ისრაელეფ ემზადებდეს მალწყარ იორდანეშ გინაჭკირალო დო დუნაპირებ ქიანაშა ინაულარო. თე დროს თინეფშა შხვა ერიშ ოსურეფქ ქიმერთეს დო ისრაელ ქომოლკათა ოქეიფეფშა ქუდაპეჯეს. თე შემოთავაზება ალბათ მეწონებდეს თინეფს. ახალ მეგობრეფიშ გაჩინებაფა, სხაპუა დო ჯგირ ოჭკუმალეფ მიმზიდველო იძირედ. მართალ რე, თი წეს-ჩვეულებეფ, ნამდგას თე ოსურეფ მეჸუნდეს, ოწინააღმდეგუდ ისრაელეფშა მეჩამილ ღორონთიშ კანონს, მარა შილებე ნამთინე ქომოლკოჩიქ იფიქრუკო: „მუთუნ პრობლემა ვა რე. ფრთხილას იპჸით“.

 მარა მუქ მოხვად სინამდვილეს? ბიბლია მირაგადნა: „ქიდიჭყჷ ხალხიქ გარყვნილება მოაბიშ ოსურსქუალეფწკუმა“. სინამდვილეს თე ოსურეფს ოკოდეს ისრაელ ქომოლკათაქ ტყურა ღორონთეფიშ თაყვანიშცემა ქიდიჭყესკო დო თექ ქოთ ქუმოხვად. ათეშენ ვამკვენა, მუშენ გერისხჷ იეჰოვაქ ისრაელეფშე (რიცხ. 25:1—3).

თე ისრაელ ქომოლკათაქ ღორონთიშ კანონს ჟირმაგო გინურთეს: პირველ, თინეფქ თაყვან ქოცეს კერპეფს, დო მაჟია, სექსუალურ უზნეობა ჩედინეს. შედეგო, ანთასობით ისრაელქ დოღურ, მუშენდა ვედემორჩილეს ღორონც (გამ. 20:4, 5, 14; კან. 13:6—9). მუშენ რდუ თინეფიშ საქციელ განსაკუთრებულო ტრაგიკულ? თე ქომოლკათას ღორონთიშ კანონ ქუდუცვებდესკონ, ანთასობით ისრაელ მალას გეგნოჭკირუნდჷ მალწყარ იორდანეს დო გენიშ დუნაპირებ ქიანაშა (რიცხ. 25:5, 9).

თე შემთხვევაშ გურშენ პავლექ ჭარჷ: „მუდგაქ თინეფს აღოლეს, ჩქინო გაკვეთილ რე დო ჩქინ გაფრთხილებერო იჭარ, მიდგაშა ქვეყნიერებაშ აღსასრულქ ქუმანჭ“ (1 კორ. 10:7—11). მუშო ოკო რაგად, სატანა გეხარებუდ, მუჟამსით ისრაელეფქ სერიოზულ ცოდვა ჩედინეს დო ვენართინეს დუნაპირებ ქიანაშა. სატანაშ მიზან რე, ვენმართინან ახალ ქიანაშა დო თის მანგარო გახარენს თე მიზანიშ მეჭირნაფა. ათეშენ, გონივრულ იჸუაფ თე გაფრთხილება გურშა მიბღათ.

სატანაშ სამიზნე ქრისტიანეფ რენა; თინა გიმირინუანს თიცალ მახეეფს, ნამდგას დახელოვნებურ რე დო ბრელ მეუჩილითუაფ თეშნერო. ჟიშე მოშინაფილ ისრაელეფწკუმა თიქ სექსუალურ უზნეობა გიმირინუ. სატანა ჩქინ დროს ხოლო მიმართენს თე ხერხის. ართ-ართ ძლიერ საშვალება, ნამდგათ თინა ხალხის ოჩილითუანს, პორნოგრაფია რე.

