BAINHIRA ema Izraél antigu besik atu hakur Mota Jordaun no tama ba rai neʼebé Maromak promete ba sira, ema balu mai vizita sira. Feto jentiu mai vizita sira no konvida mane Izraél atu bá festa. Karik sira hanoin katak neʼe mak oportunidade neʼebé kapás no úniku. Sira sei hetan kolega foun, dansa, no han hahán gostu. Maski feto jentiu sira-nia kostume no morál la hanesan ho ema Izraél neʼebé aprende ona Maromak nia Ukun-Fuan, maibé karik mane Izraél balu hanoin: ‘Diʼak hela, ami sei kuidadu an.’

 Saida mak akontese? Bíblia hatete: “Sira hahú halo sala seksuál ho ema Moab nia oan-feto sira.” Tuir loloos, feto sira-neʼe hakarak mane Izraél sira-neʼe atu adora maromak falsu sira. No neʼe akontese duni. Rezultadu mak “Jeová sai hirus tebes ba ema Izraél”.​—Núm 25:1-3.

Mane Izraél sira-neʼe kontra Maromak nia Ukun-Fuan iha dalan rua: Sira hakruʼuk ba estátua sira no halo sala seksuál. Ema rihun ba rihun mate tanba la halo tuir Maromak. (Éx 20:4, 5, 14; Deut 13:6-9) Neʼe triste tebes tanba se mane sira-neʼe la kontra Maromak nia Ukun-Fuan, ema Izraél rihun ba rihun sei la mate no bele hakur Mota Jordaun no tama ba rai neʼebé Maromak promete.​—Núm 25:5, 9.

Apóstolu Paulo hakerek kona-ba akontesimentu sira-neʼe: “Buat sira-neʼe akontese ba sira hodi sai nuʼudar lisaun ba ita, no neʼe hakerek hodi fó avizu ba ita neʼebé moris iha tempu neʼe nia rohan.” (1 Kor 10:7-11) Ita bele fiar katak Satanás sente kontente kuandu mane sira-neʼe halo sala sériu hasoru Jeová no labele tama ba rai neʼebé Maromak promete. Diʼak atu aprende husi sira-nia sala tanba ita hatene katak Satanás sei kontente tebes se nia bele hanetik ita atu tama ba mundu foun.

Satanás hakarak lasu ema Kristaun ho lasu sira neʼebé uluk nia uza ona ho susesu. Hanesan temi iha leten, Satanás uza sala seksuál atu lasu mane Izraél sira. Toʼo ohin loron, sala seksuál mak lasu neʼebé perigu. Buat ida neʼebé bele halo ita monu ba lasu neʼe mak pornografia.

Ohin loron, ema ida bele haree pornografia no ema sei la hatene. Tinan barak liubá, se ema hakarak haree pornografia, sira tenke bá sinema ka loja neʼebé faʼan livru kona-ba pornografia. Maibé ema barak la bá fatin sira-neʼe tanba moe ba ema seluk. Ohin loron, ema bele asesu internét atu haree pornografia iha serbisu-fatin ka iha karreta laran. Iha rai barak, mane ka feto bele haree pornografia iha sira-nia uma.

Laʼós neʼe deʼit, sasán eletróniku hanesan telemovel ka tablet halo fasil ba ema atu haree pornografia. Bainhira laʼo iha dalan ka saʼe transporte, ema bele haree dezeñu aat iha telemovel ka tablet.

Tanba fasil liu atu haree pornografia subasubar, neʼe lori rezultadu aat ba ema barak liu ohin loron se kompara ho uluk. Ema barak neʼebé haree pornografia estraga sira-nia moris kaben nian, sira-nia dignidade no konxiénsia. Aat liután mak sira bele estraga sira-nia relasaun diʼak ho Maromak. Ita bele fiar katak pornografia estraga duni ema neʼebé haree ida-neʼe. Iha situasaun balu, pornografia afeta ema iha dalan neʼebé aat tebes ba tempu kleur no dala ruma nunka bele halakon ida-neʼe.

Maibé Jeová hakarak proteje ita husi Satanás nia lasu neʼe. Se ita hakarak hetan Jeová nia protesaun, ita presiza halo buat neʼebé mane Izraél sira la konsege halo, neʼe mak “halo tuir ho didiʼak”. (Éx 19:5) Ita presiza rekoñese katak Maromak odi tebes pornografia. Tanbasá?

Hanoin kona-ba neʼe: Maromak nia Ukun-Fuan ba nasaun Izraél mak úniku iha tempu neʼebá. Ukun-Fuan sira-neʼe mak hanesan ho moru neʼebé proteje sira husi nasaun seluk no sira-nia hahalok foʼer. (Deut 4:6-8) Ukun-Fuan sira-neʼe hatudu ho klaru lia-loos ida: Jeová odi sala seksuál.

