe taro nemoralna postapke soj ko akava sveto.

I pornografija na sikavela poštovanje sprema o Devel. Ov stvoringja e manušen sprema plo liko hem dengja amen čuvstvo bašo adava soj ispravno a soj pogrešno. O Devel sikavgja bari mudrost keda dengja zakonija bašo seksualna odnosija. Leskiri namera sine o seksualna odnosija te anen zadovolstvo okolenge soj ko brako (1. Moj. 1:26-28; Izr. 5:18, 19). Ama, so kerena okola so pišinena, sniminena ili širinena o pornografsko materijali? Ola celosno gazinena e Devleskere moralna merilija. Čače, o manuša so širinena i pornografija na poštujnena e Jehova. O Devel ka sudinel okolenge so otfrlinena leskere merilija adalea so sniminena ili širinena nemoralno materijali (Rim. 1:24-27).

A sar tano e manušencar so namerno čitinena ili dikhena pornografija? Nesave šaj dikhena ko adava sar zabava so nane opasno. Ama, ola ustvari poddržinena okolen so na poštujnena e Jehovaskere merilija. Šaj na sine len asavki namera keda počmingje te dikhen pornografija. Sepak, i Biblija jasno sikavela kaj o sluge e čačutne Devleskere valjani te mrzinen i pornografija. I Biblija pottikninela amen: „Tumen so mangena e Jehova, mrzinen adava soj lošno!“ (Ps. 97:10).

 Čak okola so mangena te izbeginen i pornografija šaj te ovel lenge pharo te keren adava. Adaleske so siem nesovršena šaj te ovel amenge pharo te borina amen e melale seksualna želbencar. Isto agjaar, amaro nesovršeno srce šaj te ubedinel amen kaj nane pogrešno te dikha pornografija (Erem. 17:9). Ama, but džene so ule e Devleskere sluge pobedingje ki adaja borba. Akava šaj te uverinel tut kaj tu da šaj te pobedine ako borinea tut asavke pogrešna želbencar. Te dikha sar e Devleskoro Lafi šaj te pomožinel tuke te na mukhe o Satana te astarel tut ki akaja zamka.

Sar so više dikhlem, but Izraelcija mukhle o neispravna želbe te anen len dži ki katastrofa. Šaj avdive da te slučinel pe akava. O Jakov, o phral e Isuseskoro, kergja lafi baši akaja opasnost: „Sekova jekh tano iskušimo agjaar so cidela le hem hovavela le leskiri želba. Keda i želba ovela but bari, anela dži ko grevo“ (Jak. 1:14, 15). Keda jekh neispravno želba ka razvinel pe dži ki nesavi mera ko nekaskoro vilo, but bari tani i verojatnost kaj adava manuš ka kerel grevo. Adaleske mora te otfrlina o nemoralna misle.

Ako primetinea kaj često razmislinea bašo nemoralna bukja, odma ker nešto. O Isus vakergja: „Ako tlo vas ili tlo pro čhivela tut te kere grevo, čhin le hem frde le tutar... Hem ako tli jakh čhivela tut te kere grevo, ikal la hem frde la tutar!“ (Mat. 18:8, 9). O Isus na manglja te phenel kaj valjani te kera amen sakati. Ov dengja akaja sporedba te pomožinel amenge te haljova kaj valjani te dikha so čhivela amen te razmislina bašo nemoralna bukja, hem tegani sigate hem odlučno te kera o potrebna promene. Sar šaj te primenina akava sovet keda kerela pe lafi baši pornografija?

Ako ikljola tuke nesavo pornografsko materijali, na valjani te misline tuke: „Adava nane te vlijajnel upri mande“. Namesto adava, odma dikh javerthe. Odma ačhav i televizija, o kompjuteri ili o mobilno ured. Razmislin bašo nešto soj čisto. Ako kerea agjaar, adava ka pomožinel tuke te kontrolirine tle misle namesto te mukhe o pogrešna želbe te kontrolirinen tut.

