DI DEN Israelsma ben de fu abra Yordan-liba fu go na ini a kondre di Gado ben pramisi den, wan tu uma kon na a kampu fu den. Den uma disi di no ben de Israelsma, kon kari den man fu go na wan fesa. Kande den man disi ben denki taki disi ben de wan moi okasi fu meki nyun mati, fu dansi èn fu nyan switi nyanyan. Ma den uma disi ben abi tra gwenti èn den ben tyari densrefi tra fasi leki den Israelsma di ben abi a Wet fu Gado. Kande den man ben e prakseri: ’Wi sabi san wi e du. Noti no o pasa.’

 Ma san pasa? Bijbel e taki: „Den du hurudu nanga den uma fu Moab.” Fu taki en leti, den uma disi ben wani taki den man disi ben musu anbegi falsi gado. Èn na dati den du tu! Dati meki „Yehovah en ati bron nanga Israel srefisrefi”.​—Num. 25:1-3.

Den Israelsma dati trangayesi a Wet fu Gado na tu fasi: Den boigi gi falsi gado èn den du hurudu. Dusundusun sma dede fu di den trangayesi Yehovah (Eks. 20:4, 5, 14; Deut. 13:6-9). Fu san ede disi ben de wan sari sani? Fu di a sani disi pasa syatu fosi den Israelsma ben o abra Yordan-liba. Efu den dusundusun man disi no ben pasa a Wet fu Gado, dan den ben o go na ini a Pramisi Kondre tu.​—Num. 25:5, 9.

Luku san na apostel Paulus taki fu a tori disi: „Den sani disi di pasa nanga den de leki eksempre gi wi èn den skrifi leki wan warskow gi wi di e libi na a kaba fu a ten disi” (1 Kor. 10:7-11). Wi kan de seiker taki Satan ben breiti taki sonwan fu den Israelsma sondu teige Yehovah èn taki den no go na ini a Pramisi Kondre. A bun fu gi yesi na a warskow fu Paulus, fu di wi sabi taki Satan ben o breiti efu a meki taki wi no go na ini a nyun grontapu fu Gado!

Na ini a ten disi Satan wani kori tru Kresten nanga den srefi triki di a gebroiki fu kori furu tra sma. Soleki fa wi si, dan a kisi den Israelsma fu du hurudu. Na ini a ten disi Satan e kisi furu sma ete nanga hurudu. Wan fasi fa wan sma kan fadon na ini a trapu disi, na te a e luku porno, dati na seks prenki nanga seks felem.

Na ini a ten disi sma kan luku porno sondro taki tra sma sabi. Fosi, efu wan sma ben wani luku porno a ben o abi fu go na wan theater noso na wan wenkri pe sma e seri porno buku. Furu sma no ben e go na den presi disi fu di den ben o firi syen efu wan sma ben o si den drape. Ma now efu wan sma abi Internet, a kan luku porno na wroko noso na ini en wagi srefi. Na ini furu kondre man nanga uma kan luku porno na ini den eigi oso.

Ma dati a no ala. Cellulair nanga tablet meki en moro makelek gi sma fu luku porno. Den sani disi e meki taki sma kan luku porno te den e waka na strati noso te den sidon na ini bus.

Fu di a makelek now fu luku porno sondro taki sma sabi, meki a sani disi tyari takru bakapisi kon gi moro sma. Bun furu sma di e luku porno pori den trowlibi, den e firi syen èn den e kisi konsensi fonfon. San moro ogri, na taki den kan pori den matifasi nanga Gado. A de krin taki porno e tyari takru bakapisi kon gi den sma di e luku en. Den takru bakapisi disi e tan wan langa pisi ten èn son leisi den no e gowe moro.

Ma hori na prakseri taki Yehovah kan kibri wi gi a triki disi fu Satan. Efu wi wani taki Yehovah kibri wi, dan wi musu du san den man fu Israel no ben du. Wi musu ’du finifini san Yehovah taigi wi’ (Eks. 19:5). Wi musu frustan taki Yehovah no lobi porno kwetikweti. Fu san ede wi e taki dati?

