NÓTERU xáni kuerataxaptia paraksï israelitecha ríu Jordanini parhikuni paraksï niárani imani echeri jimbo enga Tata Diosï aiakuapka. Ma jurhiatikua, nanakechaksï máru niáraspti engaksï máteru paisi anapuepka paraksï pʼímarhiani tatakechani kʼuínchikuarhu ma. Jamberi para israelitecha ísï xarharapti komu kʼéri oportunidadi ma para jimbanhi amiguechani jatsiani, uarhani ka sési tʼireni. Nájkirukaksï ima pʼindekuecha ka na engaksï jámenga ima nanakecha, no terukuntenga Tata Diosïri Lei jingoni enga ireta Israelini íntskupka, jamberiksï máru tatakecha eratsipti eskaksï jingontku jámapiringa ka eskaksï no ma ambe úkuarhinchapiringa.

 Peru ¿ambe úkuarhispi? Bibliajtsïni arhisïndi eskaksï israelitecha uénaspka ísku jándikua ambe niátani Moabi anapu nanakecha jingoni. Nanakechaksï uékasïrendi eskaksï israelitecha diosï úkatechani kómarhiapiringa. Ka indeni ambeksïsï úpti. Jimbosï Jeoba ikiapti Israeli jingoni (Núm. 25:1-3).

Israelitechaksï tsimani ambe úspti enga Tata Diosïri Lei uandenga eskaksï no jatsispka para úni: diosï úkatechanksï kómarhiaspti ka ísku jándikua ambeksï niátaspti. Uánikuechaksï uarhispti engaksï ísï indeni ambe úpka (Éx. 20:4, 5, 14; Deut. 13: 6-9). ¿Andisï xáni no sési ambeepi ima ambe engaksï úpka? Jimboka nóteru xáni kuerataxapkia paraksï ríu Jordanini parhikuni. Engaksï i xáni uánikua kʼuiripuecha kumpliripiringa Tata Diosïri Leini, no ióni jimboksï parhikupirindia ríuni ka niáranksï Echerirhu engaksï Aiaminhapka (Núm. 25:5, 9).

Enga apostuli Pablu indeni ambe miántapka, arini ambe karaspti: “Ini ambeksï úkuarhinchaspti para ma ejemplu, ka karakata jarhasti parajtsïni arhistachini juchantsïni engachi andajkuarhika irekani jarhani ini últimu tiempuechani jimbo” (1 Kor. 10:7-11). Ísïsti, Noambakiti kánikua tsípispti engaksï israelitecha kʼéri pekadu úpka ka indeni ambe jimboksï no úni inchani Echerirhu engaksï Aiaminhapka. Jatsiskachi para jorhenguarhini ambe ma imeri ambe engaksï israelitecha no sési úpka, jimbokachi mítetixaka eska Noambakiti tsípepiringa engachi no niárapiringa jimbanhi parhakpinirhu jarhani enga Tata Diosï aiatspika.

Para úni eskaksï kristianuecha no sési ambe niátaaka, Noambakiti imani ambe úrasïndi enga sési mítika ka enga úrakia uánikua kʼuiripuechani jingoni. Eskachi na exekia, úspti eskaksï israelitecha ísku jándikua ambe niátapiringa. Iásï, ísku jándikua ambe seguirixati trampa máeni. ¿Ambe úpirini úni eskachi niárapiringa indeni ambe úni? Ma ambe enga meru marhuakujka Noambakitini, jindesti pornografia.

Ini jurhiatikuecha jimbo, sáno méntkisï kʼuiripu úsïndi pornografia ambe exeni ka no nema kuenta íntskukuarhini. Ióntki, enga nema uénkenga indeni ambe exeni, jatsisïrendi para sinerhu nirani exeni pelikula ma o jima nirani nani engaksï rebistecha o libruecha ambe íntspikuarhinhenga pornofrafieri ambe. Jamberiksï uánikuecha no nirendi jimesïsï, jimbokaksï kʼuratsesïrenga eskaksï exenhapiringa jimesïsï jámani jarhani. Peru iásï, ne uéjki enga kámajka Interneti, úsïndi pornografia ambe exeni imeri ánchikuarhitarhu o asta karrurhu ma enga no xanhatatanhani jarhajka. Ka uánikua paisicha jimbo, tataka ka nanakechaksï úsïndi indeni ambe exeni, nájkirukaksï no uéraaka kʼumanchikuarhu.

