MAISRAYELI nibakali baba aafwiifwi kuzubuka Mulonga waJordani kuti banjile munyika Leza njaakabasyomezezye, bamwi bantu bakabaswaya. Bantu aaba bakali basimbi bakuMowabbu alubo bakatamba baalumi bachiIsrayeli kupobwe. Kutambwa ooku kwakali kubonekaanga nchintu chigambya. Kuba abeenzinyina bapya, kuzyana achakulya chibotu, kwakali kubonekaanga kuyoobanoneezya. Nikuba kuti ziyanza akulijata kwabanakazi aaba teekwakali kweendelana aMulawu waLeza pesi kulakonzeka kuti bamwi baalumi maIsrayeli bakayeeya kuti: ‘Tatukachiti nzibachita. Tabakatweeni pe.’

 Niinzi chakachitika? Bbayibbele lyaamba kuti: “Bantu bakatalika kuvwuula abana basimbi baku Moabu.” Basimbi aaba, bakali kuyanda kuti baalumi maIsrayeli bakombe baleza bakubeja. Alubo nzizyo zyakachitika! Kuzwa waawo, “bukali bwa Jehova bwakababukila bana Israyeli.”—My. 25:1-3.

MaIsrayeli bakatyola Mulawu waLeza munzila zibili: Bakakomba baleza bakubeja alubo bakachita bwaamu. Eezi zyakapa kuti zyuulu zyabantu bafwe akaambo kakutaswiilila Leza. (Kul. 20:4, 5, 14; Dt. 13:6-9) Niinzi chimwi chitondeezya kuti nchibakachita chakali chibi? Nchiindi. Kaansinga baalumi aaba teebakatyola Mulawu waLeza, nikuli maIsrayeli aabo bakakonzya kuzubuka mulonga waJordani kabaya Munyika Yachisyomezyo.—My. 25:5, 9.

Kaambuula atala amakani aaya, mwaapostolo Pawulu wakalemba kuti: ‘Zintu eezi zyakabachitikila kutegwa zibe zikozyano, alimwi zyakalembelwa kutuchenjezya swebo nitupona kumamanino aabweende bwazintu bwiindene-yindene.’ (1 Kor. 10:7-11) Saatani wakabotelwa chiindi bamwi maIsrayeli nibakachita chibi chipati akuti teebakanjila Munyika Yachisyomezyo. Tweelede kwiiswiilila nchenjezyo eeyi nkaambo Saatani uyanda kuti tutakanjili munyika mpya yaLeza.

Mazubaano, Saatani uliikweena maKristu alubo kuti achite oobo ubelesya tukole ntwazi, ntwaakabelesya kuli bamwi. Mbuuli mbutwabona musule, kumaIsrayeli, Saatani wakabelesya kakole kakutalijata. Alubo mazubaano, kutalijata kabotu nkakole kapati nkalikubelesya. Imwi nzila njalikubelesya kuti atuche, niponogilafu.

Mazubaano, muntu ulakonzya kweebela ponogilafu kakutakwe bamubona. Chiindi, muntu wakali kuyanda kweebela ponogilafu, wakali kwiinka kumasena kwakali kweebelwa mafilimu kuti akeebele ma-movie aatondeezya michito yakutalilemeka naakuti kuzintoolo zyuuzya mabbuku aatondeezya michito iili boobo. Bantu biingi bakali aabweeme kwiinka kumasena aaya nkaambo bamwi bakali kukonzya kubabona. Pesi mazubaano, muntu ulakonzya kubelesya Intaneti kuti ayebele ponogilafu kumulimu naakuti kali mumoota. Alubo muzisi zyiingi, muntu ulakonzya kweebela ponogilafu nikuba kali mung’anda.

Tazimanini waawo. Akaambo kamafooni amatebbuleti, kweebela ponogilafu takuchikataazyi pe. Bantu balakonzya kulanga zifanikisyo zitali kabotu mumafooni nibayabweenda munzila, mubbaasi naakuti muchitima.

Akaambo kakuti kweebela ponogilafu kwakawuba akuti muntu ulakonzya kusisa kuti uliiyebela, bantu biiyebela balinjizya mumapenzi miingi. Bantu beebela ponogilafu bapa kuti myuunzi yabo imwayike, batalemekwi akukataazikana mumoyo. Alubo penzi pati ndyakuti, kwiiyebela kupa kuti muntu atabi mweenzinyina waLeza. Nichoonzyo kuti bantu beebela ponogilafu balinjizya mumapenzi. Chiindi chiingi, kweebela ponogilafu kupa kuti muntu abe aamachise miingi. Machise aayo alakonzya kukkala kwachiindi chilamfu naakuti kutamana.

Tweelede kuziba kuti Jehova ulatukwabilila kukakole aaka Saatani nkabelesya. Nkinkaako, kuti katuyanda kukwabililwa aaJehova, tweelede kuchita chintu baalumi maIsrayeli nchibakakachilwa kuchita, chaamba ‘kumuswiilila chakumaninina.’ (Kul. 19:5) Tweelede kuziba kuti Leza ulayizonda ponogilafu. Nkamboonzi nitwaamba oobo?

