TE ISRAELETIK nopol ya xkʼaxikix ta mukʼul jaʼ Jordán yuʼun ya x-ochik ta kʼinal te albilik yuʼun Jehová te ya yichʼike. Ta yorail-abi, ay kʼot antsetik ta yikʼel bael te israel-winiketik ta smulanel kʼin. Te winiketik laniwan snopik te maʼyuk bin-ora jich ya staikxane, te ya xjuʼ ya staxan yamigotakik, ya x-ajkʼotajik sok te ya smulanik lekil weʼelile. Te skostumbre sok te stalel te antsetik-abi, ya skontrain sba sok te Ley akʼbot te lum Israele. Pero ayniwan machʼatik la skuyik te maba ya staik wokol teme ya xbajtʼik sok te antsetike sok laniwan snopik te ya xjuʼ yuʼunik stsajtayel sbaike.

 Pero, ¿bin-nix kʼot ta pasel-a? Te Biblia jich ya yal: «Te Israel [...] hahch yicʼ yantsimbeyic te yantsil-nichʼnab moabetic». Te bin-nix ya skʼanik-a te antsetike, jaʼ te ya yichʼik ta mukʼ lotil diosetik te israeletike. Ta melel, jich kʼot ta pasel. Jich yuʼun, te Jehová ilin ta stojol te Israel (Núm. 25:1-3).

Kʼalal jich la spasik te israeletike, la skʼaxuntayik cheb mantaliletik yuʼun Dios te ayik ta Leye, melel la skejan sbaik ta stojol lotil diosetik sok yalik ta spasel mulil. Bayal mil lajik ta skaj te la skʼaxuntayik te mantale (Éx. 20:4, 5, 14; Deut. 13:6-9). Kʼax mel-oʼtantik sba te bin la spasike, melel jtebxanix ya skʼan ya smulanbeyik yutsil te lekil kuxlejalile. Te manchuk la skʼaxuntayik te Ley yuʼun Dios, solik kʼaxel ta mukʼul jaʼ Jordán te jichuke sok ochik ta Kʼinal te albil skʼoplal ya yichʼike (Núm. 25:5, 9).

Ta swenta te bin la spasik te israeletike, te Pablo jich la yal: «Hich cʼoht ta pasel scuenta ichʼo-qʼuehl [o, ejemplo kuʼuntik], soc hich tsʼihbabil hilel yuʼun ya stsitsotic hoʼotic te la stahotic te slajibal cʼahcʼale» (1 Cor. 10:7-11). Ta melel, kʼax bayal akʼbot stseʼelil yoʼtan te Satanás te la spasik tulan mulil te israeletik, melel jich ma ochik ta Kʼinal te albil skʼoplal ya yichʼike. Ayme bin ya skʼan ya jnoptik ta swenta te bin ma lek la spasik te israeletike, melel te Satanás yoʼtanuk te ma x-ochotik ta achʼ balumilal te yaloj Dios te ya yakʼbotike.

Swenta ya sloʼlay te j-abatetik yuʼun Dios te Satanase, ya stuuntes pejtsʼetik te ya snaʼ stuuntesel ta lek sok te bayal machʼatik sloʼlayoj-ae. Jich bitʼil lajelto kilbeltik, la sloʼlay te israeletik ta spasel antsiwej. Jaʼnix jich ta ora ini, te Satanás ya smonbey yoʼtan te ants winiketik yuʼun ya xyalik ta antsiwej, antsinel o yantikxan mulil te pajal soke. ¿Bin ya xjuʼ ya yikʼotik ta spasel te muliletik ini? Jun pejtsʼ te ya stuuntes te Satanás, jaʼ te pornografia.

Te ants winiketik ta ora ini muken ya yilik pornografia. Te ayix tal bayal jaʼbile, teme ay machʼa ya skʼan ya yil pornografia ya skʼan ya xbajtʼ ta sine yuʼun ya yilbey spelikulail o te ya xbajtʼ sman libro o rebista yuʼun pornografia. Bayalniwan machʼatik ma jichuk la spasik ta skaj te ya xkʼexawik te ya x-ilotik yuʼun te yantike. Pero ta ora ini, machʼauk-a te ay s-Internet ya xjuʼ ya yil pornografia ta yaʼtel o ta yutil skarro. Ta bayal nasionetik, te winiketik sok te antsetik ma puersa te ya xlokʼik ta sleel banti ya yilik pornografia, melel ya xjuʼ ya yilik ta yutil snaik.

Pero ma jaʼuknax-abi, ta swenta te bayalix aparatoetik jich bitʼil te selular o tablet, ya xjuʼ bueltanax ta tael te pornografia. Ay machʼa ya xjuʼ ya yil pornografia te kʼalal yak ta beel ta kaye, te kʼalal ay ta beel ta karro o ta tren.

