1-2. (a) Inoñnaga ni oda i Yésu i i mpémél i kaat Matéô 28:18-20, nson u bisu u bikristen yé le kii? (b) Mambe mambadga di ga wan munu yigil ini?

BAÔMA ba bi lama ba nyonok ni maséé ngéda ba bi kodba i ngii hikôa. I mbus bitugne gwé, Yésu a bi yoñ bitelbene le ba koba nye nyoo. (Matéô 28:16) I nene le ha ngéda i nyen ‘a pémél iloo 500 i lôktata ngélé yada.’ (1 Korintô 15:6) Inyuki Yésu a bi naña bo? Inyu bééga bo nson nlam: “Jon kenana, yilhana biloñ gwobisôna banigil.”​—Añ Matéô 28:18-20.

² Banigil ba bi nok bipôdôl bi Yésu ba bi yila bijô bi likoda li hiai hi bisu. Njômbi i bisu i likoda li, i bé i yilha bôt banigil ba Kristô. I len ini, dikôô di makoda di yé ntjamak ni nkoñ ’isi wonsôna, yak mu makoda ma, nson u won u yé jam li bisu. Munu yigil ini, di ga timbhe mambadga ma-na: Inyuki i yilha bôt banigil i nlôôha ba nseñ? I yilha bôt banigil wee kii? Baa bikristen gwobisôna bi ngwel nson u? Inyuki di gwé ngôñ ni wongut mu nson u?

3. Inoñnaga ni kaat i Yôhanes 14:6 ni 17:3, inyuki i yilha bôt banigil i nlôôha ba nseñ?

³ Inyuki i yilha bôt banigil i nlôôha ba nseñ? Inyule ndik banigil ba Kristô bon ba nla ba mawanda ma Djob. Ni ki le, i bet ba noñ Yésu ba nlémés niñ yap i len ini, ba gwé ki botñem i niñ mba ni mba. (Añ Yôhanes 14:6; 17:3.) Ñ, Yésu a bi bééga bés nson nkeñi, ndi di ngwel bé wo bés botama. Ñôma Paul a tila inyu yé ni inyu solôñ yé le: “Di yé bagwelnson lôñ yada ni Nyambe.” (1 Korintô 3:9) Kinje nsima Yéhôva bo Kristô ba bi ti bikwéha bi bôt!

4. Kii ñañ u Ivan bo Matilde u niiga bés?

⁴ I yilha bôt banigil i nlona bés ngandak maséé. Di yoñ hihéga hi Ivan bo nwaa Matilde, i loñ i Kolombia. Ba bi añle hiloga hiada le Davier ñañ nlam, a kal bo le: “Me nsômbôl lémés niñ yem ndi m’a boñ lelaa?” Davier a bé sal bôlô i ôma bikut, a ôdôk hibañga, a hiôôk moog, a niñik ni mbok wé leÉrika. Mankéé Ivan a ntoñol le: “Di bi bôdôl yuuga nye i mbai yé; i bé haa ngandak. Di bé ke mbôñgô liké ni baskô mu nloñ mbe u, inyu bol i nyeni. Ngéda mbok u Davier u bi yimbe le a nkahal héñha, yak nye a bôdôl yigil.” Ndék ngéda mbus, Davier a nwas hibañga, lihua, ni bôlô i ôma bikut. Yak bii, a bii Érika. Matilde a nkal le: “Ngéda Davier bo Érika ba bi sôblana i nwii 2016, di bi bigda bibañga bi Davier bini le, ‘Me nsômbôl lémés niñ yem ndi m’a boñ lelaa?’ Di bi lôôha ba maséé kayéle di ee.” Ibabé nkaa, di nôgda ngandak maséé i ngéda di nhôla bôt bape i yila banigil ba Kristô.

5. Kii i yé jam li bisu di nlama boñ inyu yilha bôt banigil?

⁵ Jam li bisu di nlama boñ inyu yilha bôt banigil, li yé ‘i yéñ’ i bet ba ngwés emble biniigana bi Djob. (Matéô 10:11) I ngéda di nkwélés i bôt bobasôna di mboma likalô, di ñunda toi le di yé Mbôgi Yéhôva. Ngeñ di nôgôl i oda i Kristô i, di ñunda le di yé bañga bikristen.

6. Kii i nla boñ le likalô jés li num matam malam?

⁶ Bôt bahogi ba gwé ngôñ i yi maliga, ndi bape ba yé ba tjél ndugi leege bés bibôdle. Di nlama ti bo ngôñ i emble. Inyu boñ le likalô jés li num matam malam, di nlama kôôba loñge. Pohol miño mi minkwel mi mi ga lémél i bet u ga boma. Mbus, béñge lelaa u ga jubus nkwel.

