HO AGU aYisaraere naadu mbata aambeda ni ka si gu Di nga Yaradene ku rogo gu rago Mbori akidopaha fuyo, gu kura aboro aye ka bi yo. Agu aboro naye ka bi yo re angia agu adee naangianga aYisaraere ya na i ki yambu agu akumba nangia aYisaraere tipa pumbo. Si aima rengba ka ngera wa gu pa momu ni naamanganga dedede ya. Zio vovo abakure, dogbere, na kini ri wene ariahe aima rengba ka ngera wa gupai naadu ni bawenehe. Gu sino mangapai nangia ga agu adee naangianga aYisaraere re ya na gayo gene raka aadunga wa gu aYisaraere awirikihe rogo ga Mbori aNdiko yo te, gu kura akumba nangia aYisaraere aima rengba ka berã gupai nga: ‘I agbarasa nga rani te. Ani nika duadu na rubangirise.’

 Ginipai naamangi? Gu pangbanga ga Mbori toro adu kugiipa kehe naya: “Aboro ki tona ka manga pa sino bari na awiri aMoabo nga ade.” Ono tie, gupai agu adee re aaidaha nga agu akumba nga aYisaraere re tona iriso ziree ambori. Na i aima tona ka iriso ziree ambori! Si nirengo nga, ‘Ga Yekova zinga arungudi kuti aYisaraere.’​—Geda 25:1-3.

Agu aYisaraere re akuo ga Mbori Andiko ngba agene ue: I anugodi fu akpiahe, na i ki mangi wasiwasi kodaba. Akutu aboro akpiki mbiko gayo basasangba. (Gate 20:4, 5, 14; Pa Rug. 13:6-9) Ginipai nasa gupai nga gayo mangaapai du ni pa kere gberãrago? Gu regbo i amangi gupai re ti ni. Ka agu akumba re aakuonga ga Mbori aNdiko ya, ka gu akutu aYisaraere re aima si Yaradene ku rogo Ringara Mokido.​—Geda 25:5, 9.

Nibipa agu apai namangi re, gu mokedi nangia Pauro akepai ki ya: “Agi apai amangi yo ni kpia pai; si ki du ni keke he tipa za rani, nga agu yo ye digida rago ku auru yo.” (1 Kor. 10:7-11) Zanga kapa, Satana aima du na bakere ngbarago nga bete agu aYisaraere re aima ti ku rogo kere ingaapai na ka i arẽnga berewe ka rimo ku Ringara Mokido yo ya. Si naida ani wirikipai ti gayo ingahe bambiko ani ima ino gupai nga Satana ima rengba kadu na bakere ngbarago ka ko ká na ani ti rimo ku rogo ga Mbori vovo zegino!

Satana naida ka zio aKristano na gbina na tipa ko mangi gipai re, ko namangasunge na agu abirĩ ko aima mangasunge na ni mbata kidu na diabese. Wa gu i nifura tipaha kusayo tipa gupai ko amangihe na aYisaraere, ko namangasunge na wasiwasi kodaba. Ti gi gaani regbo re, wasiwasi kodaba kindi nga kere gbina. Bangua gene sa rengbe wasiwasi kodaba kadu na maapai kurirani ngbaha nga, bi agu ahe nazingisa nyemu kodaba.

Areme, boro rengbe kaa bi agu ahe nazingisa nyemu kodaba ka kura aboro ainongo pai tipa gupai ni amangaha ya. Mbata kusayo, gu boro naniʹidi ka bi kpia kundiri aboro anaandu ku rogo gu ba i abi avidio rogoho tipa ka bi gu vidio du na kpia kundiri aboro rogoho watadu ka ndu ku rogo gu ba baga awaraga nga ga kpia kundiri aboro tipa ka ngbe gu waraga du na kpia kundiri aboro rogoho. Badungu aboro anaandunga ku rogo agu aba re te mbiko zee anaazio yo azio nga aboro nika biyo. Ono awere, agu aboro rengbe ka rimo Internet ima rengba ka bi kpia kundiri aboro ba gayo asunge yo watadu i ima rengba kaa bihe rogo gayo atarambiri. Na rogo dungu aringara, kumba watadu dee ima rengba kaa bi kpia kundiri aboro kina kpuni yo.