Jich bitʼil te bueltaxanix ta tael te pornografia, bayal machʼatik yakal stabel swokolik yuʼun. Ta skaj te pornografia, kʼax bayal ta tul ants winiketik ya xjin skuxlejalik ta yutil snaik, maʼyuk skʼoplal ya yaʼiy sbaik sok ya xjinbot te snopojibal yuʼunike. Pero te bin mel-oʼtantikxan sbae, jaʼ te ya xjuʼ ya xnamajik ta stojol te Diose. Jamal chikan ta ilel te bayal swokol ya sta te machʼa ya yil te pornografia. Bayal machʼatik jkʼaxel ma lek ya yaʼiy sbaik yuʼun, melel ya x-utsʼinbot yoʼtanik yuʼun. Jichniwan te kʼunkʼun ya xlekub bael, pero yaniwan xkʼax bayal jaʼbil yuʼun ya xchʼay bael te bin ya x-utsʼinotik yuʼune.

Pero mame xchʼay ta koʼtantik te ya yakʼ jnaʼtik te Jehová bin-utʼil ya xjuʼ ya jkanantay jbatik yuʼun ma xyalotik ta yilel te pornografiae. Teme ya jkʼantik te ya skanantayotik te Jehová, mame jichuk ya jpastik bitʼil te israeletik te la skʼaxuntaybeyik te skʼope, yame skʼan ya jpastik spisil te bin ya yalbotike (Éx. 19:5). Yame skʼan ya jnaʼtik te ya yilay Jehová te pornografia. ¿Bin yuʼun te jich ya kaltike?

Jnop kaʼiytik ta swenta ini: te israeletik bayal koltayotik yuʼun te leyetik akʼbotik yuʼun te Diose. Te leyetik-abi jich kʼot bitʼil tsʼajkʼ te joytaybilik yuʼun te israeletik swenta maba ya snopbeyik te schopol stalel te jyanlumetike (Deut. 4:6-8). Te leyetik te la yichʼik akʼbeyele, la yakʼ ta ilel ta  jamal te ya yilay Jehová te antsiwej, antsinel sok spisil te muliletik te pajal soke.

Te kʼalal yalojix-a te Jehová te bintik kʼax chopol ya spasik te nasionetik te ayik ta sjoyobal Israel, jich la yal ta stojolik: «Ma hichuc xapasic te bin ya spasic ta sqʼuinal Canaán te banti ya quiqʼuex bahel, ma me xatʼumbeyic te bin ya spasique». Sok la yal te «bohlob[en] scʼoblal te lumqʼuinale» sok te ya yakʼbey kastigo te yajwal Canaán. Te bin la spasik te kananeoetik kʼax ilobtik sba la yil te chʼul Dios Jehová, jaʼ yuʼun la yal te bolob skʼoplal te lum kʼinal te banti nainemike (Lev. 18:3, 25).

Manchukme te Jehová la yakʼbey kastigo te kananeoetike, aynanix machʼatik la spasulanik bael-a. Te kʼalal kʼaxemix 1,500 jaʼbil te Pablo la yal te «chʼay sqʼuexlalic» te nasionetik te banti nainemik te j-abatetik yuʼun te Diose. Te ants winiketik ta nasionetik-abi «la yacʼ sbahic ta spasel mulil ta sbaqʼuetalic, hich spisil yoʼtanic la spasic te bintic chopol ta pasele» (Efes. 4:17-19). Ta ora ini, jaʼnix jich bayal ants winiketik jkʼaxel chʼayemix skʼexlalik ta spasel muliletik. Te smelelil j-abatetik yuʼun te Diose, ya skʼan te ya spasik tulan te manchuk ya xbajtʼ sitik ta yilel te muliletik ya spas te ants winiketik yuʼun te balumilal ini.

Te pornografia jkʼaxel ya sbolobtes o ya yakʼ ta kʼexlal te Jehová. ¿Bin yuʼun? Melel te Jehová, jaʼ jich la spasotik te bin-utʼil yilel stukele sok la yakʼbotik te taleliletik yuʼune, jich yuʼun la yakʼ ta koʼtantik te ya jkʼextik spasel te bin ma lekuke. Ta spʼijil yoʼtan te Jehová la yakʼ leyetik ta swenta te bitʼil stojil te ya sjokin sba ta wayel te winik sok te ants te nujpunemike sok la yakʼ yuʼun ya smulanbeyik yutsil (Gén. 1:26-28; Prov. 5:18, 19). Pero te machʼatik ya schajpanik te pornografia o ya spukbeyik skʼoplale, ya slabanik te mantaliletik yuʼun te Diose sok jkʼaxel ma xyichʼik ta mukʼ te Diose. Jich yuʼun te Jehová yame yichʼ ta kʼop te ants winiketik-abi (Rom. 1:24-27).

