ИЗРАИЛЬ калыкысь адямиос Сӥзем музъем азьын вал. Соослы Иордан шур вамен потыны гинэ кылиз. Шӧдтэк шорысь соос доры вуизы витьымтэ куноос — мукет калыкысь кышномуртъёс. Соос израиль пиосмуртъёсты празднике ӧтизы. Соослэн ӧтёнзы тунсыко потыны быгатэ вал: выль эшъёс, эктонъёс, ческыт сиён. Та кышномуртъёслэн сям-йылолъёссы но со, малы Инмар израиль калыкез дышетӥз, пӧртэмесь вал ке но, куд-ог израиль пиосмуртъёс малпаны быгатӥзы: «Татын номыр кышкытэз ӧвӧл, мон сак луо. Мон чиданы быгато».

 Мар луиз собере? Библиын гожтэмын, калык «Моавлэн нылъёсыныз азыса-калгыса улыны кутскиз» шуыса. Зэмзэ вераса, со кышномуртъёслэн потэ вал, израиль пиосмуртъёс зэмос луисьтэм инмаръёслы йыбыртъяны мед кутскозы шуыса. Но соос сое лэсьтыны быгатӥзы! Соин ик «Кузё-Инмарлэн вожпотонэз Израиль вылэ ӝуатскиз» (Лыд. 25:1—3).

Израиль калыкысь адямиос лэсьтӥзы кык туж секыт сьӧлыкъёсты: соос сульдэръёслы-идолъёслы йыбыртъяны кутскизы но азон-калгон сьӧлыке пыризы. Трос сюрс пиосмуртъёс кулӥзы, малы ке шуоно соос Инмарлэсь ӧз кылзӥське (Пот. 20:4, 5, 14; К. Зак. 13:6—9). Нош мар эшшо но уродгес каре вал та югдурез? Та пиосмуртъёс Сӥзем музъеме пырыны ӧз быгатэ, соослы Иордан шур вамен потыны гинэ кылиз вал ке но (Лыд. 25:5, 9).

Тани мар гожтӥз апостол Павел со югдур сярысь: «Ваньмыз таос соослы со понна луиз: асьмеос соослэсь адӟем медам каре, нош та асьмелы, берпуметӥ аръёсы улыны кылемъёслы, алон понна гожтэмын» (1 Кор. 10:7—11). Оскыны луэ: Шайтан туж шумпотӥз, куке израиль калык секыт сьӧлыказ но Сӥзем музъеме пырыны ӧз быгаты. Милемлы соослэн янгышсы вылын дышетсконо, малы ке шуоно Шайтанлэн потэ, Инмарен сӥзем выль дуннее ми медам пыре шуыса.

Шайтанлэн туннэ но христианъёсты пӧямез потэ. Со понна со уже кутэ сьӧлтэтъёсты, кудъёсаз азьвыл трос адямиос сюризы. Кызьы гожтэмын вал ини, Шайтан израиль калыклэсь мылкыдзэ ӝутӥз азон-калгон сьӧлыке пырыны. Асьме нуналъёсы но азон-калгон — со кышкыт сьӧлтэт. Тросэз та сьӧлтэтэ сюризы, куке порнографиез учкыны кутскизы.

Туала вакытэ адями порнографиез учкыны быгатэ, но со сярысь нокин но уз тоды. Азьло дыръя адямилы, кудӥзлэн порнографиез учкемез потэ вал, кинотеатре яке видеосалонэ мыноно вал, нош порнографиен герӟаськем журналъёсты нимысьтыз магазинъёсын гинэ басьтыны луэ вал. Тросэз адямиос сыӵе интыосы ӧз ветлэ, малы ке шуоно соос кышказы, вылды, соосты отын кин ке но адӟоз шуыса. Нош туннэ котькуд адями, кудӥзлэн интернетэз вань, уж дораз яке машинаяз гинэ но порнографиез учкыны быгатэ. Трос шаеръёсын, порнографиез учкон понна, адямилы дорысьтыз ик потоно ӧвӧл.

Нош со ваньмыз ӧвӧл на. Мобильной телефонъёслы луыса порнографиез шедьтыны эшшо но капчигес луиз. Туннэ адямиос порнографиез учкыны быгато телефонысьтызы, урамтӥ яке транспортэн мыныкузы.

