TAIM lain Israel i redi long brukim Wara Jordan bilong i go long graun God i promis long givim ol, sampela visita i kam kamap. Ol dispela visita em ol meri bilong narapela kantri, na ol i bin invaitim ol man Israel long i go long wanpela bikpela kaikai. Em sans bilong ol man Israel long kisim amamas. Ol bai bungim ol nupela pren, danis, na kisim naispela kaikai. Ol kastam na pasin bilong ol dispela meri i no stret wantaim Lo em God i givim long lain Israel, tasol ating sampela man Israel i tingting olsem: ‘Mipela bai orait. Mipela i no inap pundaun.’

 Wanem samting i kamap? Baibel i tok: “Ol man bilong Israel i stat long mekim pasin pamuk wantaim ol meri Moap.” Ol dispela meri i laik bai ol man Israel i lotuim ol giaman god. Ol man Israel i pundaun long dispela pasin! Olsem na “Jehova i belhat long ol Israel.”—Nam. 25:1-3.

Lain Israel i brukim 2-pela Lo Bilong God: Ol i brukim skru long ol imis, na ol i mekim pasin pamuk. Planti tausen manmeri i dai bikos ol i sakim tok bilong God. (Kis. 20:4, 5, 14; Lo 13:6-9) Wai na dispela em bikpela rong? Wanpela risen em olsem, ol i stap klostu tru long Graun Bilong Promis, na sapos ol i bihainim Lo Bilong God, ol inap brukim Wara Jordan na kisim dispela graun.—Nam. 25:5, 9.

Aposel Pol i tok: “Ol dispela samting i painim ol i stap olsem piksa ol man i ken lukim. Na ol man i bin raitim ol dispela stori bilong givim tok lukaut long yumi husat i stap nau long pinis bilong dispela taim.” (1 Kor. 10:7-11) Satan i amamas tru olsem sampela lain Israel i mekim bikpela rong na ol i no go insait long Graun Bilong Promis. Yumi mas tingim gut tok lukaut i stap long stori bilong ol, na yumi mas save olsem Satan i laik tru long pasim yumi long go insait long nupela taim!

Satan i laik trapim ol Kristen long nau, na em i yusim ol trap em i save gut long en, na ol dispela trap i bin pundaunim planti manmeri long bipo. Em i yusim trap bilong pasin pamuk long pundaunim lain Israel. Long nau tu, pasin pamuk i stap yet olsem trap nogut bilong Satan. Wanpela rot bilong Satan long yusim dispela trap em long rot bilong ponografi.

Long nau, ol man inap lukim ponografi long pasin hait na ol narapela i no inap save. Long bipo, sapos man i laik lukim ponografi, em i save go long haus piksa long watsim ol muvi i soim man na meri i slip wantaim, o em i save go long ol stua i salim ol buk i gat ol piksa o stori bilong ol manmeri i mekim pasin sem. Planti manmeri i abrusim ol dispela hap bikos ol i sem long ol narapela i lukim ol. Tasol long nau, man inap stap long ples wok o stap insait long kar na yusim Intenet long lukim ponografi. Long planti kantri, man o meri inap stap tasol long haus na lukim ponografi.

Ol man inap lukim ponografi long ol narapela rot tu. Ol inap yusim mobail fon. Ol inap wokabaut long strit o sindaun long bas o tren na lukim ol piksa nogut long mobail fon o teblet.

Em isi tru long man inap lukim ponografi na ol narapela i no inap save, olsem na planti moa manmeri long nau i pundaun long dispela trap. Marit bilong planti manmeri i bagarap, ol i bel hevi long ol yet, na maus bilong bel i kotim ol. Na tu, ol inap bagarapim pasin bilong ol long pas gut wantaim God. Dispela i soim klia olsem hevi i save painim man i lukim ponografi. Planti man i lukim ponografi na dispela i bagarapim tru bel na tingting bilong ol. Maski ol i stop long lukim ponografi, bel na tingting bai wok yet long kotim ol maski planti yia i lus pinis.

Jehova inap lukautim na helpim yumi long abrusim dispela trap bilong Satan. Sapos yumi laik bai Jehova i lukautim yumi, orait yumi mas “bihainim tok bilong [em] long olgeta samting”—ol man Israel i no bin mekim olsem. (Kis. 19:5) God i heitim tru ponografi. Wai na yumi tok olsem?

Tingim: Olgeta lo God i givim long lain Israel i narapela kain tru long ol lo bilong ol narapela kantri. Lo Bilong God i olsem wol na i banisim lain Israel long ol pasin nogut bilong ol manmeri bilong ol narapela kantri. (Lo 4:6-8) Ol dispela lo i kamapim klia olsem: Jehova i heitim pasin pamuk.

