DŽI o Izraelcija spremindže pe te nakhen i ljen Jordan hem te khuven ki phuv so o Devel obećindža ljendže, neko alo koro ljende. O romnja kotar aver narodo alje te vičinen e muršen te aven ki jekh proslava. Odova dičhilo oljendže sar diso so na ka ovel paljem. Te ovel ljen neve amala, te oven oljencar, te čheljen hem te han diso ukusno dičhilo sar diso but šukar. Iako odolje romnjenge običaja hem o ponašanje na hine asavko sar so o Devel sikavdža e Izraelcen prekalo Zakon, disave šaj razmislindže: „Odova šaj na ka utičini upro mande. Ka pazinav man.“

 So hine palo odova? E Devljeso Lafi phenela: „O narodo počmindža te čerel o blud e čhajencar ando Moav.“ Ama, odola romnja hem manglje te čhiven e Izraelcen te služinen e hovavne devljendže. Odova hem ulo! Akana šaj te haljova sose „o Jehova hine but holjamo upro Izrael“ (Br. 25:1-3).

O Izraelcija na šundže e Devljeso zakon ko duj načinja: Klanindže pe e idolendže hem čerdže polni nemoral. But murša mulje odoljese so na šundže e Devlje (Izl. 20:4, 5, 14; Pon. zak. 13:6-9). Sose odova so čerdže andža ljendže odobor bari dukh? Sebepi so odova čerdže hari angljeder te nakhen i ljen Jordan hem te khuven ki Obećano phuv. Ked bi šunena e Devljeso zakon hiljade Izraelcija bi khuvena ki Obećano phuv (Br. 25:5, 9).

Dži hine ljese ki godi o Izraelcija hem sa akava so ulo, o Pavle pisindža: „Sa odova tano pisimo sar upozorenje amendže, kola živinaja ko krajo akalje svetoso“ (1. Kor. 10:7-11). O Beng sigurno hine radosno so nesave Izraelcija čerdže baro greh hem sebepi odova naštine te khuven ki Obećano phuv. Amen valjani te sikljova kotar oljenge greške, odoljese so džanaja so o Beng ka ovel but bahtalo ked bi šaj te čhinavi amen te khuva ko e Devljeso nevo sveto!

O Beng mangela te čhivel e hrišćanen ki zamka hem odoljese ov koristini o buča kola angljeder uspešno koristindža. Jekh oljendar, koja koristindža hem koro Izraelcija, tani o polni nemoral. Ko amaro vreme o nemoral pana tano opasno zamka. Prekali pornografija amen šaj te pera ki akija but opasno zamka.

Avdije šaj te dikhel pe i pornografija hem niko te na džanel odova. But berša angljeder, o manuš ked manglja te dikhel i pornografija morandilo te džal ko bioskop te dikhel asavke filmija ja te činel pornografska časopisija ki radnja kuri šaj hine te khuven samo o punoletna manuša. But džene na manglje te džan ko odola thana, sose hine ljendže ladžavo avera te dikhen ljen odothe. Ama, avdije svako ko isi lje internet šaj te dikhel i pornografija ki buti, pa čak hem ko pe vorda. Ko but phuvja o murš ja i džuvlji šaj te dikhel i pornografija ko po čher.

Ama, odova nane sa. Sebepi o telefonija hem o tabletija akana tano polokho te dikhel pe i pornografija. Dži tane ki ulica ja džana autobuseja ja vozeja o manuša šaj te dikhen nemoralna slike ko po telefoni ja ko po tablet.

Odoljese soj tano but lokho te dikhel pe i pornografija, a niko te na džanel, oj čerela pobari šteta avdije, nego li angljeder. But džene kola dikhena pornografija našaljena po brak, po poštovanje hem meljačerena pi savest. Soj pana pološno, odoljeja ruminena po amaljipe e Devljeja. Šaj te ove uverimo so i pornografija čače čerela šteta okoljendže kola dikhena la. Oj but puča ačhavi hem hor emotivna rane. Odola rane šaj hari pohari te sačon, ama o ožiljkija ačhona.

Ama, ma te bistra so o Jehova šaj te zaštitini amen ando e Bengese zamke. Ako mangaja o Jehova te zaštitini amen valjani te šuna lje ko sa, a na te ova sar o Izraelcija (Izl. 19:5). Valjani te haljova so o Devel mrzini i pornografija. Sose odova šaj te phena?