Anga kina gure sa te. Aterefuni ima saha taata fu aboro i naabi kpia kundiri aboro. Ho aboro andu ni bangiri gene, rogo tarambiri watadu rogo gatara, i ima rengba kaa bi wasiwasi asura rogo gayo aterefuni, atablet, na akompiuta.

Wa duhe nga si ima du taata awere tipa boro bi kpia kundiri aboro na kini okõ gupai nga ni nabihe, si naye na kerepai kuti aboro awere kisusi wai si anidu mbata kusayo. Badungu agu aboro nabi kpia kundiri aboro nagbarasa gayo rogatise, gu irisa du aboro na ni koyo du yo ni, gbiati gayo sangbakpotoseyo. Gu gberẽ agberã berewe kisusi nga, i namaa pa gbarasa gayo pabakure na Mbori ngbapai yo. Oni ima rengba kadu na gu kido nga bi kpia kundiri aboro nayeaye na kerepai kuti agu aboro nabihe. Bi kpia kundiri aboro namaapai kurii aboro ngba gbegberẽ gene na gu gbegberẽ asangbanaha re nanye tipa gbanga regbo. Na ti kura regbo ka boro dinga gu gbegberẽ sangbaha re kusayo te.

Ono tie, si naida ani rugutirani na gupai nga Yekova nafu bandahe furani be gi ga Satana gbina re. Ka ani aida Yekova banda rani, si naida ani irisi kina ko sa, nga gupai agu akumba nangia aYisaraere akpa ti mangaha. (Gate 19:5) Si naida ani rugutirani na gupai nga Yekova ima sogo agu ahe nazingisa nyemu kodaba. Tipagine ani apehe ti ni wo?

Mo berẽnga kurii gipai re: Agu andiko Mbori afuhe fu ringara aYisaraere adu kia ti agu andiko kura aringara anaaraka kutini. I rengbe ka ringbisa agu andiko Mbori afuhe fu aYisaraere kuti ngapa, nga gu  naabanda yo be gu maapai kurii nangia ga agu arikaaboro naadu patiyo. (Pa Rug. 4:6-8) Agu andiko re aima yugo gu nyanyakipa rengo duho gbaiga nga: Yekova ima soga wasiwasi kodaba.

Yekova agumbapa gu gbegberẽ apai agu aboro naadu pati aYisaraere amangihe na ko ki ya fu aYisaraere wẽ: ‘Ka oni nimángi nga pai wa i anamanga ha ringara Kanana yo a ya, nga gu ringara mi aye na oni ku rogo ho. . . . Ringara gberẽ, si du mi ambúsa gaha irairapai.’ Bangiri gu ziazia Mbori nangia ga aYisaraere ko, ga aKanano raka aima gberã ni kerehe na kidu ni kere wasiwasihe si ki sa gupai nga ko bi ringara aKanano ni bibiriko ho na ni kere gbegberẽhe.​—Pa Mot. 18:3, 25.

Wa vura duhe nga Yekova aima fu mbusa fu aKanano, gu kura aboro aandu kindi kumbatayo kaa manga wasiwasi kodaba. Fuo susa agarã 1,500 kusa, Pauro afura tipa agu aboro aKristano araka dagbayo nga “i susi ina pa he ki fu tiyo fu wasiro.” Zaatu, i “[amangi] birikobiriko apai dunduko ni gbangbati.” (Ef. 4:17-19) Areme a, badungu aboro namanga dungu bibiriko apai, na zee amanganga yo na ni te. Rogo dungu aba areme, si naida ndikidi airisimbori ne biko gu gbegberẽ mangaapai nga ga agu aboro du rogo gi zegino re.