ამდღა პორნოგრაფიაშ ჯინა შხვეფქ ვეგეგანინ თეშ ხოლო შილებე. წანეფიშ წოხოლე, პიროვნებას პორნოგრაფიაშ ჯინა ქაკოდ-და, თიქ კინოთეატრშა ოკო მიდართკო, სოდეთ უზნეო ფილმეფს ოძირანდეს ვარდა წიგნეფიშ მაღაზიას ოკო ქიჸიდკო პორნოგრაფიულ შინაარსიშ მასალა. ხალხიშ უმენტაშ ვემიშ თეცალ ადგილეფშა, მუშენდა ონჯღორე უჩქდეს, შხვეფქ ქოძირესკო. მარა ამდღა არძას შეულებ ინტერნეტიშ საშვალებათ პორნოგრაფიაშ ჯინა, მაგალთო სამუშას ვარდა მანქანას. ბრელ ქიანას, პორნოგრაფიაშ ჯინა ჸუდეს ხოლო რე შეიოლებერ.

თეს გეძინელ, მობილურ მოწყობილობეფით ხოლო უმოს ადვილ რე თეშ კეთება. ქუჩას სეირნობაშ, ავტობუსით ვარდა მატარებელით მგზავრობაშ დროს ხალხის შეულებ ქუგაჯინას უზნეო სურათეფს მუნეფიშ ელექტრონულ მოწყობილობეფს.

ამდღა პორნოგრაფიაშ ტყობაშე ჯინა უმოს ადვილ რე, ათეშენ ჩქინ დროს თის ბრელით უმოს ზიან მოუღ ხალხშა, ვინემ ჯვეშო. ბრელ, მით პორნოგრაფიას უჯინე, ქორწინებას საფრთხეშ თუდო გიორინუანს, დუდიშ პატიცემას ოდინუანს დო სინდის ეუხეშებ. მუთ არძაშ უმოს მნიშვნელოვან რე, ღორონთწკუმა მეგობრობას საფრთხეშ თუდო გიორინუანა. შემლებნა დარწმუნებულ ვორდათ, ნამდა პორნოგრაფიას დიდ ზიან მოუღ თინეფშო, მით უჯინე თის. უმენტაშ შემთხვევას, თენა ემოციურო ანადგურენს პიროვნებას. მართალ რე, შილებე თე მდგომარეობაშე დრო ხანიშ უკულ გეგშართე, მარა თინა იშენით იტენს გლახა შედეგეფს.

დარწმუნებულ ოკო ვორდათ, ნამდა იეჰოვა მოხვარნა დუდ ევუჩილითუათ სატანაშ მახეეფს. ქუმოკონა იეჰოვაქ დოფთხილუან-და, ისრაელეფიშ გინაწონს, მთელ გურით ოკო დევემორჩილათ თის (გამ. 19:5). ჩქი ოკო მარჩქილედან, ნამდა ღორონც ჯოგჷ, მუჟამსით ხალხ პორნოგრაფიას უჯინე. მუშენ შემლებნა თეშ რაგად?

დეფიქრით, მუჭო გენესხვავებუდ ისრაელეფშა მეჩამილ ღორონთიშ კანონ შხვა ერეფიშ არძა კანონშე. ღორონთიშ კანონ შილებე შევადარათ კიდალას, მუშენდა თე კანონ იცვენდჷ თინეფს შხვა ერეფიშ გლახა წეს-ჩვეულებეფშა მონაწილებაშ  მეღებაშე (კან. 4:6—8). თე კონონეფშე არგამათ იძირე, ნამდა იეჰოვას ჯოგჷ სექსუალურ უზნეობა.

შხვა ერეფიშ უზნეო საქმეეფიშ მოშინაფაშ უკულ, იეჰოვაქ ისრაელეფს უწუ: „ვემიქცუათ ... ქანაანელეფცალო, მიდგაშ ქიანაშა მეპჸუნთ. თინეფიშ დიხა გაუწმინდურებულ რე. დაბსაჯენქ თინეფს მუნეფიშ დუნაშებუშ გურშენ“. ქანაანელეფ თიცალ საზიზღარ საქმეეფს ორთუდეს, ნამდა ისრაელიშ წმინდა ღორონთშო თინეფიშ დიხა უწმინდურ რდუ (ლევ. 18:3, 25).