Порнографиез шедьтыны капчи луиз бере, азьвыл нуналъёсын ӵошатыса, туннэ со тросгес адямиослы изъян вае. Туж трос адямиос, кудъёсыз порнографиез учко, кузпалэнызы матысь кусыпъёссэс ышто, асьсэды гажамысь дугдо но возьытлыксылэсь верамзэ лыдэ уг басьто. Нош тужгес но уродэз — соин сэрен соос Инмарен кусыпъёссэс ыштыны быгато. Веранэз ик ӧвӧл, порнография изъян вае соослы, кинъёс сое учко. Сое учконлэсь бервылъёссэ ӵошатыны луэ мур яраосын, кудъёсыз туж кема дыр ӵоже бурмо но умойтэм пытьы кельто.

Озьы ке но милемлы тодамы возёно, Шайтанлэн та сьӧлтэтэзлэсь Иегова милемыз утьыны быгатэ шуыса. Утиськон понна милемлы Инмарлэсь котьку кылзӥськоно, нош израиль пиосмуртъёс сое ӧз лэсьтэ (Пот. 19:5). Тодамы возьыны кулэ, Инмар порнографиез адӟемпотостэм каре шуыса. Малы ми озьы вераны быгатӥськомы?

Малпаське: законъёс, кудъёссэ Иегова израиль калыклы сётӥз, мукет калыкъёслэн законъёссылэсь пӧртэмесь вал. Соос борддор сямен израиль калыкез утизы юрӟым ужъёслэсь, кудъёссэ котырысьтызы калыкъёс лэсьто вал (К. Зак. 4:6—8). Со законъёс валамон  возьматӥзы, Иегова азыса-калгыса улонэз адӟемпотостэм каре шуыса.

Артысь калыкъёслэн азон-калгонэн герӟаськем ужъёссы сярысь веракуз, Иегова израиль калыклы шуиз: «Ханаан музъемын, кытчы Мон тӥледыз нуо, мар отын лэсьто, соосты быдэсъяса эн улэ... [...] Отысь музъем но саптаськиз; солэн законлы пумит улэмез шоры Мон учки» (Лев. 18:3, 25). Израильлэн дун-чылкыт Инмарезлы хананей калыклэн ужъёсыз сокем юрӟым потӥзы, соослэсь музъемзэс гинэ но Иегова саптаськемын шуыса лыдъяз.

Иегова хананей калыкез кыл кутытӥз, нош мукет калыкъёс озьы ик азыса-калгыса улӥзы. 1 500 ар ортчыса, апостол Павел таӵе кылъёс гожтӥз калыкъёс сярысь, кудъёсыз пӧлын христианъёс улӥзы: «Визьзэс ыштон доры вуизы ни соос: азыса-калгыса уло, котькыӵе кырсь-юрӟым ужез пичи но возьдаськытэк лэсьто» (Еф. 4:17—19). Туннэ тросэз адямиос асьсэды озьы ик возё. Зэмос Инмарлэн ужась-тыршисьёсызлы туж тыршоно палэнскыны та дуннеын адямиос кадь азыса-калгыса улэмлэсь.

Порнография Инмарез сантэма. Со милемыз аслыз укшатыса кылдытӥз, но ми шӧдыны быгатӥськомы, мар шонер, нош мар шонертэм луэ. Инмар визьмо лэсьтӥз, куке адямиослы сексуальной кусыпъёсын герӟаськем законъёс сётӥз. Солэн малпамезъя, та кусыпъёс кузпалъёслы шумпотон вайыны кулэ (Ул.-выл. 1:26—28; Мад. 5:18, 19). Нош соос, кинъёс порнографиез вӧлмыто но сое учкыны мылкыдэз ӝуто, Инмарлэсь вылӥ эсэпъёссэ нокӧня но лыдэ уг басьто. Сыӵе адямиос Инмарез уг гажало. Иегова судъялоз соосты, кинъёс солэсь катъёссэ тӥяло, порнографиез вӧлмытыса но сое учкыны мылкыдэз ӝутыса (Рим. 1:24—27).