Bi kpia kundiri aboro nayugo bakere zanga irisa fu Mbori. Ko akusi aboro rogo kpiako yo na i du wakina ko. Ko afu gu sino furani nga ga ino wenepai watadu ka ino gbegberẽpai. Mbori angia iratatamana ho ko afu andiko ni tipa kodaba. Ko amoi kodaba tipa arogotise gbia ngbarago behe. (Bam. P. 1:26-28; Snz. 5:18, 19) Ono ginipai agu aboro nakusa agu ahe na zingisa nyemu kodaba na kini ngarasi paha amangaha? I ayugongo irisa kandara tooni tipa gu ga Mbori ruru arugute du tipa raka te. Si ni rengo nga, agu aboro nasonosa pa agu ahe nazingisa nyemu kodaba nayugo zanga irisa fu Yekova. Mbori nika sapangbanga agu aboro asapa nakusa agu ahe nazingisa nyemu kodaba ti aboro na kini ngarasi pa agu awaraga du na kpia kundiri aboro rogoho.​—Rom. 1:24-27.

Ono na ginipai tigaha du tipa agu aboro nata inoaino kini bi kpia kundiri aboro watadu kini gedipaha? Kura aboro ima rengba ka bihe nga si gbua nga kungbo aũngbarago adunga kerepai ti ni ya. Ono tie, i nasongoda agu aboro abingo ga Yekova ruru arugute tipa ruru mangapai na nyanyakipaha ya. Si ima rengba kadu nga anga gipai re naadu berãyo yo ho i atona bi kpia kundiri aboro ni te. Ono Ziazia Kekeapai ima yugoho ziazia nga si naida airisi ndikidi Mbori  sogo bi agu ahe nazingisa nyemu kodaba. Ziazia Kekeapai nangarasa rani nga: “Ako, agu roni nakpi nyemu Yekova, oni sógo gbigbitapai.”​—Tam. 97:10.

Si ima rengba ka kpakara zavura fu agu aboro naida ka ne bi agu ahe nazingisa nyemu kodaba. Kpakpa aboro nga ani, na si naida ani sovura aso tipa ka ká gu bibiriko nyemupai nga ga kodaba. Berewe a, mbiko gupai nga ani nga kpakpa aboro, ani ima rengba ka ya fu tirani gberẽ ngaha ka bi agu ahe nazingisa nyemu kodaba te. (Yere. 17:9) Ono badungu agu aboro naima da ni aKristano ima diabe gi vura re. Ino mo gipai re ima rengba ka fu gu kido foro nga mo ima rengba ka ne bi agu ahe nazingisa nyemu kodaba. Mo bingo wai rengbe Fugo Mbori ka undo ro mo ne gu ga Satana gbina nga ga bi agu ahe nazingisa nyemu kodaba.

A wa i ni pehe kusayo, aYisaraere ambu wasiwasi nyemuapai si gbarasi yo. Gu bangisapai re ima rengba ka manga areme a. Wirina Yesu nangia Yakoba apepa gu kerepai du ti ni ki ya: “Boro . . . ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni. Gu nyemuhe nga ga borose, fuo du he na mobara, si ki vungu ingapai.” (Yak. 1:14, 15) Ka boro mbu wasiwasi nyemupai si sono rogo ni yo, fuo bete regbo, gu boro re nika manga ingapai amanga. Sidu tie, si naida ani mbu berãpa wasiwasi nyemupai kusayo​—ka ani anyenga kaa berã kina kuriihe ya.

Ka mo bi gupai nga mo nanye kaa berã kina kurii wasiwasi apai, si naida mo mangipai ni ipo. Yesu aya: “Were si ngia bero na nduro ka mangi ro mo koto, mo ki yere he ayera. . . . Singia bangiro ka mangi ro mo koto, mo ki mo ho amo.” (Mt. 18:8, 9) Anga gupai Yesu aaida ka gumbaha nga ani gbarasi ndikidi kpotorani te. Ko aamangasunge na kpiapai tipa ka undo rani ani rugutirani na ndu gupai ani aberã gbegberẽ aberã ti ni na ani ki mangi gu ariapai si aidaha. Waigu rengbe ani ka mangasunge na gu rugute re nibipa bi agu ahe nazingisa nyemu kodaba?

Ka mo kuru bara agu ahe nazingisa nyemu kodaba, ka mo yanga wẽ, ‘Mi ima rengba ka mangapai sa ni’ ya. Mo di bangiro ti ni kusayo ni ipo. Mo kisi terevizioni nibasa. Mo kisi kompiuta watadu terefuni ni ipo. Mo aria berãro kuti gupai duni gigirihe. Manga mo agi apai re nika undoro tipa mo banda berãro kuba gupai nga kaa berã kurii wasiwasi nyemupai.

