1-2. (a) Ma lubbe ki cik ma Yecu omiyo i Matayo 28:18-20, tic ma pire tek loyo pa kacokke pa Lukricitayo obedo ngo? (b) Lapeny mene ma wabinyamogi i pwony man?

I NGE cerre, Yecu oketo yub pi lupwonnyene me rwatte kwede i wi got mo i Galilaya. I kare ma gugure i kabedo meno, lukwenane nen calo gubedo ki miti me ngeyo pingo kilwongogi. (Mat. 28:16) Meno aye nen calo obedo kare ma en “onen bot utmego makato miya abic lawangacel.” (1 Kor. 15:6) Pingo onongo Yecu olwongo lupwonnyene i cokke man? Me minigi tic ma kelo yomcwiny adada ni: “Wuciti wucilok jo me rok ducu gudok jo ma luba.”​—Kwan Matayo 28:18-20.

² Lupwonnye ma guwinyo lok pa Yecu-ni lacen gudoko lumemba me kacokke pa Lukricitayo me cencwari me acel. Tic ma pire tek loyo pa kacokke meno onongo obedo me loko dano wek gudok lupwonnye pa Kricito. * I kare-ni, watye ki kacokke alip mapol pa Lukricitayo me ada i twok lobo-ni ducu, dok tic ma pire tek loyo pi kacokke magi peya olokke. I pwony man, wabinyamo lapeny angwen: Pingo tic me loko dano pire tek adada? Tic me loko dano kwako ngo? Tika Lukricitayo ducu gitwero konyo me loko dano? Ki dong, pingo tic me loko dano mito diyo cwiny?

3. Ma lubbe ki Jon 14:6 ki 17:3, pingo tic me loko dano pire tek tutwal?

³ Pingo tic me loko dano pire tek adada? Pien lupwonnye pa Kricito keken aye ma gitwero doko lurem Lubanga. Medo i kom meno, jo ma lubo kor Kricito kwogi yubbe i kare-ni dok gibedo ki gen me nongo kwo ma pe tum i anyim. (Kwan Jon 14:6; 17:3.) Labongo akalakala mo, Yecu ominiwa tic ma pire tek, ento pe watimo tic man kenwa. Lakwena Paulo ocoyo i kome kekene ki lureme mogo macok ni: “Wan lutic kacel ki Lubanga.” (1 Kor. 3:9) Jehovah gin ki Yecu pud dong gumiyo mot madit bot wan dano ma watye ki roc ya!

4. Ngo ma watwero pwonyo ki i kom gin mutimme i kom Ivan ki Matilde?

⁴ Tic me loko dano twero keliwa yomcwiny madwong. Nen kong labol pa Ivan, ki dakone Matilde, ma gibedo i lobo Colombia. Gutito kwena bot awobi mo ma nyinge Davier, ma owaccigi ni: “Amito loko kwona, ento pe larre.” Davier onongo obedo ladong bunia, ma tiyo ki yadi calo jayigi-ni, en bene onongo lamero matek, dok gibedo kacel ki anyaka mo ma nyinge Erika kun pe gunyomme. Ivan otito ni: “Wacako limme i caro ka mabor ma en bedo iye, dok onongo mitte ni wanyon lelawa pi cawa mapol i yo ma opong ki coto me o kunnu. I kare ma Erika oneno alokaloka maber ma tye ka timme i kom Davier, en bene ocako kwano Baibul kacel kwedwa.” I nge kare mo, Davier oweko tic ki yadi, ojuko mato kongo kacel ki dongo bunia. En bene onyomo Erika. Matilde otito ni: “I kare ma Davier ki Erika gunongo batija i mwaka 2016, wiwa opo ni con onongo Davier maro waco ni, ‘Amito loko kwona, ento pe larre.’ Yomcwiny ma wawinyo oweko wakok ki pig wangwa.” Labongo akalakala mo, wabedo ki yomcwiny madwong adada ka wakonyo ngat mo me doko lapwonnye pa Kricito.

5. Gin ango mukwongo ma omyero watim me loko dano wek gudok lupwonnye pa Kricito?

⁵ Gin mukwongo ma watimo me loko dano aye ka ‘wayenyo anga’ ma tye ki cwiny matir. (Mat. 10:11) Wanyuto ada ni wan Lucaden pa Jehovah ka wamiyo caden bot dano ducu ma warwatte kwedgi. Wanyuto ni watye Lukricitayo me ada ka walubo cik pa Kricito me tito kwena.

6. Gin ango ma twero konyowa me cobo ticwa me pwony maber?

⁶ Jo mukene gitye ki miti me pwonyo lok ada me Baibul, ento jo mapol ma warwatte kwedgi pe ginyuto miti i acakkine. Twero mitte ni watug mitigi. Wek wacob ticwa me pwony maber, omyero wayubbe maber adada. Yer pwony ma twero tugo miti pa jo ma irwatte kwedgi. Ci iyub kit ma ibicako kwede lok i kom pwony meno.