Prakseri a sani disi: Den wet di Gado ben gi den Israelsma ben difrenti fu den wet di den tra kondre fu a ten dati ben abi. Den wet disi ben de leki wan skotu di ben kibri den Israelsma, so taki den no teki den gwenti abra fu den pipel na den lontu (Deut. 4:6-8). Den wet disi ben e sori krin taki Yehovah e tegu gi hurudu.

Baka di Yehovah taigi den Israelsma sortu morsu sani den pipel na den lontu ben e du, a taki: „Un no musu tyari unsrefi leki  den sma fu a kondre Kanan pe mi sa tyari unu go.” A taki tu: ’A heri kondre no krin. Mi o strafu den fu na ogri di den du.’ Fu di Yehovah, a Gado fu den Israelsma santa, meki a ben feni taki den Kanansma ben doti a kondre nanga a morsu libi fu den.​—Lef. 18:3, 25.

Yehovah strafu den Kanansma, ma tra pipel tan du hurudu. Moro leki 1500 yari baka dati, Paulus ben taki dati den Kresten ben e libi na ini kondre pe sma „no sabi moro san bun noso san ogri. Soso ogri den e du sondro fu syen èn den gridi fu du wan lo morsu sani” (Ef. 4:17-19). Na ini a ten disi furu sma e libi wan morsu libi tu èn den no e syen gi dati. Tru anbegiman no musu luku den morsu sani di sma na ini grontapu e du.

Sma di e meki porno felem noso porno buku no e lespeki Gado srefisrefi. Gado meki libisma leki fa ensrefi de èn a meki wi na so wan fasi taki wi kan sabi efu wan sani bun noso efu a no bun. Gado du wan koni sani di a gi wet di e sori fa sma musu si seks. Gado taki dati seks na soso gi wan man nanga wan uma di trow èn a kan gi den prisiri na ini a trowlibi (Gen. 1:26-28; Odo 5:18, 19). Ma san den sma di e meki porno felem noso di e gi sma deki-ati fu luku porno e du? Den no e span nanga den wet fu Yehovah. Iya, den sma disi no e lespeki Yehovah kwetikweti. Gado o strafu den sma di e meki porno felem nanga buku èn di e gi sma deki-ati fu luku den.​—Rom. 1:24-27.

Ma fa a de nanga sma di e luku porno? Kande den sma disi e denki taki a no kan du den ogri. Ma den sma disi e horibaka gi den sma di no e span nanga den wet fu Yehovah. Kande den no ben abi disi na prakseri di den bigin luku porno. Toku a de krin taki anbegiman fu a tru Gado musu tegu gi porno. Bijbel e taki: „Unu di lobi Yehovah, un no musu lobi ogri sani kwetikweti.”​—Ps. 97:10.

Srefi den sma di no wani luku porno, kan feni en muilek fu no du dati. Wi na sondusma èn kande wi musu feti teige sekslostu di no bun. Boiti dati, wi ati kan kori wi taki a no fowtu fu luku porno (Yer. 17:9).  Ma furu sma di tron Kresten wini a feti disi. A sani disi kan de wan deki-ati gi yu efu yu abi a srefi problema. Luku fa Gado Wortu kan yepi yu fu no meki Satan kisi yu nanga porno.

Soleki fa wi si na a bigin fu na artikel, furu Israelsma meki den takru lostu fu den kon so tranga, taki den go du wan sani di tyari takru bakapisi kon gi den. A srefi sani kan pasa na ini a ten disi. Yesus afu-brada Yakobus ben taki: „Ibri sma . . . en eigi lostu e hari en èn e kori en. Te a kweki a lostu, a e tyari sondu kon te fu kaba” (Yak. 1:14, 15). Efu wan sma e gi pasi taki wan takru lostu e kon tranga, dan te fu kaba a o sondu. Sobun, wi musu du tranga muiti fu no prakseri sani di no fiti èn wi no musu kweki takru lostu.

Efu yu si taki yu e tan prakseri sani di no fiti, dan du wan sani wantewante. Yesus taki: „Efu yu anu noso yu futu e meki yu sondu, dan koti en puru èn trowe en gowe. . . . Sosrefi, efu yu ai e meki yu sondu, dan diki en puru èn trowe en gowe” (Mat. 18:8, 9). Yesus no e taki dyaso taki yu musu gi yusrefi mankeri. Ma a ben e gebroiki wan agersitori fu yepi wi frustan taki wi musu tapu fu du iniwan sani di e meki wi prakseri sani di no fiti. Fa a rai disi kan yepi wi fu no luku porno?