Na ka si du nga mo aima mbu bi agu ahe nazingisa nyemu kodaba, ono mo natingidapa gupai atingida mo abihe? Kpia kundiri aboro watadu gaha aberã ima rengba ka nye rii boro yo tipa gbanga regbo. Si ima rengba ka ye ku berãro yo ti ai regbo. Ka si mangi wo, si ima rengba ka saro mo mangi bibiriko pai, wa zapada barangbase. Sidu, mo ini gupai nga ngbatunga agu aberã re ima rengba ka ye ku berãro yo, na mo mbakadi tiro ka sovura kutini.

Mo moihe ni gamo diaberã kaa berã na kaa mangapai wa gu Mbori aida mo mangihe. Mo du wa gu mokedi nangia Pauro, nga guko naima du regerege ka ‘manga boroko ka sa ha ni kanga fuko.’ (1 Kor. 9:27) Ka mo mbunga bibiriko nyemuapai si sa ro ni kanga ya. ‘Mo sá tiro ni mbakada berãro berewe, mo kpária pa gu he nga ga Mbori nyemu he du ni wene he, nzunzu, ni ziazia ha.’ (Rom. 12:2) Mo tingidi gupai nga: Ngbarago ho ti manga wasiwasi apai te ngbarago sa kina ti berã na kini mangipai wa gu Mbori aidaha.

Mo asadi kaa pe kura averesi ngbariro. Ho gbegberẽ aberã nika ye ni kuriro yo mo ki asadi tiro ka berãpa agu averesi re. Averesi wa Atambuahe 119:37; Yesaya 52:11; Matayo 5:28; AEfeso 5:3; AKorosaio 3:5; gbiati 1 ATesaroniko 4:4-8 nika undo ro mo naabi agu ahe nazingisa nyemu kodaba wa gu Yekova abihe na si nika sa ro mo rugutiro na pa gupai ko aida mo mangihe.

Ginipai rengbe mo ka mangaha ka mo bi gupai nga ka mo nenga nyemu bi wasiwasi apai te watadu ka mo zanganga berãkuriihe te? Mo pekefuo gu bawene kpiapai nga ga Yesu. (1 Pet. 2:21) Tingbafuo Yesu zi bapatiza, Satana anye kindi kaa asadako. Ginipai Yesu amangihe? Ko aaká kindi. Yesu aamangasunge na badungu averesi ho ko aaká ga Satana aʹasada ni. Ko aya: “Satana, mo gúari erẽ!” na Satana ki mbuko. Kina wai Yesu aambunga sovura kuti bakitingbanga ya, kinawo a si aidanga mo mbu sovura kutiko ya. (Mt. 4:1-11) Satana na gako zegino nikaa ndu kindi kumbatayo kaa hiso berãro na wasiwasi aberã, ono ka mo henga sovura ya. Mo ima rengba ka diabe biko agu ahe nazingisa nyemu kodaba. Yekova nika undo ro aundo mo dibe vuraro.

Mo nindu kindi kumbatayo kaa kpara fu Yekova na kini sanako tipa ko undo ro. Pauro aya: “Oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (Frp. 4:6, 7) Mbori nika fu gu zereda foro nga ga berãse yo tipa si undoro mo ká manga gupai duni gbegberẽhe. Ka mo mbedi na Yekova, ‘ko ka mbeda na mo a.’​—Yak. 4:8.

Gu bawenepai nika banda ro be ai kerepai nga ka mbeda na Bakere Bakindo nga ga haurago. Yesu aya: “Kindo zegino [nga Satana] naye, ka tandu adu nga be ko auru re ya.” (Yo. 14:30) Tipagine Yesu adu ti ni na gu kido re? Ko asakirogoyo ki ya: “Gu ko nakedi re ani na ko; ko ahe nga re ni sa re te; bambiko mi namanga kina agu apai ngba ti ko waragoagira.” (Yo. 8:29) Ka mo aamanga agu apai nafu ngbarago fu Yekova, ko ambunga ro a te. Mo ne gu gbina nga ga bi agu ahe nazingisa nyemu kodaba, na Satana arengbanga ka zio ro na gako gbina te.