მართალ რე, იეჰოვაქ დასაჯ ქანაანელეფ, მარა შხვა ერეფ აგრძელენდეს სექსუალურ უზნეობას. 1 500-შე მეტ წანაშ უკულ თი ერეფიშ გურშენ, მიდგაწკუმა ართო ქრისტიანეფ ცხოვრენდეს, პავლე მოციქულქ თეცალ სიტყვეფ თქუ: „ირნერო ზნეობა დინაფილეფ, ეიშკვეს, ნამდა ირნერ უწმინდურება გაკეთან ურძღაფელობათ“ (ეფეს. 4:17—19). ამდღა ხოლო ბრელ იქციებ უზნეოთ დო შურო ვა წუხენა თეშ გურშენ. ჭეშმარიტ ქრისტიანეფქ ირნერო ოკო ვეცადათ დუდ ევუჩილითუათ ირნერ უზნეობაშ ჯინას.

პორნოგრაფია ღორონთიშ სახელს შეურაცხყოფას მიორინუანს. თიქ ადამიანეფ მუშ ამნახანტო გაჭყჷ დო ჯგირ დო ფურიშ გარჩიებაშ უნარ მეჩჷ. თიქ გონივრულო მიქცუ, მუჟამსით სექსუალურ ურთიერთობეფშო გარკვეულ ზღვარ დადგინ, მუთ თის ნიშნენდჷ, ნამდა სექსუალურ ურთიერთობა ხვალე დაქორწინებულეფს ოკო უღდესკო (დაბ. 1:26—28; იგავ. 5:18, 19). მარა მუშ რაგად შილებე თინეფშე, მით გიშაშკვანს ვარდა ავრცელენს პორნოგრაფიულ მასალას? თინეფ მუთუნო ვემირჩქინანა ღორონთიშ ზნეობრივ ნორმეფს დო თიშ სახელს შეურაცხყოფას მიორინუანა. ღორონთ დასაჯენს თინეფს, მით გინურთანს თიშ ზნეობრივ ნორმეფს დო ხეს უნწყუნს უზნეო მასალაშ გიშაშკუმალას ვარდა გავრცელებას (რომ. 1:24—27).

მუშ რაგად შილებე თინეფშე, მით შეგნებულო კითხულენს ვარდა უჯინე პორნოგრაფიულ მასალას? ნამთინე შილებე ფიქრენდას, ნამდა თეცალ გართობას მუთუნ ზიან ვა მოჸუნს. მარა სინამდვილეს, ხუც უკინენა თინეფს, მით მუთუნო ვემირჩქინანს იეჰოვაშ კანონეფს. შილებე თენა ვა უდღან მიზანო, მუჟამსით პორნოგრაფიაშ ჯინას იჭყანა. მარა ბიბლია გასაგებო იჩიებ, ნამდა ჭეშმარიტ ღორონთიშ თაყვანიშმცემლეფს ოკო ჯოგდან პორნოგრაფია. ბიბლია მომწოდენა: „იეჰოვაშ  მოჸოროფეეფ, გიჯოგეთ უბადობა“ (ფსალმ. 97:10).

თინეფშო ხოლო, მით ოცადნა დუდ ეუჩილითუან პორნოგრაფიაშ ჯინას, შილებე თეშ კეთება ადვილ ვა რდას. ჩქი არასრულყოფილეფ ვორეთ, ათეშენ შილებე არასწორ სექსუალურ სურვილეფწკუმა მაჸუან ობრძოლებერქ. ხოლო უმოს, შილებე ჩქინ არასრულყოფილ გურქ მოფიქრებაფუან, ნამდა პორნოგრაფიაშ ჯინას მუთუნ გლახა ვა რე (იერ. 17:9). მარა ბრელქ, მიდგაქ ქრისტიანო გინირთჷ, დამტკიც, ნამდა შემლებნა მივერუათ არასწორ სურვილეფს. თეშ რჩქინა გურშა ელაიკინანა დო დუგარწმუნენა, ნამდა თქვა ხოლო შეგალებენა ქეწინააღმდეგათ არასწორ სურვილეფს. დეფიქრით, მუჭო მიგეხვარებნა ღორონთიშ სიტყვა დუდ ეუჩილითუათ სატანაშ ართ-ართ მახეს, პორნოგრაფიას.