Jeová temi kona-ba hahalok la morál neʼebé nasaun viziñu halo no tuirmai nia hatete ba ema Izraél: “Imi labele halo buat  neʼebé ema iha rai-Kanaan halo, rai neʼebé haʼu sei lori imi bá. . . . Rai neʼe sai la moos, no haʼu sei lori kastigu ba ema iha rai neʼe tanba sira-nia sala.” Ba Izraél nia Maromak neʼebé santu, ema Kanaan nia kostume mak foʼer tebes toʼo hafoʼer mós rai neʼebé sira hela bá.—Lev 18:3, 25.

Maski Jeová fó kastigu ba ema Kanaan, maibé ema seluk kontinua halo sala seksuál. Tinan 1.500 liutiha, Paulo esplika katak nasaun sira iha ninia tempu mak ema neʼebé “la hatene morál neʼebé loos”. Tuir loloos, “sira entrega sira-nia an hodi halo hahalok aat toʼo la sente moe no ho kaan-teen halo hahalok oioin neʼebé la moos”. (Éf 4:17-19) Ohin loron mós ema barak halo hahalok la morál toʼo la sente moe. Tan neʼe, ema Kristaun presiza hadook an hodi la haree atividade oioin neʼebé la iha morál.

Pornografia la hatudu respeitu ba Maromak. Maromak kria ema tuir ninia ilas ho hahalok hanesan nia no iha kbiit atu hatene buat neʼebé aat ka diʼak. No nia halo ukun-fuan kona-ba relasaun seksuál. Nia hakarak atu ema neʼebé kaben ona mak bele goza ida-neʼe. (Gén 1:26-28; Prov 5:18, 19) Maibé saida mak ema neʼebé habelar pornografia halo? Sira la halo tuir duni Maromak nia matadalan kona-ba morál. Ema neʼebé habelar pornografia la hatudu respeitu ba Jeová. Maromak sei tesi-lia ba sira neʼebé la halo tuir ninia matadalan hodi halo ka habelar buat oioin neʼebé la morál.—Rom 1:24-27.

Oinsá ho ema neʼebé ho neon lee no haree pornografia? Ema balu sente katak neʼe la perigu. Maibé loloos, sira apoia ema neʼebé la respeitu Jeová nia matadalan kona-ba morál. Karik neʼe laʼós sira-nia intensaun kuandu foufoun haree pornografia. Maski nuneʼe, ema neʼebé adora Maromak loos tenke odi tebes pornografia. Bíblia dehan: “Oh imi neʼebé hadomi Jeová, imi tenke odi buat neʼebé aat.”—Sal 97:10.

Maski ita hakarak, dala ruma susar atu hadook an husi pornografia. Ita la perfeitu no karik presiza funu hasoru ita-nia hakarak seksuál neʼebé la moos. Liután neʼe,  karik ita-nia laran koko lohi ita katak la sala atu haree pornografia. (Jer 17:9) Maibé ema barak neʼebé sai ona ema Kristaun manán ona funu neʼe. Hodi hatene ida-neʼe bele ajuda ita fiar katak ita mós bele manán pornografia. Haree toʼok oinsá Maromak nia Liafuan bele ajuda ita atu hadook an husi Satanás nia lasu pornografia.

Hanesan ita lee ona, ema Izraél barak husik sira-nia hakarak neʼebé sala lori rezultadu aat. Buat neʼebé hanesan mós bele akontese ohin loron. Jesus nia alin Tiago esplika kona-ba perigu, hodi hatete: ‘Ema ida-idak nia hakarak rasik mak dada nia no tenta nia. Tuirmai kuandu hakarak neʼe sai buras ona, neʼe hamosu sala.’ (Tgo 1:14, 15) Bainhira hakarak neʼebé sala sai buras iha ema nia laran, baibain ema neʼe sei halo sala. Tan neʼe, ita presiza hasai tiha no keta hanoin tan buat neʼebé la morál.

Se Ita hanoin beibeik kona-ba buat neʼebé la morál, halo kedas buat ruma. Jesus hatete: “Se ó-nia liman ka ain halo ó sidi, tesi tiha ida-neʼe no soe tiha. . . . No mós, se ó-nia matan halo ó sidi, losu ida-neʼe no soe tiha.” (Mt 18:8, 9) Jesus la haruka ita atu hakanek ita-nia an. Nia hakarak ajuda ita buka-hatene tanbasá ita hanoin buat neʼebé sala no tuirmai halo kedas mudansa. Oinsá ita bele aplika konsellu neʼe?