Efu yu e si porno sondro taki yu fruwakti dati, dan no denki: ’Noti no o pasa.’ Ma drai yu fesi wantewante. Kiri a telefisi wantewante. Kiri a computer, a telefon noso a tablet wantewante. Prakseri sani di bun. Disi kan yepi yu fu no prakseri sani di no fiti èn fu no kweki takru lostu.

Ma san yu kan du efu yu tapu fu luku porno, ma son leisi yu e memre baka san yu si? Den seks prenki di wan sma si kan tan na ini en frustan wan langa pisi ten. Den kan kon na ini en prakseri na iniwan momenti. Efu dati e pasa, dan a kan gi yu a firi fu du  wan sani di no krin. Fu eksempre, a kan meki wan sma prei nanga en syenpresi. Sobun, hori na prakseri taki den sani di yu ben si kan opo kon na ini yu frustan sondro taki yu wani. Ma du ala muiti fu no tan prakseri den.

Meki ala muiti fu denki leki fa Gado wani èn fu du sani di a feni bun. De leki na apostel Paulus, di ben ’naki en skin nanga kofu èn di ben e basi en neleki a de wan srafu’ (1 Kor. 9:27). No meki takru lostu basi yu. ’Kenki yu denki, so taki yu kan kenki yu libi. Dan yu o sabi san na a wani fu Gado di bun, di e gi en prisiri, èn di no e mankeri noti’ (Rom. 12:2). No frigiti a sani disi: Te yu e du sani di no fiti, dan yu no o de koloku. Ma yu o de koloku te yu e denki leki fa Gado wani èn te yu e du sani di a feni bun.

Pruberi fu sabi son Bijbeltekst na ede. Te sani di no fiti e kon na ini yu prakseri, dan meki tranga muiti fu prakseri den tekst dati. Tekst soleki Psalm 119:37, Yesaya 52:11, Mateyus 5:28, Efeisesma 5:3, Kolosesma 3:5, nanga 1 Tesalonikasma 4:4-8 o yepi yu fu si porno neleki fa Yehovah e si en. Den o yepi yu tu fu frustan san Yehovah e fruwakti fu yu.

San yu musu du efu a firi fu luku porno noso fu prakseri seks e kon so tranga, taki a gersi leki yu no man hori yusrefi moro? Du a srefi sani di Yesus du (1 Petr. 2:21). Baka di a dopu, Satan tan tesi en. San Yesus du? A tan kakafutu gi en. Ibri leisi a gebroiki Gado Wortu fu kakafutu gi den tesi fu Satan. Yesus taki: „Gowe fu dya, Satan!” Noiti Yesus gi abra di Satan Didibri ben tesi en, èn yu no musu gi abra tu (Mat. 4:1-11). Satan nanga a grontapu fu en o tan pruberi fu furu yu frustan nanga seks, ma tan feti. Yu man wini a feti teige porno. Yehovah kan yepi yu fu wini a feanti disi.

Tan begi Yehovah èn aksi en fu yepi yu. Paulus taki: „Begi Gado ala ten. . . . Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus” (Fil. 4:6, 7). A freide fu Gado o kibri yu frustan so taki yu o man tan feti nanga den sondu firi fu yu. Efu yu e kon krosibei na Yehovah, dan ’a o kon krosibei na yu’.​—Yak. 4:8.

A moro bun sani di kan kibri wi gi den triki fu Satan, na te wi abi wan bun matifasi nanga Yehovah, a Moro Hei Tiriman. Yesus taki: „A tiriman fu grontapu [Satan] e kon. A no abi krakti na mi tapu” (Yoh. 14:30). Fu san ede a ben de seiker fu disi? Wan leisi a ben taki: „A sma di seni mi kon, de nanga mi. A no gowe libi mi fu mi tan mi wawan, fu di ala ten mi e du san e plisi en” (Yoh. 8:29). Efu yu e du sani di Yehovah feni bun, dan noiti a o gowe libi yu. Efu yu no e luku porno, dan Satan no o man kisi yu nanga a triki disi.