I TE taimi ne fakatokatoka ei te kau Isalaelu ke olo atu ki te suā feitu o te Vaitafe ko te Iolitana ke ulu atu ki loto i te fenua ne folafola atu ne te Atua ki a latou, ne oko atu ne tino o asi ki a latou. A tino asiasi konei ne fāfine mai fenua fakaa‵tea kolā ne o‵mai o ‵kami atu a tāgata ki se ‵kaiga. E foliga mai me i te mea tenei se avanoaga mauagatā. Ke fai ne taugasoa ‵fou, ke saka‵saka, kae ‵kai ki meakai ‵gali kāti se mea gali ‵ki. E ui eiloa a faifaiga mo amioga a fāfine konā e se ko mea kolā ne fakatonu atu te Atua ke fai ne Isalaelu, kāti ne mafau‵fau aka a nisi tāgata Isalaelu penei: ‘E iloa ne matou te mea e ‵tau o fai. Ka fakaeteete matou.’

 Se a te mea ne tupu? E fai mai te tala i te Tusi Tapu penei: “Ne kamata o fai ne tino a amioga fakatauavaga sē ‵tau mo fāfine Moapi.” A te tonuga loa, ne ma‵nako a fāfine konā ke tapuaki a tāgata Isalaelu ki atua ‵se. Kae tenā loa te mea ne fai ne latou! E maina tatou me “ne kaitaua malosi a Ieova ki Isalaelu.”—Nume. 25:1-3.

Ne ofa ne tino Isalaelu konā a te Tulafono a te Atua i auala e lua: Ne ifo latou ki tupua, kae fai ne latou a amioga fakatauavaga sē ‵tau. E lau i afe a tino ne ‵mate ona ko te lotou sē faka‵logo. (Eso. 20:4, 5, 14; Teu. 13:6-9) Kaia ne fakafanoanoa malosi ei te lotou mea ne fai? Te taimi. Moi ne sē ofa ne tāgata a te Tulafono a te Atua, penei ko oti ne olo atu te fia afe tino Isalaelu konā ki te suā feitu o te Iolitana ki loto i te Fenua o te Folafolaga.—Nume. 25:5, 9.

E uiga ki mea konā ne ‵tupu, ne tusi mai te apositolo ko Paulo: “Ne ‵tupu a mea konei ki a latou ke fai e pelā me ne fakaakoakoga, kae ne tusi ki lalo mo fai se fakailoaga ke fakaeteete tatou kolā ko ‵nofo i taimi o te gataga o te olaga tenei.” (1 Koli. 10:7-11) E mautinoa me ne fiafia malosi a Satani me ne ‵to atu a nisi tino Isalaelu ki te agasala matagā tenā kae ko se mafai o ulu atu ki loto i te Fenua o te Folafolaga. Se mea poto eiloa ke masaua ne tatou te mea ‵se tenā, me ka fiafia malosi eiloa a Satani māfai ko se ‵to atu tatou ki loto i te lalolagi fou a te Atua!

E taumafai Satani ke ‵po aka ne ia a Kelisiano, mai te fakaaogaga o togafiti kolā e iloa ‵lei ne ia kae ne mafai o ‵po aka i ei a tino e tokouke. E pelā mo te mea ne fakaasi mai i te kamataga e uiga ki tino Isalaelu, ne fakaaoga ne ia a amioga fakatauavaga sē ‵tau. I aso nei, koi fai eiloa a amioga fakatauavaga e pelā me se matasele fakamataku. A te auala magoi e tasi ko ata ma‵sei.

I aso nei, e mafai fua o onoono se tino ki ata ma‵sei kae seiloa ne nisi tino. I se fia sefulu tausaga ko ‵teka, a te tino telā e fia onoono ki ata ma‵sei e ‵tau o fano ki se fale tamunei ke onoono ki ei io me ki fale ‵togi tusi o ‵togi a tusi kolā e isi ne ata ma‵sei i ei. E se fia olo eiloa a tino e tokouke ki koga konā me ‵mā latou ma lavea atu i loto io me i tafa o koga konā. Kae nei la, so se tino e fano ki te Itaneti e mafai o onoono ki ata ma‵sei i te galuega io me i loto i tena motoka. Kae i fenua e uke e mafai o onoono se tagata io me se fafine ki ata ma‵sei i loto eiloa i tena fale.

E se tenā fua. Ko faigofie foki ke onoono ki ata ma‵sei i luga i selefoni. I te taimi e sa‵sale ei a tino i te auala io me olo i luga i pasi io me ko tuleni, e mafai fua o onoono latou ki ata ma‵sei i luga i olotou selefoni konā.

