AISARAYELI yaahanle vakhaani olapuwa Muro Yordani. Moohipisa yaamukela Elapo yaaleiheriwe aya ni Muluku, masi nihiku nimosa yaahixukuriwa. Atthu yaaxukurya yaari athiyana amalapo yaarwiiye waalattula alopwana orowa ofestani. Vaakhala ntoko wira efesta ele yaari eparakha yoowaapaka apatthani, wiina ni olya yoolya yoosiva. Masi soolema ni mweettelo wa athiyana ale khiwaamusivela Muluku, maana soolema saya saahivirikana ni iye Yehova aavanhe awe aIsarayeli. Hata vaari siiso, woonasa wene, alopwana akina aIsarayeli yahuupuwela so: ‘Kinnisuwela etthu yooloka ni yoohiloka. Kinoosuwela etthu yoopaka’.

 Masi exeeni yaakhumelenle? Biibiliya onihimya so: “Alopwana yahipajerya oraruwa n’athiyana òMowabi”. Tthiri etthu athiyana ale yaaphavela aya waari owiiriha alopwana aIsarayeli waakokhorela amuluku eethiru. Eyo ti etthu yaapanke aya! Mwaha woopaka eyo, Yehova ‘ahaviruwela vanjene’.​—Moth. 25:1-3.

AIsarayeli ale khiyiiwelenle Nlamulo na Muluku mwa inamuna piili: Yoopacerya, yahaakokhorela amuluku eethiru. Ya nenli, yaahiraruwa aahiiso weetta onamuttompe. Mwaha wa itampi iyo, aIsarayeli anceene yaahikhwa. (Okhum. 20:4, 5, 14; Otum. 13:6-9) Munnisuwela xeeni yowiiraneya ele eri aya yooriipiha murima? Awo yaahanle vakhaani okela Elapo Yooleiheriwa. Vaakhanle wira aIsarayeli ale yaahimwiiwelela Muluku, moohipisa yaamulapuwa Muro Yordani ni okela Elapo Yooleiheriwa.​—Moth. 25:5, 9.

Olavukala yowiiraneya ele, murummwa Paulo olempe wira: “Itthu iya sothene sahakhumelela axitith’ihu a khalai wira sinikhalele nthonyero: sahilempwa wira sinlopole hiyo, okhala wira omala wa mahiku wonattamela”. (1 aKor. 10:7-11) Moohaanyiherya, Satana aahihakalala vanceene waaweha aIsarayeli ale apakaka itampi suulupale seiyo saawiirinhe ohikela Elapo Yooleiheriwa. Nihaana ovaha ephoole ele yaawiiranenle aIsarayeli ale, mwaha woowi Satana onnisuwela wira nihanle okela Elapo esya Muluku onleihenrye awe!

Satana oniphavela wira maKristau eekeekhai amorele muraakho awe. Wira opake eyo, owo onnirumeela muraakho onoona awe wira onnimukhumela saana okhuma khalai. Ntoko niwenhe ahu, Satana aarumenle orupihana woohiloka wira aahapuxe aIsarayeli. Nave mahiku ahu ala, orupihana woohiloka muraakho muulupale ni wootakhala. Enamuna yuulupale mutthu onimorela awe muraakho wa orupihana woohiloka ori oweha epornografia.

Olelo-va, mutthu pooti oweha epornografia atthu akina ahisuwelaka. Masi khalai, mutthu aaphavela oweha epornografia aahaana orowa mapuro saawehiwa aya iviidiyu, aahiiso aahaana orowa elooxa yaatumiha iliivuru sa epornografia wira othume. Ikwaha sinceene atthu akina yaanuuliwa muru owehiwa arowaka mapuro awo, nto khiyaaweha epornografia. Masi mahiku ala, mutthu orina interneti pooti oweha epornografia hata ori ene omutekoni aahiiso mapuro sinweliwa ikaaro. Nave ilapo sikina, atthu anceene pooti oweha epornografia ari ene owannyeya.