Pero, ¿bin ya xjuʼ ya kaltik ta swenta te machʼatik ya smulanik skʼoponel sok yilel te pornografiae? Ayniwan machʼatik ya yalik te ma chopoluke. Pero ta melel, akuerdo ayik sok te machʼatik ya schajpanik te pornografia o ya spukbeyik skʼoplale. Maniwan jichuk snopojik-a te kʼalal jajch yilik pornografia. Yan stukel te machʼatik ya yichʼik ta mukʼ te smelelil Diose, jamal chikan ta ilel te ya skʼan ya spʼajik ta jkʼaxel te pornografia. Te Biblia jich ya spasotik ta mantal: «Haʼex te cʼux ta awoʼtanic te Jehová, ihlayahic te bin chopol» (Sal. 97:10).

 Te machʼatik ma skʼan ya yilik pornografia, jaʼnix jich tulan ya yaʼiyik te ma xyakʼ sbaik ta tsalel yuʼune. Ta skaj te jmulawilotike, ayniwan bin kʼax chopol ya skʼan ya spas te jbakʼetaltik te wokol ya kaʼiytik skomele. Jaʼnix jich ya xjuʼ ya sloʼlayotik te koʼtantik te ya jkuytik te ma chopoluk skʼaxuntaybeyel sley te Diose (Jer. 17:9). Pero bayal machʼatik te j-abatetikix yuʼun Dios ta ora ini, juʼem yuʼunik stsalel te bin chopole. Te ejemplo yuʼunike, ya xjuʼ ya yakʼbey yip yoʼtan te machʼatik yakik ta spasel tulan ta yijkʼitayel yilel te pornografia. Jich yuʼun, kiltik bin-utʼil te sKʼop Dios ya xjuʼ ya skoltayotik yuʼun maba ya xyalotik ta spejtsʼ te Satanás.

Jich bitʼil la kiltik ta sjajchibal te artikulo ini, bayal israeletik lajik ta skaj te la spasik te bin chopol la skʼan yoʼtanike. Jaʼnix jich ya xjuʼ ya xkʼot ta jtojoltik-euk. Te Santiago, te jaʼ yijtsʼin te Jesuse, la yal bin-utʼil ya xjuʼ ya xkʼot ta pasel te mulile: «Tuhlutuhl ya yaʼiy sujel ta mulil yuʼun te bin chopol ya scʼan yoʼtan, te ya xnitot soc ya xmonot yuʼune. Cʼalal hahchemix te bin chopol ya scʼan yoʼtan, ya yayintes mulil» (Sant. 1:14, 15). Te kʼalal ay machʼa ya yakʼ te ya yichʼ yip ta yoʼtan te bin ma lekuke, ya xjuʼ ya spas te mulile. Jich yuʼun yame skʼan ya jlokʼestik ta jpensartik spisil te bin swenta mulile, mame skʼan ya jnaʼulantik.

Teme ya kiltik te wokol ya kaʼiytik slokʼesel ta koʼtantik te bin chopole, yame skʼan te ay bin ya jpastik ta oranax. Te Jesús jich la yal: «Teme ha ya yaʼbat ale amul te acʼab o te awoc, boja loqʼuel, chʼaya bahel [...]. Soc teme ha ya yaʼbat ale amul te asite, loqʼuesa, chʼaya bahel» (Mat. 18:8, 9). Te Jesús ma jaʼuk yak ta yalel-a te jaʼ ya jbojtik lokʼel te mero jkʼabtik o te ya jlokʼestik te mero jsitike. Te bin yak ta yalel-ae, jaʼ te ma skʼan xchebetuk koʼtantik ta yijkʼitayel te bin ya yakʼotik ta chʼayele sok te ya jpastik ta oranaxe. ¿Bin-utʼil jich ya xjuʼ ya jpastik sok te pornografiae?

Jnop kaʼiytik te ay banti repentenax ya xchiknaj tal pornografia ta jtojoltik. Mame jkuytik te ma xyutsʼinotike. Jich yuʼun, akʼa jsut jsitik ta oranax, jtupʼtik ta oranax te telebision, komputadora, selular o biluk-a te banti ya xchiknaj te pornografia. Ayukme bin lek ya jpastik pensar. Teme jich ya jpastike, ya skoltayotik yuʼun ma x-och jmulantik snopel bin chopol, jich ma stsalotik-a te bin ma lek ya skʼan te koʼtantike.

Te machʼa ya yil te pornografia ya xjuʼ te bayal jaʼbil ya xjil ta sjol te bintik ma lek la yil o la skʼopone sok ya xjuʼ ya xtal ta yoʼtan ta repentenax. Te kʼalal jich ya xkʼot ta pasele, ayniwan bin chopol ya xtal ta yoʼtan spasel, jich bitʼil te ya x-och spiktiklan skʼunil sbakʼetal. Teme juʼix awuʼun yijkʼitayel te pornografia, pero ay yato xjul ta awoʼtan te bin chopol la awil o la akʼopone, yame skoltayat te ayuk ta awoʼtan te ay jich ya xkʼot ta pasel ta atojole, jich yuʼun chapalukatme ta stsalel te bin chopol ya xtal ta awoʼtan.