Yeeya atala amakani aaya: Milawu Leza njaakapede maIsrayeli, yakali siyene amilawu yazimwi zisi. Milawu eeyi yakali mbuuli miduli nkaambo yakali kubakwabilila kuti batachiti michito iisesemya yakali kuchitwa aabantu mbibakayakilene aabo. (Dt. 4:6-8)  Alubo yakali kutondeezya kasimpe kayandikana kakuti: Jehova ulakuzonda kuchita bwaamu.

Naakali kwaambuula atala amichito yakutalilemeka yakali kuchitwa aazimwi zisi, Jehova wakati kumaIsrayeli: “Tamweelede kucita mbobacita bana Kanana, munyika mondimutola. . . . Nyika yabo ilisofweede, alimwi ndiyoobasubula bantu bakkala mulinjiyo nkaambo kazibi zyabo.” Kuli Leza uusalala wamaIsrayeli, maponeno aabantu bakuKkenani akali kumusesemya zyakuti nyika yabo wakayibona kayisofweede.—Lev. 18:3, 25.

Nikuba kuti Jehova wakabapa chisubulo bantu bakuKkenani pesi bamwi bantu bakiinkilila kunembo kabachita bwaamu. Kakwiindide minyaka iili 1 500, Pawulu wakati muzisi maKristu mubakali kukkala, bantu ‘teebakajisi nsoni naaba aniini mubukkale bwabo.’ Bantu aabo bakali “balyaaba kubukkale busesemya kuti bacite busofwaazi bwamusyobo uuli woonse cabulyato.” (Ef. 4:17-19) Nikuba mazubaano, bantu biingi bali aabukkale busesemya. Bakombi baLeza beelede kutantamuka kweebela zintu zitali kabotu zili munyika eeyi.

Ponogilafu itondeezya kutalemeka Leza. Leza wakalenga bantu muchikozyano chakwe akuti babe mbuuli nguwe. Wakatulenga katukonzya kuziba chibotu achibi. Alubo chabusongo, Leza wakatubikkila milawu iili atala akoonana. Makanze aakwe akali aakuti bantu bachadide, babe mbabo luzutu bali aachilongezyo chakoonana. (Matl. 1:26-28; Tus. 5:18, 19) Pesi kutegwani abantu bapupulula abasumpula ponogilafu? Batondeezya kutalemeka malayilile aaLeza aakulijata. Bantu basumpula ponogilafu bapa kuti Jehova atalemekwi. Leza uyoobabeteka bantu bataswiilili malayilile aakwe akaambo kakupupulula zintu zyakutalilemeka akuzisumpula.—Rom. 1:24-27.

Pesi kutegwani abantu beebela naakuti babala zintu zyaponogilafu? Bamwi bayeeya kuti kuchita oobo takukabanjizyi mumapenzi pe. Kwaamba choonzyo, bantu aabo ngabalikubbazu limwi abantu batalemeki malayilile aaJehova. Kulakonzeka kuti taakali makanze aabo pe nibakasaanguna kwiiyebela.  Pesi bakombi baLeza wakasimpe beelede kwiitantamuka chakumaninina ponogilafu. Bbayibbele lyaamba kuti: “Nywebo nomuyandisya Jehova, amusulaike bubi.”—Int. 97:10.

Nikuba bantu bayanda kutantamuka kweebela ponogilafu kulakonzya kubayumina kuchita oobo. Tuli aachibi alubo chimwi chiindi tweelede kubeleka changuzu kulwana mizeezo yakutalilemeka. Alubo moyo wesu uuli aachibi, ulakonzya kutweena kuti tuchite zintu zikazyania amulawu waLeza. (Jer. 17:9) MaKristu biingi bakalizunda penzi eeli. Makani aaya alakonzya kukuumbulizya kuti kuli aapenzi lili boobo. Atubone Jwi lyaLeza mbulikonzya kukugwasya kuti utantamuke kakole nkabelesya Saatani, kaponogilafu.

Mbuuli mbukwaambwa, maIsrayeli biingi bakazumizya mizeezo iitali kabotu kuti ikomene mpawo bakachita chibi. Eezi zilakonzya kuchitika nikuba kulindiswe. Jakkobo mwananyina waJesu wakaamba penzi likonzya kuba naakati: ‘Umwi awumwi ulawongelezegwa akuchegwa azisusi zyakwe mwini. Lino zisusi eezyo zyamita, zizyala chibi.’ (Jak. 1:14, 15) Kuti mizeezo iitali kabotu yakomena mumoyo wamuntu, chiindi chiingi muntu ooyo ulakonzya kubisya. Nkinkaako, tweelede kugwisya mizeezo yakutalilemeka akutayiyeeya.