Razmislin ando akava: O Zakon kova o Devel dindža e Izraelcendže hine averčhane kotar o zakonja kola avera narodija hine ljen ko odova vreme. Ov hine sar jekh zido kova štitindža ljen ando melalje buča kola čerdže o manuša kola hine uzo ljende (Pon. zak. 4:6-8). Akava zakon jasno mothovdža jekh važno čačipe: O Jehova mrzini o polni nemoral.

Ked vačerdža ando melalje buča kola čerdže avera narodija, o Jehova e Izraelcendže phendža: „Ma čeren odova so čerela pe ki hanansko phuv,  ki koja ljegarava tumen [...] I phuv tani melalji hem me ka kazninav la sebepi olake prestupija.“ E sveto izraelsko Devljese, o način sar o Hanancija živindže hine odobor odvratno, so oljese i phuv ki koja on živindže ulji melalji, ja te phena otrovno (Lev. 18:3, 25).

Iako o Jehova kaznindža e Hanancen, avera narodija nastavindže te čeren polno nemoral. O Pavle koro 1 500 berša palo odova phendža so o narodija maškaro kola o hrišćanja živindže našaldže „svako moralno osećaj, mukhlje pe te čeren odova soj tano ladžavo, te šaj pohlepno te čeren sa soj melalo“ (Ef. 4:17-19). Hem avdije but džene tane nemoralna hem na ladžana sebepi odova. Kobor god šaj, e Devljese sluge valjani te ciden pe odoljestar te na dikhen pornografsko materijali kova isi ko akava sveto.

I pornografija mothovi nepoštovanje premalo Devel. O manuša tane stvorime te mothoven e Devljese osobine. Stvorime hijam te džana soj tano ispravno, a so nane ispravno. O Devel mudro postupindža ked ograničindža disave seksualna odnosija. Ov manglja o bračno par te uživini ko seksualna odnosija (Post. 1:26-28; Posl. 5:18, 19). Ama, so čerena okola kola čerena o pornografsko materijali ja podstakninena averen te dikhen odova? On odoljeja mothovena baro nepoštovanje premalo e Devljese moralna načelija. O manuša kola čerena odova na poštujinena e Jehova hem ov ka sudini ljendže sebepi odova (Rimlj. 1:24-27).

Ama, soj tano e manušencar kola namerno čitinena hem dikhena i pornografija? Disave mislinena so asavki zabava na ka čerel ljendže šteta. Ama, on odoljeja podupirinena okoljen kola na poštujinena e Jehovase načelija. Šaj odova na hine oljengi namera ked počmindže te dikhen i pornografija. Ama, i Biblija jasno vačeri so okola kola služinena e čačutne Devljese valjani celona duša te mrzinen i pornografija. Oj podstaknini amen: „Tumen kola mangena e Jehova, mrzinen odova soj tano lošno“ (Ps. 97:10).

Čak hem okoljendže kola na mangena te dikhen i pornografija šaj te ovel pharo te ciden pe. Amen hijam nesavršena hem šaj valjani te borina amen protiv o neispravna seksualna želje. Isto adžahar,  odoljese so hijam nesavršena, šaj kokri amen te ubedina so nane lošno te dikha i pornografija (Jer. 17:9). Ama, but džene kola ulje hrišćanja pobedindže ki odija borba. Odova šaj te ohrabrini hem tut te pobedine ki odija borba. Te dikha akana sar e Devljeso Lafi šaj te pomožini tut te cide tut andi e Bengesi zamka – i pornografija.

Sar so vačerdžam angljeder, but Izraelcija mukhlje o neispravna želje te barjon hem sebepi odova on čerdže lošna buča kola andže ljendže bare posledice. Isto šaj hem avdije te ovel. O Jakov, e Isuseso phral, ked vačerdža andi akija opasnost pisindža: „Svakone iskušini oljesi želja adžahar so cidela lje hem hovavi lje. Hem tegani ked i želja ovela but bari, anela dži o greh“ (Jak. 1:14, 15). Ako neko dozvolini ko oljeso vilo te barjon o neispravna želje, tegani ov verovatno ka čerel o greh. Amen valjani te borina amen te na mislina ando nemoralna buča hem te forda ljen andi amari godi.

Ako pojavinena pe tuče nemoralna mislija, odmah čer diso. O Isus phendža: „Odoljese ako to vas ja to pro čhivela tut te čere greh, čhin lje hem forde lje tutar [...] Hem ako ti jakh čhivela tut te čere greh, ikal la hem forde la tutar“ (Mat. 18:8, 9). O Isus na manglja te phenel so valjani kokri amen te sakatina. Ov koristindža akava primer te pomožini amen te haljova so amen valjani te dikha so čhivela amen te razmislina ando lošna buča hem palo odova te menina amen. Sar šaj te primenina akava savet ked vačeri pe andi pornografija?