7. Itwero cako lok ki dano nining, dok pingo itamo ni pire tek me winyo lok pa dano ki minigi woro?

⁷ Me labolle, iromo penyo rwod ot ni: “Tika atwero niang tammi i kom lok man? Pekki ma watye ka kato ki iye i kare-ni gudo dano ducu ma i but lobo man. Tika itamo ni gamente acel ma loyo lobo ducu aye twero cobo pekki magi ducu?” Ci itwero kwanne Daniel 2:44. Nyo bene itwero waco bot jiranini ni: “Itamo ni yo ango maber loyo me pwonyo lutino wek gubed jo ma wor? Amito  niang tammi i lok man.” Ci itwero nyamo lok ma tye i Nwoyo Cik 6:6, 7. Kadi bed iyer pwony mukene, tam kong i kom jo ma gibiwinyo lokki. Go kong kit ma gibinongo kwede adwogi maber ka gupwonyo gin ma Baibul ada pwonyo. Ka itye ka lok kwedgi, pire tek ni iwiny lokgi dok iwor tamgi. Man bikonyi me niang tamgi maber, dok gitwero bedo ki miti me winyo lokki.

8. Pingo dok cen ka limo dano mito diyo cwiny?

⁸ Ma peya dano moni omoko tamme me kwano Baibul, twero mitte ni iter cawa malac dok itute me dok cen ka limme tyen mapol. Pingo? Pien jo mapol pe gibedo tye gang ka wadok cen ka limogi. Medo i kom meno, twero mitte bene ni idok cen tyen mapol wek rwod ot owiny agonya me kwano Baibul kwedi. Wi opo ni, yat dongo maber ka kionyo pii i tere kare ki kare. I yo acel-lu, mar pi Jehovah ki Kricito twero dongo i cwiny ngat ma tye ki miti ka wanyamo Lok pa Lubanga kwede kare ki kare.

9-10. Pingo watwero wacone ni latit kwena acel acel nywako i tic me yenyo jo ma cwinygi atir?

⁹ Latit kwena acel acel nywako i tic me yenyo jo ma cwinygi atir. Watwero poro tic man ki tic me yenyo latin ma orweny. I yo ma nining? Tam kong i kom gin mutimme i kom latin awobi mo me mwaka adek ma orweny woko ki gang. Dano ma romo 500 guyenyo latin awobi man. Lacen, i nge cawa 20 ma latin man orweny kwede, lami kony mo onongo latin-ni i poto anyogi mo. Lami kony meno okwero jolo pwoc ki deyo pi nongo latin man. En owaco ni: “Otero dano miya mapol me nongo latin man.”

 ¹⁰ Jo mapol gitye calo latin man. Giwinyo calo gurwenyo woko. Pe gitye ki gen mo, ento gimito kony. (Ep. 2:12) Lucaden pa Jehovah ma welgi kato milion aboro gitye ka yenyo jo ma kit man. Twero bedo ni pe inongo ngat mo ma mito kwano Baibul kwedi. Ento lutit kwena mukene ma gitye ka tic i wang tic acel-lu guromo nongo ngat mo ma mito pwonyo lok ada ma tye i Baibul. Ka omego nyo lamego mo onongo ngat mo ma lacen odoko lapwonnye pa Kricito, jo ducu ma gunywako i yenyo dano meno gibedo ki yomcwiny.

11. Kadi bed ni kombeddi pe itye ka kwano Baibul ki ngat mo, i yo mukene mene ma itwero konyo me loko dano wek gudok lulub kor Kricito?

¹¹ Kadi bed ni kombeddi pe itye ka kwano Baibul ki ngat mo, pud itwero konyo me loko dano i yo mukene. Me labolle, itwero jolo jo manyen kun ikonyogi ka gubino i Ot me Ker. I yo meno, ikonyogi me moko ni mar aye gin ma nyuto ni wabedo Lukricitayo me ada. (Jon 13:34, 35) Lagam ma imiyo i cokke, kadi cek, twero pwonyo jo manyen kit me tito pi niyegi i yo ma nyuto woro kun a ki i cwinygi. Itwero bene cito ki latit kwena manyen i tic me pwony kun ikonye me tic ki Ginacoya me nyamo lok ki dano. Ka itimo kit man, nongo itye ka pwonyo en me lubo lanen pa Kricito.​—Luka 10:25-28.

12. Tika omyero wabed ki diro mo ma kite dok pat wek wapwony dano gudok lulub kor Kricito? Tit kong.

¹² Pe omyero watam ni mitte ni wabed ki diro mo ma kite dok pat wek wapwony dano me doko lulub kor Yecu. Pingo? Tam kong i kom labol pa laminwa Faustina, ma bedo i lobo Bolivia. En onongo pe ngeyo kwan i kare ma orwatte ki Lucaden pa Jehovah pi tyen mukwongo. Nicakke i kare meno, en opwonyo kwan manok. En dong onongo batija, dok maro pwonyo jo mukene. Pol kare, en kwano Baibul ki dano abic cabit ki cabit. Kadi bed ni Faustina pe twero kwan maber calo lutino kwanne, en okonyo dano abicel me nongo batija.​—Luka 10:21.