Niireke eyo khahiyo ekeekhai? Atelefoni ni atableti annaakhweiherya atthu oweha epornografia. Vaavo onikhuma awe owaani orowaka onwela xaapa aahiiso komboi mutthu pooti oweha epornografia.

Olelo-va, okhala wira ti vookhweya oweha epornografia mutthu ohiwehiwaka, eyo ennitepa okumiherya mixankiho ovikana khalai. Atthu anceene anweha epornografia, annihonona itthoko saya, ottittimihiwa waya ni yowuupuxerya ya murima aya ennaalemela. Etthu yootepa otakhala okhala wira pooti oyeleela waataana waya ni Muluku. Tthiri vannikhalela ohimya wira ale aniweha epornografia ennaakumiherya mixankiho sinceene. Ikwaha sinceene, epornografia onnikumiherya mixankiho mmuupuweloni mwa mutthu. Hata okathi mukina mixankiho iyo siviraka, masi sinnihiya ekanyeryo mmuupuweloni mwa mutthu owo.

Ekeekhai wira Yehova onninikhapelela wira nihihapuxiwe ni muraakho owo wa Satana. Masi naaphavelaka wira Yehova onikhapelele, nihaana opaka ele aIsarayeli yahaapanke aya, eyo piiyo, nihaana ‘wìwelela moolumo’ a Yehova. (Okhum. 19:5) Nihaana osuwela wira Yehova onninyokha epornografia. Xeeni ninhimya ahu siiso?

Nkahaya muupuwela ela: Malamulo Muluku aavanhe awe aIsarayeli yaahivirikana ni malamulo a maloko makina yahaamurumeela Yehova. Khinivo nloko naarina malamulo ntoko ale. Malamulo ale yaari ntoko makokoro yaakhapelela aIsarayeli wira ahipakeke itthu soohiirya saapakiwa ni maloko makina. (Otum. 4:6-8) Malamulo ale yaanooniherya ekeekhai ela: Yehova onninyokha orupihana woohiloka.

 Nuumala olavula itthu soohiirya saapakiwa ni maloko makina, Yehova aalenle so aIsarayeli: “Muhitthareké makhalelo . . . àtthu èlapo y’oKanàni, weiwo onoroihakani. . . .Hatá elapo eyo yoravihiwa mwikho; tivó miyo kihahukhumu atthu awo mwaha wa sotakhala saya”. Yehova Muluku aaIsarayeli, ahoona wira mweettelo wa aKaanani waari wootepa ohiirya mpakha oraviha mwiikho elapo ele.​—Onam. 18:3, 25.

Nnaamwi Yehova aahukhummu aKaanani, atthu akina yaahivikaniha orupihana woohiloka. Nuuvira iyaakha 1.500, murummwa Paulo aahimmye wira maKristau makina yaakhala ni atthu ‘murim’aya wahòna ekekhai nnákhala eyaha’. Tthiri, atthu ale yaahiivahererya “mmansaya wa sonanara, enìra itthu sothene sinùliha muru vohìphimela”. (aÉf. 4:17-19) Nave olelo-va, atthu khanuuleliwa muru weetta onamuttompe. Atthu akina anniikukumiha mwaha wa orupihana waya woohiloka. Khula opuro enniphwanyaneya epornografia, nto maKristau eekeekhai ahaana osyaka moomalela itthu iyo soohiirya sa olumwenku ola wa Satana.

Mutthu oniweha epornografia onnooniherya wira khonimuttittimiha Yehova. Owo aapattunxe apinaatamu iilikanyihaka mmansawe. Nto ohaavaha osuwela ele eri yooloka ni yoohiloka. Mwa miruku, Muluku oovaha malamulo voohimya sa orupihana. Eyo enooniherya wira orupihana waapakiwe wira omuhakalaliheke mulopwana ni muthiyana athelanne. (Maph. 1:26-28; Mir. 5:18, 19) Niireke atthu ale anipaka ni anaatumererya atthu akina oweha epornografia aakhalana muupuwelo wa Yehova? Nnaari, mwaha woowi atthu awo khaniiwelela malamulo a Muluku. Nave atthu awo annimunyohola Yehova. Moohipisa Yehova onrowa waahukhumu atthu otheene anikumiherya ni anaatumererya atthu opaka itthu soohiloka.​—aRom. 1:24-27.