მუჭოთ ჟიშე მიფშინეთ, ბრელ ისრაელქ გეიაჸუნ არასწორ სურვილეფს, მუდგაქ გლახა შედეგეფშა ქიმიჸუნ. თეცალ მუდგარენქ შილებე ამდღა ხოლო ქუმოხვადას. იესოშ ჯიმაჸონერ იაკობიქ ჭარჷ: „თითოულს გიმოცადუნს მუშ სურვილ . . . სურვილ, მუჟამსით გევითარებუნ, ცოდვას მიღანს“ (იაკ. 1:14, 15). მუჟამსით პიროვნება საშვალებას ქიმეჩანს უზნეო ფიქრეფს, გევითარას თიშ გურს, შილებე ცოდვა ჩედინას. თაშ ნამდა, დუვანძალათ ოკო ჩქინ დუც, მივოტუათ უზნეო სურვილეფშე ფიქრი.

მუჟამსით უზნეო ფიქრეფ ქუმგალენა, ხეთეშე მიღით ზომეფ. იესოქ თქუ: „ათეშენ ხე ვარდა კუჩხი გაბრკოლენს-და, მიკვათ დო გეგნაჸათ . . . თოლ ქუგაბრკოლენს-და, გელიჸოთ დო გეგნაჸათ“ (მათ. 18:8, 9). იესოს პირდაპირ გაგებათ ვა უთქუალ, ნამდა დებზიანათ ჩქინ სხეულ. თინა გულისხმენდჷ, ხეთეშე ჩეფთხინეთკო ირფელ, მუთ მაბრკოლენა. მუჭო შემლებნა თე რჩევაშ გათვალისწინება, მუჟამსით საქმე პორნოგრაფიას ოხუ?

პორნოგრაფიას თოლ შემთხვევით ქუმუკინდეთ-და, ვეფიქრათ, ნამდა თენა პრობლემა ვა რე. ხეთეშე ჩაუთხინეთ თის თოლ. თიმ წუთის გოთიშით ტელევიზორ, კომპიუტერ ვარდა მობილურ მოწყობილობა. ყურადღება გეგნიღით თიცალ მუდგარენშა, მუთ ზნეობრივო წმინდა რე. თეცალ მოქციება მიგეხვარებნა აკონტროლათ თქვან ფიქრეფი დო ვეიაჸუნათ არასწორ სურვილეფს.

შილებე მიოტეთ პორნოგრაფიაშ ჯინა, მარა ჯინელ კადრეფ მინშა დუც გუგოშინანა. მუჭო ოკო მიქცუათ თეცალ დროს? პორნოგრაფიულ კადრეფქ დო ფიქრეფქ შილებე დიდ ხანს ქუდოსკიდას გონებას. თექ შილებე პიროვნებას ნებისმიერ დროს ქუგაშინას დუდ. თაშ ქუმოხვად-და, შილებე მუდგაინ არასწორ გაკეთას, მაგალთო მასტურბაცია ვარდა ხოლო უფრაშ. თაშ ნამდა, თეცალ ფიქრეფქ შილებე ველუთინ თეშ ქუმოირთან, ათეშენ მზათ რდათ, ქეწინააღმდეგათ თის.

მტკიცას გაფდან გინოჭყვიდილ, თქვან აზრეფ დო მოქმედებეფ ღორონთიშ ნებას ოსადაგდას. მიაჸუნით მოციქულ პავლეშ მაგალითის, ნამუქით თქუ: „ბლახუნქ დო იმობრჩილენქ ჩქიმ სხეულს“ (1 კორ. 9:27). ვემეჩათ უზნეო ფიქრეფს თიშ უფლება, გაკონტროლან. „გეახალით გონება დო დითირით, ნამდა დერწმუნათ, მუ რე ღორონთიშ ნება — ჯგირ, მოსაწონ დო სრულყოფილ“ (რომ. 12:2). ვაგგოჭყორდან: ღორონთიშ ნებაშ თანახმათ ფიქრი დო მოქმედება ბრელით უმოს კმაყოფილებას მოიღანა, ვინემ უზნეო ფიქრეფიშ ეჸუნა.

