TEPO vaIsrayeli va gale va dzi dongisedego gu tshatuga tsongo wa Joridhani na va gu hongola tigoni va tumbisidwego khu Nungungulu, va di ta wusedwa khu vathu nyo khaguri. Va diri vanyamayi va nyamayigo va nga ta raneya buzo vama nya vaIsrayeli. Gwawe adzina si wonegide kha nga lithomo nyo kale gu li mana. Gu gira dzipari nya dziphya, gu hana, ni gu hodza mafanjara si di hadzi va tsakisa ngudzu. Kha nga olu sihena ni mavbanyelo ya vanyamayi vovo si nga ba si hambana ni Nayo owu Nungungulu a ningidego vaIsrayeli, vambe vama nya vaIsrayeli adzina va pimiside esi: ‘Hi ngu siti esi nya sadi ni esi nyo vivbe. Hi na ya dzi woneya.’

 Ganiolu, ginani gi nga dugeleya? Matimo mo hi embeya esi: “Vathu va di bhaya ni vanyamahegyane va na Mowabhi.” Khu gu hegisa vanyamahegyane vale va na Mowabhi va di kutsa vama nya vaIsrayeli gu khozeya vanungungulu vawe nya malipha. Nigu khiso kamo soso va nga gira! Khu gighelo nyo pwale, Jehovha “a di wugela va na Israyeli.” — Mite. 25:1-3.

Vaisrayeli vovo va di ndraga Nayo wa Nungungulu khu dzindziya dzimbili: Va di khozeya sithombe, va bwe va gira wubhayi. Mazanazana nya vathu va fude khu gu mba engisa Nungungulu. (Ekiso. 20:4, 5, 14; Dhet. 13:6-9) Khu ginani esi va giridego si vbisisago ngudzu monyo? Khu kotani nya tepo va nga ba vari ga iyo. Nari khatshi vama vale nya vaIsrayeli va di sayiside Nayo wa Nungungulu, mazanazana yale nya vathu va ngafago, na va tshatugide tsongo wa Joridhani va beya Tigoni nya Gitumbiso. — Mite. 25:5, 9.

Khu kotani nya silo soso, mupostoli Pawulo a di lova esi: “Satshavbo sesi si manegide gwawe gasi gu khala giwonegiso, gambe si lovidwe gasi si khale gitiviso ga ethu hi vbanyago ga matshigu yaya nya guhegise.” (1 Kor. 10:7-11) Kha si kanakanisi gu khiso Sathane tsakide ngudzu kholu vaIsrayeli nyo khaguri va giridego gighoho nya gikhongolo nigu khu gighelo gyogyo va si beyi Tigoni nya Gitumbiso. Gu vbwetega hi hevbula gilogyo ga sighoho sawe, kholu hi ngu dziti gu khethu Sathane a na tsaka ngudzu o tshuka a hi tandregisa gu beya mafuni nya maphya ya Nungungulu!

Sathane a gu vbweta gu tshanisa maKristo muhuno, nigu gasi gu gira isoso uye o thumisa milaphwi yi kodzidego gu mola vathu nya vangi gupheyani. Kha nga hi si wonidego ga vaIsrayeli, uye o thumisa wubhayi. Ambari dziteponi dzathu wubhayi wu ngari naphwi nya wukhongolo. Pornografiya mweyo nya dzinyambwa dzi thumiswago khu Sathane gasi gu hi bedza wubhayini.

Muhuno, si ngu kodzega gu wona pornografiya nya mba tugudwa khu muthu. Gale yoyo, muthu a gu vbweta gu wona pornografiya a di yede gu hongola dziteyatrutunu gasi guya wona dzifilimi mwendro dzivhidhiyu nya pornografiya mwendro omu nya dzilivrariya dzi nga ba dzi giredwe basi vathu nya vakhongolo gasi guya renga mabhuku nya pornografiya. Adzina vathu nya vangi kha va nga ba va hongola malangani yoyo khu gu thava gu thega dzitshoni vo tshuka va wonwa khu vambe vathu. Ganiolu muhuno, khu gu thumisa interneti muthu a nga wona pornografiya a gu ba ari thumotunu, ambari movhani yi emidego. Nigu mayigoni nya mangi, muthu a nga wona pornografiya nari khu ndrangani gwaye.