7. Lelaa u nla bôdôl nkwel ni mut, inyuki i yé loñge i emble ni i diihe mahoñol mé?

⁷ Kiki hihéga, u nla kal nwet ndap le: “We u nhoñol lelaa inyu jam lini? Libim li mandutu di mboma i len ini, li ntihba yak bôt bape ikété nkoñ ’isi. Inyu mélés mandutu ma, baa di gwé ngôñ ni ngim ane i i ga énél nkoñ ’isi wonsôna?” Mbus mambadga ma, ni nla kwélél mu i kaat Daniel 2:44. Tole u nla kal mut woñ libôk le: “Kii u nhoñol: lelaa di nla tibil néñés  bon bés?” Mbus, unda nye yom kaat Ndiimba Mbén 6:6, 7 i nkal. Ngéda u mpohol ño nkwel, hoñol bôt ba libôga joñ. Hoñol bisai ba nla kôs ibale ba nyi i yom Bibel i niiga toi. Ngéda u nkwélés bo, i yé loñge le u emble, u diihe ki mahoñol map. Ni i njel i, u ga tibil nok bo, ba ga ba yak bebee i emble we.

8. Inyuki i nsômbla mban ngéda di mboñ mapeple?

⁸ Ilole mut a neebe nigil Bibel ni bés, i mbéda ngandak biliya ni ngandak ngéda inyu boñ mapeple. Inyuki? Inyule i nla pam le bôt ba, ba ba bé mandap ngéda di ntémb i yuuga bo. Ni ki le, di nlama yuuga mut ngandak ngélé inyu boñ le a neebe yigil. Bigda le, bebela i nañ loñge ngéda ba nkôp yo malép hiki ngéda. Nlélém inyu mut a ngwés maliga, ngéda di nkwel mam ma Bibel ni nye hiki ngéda, gwéha yé inyu Yéhôva bo Kristô i nla nañ.

9-10. Ngéda mut a yila nnigil Kristô, inyuki di nla kal le bés bobasôna di nyoñ ngaba mu?

⁹ Bikristen gwobisôna bi nlama yéñ i bôt ba ngwés maliga. Di nla hégha i bôlô i ni jam li mbôña ngéda ba nyéñ mañge a nimil. Lelaa hala? Di yoñ hihéga hi mañge munlôm nu nwii maa nu a bi nimil. Bebee le 500 bôt i bi jôp i nyiña inyu léba nye. Sôk i nsôk, i mbus 20 ma ngeñ, mut wada mu ikété bayéñ a léba nye i wom i mbaha. Mut nu a bé gwés bé  le bôt ba bégés nye inyule a nléba mañge. A kal le: “Metama bé nyen me nléba nye.”

¹⁰ Ngandak bôt i mpôôna mañge nu i len ini. Ba gwé bé botñem yo ki yo, jon ba gwé ngôñ ni mahôla. (Éfésô 2:12) Iloo didun di batéé likalô juem di nsal ntôñ inyu léba nya bôt i. I nla ba le, u nlébga bé mut u nla niiga Bibel. Ndi batéé likalô bape ba ba nsal nlélém libôga ni we, ba nla léba bôt ba ngwés maliga. Ngéda mankéé nu muda tole nu munlôm a nhôla mut i yila nnigil Kristô, ba bobasôna ba bi yoñ ngaba mu nson u, ba kôli kon maséé.

11. To ibale u gwé bé yigil Bibel, mambe manjel mape u nla gwélél inyu yilha bôt banigil?

¹¹ To ibale u gwé bé yigil Bibel, u nla gwélél manjel mape inyu yilha bôt banigil. Kiki hihéga, u nla leege i bôt ba ntip lo i ndap Ane, u bot ki bo mawanda. Ni i njel i, u nla kwés bo nkaa le gwéha i yé yimbne i bañga bikristen. (Yôhanes 13:34, 35) Mandimbhe u nti i makoda, to ibale ma yé sem kwep, ma niiga i bet ba ntip bôdôl lo makoda i pahal hémle yap i nya i kôli. U nla pam ni mut a ntip yila ntéé likalô, u hôla nye i gwélél Bitilna inyu niiga bôt. Ngéda u mboñ hala, u niiga nye i kôna Kristô.​—Lukas 10:25-28.

12. Baa di nlama bana makeñge ma tôbôtôbô inyu yilha bôt banigil? Toñol.

¹² Di hoñol bañ le i mbéda bés makeñge ma tôbôtôbô inyu yilha bôt banigil ba Yésu. Inyuki? Di yoñ hihéga hi Faustina, nu a bé niñ i loñ i Bôlivia. Ngéda a bôdôl nigil ni Mbôgi Yéhôva, a bé yi bé añ. Nano, a noode añ ndék. Yak sôble a bi kôs; a ngwés a niiga ki bôt bape. A nlôôs gwigil bi Bibel bitan hiki sonde. To hala kiki Faustina a ñañ bé loñge kiki i bet a niiga Bibel, a ma hôla letee ni bôt basamal i kôs sôble.​—Lukas 10:21.