13. Kad bed watye ki jami mapol adada me atima, mot ango ma watwero nongone i tic me loko dano?

¹³ Pol pa Lukricitayo gitye ki tic mapol ma pigi tego ma omyero gucob. Kadi bed kit meno, ginongo cawa me kwano Baibul ki dano, dok man kelo botgi yomcwiny madit. Nen kong labol pa laminwa Melanie. En onongo tye ka gwoko nyare me mwaka aboro kene i lobo Alaska. En onongo tye ki dog tic ma wire iye nino ducu kun bene gwoko wonne ma  tye ka twoyo two kanca. Melanie keken aye onongo tye Lacaden i taun mo ma tye kakene ka ma en bedo iye. En onongo lego pi kero me kanyo koyo wek ecit woko ka tito kwena pien en onongo tye ki miti me nongo ngat mo ma etwero kwano Baibul kwede. Lacen en orwatte ki Sara, ma cwinye obedo yom adada me pwonyo ni Lubanga tye ki nyinge. I nge kare mo, Sara oye me kwano Baibul. Melanie owaco ni: “I Ceng Abic otyeno, ma nongo aol adada, wan ki nyara onongo wacito ka kwan ki Sara dok wanongo adwogi maber adada. Onongo wamaro kwedo lok wek wanong lagam pi lapeny pa Sara dok wabedo ki yomcwiny madit me neno ni en odoko larem Jehovah.” Ki tekcwiny, Sara okanyo aunauna, ci oa woko ki i kanicane, dok onongo batija.

14. (a) Tic me loko dano kitwero poro ki tic me mako rec nining? (b) Lok pa Paulo ma tye i 2 Temceo 4:1, 2 gudi nining?

¹⁴ Kadi bed nen calo adwogi mo maber pe tye ka nen i ticci me pwony, pe iil cing woko, medde ki yenyo jo ma gimito kwano Baibul. Wi opo ni Yecu oporo tic me loko dano ki tic me mako rec. Lumak rec gitwero tero cawa malac ma nongo peya gumako rec mo. Pol kare gitiyo i dyewor nyo odiko con, dok i kare mukene omyero gukwang wa ka mabor adada. (Luka 5:5) I yo acel-lu, lutit kwena mogo bene gitero cawa malac ka yenyo dano ma cwinygi atir i cawa mapatpat dok i kabedo mapatpat. Pingo? Gitimo meno wek gurwatte ki dano mapol. Jo ma gitiyo  matek kit man, pol kare ginongo adwogi maber pien girwatte ki jo ma tye ki miti i kom lokwa. Tika iromo tito kwena i cawa ma nongo itwero rwatte ki jo mapol nyo i kabedo ma itwero nongo iye dano mapol?​—Kwan 2 Temceo 4:1, 2.

15. Pingo kwano Baibul ki dano mito diyo cwiny?

¹⁵ Pingo kwano Baibul ki dano mito diyo cwiny? Tyen lok acel aye ni pe omyero wakony latin kwan me ngeyo ki maro gin ma Baibul pwonyo keken. Omyero bene wakonye me ngeyo ki maro Ngat ma omiyo kicoyo Baibul, Jehovah. Dok medo i kom pwonyo latin kwan gin ma Yecu mito ki bot lupwonnyene, omyero bene wakonye me ngeyo kit me kwo macalo Lakricitayo me ada. Omyero wadi cwinywa me konye ka yelle me keto cik ma igi lac me Baibul i tic. Lutino kwan mogo gitwero loko tamgi ki kitgi i nge dwe mogo manok keken; ento mukene gitero kare.

16. Gin ango ma ipwonyo ki i labol pa Raúl?

¹⁶ Gin mutimme i kom lamiconari mo i lobo Peru nyuto adwogi maber ma bino pi diyo cwiny. En owaco ni: “Onongo dong akwano bukke aryo ki latin kwanna me Baibul ma nyinge Raúl. Ento en onongo pud tye ka yelle ki pekki madongo adada i kwone. Onongo tye ki peko i nyomme, maro tic ki leb marac, dok lutinone onongo ginongo tek adada me mine woro. En onongo bino i cokke kare ki kare, pi meno amedde ki limme wek akonye kacel ki lupacone. I nge mwaki makato adek ma arwatte kwede, en onongo batija.”

17. Gin ango ma wabinyamo i pwony ma lubo man?

¹⁷ Yecu owaco botwa ni, “Wuciti wucilok jo me rok ducu gudok jo ma luba.” Me cobo tic meno, tyen mapol mitte ni walok ki jo ma tamgi pat adada ki mewa, kadi wa jo ma pe gitye i dini mo nyo ma pe giye ni Lubanga tye. Pwony ma lubo man binyamo kit ma watwero tero kwede kwena maber bot dano magi.