Peru no inde ambejkuesti. Sánderu fásilisti indeni ambe exeni tabletarhu o selularirhu. kʼuiripu ma xanharani jarhasïndi, autobusi o trenirhu nirani jarhani ka ísku jándikueri ambe exeni jarhani imeri tabletarhu o selularirhu.

Komu iásï sánderu fásilikia pornografia ambe exeni ka máteruechaksï no mítini, i trampa no méni xáni no sési útspixapti. Ini ambe jimbo, uánikua kʼuiripuechaksï xéresïndi imecheri temungurhirikuani, nóteruksï xénchakuarhinia ka no sésiksï pʼikuarherani. Ka sánderu no sési ambe, nóteruksï jatsisïndia ambakiti pájperakua ma Jeobani jingoni. Uákachi seguru jarhani eska kánikua no sési úkusïnga imani enga pornografia ambe exejka ka uánikua xanhari niárasïndi kánikua no sési pʼikuastani. Jamberi sánhani arhiati nóteru xáni no sési pʼikuarherania, peru jamberi no méni niáraati mirikurhini imani ambe enga exeka.

Ju je miáni eskajtsïni Jeoba jarhuatasïnga parachi kuájchakukuarhini Noambakitiri trampa jingoni. Engachi uéjka eskajtsïni kuájchakuaka, jatsiskachi para imani ambe úni engaksï israelitecha no úpka: meru imani ambe úni enga Jeoba arhiapka (Éx. 19:5). Jatsiskachi para kurhanguni eska Jeoba kurhunhisïnga pornografiani. ¿Andichisï ísï uandajki?

Ju je arini ambe eratsini: nóksï jarhaspti imaeni járhati leicha enga Tata Diosï israelitechani íntsaapka imani jurhiatikuecha jimbo. Ísïsptiksï komueska barda ma enga kuájchakuauenga israelitechani paraksï no kúnguarhini iretarhu anapuecha jingoni enga no iauani japka ka paraksï no ikichakueni jásï ambe úni (Deut. 4:6-8). I leichaksï xarhatasïrendi  ambe ma enga meru jukaparhakueka: eska Jeoba kurhunhisïnga ísku jándikua ambe.

Enga uandapkia na engaksï xáni no sési jásï ambe uénga iretecha engaksï Israeli no iauani japka, Jeoba arhiaspti israelitechani: “Nójtsï jatsiska para [...] imani ambe úni engaksï Kanaani anapuecha újka, jima engaksïni ji páni jaka. [...] Echeri no sési jáxesti ka kastigariauaka engaksï ísï no sési ambe úka”. Para Israeliri Tata Diosï pímbinhasï, na engaksï irekani japka Kanaani anapuecha xáni ikichakueni jásï ambespti enga uandapka eska imani echeri jimbo engaksï irekani japka, no sési jándispka (Lev. 18:3, 25).

Nájkiruka Jeoba kastigariuapka Kanaani anapuechani, ísku jándikua ambe útasï seguirixapti jarhani. Jukari mili kinientu uéxurhini ísï tátsekua, Pablu uandaspti eskaksï iretarhu anapuecha engaksï irekani japka kristianuecha, kʼuratsekuaksï tsitaspkia. Astaksï jurajkutakuarhispti “paraksï ísku jándi úkuarhini, ka únksï mámaru ambe enga ikichakueni jásïka” (Efes. 4:17-19). Iásïjtuksï uánikua kʼuiripuecha no sáni kʼuratsesïndi ísku jándikua ambe niátani. Ambakiti kristianuechaksï jatsisti para jánguarhintani para no exeni ísku jándikueri ambe engaksï parhakpini anapuecha niátajka.

Pornografia, ambe máesti enga méntku no sáni xarhatakujka janhanharhikua Tata Diosïni. Imajtsïni ísï kueraasti eska ima na jásïka ka ústi eskachi eratsiaka parachi ambakiti eratsikua ma jatsini. Jánhaskakua jingoni, íntspiasti leichani relasioni seksualiri ambe ka ústi indeni ambe para tataka ka nanaka ma engaksï sibilarikuaritini jaka (Gén. 1:26-28; Prov. 5:18, 19). Peru, imecha engaksï újka eska pornografia ambe exenhaaka, nóksï jiókuarhiasïndi Tata Diosïri juramukuechani ka nóksï janhanharhisïndi. Ísï jimbo, Jeoba kurhakuantauati kuenta indeni kʼuiripuechani (Rom. 1:24-27).