Нош мар вераны луоз адямиос сярысь, кинъёс валаса вылысь порнографиез учко но соин герӟаськем публикациосты лыдӟо? Куд-огъёсыз малпало, отын номыр умойтэмез ӧвӧл шуыса. Нош зэмзэ вераса, сыӵе адямиос луо соос пӧлын, кинъёс Инмарлэсь катъёссэ тӥяло. Порнографиез учкыны кутскыкузы, соос ӧз но малпалэ, вылды, Инмарлэсь катъёссэ тӥясьёс пӧлын луозы шуыса. Валамон, зэмос Инмарлэн ужась-тыршисьёсызлы порнографиез туж адӟемпотостэм кароно шуыса. Библиын таӵе ӧтён вань: «Кузё-Инмарез яратӥсьёс, уродэз-лекез адӟонтэм каре!» (Пс. 96:10).

 Адямилэн порнографиез учкемез уг поты ке но, соин пумиськыкуз, солэсь возиськыны секыт луыны быгатэ. Ми тырбыдэстэмесь, соин ик лулмугормылэн кырсь мылпотонъёсызлы пумитъяськыны секыт луылэ. Со сяна, ми асьмеды оскытыны быгатӥськомы, порнографиез учкыса, номыр умойтэмез уз луы шуыса (Иер. 17:9). Озьы ке но тросэз адямиос, христианъёс луыса, та нюръяськонэз вормизы. Сыӵе учыръёс тӥледыз юнматозы, куке тӥляд порнографиез учкыны мылкыдды кылдоз. Ойдолэ эскеромы, кызьы Инмарлэн Кылыз юрттоз тӥледлы Шайтанлэн сьӧлтэтэзлэсь утиськыны.

Кызьы гожтэмын вал ини, израиль калыкысь тросэз адямиос шонертэм мылпотонъёссылы сётскизы, но со урод бервылъёсы вуттӥз. Туннэ но озьы ик луыны быгатэ. Иаков, Иисуслэн выныз, гожтӥз: «Котькин но, аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ. Соку кырсь малпан кылдэ но сьӧлыкез вордӥськытэ» (Иак. 1:14, 15). Адями азон-калгонэн герӟаськем мылпотонлы сюлмаз каръяськыны лэзе ке, дыр ортчыса, со сьӧлыке вуттоз, вылды. Соин ик милемлы сьӧлыко малпанъёсты палэнтоно.

Тӥляд кырсь малпанъёсты кылдӥзы ке, ӝегатскытэк мар ке но каре. Иисус вераз: «Киыд яке пыдыд тонэ сьӧлыке пыртэ ке, ӵогыса соосты бордысьтыд кушты. [...] Синмыд тонэ сьӧлыке пыртэ ке, ишкалты но сое бордысьтыд кушты» (Матф. 18:8, 9). Иисус астэ вӧсь карыны мылкыдэз ӧз ӝуты. Со валэктӥз, макем кулэ ӝегатскытэк но юн мылкыдын палэнтыны сое, мар милемыз сьӧлыке вуттыны быгатэ. Кызьы Иисуслэн кылъёсыз порнографиез учкыны мылкыдын нюръяськыны юртто?

Тӥ порнографиен пумиськиды ке, эн малпалэ, со тӥ вылын нокызьы но уз шӧдӥськы шуыса. Соку ик солэсь берытске. Ӝегатскытэк кысэ телевизордэс, компьютердэс яке телефондэс. Малпаське мар ке но умоез сярысь. Соку мылпотонъёсты тӥледыз уз ворме, нош тӥ соосты вормоды.

Мар кароно, тӥ порнографиез учкемысь дугдӥды ке ини, нош дырын-дырын йырады  порнографиен герӟаськем тодэ ваёнъёс кылдо? Порнографиен герӟаськем суредъёс но малпанъёс йырысь кема дыр ӵоже уг кошко но шӧдтэк шорысь тодэ лыктыны быгато. Сыӵе дыре тӥляд мылкыдды кылдыны быгатэ лулмугорлэн кырсь мылпотонъёсызлы сётскыны но кутскыны мастурбациен вырыны. Соин ик дась луэ, витьымтэ шорысь йырады кырсь малпанъёс кылдыны быгато но соосын нюръяськоно луоз шуыса.