So valjani te kere ako uspejngjan te čhinave te dikhe pornografija, ama ponekogaš palem avena tuke adala slike ko misle? O pornografska slike hem o melale misle šaj te ačhoven ki godi but vreme. Ola šaj te pojavinen pe ko bilo kova vreme. Ako slučinela pe tuke nešto asavko, šaj ka ovel tut želba te kere nešto so nane čisto, sar na primer te masturbirine. Adaleske ov svesno kaj asavke misle šaj te pojavinen pe tuke taro jekh puti hem ov spremno te borine tut protiv lende.

Ov sa poodlučno te razmisline hem te postapine agjaar sar so mangela o Jehova. Ov sar o apostol Pavle kova so sine spremno te marel plo telo hem te ikerel le sar robo (1. Kor. 9:27). Ma mukh o pogrešna želbe te kontrolirinen tut. O Pavle pišingja: „Meninen tumen agjaar so ka meninen tumaro način sar razmislinena, te šaj te oven uverime so mangela o Devel te keren — bukja soj tane šukar, sovršena hem prifatliva leske“ (Rim. 12:2). Ma bistre — ka ove but pobahtalo ako razmislinea hem postapinea agjaar sar so mangela o Devel nego ako zadovolinea tle pogrešna želbe.

Trudin tut te pamtine nesave bibliska stihija. Palo adava, keda ka pojavinen pe tuke nesave neispravna misle, de tutar sa te razmisline bašo adala stihija. O stihija sar soj Psalm 119:37, Isaija 52:11, Matej 5:28, Efešanite 5:3, Kološanite 3:5 hem 1. Solunjanite 4:4-8 ka pomožinen tuke te ovel tut isto stavi baši pornografija sar o Jehova hem te haljove sar ov mangela te postapine.

So ako ko nesave prilike osetinea kaj našti te borine tut e želbaja te dikhe ili te razmisline bašo nemoralna bukja? Dža palo primer e Isuseskoro (1. Pet. 2:21). Otkeda krstingja pe, o Satana poviše puti iskušingja le. So kergja o Isus? Ov sekogaš sprotivstavinela pe sine. Adalea so citiringja različna stihija taro e Devleskoro Lafi, na pelo ko iskušenija e Satanaskere. O Isus vakergja: „Naš, Satano!“, hem o Satana mukhlja le (Mat. 4:1-11). O Isus nikogaš na čhinavgja te sprotivstavinel pe e Bengeske, a na valjani te čhinave ni tu. O Satana hem leskoro sveto ponadari da ka probinen te pheren tli godi nemoralna mislencar, ama prodolžin te borine tut. Tu šaj te pobedine ki borba protiv i pornografija. O Jehova šaj te pomožinel tut te pobedine tle dušmane.

Ponadari da molin e Jehova te pomožinel tuke. O Pavle vakergja: „Vakeren e Devleske so rodena. Hem o mir taro Devel, kova soj upreder sekoja misla, ka arakhel tumare vile hem tumare misle preku o Hristos Isus“ (Fil. 4:6, 7). O Devel ka del tut andruno mir so ka pomožinel tuke te na kere nešto pogrešno. Ako ovea paše e Jehovaja, ov da ka ovel paše tuja (Jak. 4:8).

I najšukar zaštita taro e Satanaskere stapice tani o paše amalipe e Najbare Vladetelea ko univerzum. O Isus vakergja: „Avela o vladeteli e svetoskoro [o Satana]. Le nane le sila upri mande“ (Jovan 14:30). Soske o Isus sine doborom uverimo ko adava? Ov jekh puti objasningja: „Okova so bičhalgja man tano mancar. Na mukhlja man korkori, soske me sekogaš kerava adava soj sprema leskiri volja“ (Jovan 8:29). Džikote trudinea tut te kere bahtalo e Jehova, šaj te ove sigurno kaj ov nane te mukhel tut. Izbegin akaja stapica — i pornografija — hem tegani nane te ove žrtva e Satanaskiri.