Ankhi atthu ale moolakelela anweha aahiiso ansoma myaha sa epornografia? Atthu akina annisuwela wira etthu yootakhala. Masi hata vari siiso, atthu awo annaakhaliherya atthu ale ahiniiwelela malamulo a Yehova. Pooti wira eyo khahiyo yaari yoolukama aya okathi yaapacenrye aya oweha epornografia. Nnaamwi vari siiso, Biibiliya onihimya wira ale animukokhorela Muluku eekeekhai ahaana onyokha epornografia ni murima aya wotheene. Biibiliya oni: “Nyuwo munaphenta Apwiya, mukhotteke sotakhala”. ​—Esal. 97:10.

 Hata atthu ale ahininweha pornografia, pooti waavila omusyaka. Otheene ahu naatthu oohimalela, pooti wira nihaana owanana soophavela soohiloka sa orupihana. Nave murima ahu pooti oniwoka nnuupuwela wira epornografia khahiyo etthu yootakhala wala khenvirikanya malamulo a Muluku. (Yer. 17:9) Akhala wira munniwanana muxankiho owo, musuweleke wira maKristau manceene anniwanana. Nrowe niwehe moota Biibiliya onrowa awe wookhaliheryani owanana muraakho owo wa Satana.

Ntoko niwenhe ahu, aIsarayeli anceene yaahihiya axinttiwaka ni soophavela soohiloka, nto eyo yaahikumiherya ehasara. Etthu emosaru pooti oniiraneela. Yakobo, munnawe Yesu aahihimya woopiha waya oriki: “Khula mutthu onnehereriwa ni wunlela wawe sotakhala . . . Wunlela iwo sotakhala wavahiwa ikuru, onnikumiherya etampi”. (Yak. 1:14, 15) Akhala wira mutthu onneemererya vamurimani vawe sinnuwaka itthu soohiloka, woonasa wene onoopaka etampi. Tivonto vari aya vooloka osyaka wuupuwela itthu soohiloka ni ohihiya simakaka vamurimani vahu.

Akhala wira munnivikaniha wuupuwela itthu soohiloka, muhaana wiimananiha wuupuwela etthu ekina yooloka. Yesu aahimmye so: “Ntata nanyu walá nnawu nanyu notthekihakani, mwikitthe, murihele ottaiwene. . . . Siso-tho nitho nanyu notthekihakani, musyole, murihele ottaiwene”. (Math. 18:8, 9) Yesu khaaphavela ohimya wira atthu aahaana wiithikila. Maana Yesu aahipaka nlikanyiho nla wira aakhaliherye atthu ohiya itthu soohiloka ni ohitthikela opaka itthu iyo. Ninrowa ovarihela sai muteko malakiheryo awo a Yesu voohimya sa epornografia?

Akhala wira sookhumelela ilatarato sa epornografia muhuupuweleke wira: ‘Ela khenrowa okihapuxa’. Masi muhaana ohuluxa maitho anyu moohipisa. Muhaana omuttipiha televisau moohipisa. Nave akhala wira komputatore aahiiso selulari muhaana omuttipiha moohipisa. Mmananiheke wupuwela itthu sooloka. Opaka eyo, enimookhaliheryani okasoopa muupuwelo anyu ohiya oxinttiwa ni soophavela soohiloka.

Woonasa wene moowerya ohiya oweha epornografia. Masi pooti wira okathi mukina munnuupuwela  ilatarato sa epornografia mwaawenhe anyu. Nto muhaana opaka exeeni? Mooriipiha murima, ilatarato sa epornografia mwaawenhe anyu khalai pooti ohikhuma mmuupuweloni mwanyu. Eyo pooti wiiraneya okathi muhaalipelela anyu. Nto akhala wira eyo enimwiiraneya, pooti owiirihani opaka etthu yoohiloka ntoko wiikeha. Tivonto, muhaana osuwela wira okathi mukina muupuwelo owo pooti okhumelela ni muhaana okhala oolikana ene wira nwanane.