ქეცადით, ქიდემახსოვრათ ნამთინე ბიბლიურ მუხლი დო მუჟამსით უზნეო ფიფქრეფ ქუმგალენა, დანძალით თქვან დუც, იფიქრათ თე მუხლეფშე. მაგალთო, ფსალმუნიშ 119:37, ესაიაშ 52:11, მათეშ 5:28, ეფესოელეფიშ 5:3, კოლოსელეფიშ 3:5 დო 1 თესალონიკელეფიშ 4:4—8 მიგეხვარებნა პორნოგრაფიაშე თიცალ დამოკიდებულება გიღდან, მუნერით იეჰოვას უღჷ დო ქიგეგენთ, მუშ კეთებას ელჷ თინა ჩქინდე.

მუშ კეთება შეილებნა, მუჟამსით მინშა გირჩქინდუნა სურვილ, ქუჯინათ ვარდა იფიქრათ უზნეო სცენეფშე? დეფიქრით იესოშე დო მიაჸუნით თიშ მაგალითის (1 პეტ. 2:21). ნათუაშ უკულ, სატანაქ ქეცად იესოშ მეჩილითაფას. მუჭო მიქცუ იესოქ? თინა თეიშახ ოწინააღმდეგუდ სატანას, სოიშახ ვედეთხუ. იესოქ წმინდა წერილეფშე მუხლეფიშ გიმორნაფათ ქეწინააღმდეგ სატანაშ არძა ცდუნებას. თიქ სატანას უწუ: „ჩემეთხი სატანა!“ დო სატანაქ ქიდიტუ თინა. იესოცალო, ნამუქით ბოლოშა ქეწინააღმდეგ სატანაშ ხრიკეფს, თქვა ხოლო ვემიოტუათ ბრძოლა (მათ. 4:1—11). სატანა დო თიშ ქვეყნიერება ირიათო ეცადებ გონება უზნეო ფიქრეფით ეიფშან, მარა გაგრძელათ ოკო ბრძოლა. იეჰოვაშ მოხვარათ თქვა შეგალებენა გიორჯგინათ პორნოგრაფიაშ ჯინაშ სურვილს დო თეშნერო მერუათ თქვან ნტერს.

ვემიოტუათ ლოცვა დო ქოთხით იეჰოვას მოხვარა. პავლექ თქუ: „ქუწით არძა თქვან ოთხუალ ღორონც, დო ღორონთიშ მშვიდობა, ნამუთ ირნერ აზრიშე უმოს რე, დოთხილანს თქვან გურეფს დო გონებას ქრისტე იესოშ საშვალებათ“ (ფილ. 4:6, 7). ღორონთ ქიმერჩანა მშვიდობას, ნამუთ მიგეხვარებნა ქეწინააღმდეგათ უზნეო სურვილეფს. იეჰოვას დეახლოებუთ-და, „თინა ხოლო დეგეახლოებნა“ (იაკ. 4:8).

იეჰოვაწკუმა ხოლოშიან ურთიერთობა არძაშ უჯგუშ საშვალება რე, დუდ დიფთხილუათ სატანაშ მახეეფშე. იესოქ თქუ: „ქვეყნიერებაშ მართველ მოურს. თის მუთუნნერ ძალაუფლება ვა უღჷ ჩქიმწკუმა“ (იოან. 14:30). მუშენ რდუ იესო თეცალ დარწმუნებულ? თიქ ართშა თქუ: „ჩქიმ მუმაშკუმალარ ჩქიმწკუმა რე. თის ხვალე ვა დუტებუქ, მუშენდა ირიათო თის ვორთუქ, მუთ თის მოწონს“ (იოან. 8:29). იეჰოვაშ მოსაწონო ქიმიქციებუთ-და, თინა დღას ვემგოტენა. დუდ ეუჩილითეთ პორნოგრაფიაშ ჯინაშ მახეს დო სატანას დღას ვეშიალებე თქვან მეჩილითაფა.