Kuti wabona kuti ukkala kusikilwa mizeezo yakutalilemeka, chita chimwi chintu chakufwambaana. Jesu wakati: ‘Kuti kuboko naakuti kuulu kwako kakukulebya, kudyunkule akukusowa. . . . Kuti liso lyako kalikulebya, linonkole akulisowa.’ (Mt. 18:8, 9) Jesu taakali kwaamba kuti tweelede kuchisa mibili yesu. Pesi wakali kutondeezya mbukuyandikana kuzigwisya chakufwambaana zintu zikonzya kutulebya. Kujana twaabelesya biyeni malayilile aaya mumakani aaponogilafu?

Kuti wabona ponogilafu kutayeeyeli, utayeeyi kuti, ‘Tayikoondipambanisya pe.’ Langa kumbi chakufwambaana. Zima TV mpawaawo. Zima kkompiyuta naakuti fooni chakufwambaana. Yeeya zimwi zintu zisalala. Kuchita oobo kulakugwasya kuti uzunde mizeezo iitali kabotu akuti itakweendelezyi pe.

Weelede kuchita biyeni kuti kakuli wakaleka kweebela ponogilafu pesi kuchisikilwa aamizeezo iitali kabotu? Zifanikisyo zyaponogilafu naakuti mizeezo iitali kabotu, zilakonzya kukkala kwachiindi chilamfu mumizeezo yamuntu. Chimwi chiindi, zilakonzya kukusikila nikuba kulyiibide. Kuti mizeezo eeyi yakusikila, ilakonzya kupa kuti uchite zintu zitali kabotu mbuuli kusaanisya zizo zyakoonana. Kkala kulibambilide kulwana mizeezo iitali kabotu kuti yakusikila kulyiibide.

Kanza kuti nzuyeeya anzuchita kazyeendelana akuyanda kwaLeza. Chita mbuuli mwaapostolo Pawulu wakali ‘kudinkawula mubili wakwe akuuyendelezya mbuuli muzike.’ (1 Kor. 9:27) Utazumizyi mizeezo iitali kabotu kuti ikuchite muzike. Bbayibbele lyaamba kuti: “Amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.” (Rom. 12:2) Utalubi kuti: Unoobotelwa kuti wachita zintu ziyandwa aaLeza pesi tukoobotelwa pe kuti kuchita zintu zipa kuti ubisye.

Yezya kuyeeya amwi mavesi aamuBbayibbele. Mpawo kuti wasikilwa mizeezo iitali kabotu, yeeya magwalo aayo. Magwalo aali mbuuli Intembauzyo 119:37; Isaya 52:11; Matayo 5:28; Baefeso 5:3; Bakolose 3:5; 1 Batesalonika 4:4-8, ayookugwasya kuti mizeezo yako yeendelane aamaboneno aaJehova aali atala aponogilafu akuti uchite nzyayanda.

Weelede kuchitaanzi kuti kulikukachilwa kutantamuka kulanga naakuti kuyeeya zintu zyeetela mizeezo yakoonana? Tobelezya mikondo yaJesu, Chikozyano chesu. (1 Pet. 2:21) Jesu naakazwa akubbabbatizigwa, Saatani wakamusunka kwaziindi zyiingi. Jesu wakachita biyeni? Wakayinkilila kunembo kamukazya. Wakabelesya magwalo naakali kusandula Saatani chiindi naakali kumusunka. Wakati: “Kozwa aawa Saatani!” mpawo Saatani wakamusiya. Mbuuli Jesu mbaakataleka kukazya Dyabbulosi, anduwe toyelede kuleka pe. (Mt. 4:1-11) Saatani anyika yakwe tabakaleki pe kupa kuti mizeezo yako izule zintu zyakutalilemeka pesi utaleki pe kwiilwana. Ulakonzya kwiizunda mizeezo yakuyanda kweebela ponogilafu. Jehova uyookugwasya kuti umuzunde sinkondonyokwe.

Syoma Jehova amoyo woonse kwiinda mukukomba. Pawulu wakati: “Amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.” (Flp. 4:6, 7) Luumuno lwaLeza lulatulemununa nitulwana zintu zipa kuti tubisye. Kuti waswena aafwiifwi aJehova anguwe ‘ulaswena kulinduwe.’—Jak. 4:8.

Nzila mpati iikonzya kukukwabilila kuzintu zikonzya kupa kuti ubisye, nkuba mweenzinyina waSinguzuzyoonse. Jesu wakati: “Mweendelezi wanyika [Saatani] ulaboola, lino tajisi nguzu zyakundizunda.” (Joh. 14:30) Nkamboonzi Jesu naakali aachoonzyo mumajwi aaya? Nkaambo chimwi chiindi wakaambide kuti: “Oyo wakandituma ulaandime; kunyina naakandilekelezya nkaambo lyoonse ndicita zimukkomanisya.” (Joh. 8:29) Kuti wabeleka changuzu kuchita zintu zibotezya Jehova muzintu zyoonse, takakulekelezyi pe. Tantamuka kakole kaponogilafu alubo Saatani takakuchi pe.