Ona ko te faigofie ke onoono ki ata ma‵sei e aunoa mo te iloa ne tino, ko lasi atu te fakamaseiga e fai ne ata ma‵sei i aso nei i lō aso mua. A tino e tokouke kolā e onoono ki ata ma‵sei ko oti ne ‵tala olotou avaga, fakaseaoga te lotou tulaga ‵malu, kae fakamasei olotou loto lagona. E sili atu i te masei, ko oti ne fakamasei ne latou te lotou va fakataugasoa mo te Atua. E tonu eiloa koe ma fai mai me lasi te fakamaseiga e fai ne ata ma‵sei ki tino kolā e onoono ki ei. E pokotia masei a tino ona ko ata ma‵sei kae mafai o leva ‵ki te taimi e pokotia ei latou. I nisi taimi e se mafai o faka‵lei katoatoa ne se tino a pokotiaga ma‵sei konā.

E ‵tau o iloa ne tatou, me mafai ne Ieova o puipui tatou mai te matasele a Satani tenei. Kafai e ma‵nako tatou ki te puipuiga a Ieova, e ‵tau o fai ne tatou te mea telā ne fakata‵mala a tino Isalaelu mua o fai—“faka‵logo faka‵lei” ki a ia. (Eso. 19:5) E ‵tau o iloa ne tatou me takalialia eiloa te Atua ki ata ma‵sei. Kaia e fai atu ei tatou penā?

Mafau‵fau ki te mea tenei: Ne tu ‵kese eiloa a tulafono a te Atua ki te fenua o Isalaelu i te lalolagi i aso konā. E pelā me se ‵pui, ne ‵vae kea‵tea ei ne tulafono konā a tino Isalaelu mai tino i olotou tafa mo olotou amioga matagā. (Teu. 4:6-8) E fakaasi mai i tulafono konā se munatonu tāua: A Ieova e takalialia ki amioga fakatauavaga sē ‵tau.

 I te otiga ne laulau atu a amioga ma‵sei ne fai ne fenua i olotou tafa, ne fai atu a Ieova ki tino Isalaelu: “E se ‵tau mo koutou o fai a amioga e fai ne tino i te fenua ko Kanana, te koga ka aumai ne au koutou ki ei. . . . A te laukele ko se ‵ma, kae ka fakasala ne au te laukele ona ko olotou mea ‵se konā.” Ne fakatakalialia ‵ki eiloa ki te Atua tapu o Isalaelu a te olaga ne ola ei a tino Kanana, tenā ko se ‵ma kae ko lailai foki te laukele ne ‵nofo ei latou.—Levi. 18:3, 25.

Faitalia me ne fakasala ne Ieova a tino Kanana, ne tumau eiloa a nisi tino i te faiga o amioga fakatauavaga sē ‵tau. E sili atu i te 1,500 tausaga mai tua ifo, ne fakamatala mai ne Paulo a tino o fenua kolā ne ‵nofo ei a Kelisiano e pelā me ko “sē iloa ne latou o ‵ma.” A te tonuga loa, “ko tuku atu ne latou a latou eiloa ki amioga mata‵fatu mo te sē āva kae e fai foki ne latou a vaegā amioga lai‵lai katoa mo te kaimanako.” (Efe. 4:17-19) I aso nei foki, e tokouke a tino ko fai ne latou amioga matagā mo te mata‵fatu. E ‵tau mo tino tapuaki ‵tonu o fai te ‵toe mea e mafai ke mo a ma onoono ki faifaiga ma‵sei a tino i te lalolagi tenei.

Ata ma‵sei se fakaasiga o te sē āva ki te Atua. Ne faite ne ia a tino ki ana foliga mo mea e fiafia a ia ki ei, kae ne fai ne ia ke mafai o iloa ne tatou a te mea tonu mo te mea sē tonu. Se mea poto eiloa me ne fai ne te Atua ke isi se tapula ki te faiga o amioga fakatauavaga. Ne manako a ia ko taki tauavaga ke fia‵fia ki te faiga o amioga fakatauavaga. (Kene. 1:26-28; Faata. 5:18, 19) Kae ne a mea e fai ne tino kolā e faite io me fakamalosi ne latou te onoono ki ata ma‵sei? Ko fakaseaoga malosi eiloa ne latou a tulaga o te Atua i mea tau amioga. Ao, a tino kolā e fakamalosi ne latou te onoono ki ata ma‵sei ko fakamasiasi ne latou a Ieova. Ka fakamasino ne te Atua a tino kolā e manatu mā‵mā ki ana tulaga mai te faite mo te fakamalosi ne latou te onoono ki ata ma‵sei.—Loma 1:24-27.