Юн мылкыдды мед луоз малпаськыны но асьтэдыз возьыны озьы, кызьы Инмарлэн потэ. Адӟем каре Павеллэсь, кудӥз ачиз сярысь гожтӥз: «Ас мугорме курадӟытыса зӥбломытӥсько, тэрытскись-кылзӥськись карисько» (1 Кор. 9:27). Кырсь мылпотонъёслы асьтэдыз вормыны эн лэзе. Уже кутэ Библиысь визь-кенешез: «Асьтэлэсь лулдэс-сюлэмдэс выльдэ-воштэ, тодыны мед быгатоды: мае тӥлесьтыд Инмар возьма, кыӵе уж Солы ӟеч, ярамон, дун-шектэм луэ» (Рим. 12:2). Тодады возе: сьӧлыко мылпотонъёсмыя улыса, ми шудо ум луэ. Ми шудо луомы, куке малпанъёсмы но ужъёсмы Инмарлы ярамонэсь луозы.

Тырше Библиысь куд-ог кылбуръёсты дышетыны, кылсярысь: Псалтирь 118:37; Исаия 52:11; Матфей 5:28; Ефесъёслы 5:3; Колоссыослы 3:5; 1 Фессалоникаослы 4:4—8. Соос юрттозы тӥледлы, порнография шоры учкыны озьы ик, кызьы со шоры учке Иегова, но валаны, мае со тӥлесьтыд возьма. Тӥляд кырсь малпанъёсты кылдӥзы ке, тырше та кылбуръёс сярысь малпаськыны.

Мар тӥледлы кароно, тӥледлы туж секыт ке нюръяськыны порнографиез учкыны мылкыдын но азон-калгонэн герӟаськем малпанъёсын? Иисус Христослэсь адӟем каре (1 Пётр 2:21). Иисуслэн пылатӥськемез бере Шайтан солэсь визьзэ сынаны кутскиз. Кызьы ассэ возиз Иисус? Со ӧз сётскы: куке Шайтан солэсь визьзэ сыназ, Иисус Библиысь кылбуръёсты уже кутӥз. Со вераз: «Кошкы Мон дорысь, шайтан», но со Иисус дорысь кошкиз. Иисус Шайтанлы ӧз сётскы, тӥледлы но сётсконо ӧвӧл (Матф. 4:1—11). Шайтан но солэн дуннеез азьланяз но тыршозы тӥлесьтыд визьдэс кырсь малпанъёсын саптаны, нош тӥ нюръяськемысь эн дугдэ. Иеговалэн юрттэменыз, тӥ быгатоды та нюръяськонэз вормыны.

Иеговалы ялан вӧсяське но солэсь юрттэтсэ куре. Павел вераз: «Ялан вӧсяськыса, тау карыса, Инмар азьын мар куронды вань, курелэ. Инмарлэн каньыллыкез котькыӵе визьлэсь но вылӥын, со тӥлесьтыд сюлэмдэс но, малпанъёстэс но Иисус Христос бордын утьыса возёз» (Флп. 4:6, 7). Сюлмады «Инмарлэн каньыллыкез» луиз ке, соку тӥ шонертэм малпанъёсын нюръяськыны быгатоды. Тӥ Иеговалы матэ кариськиды ке, «Со но тӥляд матады лыктоз» (Иак. 4:8).

Дунне Кутӥсен матысь эшъяськон — Шайтанлэн сьӧлтэтъёсызлэсь тужгес но умой утиськон. Иисус шуиз: «Та дуннелэн эксэез [Шайтан] лыктэ. Но солэн Монэн кузёяськыны кужымез ӧвӧл» (Иоанн 14:30). Малы Иисуслэн таӵе осконэз вал? Со валэктӥз: «Монэ Ыстӥсь Монэн луэ. Атае Монэ огнаме ӧз кельты, Мон уго котьку но сое лэсьтӥсько, мар Солы ярано» (Иоанн 8:29). Тӥ Иеговаез котьку но шумпоттыны тыршиськоды ке, со но тӥледыз ноку но уз кельты. Порнографилэсь палэнске, соку тӥ Шайтанлэн сьӧлтэтэзлэсь утиськыны быгатоды.