Ganiolu kha si hegeyi basi avba. Mitshini ya mandzani yi ngu vbevbugiseya vathu gu wona pornografiya. Vathu va nga wona dzifoto nya mba handzega va gu ba va gimbiya ruwani, va gu ba va pasiyari, va gu ba va endra khu sibhomba mwendro dzikomboyi, khu gu thumisa mitshini yawe ya mandzani.

Kha nga olu si vbevbugago gu wona pornografiya ni olu si kodzegago gu yi wona nya mba tugudwa khu muthu, iyo yi ngu vanga sigaradzo nya sikhongolo muhuno guvbindra gale. Nya vangi va wonago pornografiya va gu tshungunula mapango yawe, va dzi nyenyezisa, ma bwe mavhalo yawe ma tshoreya. Nigu, guvbindra satshavbo vomo mhangoni nyo songe wupari wawe ni Nungungulu. Tiyisega gu khuwe pornografiya yi ngu ghoha ava va yi wonago. Gutala nya dzitepo gilo gyakona va wuyedwago khigyo, silondra ni wuvi nya wukhongolo monyoni. Pornografiya ya gu khuha vathu khu ndziya nyo vivbe ngudzu nigu mihandro yoyo nyo vivbe yi nga va tshanisa khu tepo nyo laphe, dzimbe dzitepo vambe va ngu tshaniseka womini wawe watshavbo khu kotani nya pornografiya.

Gu vbwetega hi dundruga gu khethu Jehovha a ngu vhikeya sithumi saye ga milaphwi ya Sathane. Ha gu ba hi vbweta gu khethu Jehovha a hi vhikeya hi yede gu mu ‘yingisa’, a gu esi vaIsrayeli va nga mba si gira. (Ekiso. 19:5) Gu vbwetega hi dundruga gu khethu Nungungulu a ngu nyenya pornografiya. Khu ginani hi ganeyago isoso?

Nga dundrugeya khesi: Nungungulu a di ningide vaIsrayeli nayo wu nga ba wu hambanide ni milayo ya mayigoni ya teponi yile. Nayo wowo wa gu fananiswa ni mabhiyu ma nga ba ma va vhikeya ga  mikutsedzelo nya mambe mayigo. (Dhet. 4:6-8) Milayo yoyo ya gu yeyedza lisine limwedo nya lisima ngudzu: Jehovha a ngu nyenya wubhayi.

Hwane nyo khumbuge silo nya malawu si nga ba si girwa khu vathu vale va nga ba va randrede vaIsrayeli, Jehovha a di va embeya esi: “Mu nga giri kha nga idzo va girago tigoni ga Khanani, tigoni nyi mi yisago iyo. . . . Litigo li dzi nyenyeziside; Eni nyi na tsayisa guvivba gwaye.” Ga Nungungulu nya guage wa vaIsrayeli, mavbanyelo ya vaKhanani ma di vivbide ngudzu nyo bwe litigo li nyenyeza. — Levhi 18:3, 25.

Ambari olu Jehovha a tsayisidego vaKhanani, vambe vathu va di gu simama gu gira wubhayi. Hwane nya 1 500 myaga, Pawulo ganede esi na gu thula mayigo omu maKristo ma nga ba ma vbanya umo, khuye, vathu va “gu mba yingela mavhalo yawe.” Khu lisine, kha va nga ba va “khathala gambe khu wuthu wawe. Va [di] gu dziningedzela gunyenyezani nya mithumo yatshavbo nyamba yela.” (Efes. 4:17-19) Muhuno nugo, vathu nya vangi sibhayi nigu kha va khali dzitshoni khu kotani nya isoso. Vakhozeyi nya lisine gu vbwetega va gira satshavbo va si kodzago gasi gu potsa gu khedziseya mavbanyelo ya vathu va mafuni momu.

Pornografiya kha yi ningi githawo Nungungulu nigu giride vathu khu mufananiso waye. Hi giride ni makodzelo nyo guti gu khethu gilo nyo khaguri khyadi mwendro gi vivbide. Khu wugengeyi, Nungungulu a di ninga milayo maningano ni malawu. A di gu vbweta gu khuye malawu ma hengedwa basi khu vathu vavili va tshadhidego gumogo. (Gen. 1:26-28; Mav. 5:18, 19) Ahati ava va girago ni gu andrisa pornografiya ke? Somo guagani gu khiso kha va ningi githawo milayo nya mavbanyelo ya Nungungulu. Nigu vathu va andrisago pornografiya kha va ningi githawo Jehovha gambe. Nungungulu a na lamula ava va si theyigo kota khu milayo yaye, va girago ni gu andrisa sivbungadzo nya mba handzega. — Rom. 1:24-27.