Kae pefea la a tino kolā e ma‵nako o fai‵tau io me onoono ki ata ma‵sei? Nisi tino e mafau‵fau me e seai se mea e masei i ei. Kae ko ‵lago atu eiloa latou ki tino kolā e se āva ki tulaga o Ieova. Kāti e se tenei loa te mea ne fakamoe‵moe latou ki ei i te taimi ne kamata ei latou o onoono ki ata ma‵sei. Kae e manino ‵lei me i tino tapuaki ‵tonu a te Atua e ‵tau o takalia‵lia katoatoa ki ata ma‵sei. E fakamalosi mai te Tusi Tapu: “Koutou kolā e a‵lofa ki a Ieova, takalia‵lia ki te mea masei.”—Sala. 97:10.

 Ke oko ki tino kolā e se fia onoono eiloa ki ata ma‵sei e mafai o faigata ki a latou ke ‵kalo kea‵tea mai i ei. A tatou ne tino sē ‵lei katoatoa, kae kāti e ‵tau o taua atu ki te manakoga ke ‵kalo kea‵tea mai amioga fakatauavaga sē ‵ma. E se gata i ei, e mafai o fai ne ‵tou loto sē ‵lei katoatoa ke mafaufau me e sē se mea masei ke onoono ki ata ma‵sei. (Iele. 17:9) Kae e tokouke a tino ne manumalo i te taua tenā kae ko fai nei pelā me ne Kelisiano. Se fakamalosiga eiloa ke iloa atu te mea tenei māfai ko fepaki mo se tulaga penā. Onoono ki te auala e mafai o fesoasoani mai te Muna a te Atua ki a koe ke ‵kalo kea‵tea mai matasele a Satani ko te onoono ki ata ma‵sei.

E pelā mo mea ne sau‵tala ki ei muamua, ne talia ne tino Isalaelu e tokouke a manakoga ma‵sei ke ‵taki atu latou ki fakalavelave. E mafai foki o tupu se mea penā i aso nei. Ne fakamatala mai ne te āfa taina o Iesu a te mea fakamataku: “E tofotofogina a tino taki tokotasi mai . . . ana manakoga totino. Tela la, kafai ko faitama te manakoga, ko fanau mai i ei te agasala.” (Iako. 1:14, 15) Kafai ko sae aka se manakoga sē ‵lei i te loto o se tino, fakamuli loa ka fai ne te tino tenā se agasala. Tela la, e ‵tau o tapale kea‵tea ne tatou a mafaufauga ma‵sei mai ‵tou mafaufau, ke mo a ma mafaufau ki ei.

Kafai ko takitaki ‵se koe ne mafaufauga lai‵lai, gasue fakavave. Muna a Iesu: “Kafai ko tou lima io me ko tou vae e fakaagasala ne ia koe, ‵kati ke tō kae ‵pei kea‵tea. . . . Kafai foki ko tou mata e fakaagasala ne ia koe, ‵kape ke tō kae ‵pei kea‵tea.” (Mata. 18:8, 9) Ne seki fakauiga a Iesu ke katikati ne tatou ‵tou foitino. Ne fai ne ia se fakatusaga ke maina tatou i te manakoga ke tapale fakavave kea‵tea te mea telā e fai ne ia tatou ke agasala. E fakagalue pefea ne tatou a pati fakatonutonu konā e uiga ki ata ma‵sei?

Kafai ko ‵sae aka ne ata ma‵sei, ke mo a ma mafaufau koe penei, ‘E iloa ne au te mea e ‵tau o fai.’ Ke na kilo fakavave kea‵tea. Tamate fakavave te vitio. Tamate te komupiuta io me ko tau selefoni i te taimi eiloa tenā. Ke toe saga tonu atu ki se mea telā e ‵mā. A te faiga o te mea tenei ka fesoasoani atu ke pule koe ki ou mafaufauga i lō te talia ke pule koe ne ou manakoga ma‵sei.

Kae pefea la māfai ko manumalo koe i te onoono ki ata ma‵sei, kae koi foki‵foki mai faeloa ki tou mafaufau a ata kolā ne onoono koe ki ei muamua? A ata io me ko mafaufauga ma‵sei e mafai o ‵piki ki te mafaufau o se tino mō se taimi leva ‵ki. E mafai o ‵sae fakavave aka fua. Kafai ko tupu te mea tenā, e mafai o fakamalosi atu ki a koe ke fai se mea lailai, e pelā mo te fai tokotasi. Tela la, ke fakaeteete ma ‵sae aka a mafaufauga penā, kae ke toka koe o taua atu ki ei.