13. To ibale di pégi, bimbe bisai di nla kôs mu kiki di nsal inyu yilha bôt banigil?

¹³ Libim li Mbôgi Yéhôva li pégi ni ngandak mam i mahee i boñ. Ndi to hala ba nléba ngéda inyu niiga bôt Bibel, kayéle ba kuhul maséé mu. Di yoñ hihéga hi Melanie. A bé néñés ngond yé i nwii juem nyetama i loñ i Alaska. U héya hala, a bééna bôlô i i bé yoñ nye ngandak ngéda, a bé lama ki tééda ngwal wé wada nu a  bééna kon i pos. Melanie a bé mpom Mbôgi Yéhôva mu libôga li jolisôna. Kiki a bé sômbôl bana yigil Bibel, a bé béna soohe Djob inyu ke likalô to hala kii lihep li bé ngandak. A bi sôk boma muda wada le Sara, nu a bi kon maséé i yi jôl li Djob. Mbus ngim ngéda, Sara a neebe yigil i Bibel. Melanie a nkal le: “To hala kiki me bé béna ba nwaak ngandak, me ni ngond yem di bé maséé i tégbaha i yigil i hiki kôkôa i ngwa koo. Di bé kon maséé i boñ nyiña u u bé hôla bés i timbhe mambadga ma Sara, kayéle hala a bi lémél bés ngandak i tehe nye a nyila liwanda li Yéhôva.” Ni ñem ngui, Sara a bi hônba ngolba, a pam i base yé, a sôblana ki.

14. (a) Inyuki ba nhégha nson i yilha bôt banigil ni bôlô i lop tjobi? (b) U nôgda lelaa ngéda u ñañ bibañga bi Paul i kaat 2 Timôtéô 4:1, 2?

¹⁴ To ibale u yé ngi bana yigil Bibel, u waa bañ yéñ. Bigda le Yésu a bi hégha nson i yilha bôt banigil ni bôlô i lop tjobi. Balop tjobi ba nlama tégbaha ngandak ngeñ i lép inyu gwel tjobi. Ba mbéna sal ipam juu, tole bikegla tutu, ngim mangéda ba nlama ke ntandaa liké. (Lukas 5:5) Nlélém jam inyu batéé likalô, bahogi ba ntégbaha ngandak ngéda i ‘yéñ’ bôt inyu yilha bo banigil, ba nyuuga bôt inoñnaga ni ngéda yap. Inyuki? Inyu bana pôla i boma libim li  bôt. I bet ba nsal ni ngui yap yosôna ba yé ba kôs bisai i boma bôt ba ba gwé ngôñ i emble nwin u Ane. Baa u yé le u noode pam likalô i ngeñ bôt ba libôga joñ ba mbéna ba i mandap map?​—Añ 2 Timôtéô 4:1, 2.

15. Inyuki i mbéda wongut inyu tégbaha gwigil bi Bibel?

¹⁵ Inyuki i mbéda wongut inyu tégbaha gwigil bi Bibel? Njom yada i yé le di gwé ndik bé ngôñ i hôla nnigil i yi ni i gwés biniigana bi Bibel. Di nlama ki hôla nwet di niiga Bibel i yi ni i gwés Nwet Bibel, le Yéhôva. U héya le u nlama niiga nwet a nigil Bibel ni we i yi kii Yésu a mbat le banigil bé ba boñ, di nlama ki hôla nye i yi lelaa a nla noñ mambén ma i niñ yé. Di nlama hôla nye ni wongut mu biliya a mboñ inyu bii matiñ ma Bibel bisélél. Inyu bahogi, i nsômbla ndigi ndék sôñ inyu héñha maboñok map ni mahoñol map, ki le inyu bape, i mbéda ngandak ngéda.

16. Bimbe biniigana u ñôt mu ñañ u Raúl?

¹⁶ Jam li bi pémél nsañal nu tôbôtôbô wada nu a nsal i loñ Péru, li ñunda nseñ i wongut. Mankéé nu a nkal le: “Me bi nigil bikaat biba ni nnigil Bibel wada le Raúl. Ndi a bé boma ngandak mandutu i niñ yé. A bé béna bana mindañ bo nwaa, a solok bôt, bon bé ba bé yan nye. Kiki a bé béna lo makoda, me bi ke ni bisu i yuuga nye inyu hôla nye ni lihaa jé. Yom kiki bo nwii maa mbus le me boma nye, a sôblana.”

17. Kii di ga tehe i yigil i noñ?

¹⁷ Yésu a kal bés le: “Kenana, yilhana biloñ gwobisôna banigil.” Inyu yônôs nson u, di nlama kwel ngim mangéda ni bôt ba ba gwé bé minlélém mi mahoñol ni bés, ba ba ta bé i base to yada, tole ba ba nhoñol le Djob a ta bé. Mu i yigil i noñ, di ga tehe lelaa di nla tééne mintén mi bôt nwominsôna likalô.