Akʼa ta awoʼtan te jichuk ya apas pensar bitʼil te Dios sok te jaʼ ya apas te bin ya smulan yoʼtane. Tʼuna te ejemplo yuʼun te jpuk-kʼop Pablo te jich la yale: «Ya jmaj te jbaqʼuetal soc ya cacʼ ta mosohinel» (1 Cor. 9:27). Mame xa awakʼ smosoinat te chopol pensarile. Jaʼ xa apas te bin ya yal te Romanos 12:2: «Yanuc awilelic ta scuenta yachʼubtesel te snopojibal awuʼunic, scuenta yuʼun hich yac anaʼic a te bin ya scʼan yoʼtan te Dios, te ha ay yutsil soc te cʼax leque». Mame xchʼay ta awoʼtan ini, teme jaʼ ay ta awoʼtan te bin ya smulan te Dios sok ya apas, jaʼme ya yakʼbat stseʼelil awoʼtan ma jaʼuk te ya apas te bin ya skʼan te bakʼet.

Pasa tulan ta snopel ta memoria cheʼoxeb tekstoetik te ya skoltayat te jichuk snopojibal awuʼun bitʼil te Jehová ta swenta te pornografia sok te ya yakʼbat awil te bin ya skʼan ya apase. Jich yuʼun, te kʼalal ay bin chopol ya xtal ta awoʼtane, pasa tulan yuʼun jaʼ ya anopilan te tekstoetik, jich bitʼil te Salmo 119:37, Isaías 52:11, Mateo 5:28, Efesios 5:3, Colosenses 3:5 sok 1 Tesalonicenses 4:4-8.

¿Jaxan teme ay bin-ora jkʼaxel ya yikʼ koʼtantik yilel o snopel te bin swenta mulil te ma xjuʼix jkombel jbatik ya kaʼiytike? Jaʼ xa apas te bin la spas te Jesús te jaʼ ejemplo kuʼuntike (1 Ped. 2:21). Te kʼalal yichʼojix jaʼ-a, pasot ta prueba yuʼun te Satanás. ¿Bin la spas te Jesuse? Ma la yakʼ sba ta tsalel. La skoltay sba sok tekstoetik yuʼun Biblia swenta ya skontrain te Satanás. Jich la yalbey: «Locʼan, Satanás», jich lokʼ bael te Satanás ta stojol. Jich bitʼil maba lujb te Jesús ta skontrainel te Satanás, ma skʼan te ya xlujbat-euke (Mat. 4:1-11). Te Satanás sok te balumilal yuʼune, yame spasikxan tulan yuʼun ya snojes ta joltik te bintik swenta mulile, pero mame xlujbotik ta stsalel spisil ini. Yame xjuʼ ya jtsaltik te pornografiae. Ta swenta te koltayel ya yakʼbotik te Jehová, yame xjuʼ ya jtsaltik te jkontratike.

Mame jkom jbatik ta skʼoponel te Jehová yuʼun ya jkʼanbeytik te ya skoltayotike. Te Pablo jich la yal: «Aʼbeya snaʼ Dios spisil te bintic yac acʼambeyic [...]. Hich te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel, ya me scanantaybeyex awoʼtanic soc apensaric ta scuenta te Cristo Jesús» (Filip. 4:6, 7). Te Jehová yame yakʼbotik slamalil koʼtantik te ya skoltayotik ta stsalel te mulile. Teme ya xnoptsajotik ta stojol te Diose, yame xnoptsaj ta jtojoltik-euk (Sant. 4:8).

Te bin ya skoltayotikxan ta stsalel biluk wokolil, jaʼ te nopol ay ta jtojoltik te Jpaswanej kuʼuntike. Te Jesús jich la yal ta stojol te Satanás: «Jtalelix te ajwalil yuʼun in balumilal to. Maʼyuc bi xjuʼ yuʼun te ya spasbon ta jtojole» (Juan 14:30, XCD). ¿Bin yuʼun te snaʼoj te ma xjuʼ ya xtsalot yuʼun te Pukuje? Jun buelta jich la yal: «Sjoquinejon te machʼa la sticonon tale; ma ba spihtesejon te Tatil, como spisil ora ya jpas te bin lec yoʼtan yuʼun stuquel» (Juan 8:29). Teme jaʼ ya jpastik te bin ya smulan te Jehová, mame ayuk bin-ora ya yijkʼitayotik-euk. Jich yuʼun anukotik lokʼel ta stojol te pornografia, jichme ma stsalotik te Satanás.