Ganiolu, ahati vale va lerigo ni gu wona pornografiya? Vambe va ngu siti gu khavo pornografiya yi vivbide. Ambari ulolo, avo vo seketeya vale va si ningigo githawo milayo ya Jehovha. Adzina va diri mwalo makungo yoyo tepo va nga pheya gu wona pornografiya. Khu kharato, Bhibhiliya yo si vega guagani gu khiyo vakhozeyi va Nungungulu gu vbwetega va zondra pornografiya. Bhibhiliya yo hi gengedza gu khiyo: “Enu mu golago PFHUMU Nungungulu, nyenyani guvivba.” — Ndzi. 97:10.

 Ambari vale va zamago gu potsa gu wona pornografiya kha si va vbevbugeyi, dzi ngu wuya gu gira isoso. Hi vathu nya mba vbeleya, khu kharato gu vbwetega hi dwana gasi gu vhikisana ni gu dogoreya nyo vivbe. Gimbe gambe khu gu monyo wathu nya mba vbeleya wu nga zama gu vbwetedzeya dzindziya nyo hi gire hi ndranga nayo wa Nungungulu. (Jer. 17:9) Ganiolu gu na ni vathu nya vangi va gu maKristo va nga pala nyimbi yeyi. Guti isoso si nga gu tiyisegisa gu khiso anuwe u nga yi potsa pornografiya. Wona edzi Lito la Nungungulu li nga gu phasago khidzo gu potsa naphwi wowu wa Sathane.

Kha nga hi si wonidego gu pheyani, vaIsrayeli nya vangi va dzumelede gu dogoreya nyo vivbe gu va yisa mhangoni. Nigu isoso si nga hi dugeleya nethu muhuno. Jakobe ndriye wa Jesu yi tshamusede kharati mhango yeyi: “Aholu muthu ni muthu a gu [ndrindrwa nigu sengwa] khu gudogolela nya monyo waye. Gudogolela gwa gu bela monyoni nya muthu gu khura mimba gu velega gighoho, gighoho na gi giridwe gya gu vanga gufa.” (Jak. 1:14, 15) O tshuka muthu nyo khaguri a diga gudogoreya nyo vivbe gu dandra monyoni gwaye, khu gu gimbiya nya tepo a nga thegeya gighohoni. Khu kharato hi yede gu dzigaradza gasi hi si pimisi silo nya malawu hi bwe hi si nyenya.

Wa gu tugula gu khuwe u ngo gu simama gu pimisa silo nyo vivbe, dzegeya gu gira gilogyo. Jesu a di khuye: “Wa gu wona nya gukhuwe mandza yago mwendro ngondro wago si ngu gu tshunganisa, si pile u dzudzuga. . . . Wa gu wona gukhuwe liso Iago li ngu gu tshunganisa, li duse u dzudzuga.” (Mat. 18:8, 9) Jesu kha nga ba a thula gu hi dzi bayiseya sivili sathu. A di thumisa gifananiso gegi gasi gu hi phasa gu pwisisa gu khethu gu vbwetega hi zama gu tugula gighelo gi hi girisago hi pimisa silo nyo vivbe, khavbovbo hi dzegeya gu vbindrugedza. So ta avba nya pornografiya, hi nga wu thumisa kharini wusingalagadzi wowu?

Wa gu tshangana ni pornografiya u nga emi u pimisa khuwe, ‘Kha si na nga nyi khuha.’ Dzegeya gu khedza phuvbo. Dzegeya gu tshima televizawu. Tshima computadhori mwendro telefoni khu gu vbiredza. Vega gupima avba nya silo nya sadi. Isoso si nga gu phasa gu woneleya mapimo yago wulangani nyo dige gudogoreya nyo vivbe gu gu woneleya.