¿Ka imani kʼuiripuecha jingonia engaksï uékantku exejka o arhintani pornografia? Jamberiksï máru uandajti eska solu tsípikuarhita máeska enga no no sési útspijka. Peruksï imecha jingoni úkuarhini jarhasïndi engaksï no janhanharhiajka Tata Diosïri juramukuechani. Jamberiksï no indeni ambe uékendi úni engaksï uénapka pornografia ambe exeni. Peru imecha engaksï Tata Diosï Jurhimbitini marhuakujka, sésiksï kurhangusïndi eskaksï jatsiska para kurhunhini pornografiani. Bibliajtsïni arhisïndi: “Oh, tʼu engari xénchajka Jeobani, kurhunhi indeni ambe enga no sési jaka” (Sal. 97:10).

 Asta imecha engaksï no uéjka exeni pornografia ambe, kuenta íntskukuarhisïndiksï eska úkua jukasïnga no exeni indeni ambe. Komuchi no perfektueka, jamberichi jánguarhintani jaka orhepani uérani parachi no ikichakueni jásï ambe úni. Ístuchi úpiringa eratsini eska no ma ambe úkuarhiaka engachi no úska ambe engajtsïni Tata Diosï juramuchijka (Jer. 17:9). Peru uánikua engaksï iásï kristianuekia, ústiksï orhepani uérani. Míteni ini ambe, uáti jarhuataani imechani engaksï jánguarhintani jaka paraksï nóteru exenia pornografia ambe. Ju je exeni nénajtsïni uá jarhuatani Tata Diosïri Karakata parachi no úni ambe enga Noambakiti uéjka.

Eskachi na exeka uénani jámani, uánikua israelitechaksï jurajkuspti eska no sési jásï ambe tsitini, úpiringa eskaksï no sési nitamakuarhipiringa. Ka májkueni úpirindi úkuarhini iásï. Santiagu enga Jesusiri mediu ermanuepka, uandaspti ini peligrueri ambe, eska kʼuiripuni ma, imeri mismu eratsikuechaksï pastamasïnga ka antsitanksï, “jimajkani no sési járhati eratsikuecha jindesti engaksï pekadu úrpijka” (Sant. 1:14, 15). Enga nema jurajkujka eska imeri mintsitarhu uénaaka tsitini no sési jásï ambe, sánderu segurusïndi eska niáraaka pekadu ambe úni. Ísï jimbo, ju je no eratsini jarhani ísku jándikueri ambe, ju je méntku kénditani indeni ambe juchari eratsikuarhu.

Engachi kuenta íntskukuarhiska eskachi méntku eratsini jarhasïnga imani ambe enga no sési jaka, ju je jirejiresï úni ambe ma. Jesusi uandaspti: “Enga chíti jájki o chíti jantsiri jindeka engakini pekadu úrajka, kachujkuchka o kachunduni ka kʼuanikuni, [...] enga chíti éskuakini pekadu úrajka, pʼitanharhichka ka kʼuanikuni” (Mat. 18:8, 9). Ixú Jesusi no arhikuekaxapti eskachi meru jatsiska para pʼirani indeni ambe. Sánderu sési, arhikuekaxapti eska meru uétarhisïnga jirejiresï kénditani imani ambe engajtsïni pekadu ambe úrajka. ¿Nénachi uá úrani ini konsejuni para no exeni pornografia ambe?

Ju je eranhaskani eska nani mátirku xarharasïnga pornografieri ambe. Nóchi jatsiska para eratsini eskachi no ma ambe úkuarhinchaaka. Ju je jirejiresï támisï eraani. Ju je sóntku pátani teleni, komputadorani, selularini o tabletani. Ju je sési jásï ambe eratsini. Ini ambe úni, jarhuataatijtsïni parachi no no sési jásï ambe eratsini.

Nema enga pornografieri ambe exejka ka eratsini, uáti ióndani mirikurhini ka mátirku miántani. Enga inde ambe úkuarhijka, jamberi kʼuiripu uéjti masturbarikuarhini. Enga cha nóteru exejkia pornografia, perujtsï ménisï niárani miántani imajeni ma, jarhuataatiksïni miáni jarhani eskajtsï niáraka indeni ambe úkuarhinchani ka listujtsï jarhani para kénditani indeni ikichakueni jásï ambe.