Mwiimananiheke wiiriha muupuwelo ni soopaka sanyu okhala ntoko Muluku omphavela awe. Mmutakiheke murummwa Paulo, yoowo aahimmye so: “Kinnihaxa erutthu aka, kinnikhaliha epotth’aka”. (1 aKor. 9:27) Muheemererye soophavela soohiloka sookhalihakani epottha. Muhaana otthara miruku siri aRoma 12: 2, sini: “Murukunuxe mukhalelo anyu, mùlule osuwela wanyu, wira nwerye osuwela sintthunawe Muluku, muthanlaka etthu ekhanle yorera, enimusivela Muluku ni ya xariya”. Muhiliyale ela: Wuupuwela ni opaka itthu moovarihana ni yootthuna ya Muluku onniphwanyiha ohakalala ovikana wiikhaliha epottha ya soophavela soohiloka.

Mwiimananiheke ohela mmuru soolepa sa mBiibiliyani. Nto, okathi munuupuwela anyu itthu soohiloka, mwiikhanyereriheke wuupuwela soolepa iyo. Soolepa ntoko Esalimo 119:37; Yesaya 52:11; Matheyo 5:28; aÉfeso 5:3; aKolosi 3:5 ni 1 aTesalonika 4:4-8, sinimookhaliheryani onyokha epornografia ntoko Yehova oninyokha awe ni sinimookhaliheryani opaka yoothanla yooloka.

Ankhi akhala wira munuupuwela wira khivanweryaneya ohiya omuupuwela aahiiso onweha epornografia wala itthu sikina soohiirya, mpakeke exeeni? Muhaana otthara ntakiheryo na Yesu. (1 Ped. 2:21) Nuumala Yesu obatiziwa, aaheehereriwa ikwaha sinceene ni Satana. Yesu aapanke exeeni? Owo aahivikaniha omukhoottela Satana. Orumeelaka soolepa, Yesu aahikhootta soweeha sotheene sa Satana Diabo. Yesu aahimmye so: “Khuma va, Satana!” nuumala-vo Satana aahimuhiya Yesu. Nave Yesu khaahiyale owana, nyuwo-tho muhaana opaka etthu emosaru. (Math. 4:1-11) Satana ni olumwenku awe wootakhala khonrowa ohiya owiirihani omakela wuupuwela itthu soohiloka. Masi muhikhala-khale muhiyaka owanana. Nyuwo munoowerya oxintta epornografia. Tthiri mukhaliheriwaka ni Yehova munoomuxintta nwanani owo ootakhala.

Muhikhala-khale muhiyaka onvekela Yehova nikhaliheryo. Paulo aahimmye so: “Okathi wothene nweliherye mavekelo anyu wa Muluku mmulompaka, munvaraka metto, mmuxukhuruku-tho. Siso murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu”. (aFil. 4:6, 7) Muluku onimoovahani murettele ni onimookhaliheryani oxintta etampi. Tthiri, mwamwaattamela Muluku, “Muluku onowattamelani”.​—Yak. 4:8.

Nnoowerya ohihomphwa ni miraakho sa Satana, akhala wira nnoovikaniha olipiha waataana wahu ni Mukhulupale a olumwenku wotheene. Yesu aahimmye so: “Mulupale òlumwenk’ula [Satana] ohanle orwa. Nto owo kharina etthu ni miyo”. (Yoh. 14:30) Yesu aasuwela sai eyo? Owo aahimmye so: “Ole okirumme ori ni miyo: khakihiyalé mekhaka, mana mahiku othene miyo kinnìra itthu sinimusivela”. (Yoh. 8:29) Nto akhala wira munoopaka itthu sinimusivela Yehova, owo khonrowa woohiyani. Musyakeke muraakho wa epornografia, mwiira siiso, Satana khonrowa wooweryani.