Jehova i kolim ol pasin doti bilong ol kantri i stap klostu, na bihain em i tokim lain Israel:  “Yupela i no ken bihainim pasin bilong ol manmeri long graun bilong Kenan, em ples mi bai bringim yupela i go long en. . . . Graun bilong ol i kamap doti, na bai mi mekim save long ol manmeri bilong dispela ples long pasin nogut bilong ol.” God bilong lain Israel em i holi, olsem na long ai bilong em, pasin bilong lain Kenan i doti tru, olsem na graun bilong ol tu i kamap doti.—Wkp. 18:3, 25.

Jehova i givim strafe long lain Kenan, tasol ol narapela lain i bihainim yet pasin pamuk. Winim 1,500 yia bihain long taim bilong lain Israel, Pol i tok ol Kristen long taim bilong em i stap namel long ol lain em “ol i no save sem moa long pasin ol i mekim.” Tru tru, “long laik bilong ol yet ol i go insait tru long pasin bikhet na i no sem, na ol i mekim olgeta kain pasin i no klin wantaim gridi pasin.” (Efe. 4:17-19) Long nau tu, planti manmeri i mekim pasin pamuk, tasol ol i no sem. Ol man i bihainim lotu i tru, ol i no ken tru lukluk long ol piksa bilong pasin sem na pasin doti bilong dispela graun.

Taim ol man i lukim ponografi, dispela i soim olsem ol i no rispektim God. God i wokim yumi olsem em yet na em i inapim yumi wantaim maus bilong bel. God i putim ol stretpela lo bilong stiaim ol manmeri long sait bilong maritpasin. Maritpasin em presen bilong kamapim amamas namel long tupela marit, na tu, em gutpela samting bilong lukautim helt bilong ol. (Stt. 1:26-28; Prov. 5:18, 19) Tasol olsem wanem long ol lain husat i lukim o wokim ol piksa na muvi bilong ponografi? Ol i givim baksait olgeta long ol stretpela lo bilong God. Ol manmeri husat i laikim ol piksa na muvi bilong ponografi, ol i no rispektim Jehova. God bai mekim kot long ol lain husat i sakim ol lo bilong em na wokim o laikim ol piksa na muvi bilong ponografi.—Rom 1:24-27.

Olsem wanem long ol manmeri em long laik bilong ol yet ol i ritim o watsim ponografi? Sampela inap ting ponografi i no inap kamapim hevi. Tasol ol i sapotim ol lain husat i sakim ol lo bilong Jehova. Ating ol i no tingting long mekim olsem taim ol i stat long lukim ponografi. Baibel i soim klia olsem ol manmeri bilong God i mas heitim tru ponografi. Baibel i tok: “Yupela ol manmeri i save laikim Jehova, yupela i mas heitim tru pasin nogut.”—Sng. 97:10.

 Em tru olsem sampela taim ol man inap pilim hatwok long sakim ponografi. Yumi sinman, olsem na yumi mas pait strong long daunim ol laik nogut bilong yumi. Bel inap kirapim yumi long kalapim lo bilong God. (Jer. 17:9) Tasol planti manmeri i bin daunim tru ol laik nogut bilong ol na ol i bihainim pasin Kristen. Yu tu inap daunim laik nogut bilong lukim ponografi. Tok Bilong God inap helpim yu long sakim dispela trap bilong Satan.

Olsem yumi stori pinis, planti man Israel i larim laik nogut bilong bodi i stiaim ol na ol i bagarap. Wankain samting inap kamap long nau. Jems em hap brata bilong Jisas na em i tok: “Laik bilong bel bilong olgeta man wan wan . . . i save giamanim ol na pulim ol. Na taim dispela laik i stap long bel i kamap bikpela, em i save kamapim sin.” (Jems 1:14, 15) Sapos man i larim ol laik nogut i kamap long bel bilong em, dispela inap kirapim em long mekim sin. Olsem na yumi mas rausim ol laik nogut—yumi no ken tingting oltaim long en.

Sapos yu luksave olsem yu wok long tingting oltaim long ol pasin doti, orait yu mas rausim kwik ol dispela tingting. Jisas i tok: “Sapos han o lek bilong yu i mekim yu pundaun, orait katim na tromoi i go. . . . Na sapos ai bilong yu i mekim yu pundaun, orait kamautim na tromoi i go.” (Mat. 18:8, 9) Tok bilong Jisas i no makim olsem yumi mas katim han tru o kamautim ai tru bilong yumi. Tok bilong em i makim olsem yumi mas holim wanpela tingting tasol na rausim kwik ol samting we inap pundaunim yumi. Olsem wanem dispela tok kaunsel inap helpim yumi long sakim ponografi?