Sánderu tsiti je eratsini ka ísï jámani eska na terukuntajka imani ambe jingoni enga Tata Diosï uéjka. Ísï ú je eska apostuli Pablu enga uandapka: “Ji kastigarixaka juchiti kuerpuni ka úni eskarini janhanharhiaka” (1 Kor. 9:27). Asï jurajku je eskajtsï méntku ikichakueni jásï ambe eratsini jauaka. Ísï ú je eska na arhijka Roma 12:2: “Ménderueni jáma je, jimboka chári eratsikuecha jimbanheranhantaskia, parajtsï ísï úni jánhaskani ambe enga jindeka enga Diosï uékajka eskajsï uáka enga ambakitiika ka enga jeiapanhinhantajka ka enga no ma ambe jimbo kueratajka jurhimbikueni”. Asï mirikurhi je eska eratsini ka imani ambe úni enga Tata Diosï uéjka, sánderujtsï sési pʼikuarheraaka ka eska sánderu tsitini ikichakueni jásï ambe niátani.

Jánguarhintsï je jorhenguarhiani máru Bibliaeri karakatechani engaksïni jarhuataaka ísï exeni pornografieri ambe eska Jeoba na exejka ka kurhanguni ambe enga ima uéjka eskajtsï cha uáka. Engajtsï ísï úska, jiáni engajtsï niáraaka imani ambe eratsini enga no sési jaka, jatsiskajtsï para meru eratsiani imani karakatechani. Máru karakatechaksï ari jindesti: Salmo 119:37; Isaías 52:11; Mateu 5:28; Efesu 5:3; Kolosasi 3:5; ka 1 Tesalonika 4:4-8.

¿Ka ambejtsï uá engajtsï ménisï meru kánikua antsitakuarhini jauaka para ísku jándikua ambe exeni o eratsini? Májkueni ú je eska ima engajtsïni jatsikuchika ejemplu, Jesusi (1 Ped. 2:21). Enga na itsï atakuarhipkia, Noambakiti uánikua xanhari tsʼéjkuspti. ¿Ambe úspi Jesusi? Seguirixapti orhepani uérani. Uinhamu anhaxurhikuspti Noambakitini, someni úrapariani máru karakatechani. Arhispti: “Késtakuchirini Satanasi” ka Noambakiti kéndikukuspti. Májkueni eska Jesusi na uinhamu anhaxurhikupka Noambakitini, chajtutsï jatsiska para ísï úni (Mat. 4:1-11). Noambakiti ka imeri parhakpini seguirinksï jauati uékani eskachi ikichakueni jásï ambe eratsiaka, peru ju je no kuatantani. Uákachi orhepani uérani parachi no jámani exeni pornografia ambe. Jeobaeri jarhuajperata jingoni, uákachi andani juchari ikiatspitini.

Ju je no jurajkuni kómarhini Jeobani ka kurhakuni eskajtsïni jarhuataaka. Pablu uandaspti: “Asï pendienti jatsi je ni ma ambe jimbo, sino Diosïni kómarhi je, ka kurhakuntsï ambe engajtsï uétarhinchajka, diosmeiamukua arhiparini Diosïni iámindu ambe jimbo, ka ísï Diosïri pínandikua enga no nema újka jánhaskani, kuájpiauati chári mintsitechani ka chári eratsikuani Kristu Jesusini jimbo” (Filip. 4:6, 7). Jeobajtsïni pínandikua íntskuati parajtsïni jarhuatani no úni imani ambe enga no sési jaka. Engachi andarhieraska Tata Diosïni, imajtujtsïni andarhieraati (Sant. 4:8).

Ambe engajtsïni uáka sánderu sési kuájchakuni inderi ambe, jindesti eskachi no jarhareaka imani enga Juramutika iámindu amberi. Jesusi ísï uandaspti Noambakitiri ambe: ‘Jurhaxati i parhakpini anapu juramuti, ka ima no ma ambe jatsisti jíndeni jingoni’ (Juanu 14:30). ¿Andisï xáni seguru japi eska ísïspka? Ma xanhari, uandaspti: “Jimboka ima engarini axaka, jindeni jingoni jarhaska, ka Diosï Táti nórini méni jandiajku jurajkusti, jimbokani ji siemprini imani ambesïni újka enga ima jaiapanhintajka” (Juanu 8:29). Engachi juchajtu imani ambe úska enga Jeoba jaiapanhintajka, juchantsïntujtsïni no jurajkuati. Ju je méntku no jiókuarhini pornografieri ambe ka Noambakitijtsïni no uáti andani.