Se derrepente deʼit pornografia mosu, keta hanoin: ‘Diʼak hela.’ Ita presiza fila oin kedas. Hamate kedas televizaun, komputadór ka sasán eletróniku seluk. Hanoin fali buat seluk neʼebé diʼak. Ida-neʼe bele ajuda Ita atu kontrola Ita-nia hanoin duké husik deʼit hakarak neʼebé sala kontrola Ita.

Oinsá se Ita para ona haree pornografia, maibé dala ruma Ita hanoin-hetan fali saida mak Ita haree uluk? Dezeñu foʼer ka hanoin foʼer bele metin iha ita-nia neon ba tempu kleur. Ida-neʼe bele mosu fali iha ita-nia neon derrepente deʼit. Se ida-neʼe akontese, karik neʼe mós hamosu hakarak atu halo  buat neʼebé la moos, hanesan halo masturbasaun. Hanoin hanesan neʼe bele mosu derrepente deʼit, tan neʼe ita presiza prepara an atu kontra hasoru ida-neʼe.

Hakaʼas an atu iha hanoin no hahalok neʼebé tuir Maromak nia hakarak. Sai hanesan apóstolu Paulo neʼebé prontu atu “kontrola [ninia] isin no ukun [ninia] an hanesan atan”. (1 Kor 9:27) Keta husik ita-nia hakarak neʼebé sala kontrola ita. ‘Troka ita-nia an hodi hafoun ita-nia hanoin, atu nuneʼe ita bele hatene loloos kona-ba Maromak nia hakarak neʼebé diʼak no perfeitu no halo Maromak kontente.’ (Rom 12:2) Hanoin-hetan: Iha hanoin no hahalok tuir Maromak nia hakarak sei lori kontente neʼebé boot liu duké halo tuir deʼit hakarak neʼebé sala.

Koko dekór eskritura balu, atu nuneʼe bainhira mosu hanoin neʼebé sala, Ita bele obriga Ita-nia an atu hanoin kona-ba eskritura sira-neʼe. Eskritura sira hanesan Salmo 119:37; Isaias 52:11; Mateus 5:28; Éfeso 5:3; Koloso 3:5; no 1 Tesalónika 4:4-8 bele ajuda Ita atu iha hanoin hanesan Jeová nian kona-ba pornografia no hatene buat neʼebé Maromak hakarak ita atu halo.

Saida mak Ita presiza halo se Ita sente Ita labele luta hasoru Ita-nia hakarak atu haree ka hanoin buat neʼebé la morál? Halo tuir Jesus nia ezemplu. (1 Ped 2:21) Depois Jesus hetan batizmu, Satanás kontinua tenta nia. Saida mak Jesus halo? Nia kontinua luta. Nia temi eskritura oioin atu kontra hasoru tentasaun sira husi Satanás. Nia hatete: “Bá dook tiha Satanás!” no Satanás husik hela nia. Jesus nunka para atu luta hasoru Diabu, Ita mós presiza halo nuneʼe. (Mt 4:1-11) Satanás no ninia mundu sei kontinua koko makaʼas atu halo nakonu Ita-nia neon ho hanoin neʼebé foʼer, maibé keta rende an atu luta. Ita bele manán hasoru pornografia. Jeová bele ajuda Ita manán Ita-nia inimigu.

Husu ajuda ba Jeová liuhusi orasaun. Paulo hatete: “Iha situasaun hotu husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.” (Flp 4:6, 7) Maromak sei fó Ita dame atu ajuda Ita luta hasoru buat neʼebé sala. Se Ita hakbesik ba Jeová, “nia sei hakbesik ba [Ita]”.—Tgo 4:8.

Dalan diʼak liu atu proteje Ita-nia an husi Satanás nia lasu sira mak kontinua hametin Ita-nia relasaun ho Ukun-Naʼin Boot Liu. Jesus hatete: “Ukun-naʼin mundu neʼe nian [Satanás] mai daudaun, no nia la iha kbiit atu kontrola haʼu.” (João 14:30) Tanbasá Jesus iha konfiansa hanesan neʼe? Jesus esplika: “Nia neʼebé haruka haʼu mai, nia hamutuk ho haʼu. Nia la husik haʼu mesak tanba haʼu sempre halo buat neʼebé fó ksolok ba nia.” (João 8:29) Kuandu Ita halo buat neʼebé fó ksolok ba Jeová, nia sei nunka husik hela Ita. Se Ita hadook an husi pornografia, Satanás nunka bele lasu Ita.