Ako slučajno pojavini pe disavo pornografsko materijali ma phen tuče: „Odova na ka utičini koro mande.“ Odmah irin to šero ki aver strana. Ko isto trenutko isključin o televizor, o kompjuter, o telefon ja o tablet. Počmin te razmisline kotar buča soj tane šukar hem čista. Adžahar, tu ka kontrolišine te mislija, a na on tut.

So ako više na dikheja i pornografija, ama sar džala o vreme tuče ki godi irinena pe odola slike? O pornografska slike ja o mislija šaj but vreme te  ačhon ki nekasi godi. Odova šaj te desini pe bilo ked. Tegani, šaj ka osetine so mangeja te čere diso melalo, sar soj tani i masturbacija. Odoljese, nek ovel tut ki godi so asavke mislija šaj iznenada te aven hem ov spremno te borine tut protiv oljende.

Ov pana poodlučno odova sostar razmislineja hem so čereja te ovel sar so o Devel mangela. Ov sar o apostol Pavle so hine spremno te marel poklo telo hem te kontrolišini lje (1. Kor. 9:27). Ma mukh te kontrolišinen tut o melalje mislija. O Pavle dindža amen savet: „Ma mukhen hem ponodri te oblikujini tumen akava sveto, nego meninen tumen adžahar so ka meninen tumaro način sar razmislinena, te šaj te oven uverime so mangela o Devel te čeren – buča soj tane šukar, savršena hem prihvatljiva oljese“ (Rimlj. 12:2). Ma bistri: Poviše ka ove bahtalo ked ka razmisline hem ked ka čere odova so o Devel mangela, nego te dža palo teklje grešna želje.

Pokušin te pamtine nesave stihija andi Biblija hem razmislin oljendar ked avena tuče o neispravna mislija ki godi. O stihija kola tane ko Psalam 119:37; Isaija 52:11; Matej 5:28; Efešanima 5:3; Kološanima 3:5; 1. Solunjanima 4:4-8 šaj te pomožinen tuče ki pornografija te dikhe sar so dikhela o Jehova hem te haljove sar ov mangela te ponašine tut.

So valjani te čere ako osetineja so našti te borine tut te na dikhe i pornografija ja te misline kotar nemoralna buča? O Isus nek ovel tuče primer (1. Petr. 2:21). Palo odova so krstindža pe, o Beng iskušindža lje. So o Isus tegani čerdža? Ov cidindža pe oljestar. Ked hine lje kušnje ov borindža pe adžahar so citirindža o stihija andi Biblija. Ov phendža: „Naš, Benga!“, palo odova o Beng cidindža pe oljestar. Sar so o Isus uvek borindža pe protiv o Beng, adžahar borin tut hem tu (Mat. 4:1-11). O Beng hem akava sveto hem ponodri ka pokušinen ti godi te pheren e nemoralno bučencar, ama ma de tut. Tu šaj te pobedine ki odija borba protiv i pornografija. Ked o Jehova pomožini tut, tu šaj te pobedine odolje dušmane.

Nastavin te moline tut e Jehovase te pomožini tut. O Pavle phendža: „E Devljeso mir, kova tano upreder i svako misao, ka arakhi tumare vilje hem tumare mislija prekalo o Isus Hrist“ (Fil. 4:6, 7). E Devljeso mir pomožini amen te borina amen protiv o greh. Ako oveja paše e Jehovaja, hem „ov ka ovel paše“ tuva (Jak. 4:8).

Amen ka ova zaštitime ando e Bengese zamke ako trudinaja amen te ačhova paše e Najbare Vladareja ko svemir. O Isus phendža: „Više na ka vačerav but tumencar, sose avela akalje svetoso vladari. Ov nane lje vlast upro mande“ (Jov. 14:30). Sose o Isus hine odobor sigurno ko odova? Ov jekh puti objasnindža: „Okova so bičhaldža man mancar tano. Na mukhlja man kokri, sose me uvek čerava odova so ov mangela“ (Jov. 8:29). Ako čereja odova so o Jehova mangela, ov niked na ka mukhel tut. Cide tut andi pornografija hem o Beng na ka doljel tut ki pi zamka.