Ahati wa gu ba u digide gu wona pornografiya ganiolu dzimbe dzitepo na si wuya mapimoni gwago sile u si wonidego? Dzifoto nya pornografiya dzi nga simama mapimoni nya muthu khu tepo nyo laphe. Idzo dzi nga wuya ni yevbini tepo. Tepo si giregago, adzina si nga gu vangeya gu dogoreya nyo gire silo nyo khaguri nyo vivbe ngudzu nya nga gu haganahagana ni sivbango nya wuvelegi gasi gu dzi wuseya manyawunyawu nya malawu (masturbação). Dziti gu khuwe nya mba si vireya u na tshuka u dundruga silo sile nyo vivbe u si wonidego, khu kharato dzi dongiseye gasi gu dwana naso.

Engedzeya gu dziemiseya gwago nyo pimise ni gira silo esi Nungungulu a si vbwetago. Pimedzeya mupostoli Pawulo, oyu a nga ba a dzi emisede gu “dwana ni givili [gyaye a] gi khozisa.” (1 Kor. 9:27) U nga dzumeyi gu girwa gumbi khu gu dogoreya nya mba handzega. ‘Vbindrugedza mapimo yago ni mavbanyelo yago yatshavbo, gasi u kodze gupima gugola gwa Nungungulu; ni gu pima esi nya sadi, nya gutsakise, si vbeledego mahoni gwa Nungungulu.’ (Rom. 12:2) Dundruga gu khuwe gu pimisa ni gu gira gugola ga Nungungulu si na gu reseya gutsaka nya gukhongolo ngudzu guvbindra gu engisa gu dogoreya nyo vivbe.

Zama gu vegisa mapimoni gwago mavhesi nyo khaguri nya Bhibhiliya. Khavbovbo tepo gu dogoreya nyo vivbe gu zamago gu thapheya mapimo yago, zama gu dundrugeya khu limwedo nya mavhesi yoyo. Milowo nya nga Ndzimo 119:37; Isaya 52:11; Matewu 5:28; Vaefeso 5:3; Vakolosi 3:5; ni 1 Vatesalonika 4:4-8 yi na gu phasa gu pwananisa mapimiselo yago ni mawonelo ya Jehovha maningano ni pornografiya ni esi a vireyago gu khuye u si gira.

Ginani u yedego gu gira wo wona gu khuwe khu si kodzi gu diga gu wona mwendro gu pimisa silo nya mba handzega? Landreya gwadi esi si giridwego khu Giyeyedzo gyathu, Jesu. (1 Ped. 2:21) Hwane nyo bhapatiswe, Sathane zamide gu mu linga. Ginani egi Jesu a giridego? Kha dzumeya gu padwa khu Sathane. Khu gu thumisa milowo nyo landreyane, uye pade milaphwi ya Sathane. A di khuye: “Suka, Sathane,” nigu Sathane a di dugeya kamo. Kha nga olu Jesu a nga mba dzumeya gu padwa khu Dhiyabhulosi, anuwe u nga si kodza. (Mat. 4:1-11) Sathane ni litigo laye va na simama gu zama gu tadza mapimo yago khu mapimo nyo vivbe, ganiolu gu vbwetega u simama gu dwana. U nga si kodza gu pala nyimbi nyo wone pornografiya. Nigu Jehovha a na gu phasa gu tshigira nala wago.

Simama gu gombeya ga Jehovha nigu mu lomba giphaso. Pawulo a di khuye: “Lombani esi mu si vbwetago ga Nungungulu . . . Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo ni mapimo khu ga Kristo Jesu.” (Filp. 4:6, 7) Nungungulu a na rudzisa mapimo yago gasi gu gu phasa gu potsa gu gira silo nyo vivbe. Wo hidzimeya ga Jehovha, “uye nuye a na [gu] hidzimelela.” — Jak. 4:8.

Hi na ba hi dzi vhikede ga milaphwi ya Sathane ha gu simama gu tiyisa wupari wathu ni Pfhumu nya mafu ni ndzadzi. Jesu a di khuye: “A ngu vboha [Sathane] mufumeli nya litigo leli. Uye gimwalo gilo a na girago avba gwangu.” (Joh. 14:30) Khu ginani Jesu a nga ari ni gutumba gogu? Litshigu limwedo uye tshamusede esi: “Wule a nyi rumedego a na ni eni; kha nyi diga nyenga, kholu gikhati gyatshavbo nya gu gira esi si mu tsakisago.” (Joh. 8:29) Wo zama gu tsakisa Jehovha ga satshavbo u girago, anuwe u nga tiyisega gu khuwe uye gima kha na nga gu diga. Potsa naphwi nya pornografiya, khu kharato Sathane gima kha na nga si kodza gu gu mola.