Ke na fakaiku aka ke mafaufau kae ke fai a mea kolā e manako te Atua ke fai ne koe. Ke fai pelā mo te apositolo ko Paulo, telā ne loto fiafia o “‵kini [tena] foitino kae takitaki atu e pelā me se pologa.” (1 Koli. 9:27) Ke mo a ma talia ne koe ke nofo pologa koe ki manakoga lai‵lai. “Ke ‵fuli otou mafaufau, ko te mea ke fakatalitonu aka ne [koe] me se a te loto o te Atua telā e gali, e logomalie, kae e ‵lei katoatoa.” (Loma 12:2) Masaua: A te mafaufau mo te faiga o mea e ‵tusa mo te loto o te Atua ka maua mai i ei te lotomalie katoatoa i lō te fakalogo fua ki manakoga agasala.

Taumafai o tauloto ne nai tusi fai‵tau mai te Tusi Tapu. Kafai ko ‵sae aka a mafaufauga sē ‵tonu i tou mafaufau, fai ke masaua ne koe a tusi fai‵tau konā. A tusi fai‵tau pelā mo te Salamo 119:37; Isaia 52:11; Mataio 5:28; Efeso 5:3; Kolose 3:5; mo te 1 Tesalonia 4:4-8 ka fesoasoani atu ki a koe ke fakafetaui ou mafaufauga mo te kilokiloga a Ieova ki ata ma‵sei mo te mea e manako a ia ke fai ne koe.

Kae pefea la māfai i nisi taimi ko se mafai loa o fa‵ki a te manakoga ke onoono io me mafaufau ki mea ma‵sei? Tautali fakapilipili atu ki te ‵tou Fakaakoakoga Sili, ko Iesu. (1 Pe. 2:21) I te otiga a Iesu ne papatiso, ne tofotofo faeloa a ia ne Satani. Ne a mea ne fai ne Iesu? Ne tumau a ia i te ‵teke atu ki ei. Mai te fakaaogaga o tusi fai‵tau kese‵kese, ne ‵teke atu a ia ki tofotofoga a Satani. Ana muna: “Fano kea‵tea e Satani!” ko Satani loa ko fano. E pelā eiloa mo Iesu telā ne seki ‵fiu eiloa i te taua atu ki te Tiapolo, e ‵tau foki koe o fai penā. (Mata. 4:1-11) Ka tumau eiloa a Satani mo tena lalolagi i te taumafai o faka‵fonu ‵tou mafaufau ki mafaufauga ma‵sei, kae ke mo a ma ‵fiu koe i te taua atu. E mafai o manumalo koe i te taua atu ki ata ma‵sei. Fakatasi mo te fesoasoani o Ieova, e mafai o fakatakavale ne koe tou fili.

Fakalagolago katoatoa ki a Ieova e auala i ‵talo. Muna a Paulo: “Ke tuku atu a mea katoa kolā e ma‵nako koutou ki ei ki te Atua . . . kae ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo te malosi o otou mafaufau e auala i a Keliso Iesu.” (Fili. 4:6, 7) Ka tuku mai ne te Atua a te filemu o te mafaufau ke mafai ne koe o ‵teke te agasala. Kafai e fakapilipili atu koe ki a Ieova, “ka fakapilipili mai a ia ki a [koe].”—Iako. 4:8.

A te ‵toe puipuiga ‵lei ki so se mea fakamataku ko te faiga ke pili mai ki a koe a te Pule o te iunivesi. Muna a Iesu: “Ko vau a te pule o te lalolagi [Satani], kae e seai sena pule i luga i a au.” (Ioa. 14:30) Kaia ne maua ei ne Iesu te vaegā loto talitonu tenei? Ne fakamatala mai a ia: “Te Atua telā ne uga mai ne ia au e fakatasi mai ki a au; e seki tuku tiaki ne ia au, me fai faeloa ne au a mea kolā e fiafia a ia ki ei.” (Ioa. 8:29) Kafai e fai ne koe a mea kolā e fiafia ki ei a Ieova, ka se tuku tiaki foki ne ia koe. ‵Kalo kea‵tea mai te matasele o ata ma‵sei, kae ka se pule atu a Satani ki luga i a koe.