Sapos wanpela stori o piksa bilong ponografi i kamap, yu no ken tingting olsem, ‘Mi bai orait.’ Kwiktaim yu mas tanim na lukluk i go long narapela hap. Kwiktaim yu mas ofim TV, kompiuta, o mobail fon. Senisim tingting i go long ol samting i gutpela na klin. Taim yu mekim olsem, yu bai kontrolim tingting bilong yu na yu no inap larim ol laik nogut i kontrolim yu.

Olsem wanem sapos yu stop pinis long lukim ponografi, tasol sampela taim yu tingim bek ol samting yu lukim long bipo? Ol piksa  bilong ponografi inap i stap longpela taim long tingting bilong man. Yu inap tingim gen ol dispela piksa. Dispela inap kirapim yu long mekim pasin doti, olsem pilai long sem bilong yu yet. Yu mas tingim olsem dispela kain samting inap kamap, olsem na oltaim yu mas stap redi long daunim ol dispela tingting nogut.

Strongim tingting bilong yu long bihainim tingting bilong God na mekim ol samting em i laik bai yu mas mekim. Bihainim pasin bilong aposel Pol. Em i “paitim tru bodi bilong [em] yet na mekim bodi i stap wokboi bilong [em].” (1 Kor. 9:27) Yu no ken larim ol laik nogut i kontrolim yu. ‘Yu mas kisim nupela tingting na bai pasin bilong yu i senis. Olsem bai yu ken save tru long laik bilong God, em dispela laik em i gutpela, na em i orait, na i gutpela olgeta.’ (Rom 12:2) Tingim: Sapos yu bihainim ol laik nogut bilong bodi, amamas bilong yu bai stap sotpela taim, tasol sapos tingting na pasin bilong yu i stret wantaim laik bilong God, amamas bilong yu bai stap oltaim.

Traim long putim ol tok bilong ol skripsa long tingting. Taim tingting na laik nogut i kamap, yu mas fosim yu yet long tingim ol kain skripsa olsem Song 119:37; Aisaia 52:11; Matyu 5:28; Efesus 5:3; Kolosi 3:5; na 1 Tesalonaika 4:4-8, na dispela bai kirapim yu long bihainim tingting bilong Jehova na heitim ponografi.

Olsem wanem sapos sampela taim yu pilim olsem i hatwok tru long sakim pasin bilong lukim o tingim ol piksa bilong pasin pamuk? Yu mas bihainim gutpela eksampel bilong Jisas. (1 Pita 2:21) Bihain long em i baptais, Satan i traim em. Jisas i mekim wanem? Em i sakim ol traim. Em i yusim ol tok bilong Rait Holi long sakim ol traim bilong Satan. Jisas i tok: “Satan, yu klia!” na Satan i lusim em. Jisas i no givap long sakim Satan, olsem na yu tu i mas sakim Satan. (Mat. 4:1-11) Oltaim Satan na ol manmeri bilong em bai mekim ol samting bilong stiaim tingting bilong yu i go long pasin doti, tasol yu no ken givap long sakim ol dispela traim. Yu inap winim pait bilong sakim ponografi. Jehova inap helpim yu long daunim birua bilong yu, em Satan.

Beten oltaim long Jehova na askim em long helpim yu. Pol i tok: “Kamapim ol askim bilong yupela long God, . . . na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.” (Fili. 4:6, 7) God bai givim yu bel isi bambai yu inap sakim ol pasin nogut. Sapos yu go klostu long Jehova, “em bai kam klostu long [yu].”—Jems 4:8.

Sapos yumi strongim pasin pren bilong yumi wantaim King bilong heven na graun, yumi bai sakim Satan. Jisas i tok: “Hetman bilong dispela graun [Satan] i kam nau. Na em i no gat strong long bosim mi.” (Jon 14:30) Wai na Jisas i tok olsem? Em i bin tok: “Man i salim mi i kam, em i stap wantaim mi. Em i no lusim mi i stap wanpis, long wanem, oltaim mi save mekim ol samting em i laikim.” (Jon 8:29) Sapos yu mekim ol samting Jehova i orait long en, oltaim em bai sambai long yu. Yu mas abrusim trap bilong ponografi, na Satan bai no inap long kalabusim yu.