1-2. (a) Hombar tu parenta ni Jesus di Mateus 28:18-20, aha do ulaon ni halak Kristen na rumingkot? (b) Di parsiajaran on, sungkun-sungkun aha do na laho taulas?

LAS DO roha ni angka apostel tingki marpungu nasida di dolok. Dung hehe Jesus, disuru do angka siseanna asa manjumpangi ibana di dolok i. (Mat. 28:16) Ra, on ma tingkina ‘dipatuduhon muse dirina tu lobi sian 500 halak dongan sahaporseaon na marpungu di sada inganan’. (1 Kor. 15:6) Boasa disuru Jesus angka siseanna ro tusi? Laho mangalehon sada parenta tu nasida. Didok, “Alani i, laho ma hamu, bahen ma saluhut halak sian nasa bangso gabe siseanku.”​—Jaha Mateus 28:18-20.

² Angka sisean na manangihon hata ni Jesus i ma na gabe bagian sian huria Kristen di abad na parjolo. Ulaon ni nasida na rumingkot, i ma mambahen angka halak gabe sisean ni Jesus. * Saonari, marjuta Sitindangi di liat portibi on mangulahon na sarupa. Di parsiajaran on, laho taulas ma opat sungkun-sungkun on: Boasa ringkot mambahen sisean? Aha do lapatan ni mambahen sisean? Ingkon sude do Sitindangi dohot mambahen sisean? Jala boasa ingkon sabar hita tingki mambahen sisean?

3. Hombar tu Johannes 14:6 dohot 17:3, boasa mambahen sisean ulaon na mansai ringkot?

³ Boasa mambahen sisean ulaon na mansai ringkot? Alana  holan sisean ni Jesus do na boi marale-ale dohot Debata. Asing ni i, sude na mangihuthon Jesus boi mangkilala ngolu na dumenggan saonari. Jala marpangkirimon laho mangolu salelengna di ari na naeng ro. (Jaha Johannes 14:6; 17:3.) Alani i, dilehon Jesus do tanggung jawab na mansai ringkot tu hita. Alai ndang holan sahalakta na mangulahon i. Disurat si Paulus do taringot dirina dohot angka donganna. Didok, “Ai dongan saulaon ni Debata do hami.” (1 Kor. 3:9) Dilehon Jahowa dohot Jesus do hak istimewa tu jolma na so sempurna!

4. Sian pengalaman ni si Ivan dohot si Matilde, aha do na boi taparsiajari?

⁴ Ulaon mambahen sisean boi mambahen hita marlas ni roha. Pingkirhon ma pengalaman ni si Ivan dohot istrina si Matilde na tinggal di Kolombia. Marbarita ma nasida tu sahalak baoa na poso na margoar si Davier. Didok si Davier tu nasida, “Lomo do rohangku asa muba, alai ndang tolap ahu mangulahon i.” Sahalak petinju do si Davier. Mamangke narkoba do ibana, mabuk, jala rap sajabu dohot halletna si Erika. Didok si Ivan, “Marsiajar Bibel ma hami dohot si Davier. Alai ala tinggal di inganan na pinjil ibana, ingkon marsepeda motor do hami saleleng marjam-jam jala mamolus dalan na margambo. Dung diparrohahon si Erika naung muba si Davier, gabe dohot ma ibana marsiajar Bibel.” Ujungna, ndang marnarkoba, ndang mabuk, jala ndang martinju be si Davier. Jala marhasohotan ma ibana tu si Erika. Didok si Matilde, “Tingki tardidi si Davier dohot si Erika taon 2016, diingot hami ma muse hata na didok si Davier, ‘Lomo do rohangku asa muba, alai ndang tolap ahu mangulahon i.’ Las hian do rohanami huhut tangis.” Tontu, mansai las do rohanta tingki mangurupi halak gabe sisean ni Jesus.

5. Aha do na ingkon taulahon laho mambahen sisean?

⁵ Laho mambahen sisean, ingkon talului do manang ise na lomo rohana mananda Debata. (Mat. 10:11) Molo marbarita hita tu sude halak, on patuduhon na Sitindangi Ni Jahowa do hita. Jala tingki taulahon parenta ni Jesus laho marbarita, on patuduhon na sisean ni Jesus do hita.

6. Asa olo halak manangihon hita, aha do na ingkon taulahon?

⁶ Lomo do roha ni piga-piga halak marsiajar Bibel. Alai godang do na mulana, ndang lomo rohana marsiajar Bibel. Alani i, ingkon tajujui do nasida asa marsiajar. Asa olo halak manangihon hita, ingkon denggan do taparade. Pillit ma topik na menarik tu angka halak. Dung i, bahen ma hata pamungka na pas.

7. Aha do na boi disungkun hamu tu sasahalak, jala boasa ringkot manangihon dohot mangargai pandapotna?

⁷ Umpamana, boi do disungkun hamu tu parjabu, “Songon dia do pandapotmuna? Godang do hasusaan na diadopi angka jolma saonari di liat portibi on. Ninna rohamuna, adong do pamarentaon na boi manalpuhon hasusaan ni angka jolma?” Dung i, boi ma diulas hamu Daniel 2:44. Manang boi do disungkun hamu, “Ninna rohamuna, songon dia do carana pagodang-godangkon ianakhon asa boi denggan pangalahona?” Dung i, ulas ma  5 Musa 6:6, 7. Manang aha pe topik na diulas hamu, pingkirhon ma halak na manangihon hamu. Rimangi ma laba na boi dapot ni nasida ala marsiajar Bibel. Tingki mangkatai dohot nasida, ringkot do ditangihon jala diargai hamu pandapot ni nasida. Molo diulahon hamu i, gabe olo ma nasida manangihon hamu.

8. Boasa ingkon jotjot hita manjumpangi muse?

⁸ Andorang so olo sasahalak marsiajar Bibel, ra ingkon jotjot do hamu manjumpangi ibana muse. Boasa? Alana tingki ro hita manjumpangi muse, olo do ra ndang di jabu ibana. Jala ingkon dijumpangi hamu do ibana manang piga-piga hali sahat tu na olo ibana marsiajar Bibel. Ingot ma, asa boi tubu suan-suanan, ingkon jotjot do i tasiram. Suang songon i ma, molo jotjot taulas Bibel dohot sasahalak, boi do gabe holong rohana tu Jahowa dohot tu Jesus.

9-10. Boasa ingkon sude halak Kristen dohot mangurupi halak asa gabe sisean ni Jesus?

⁹ Ingkon dohot do sude Sitindangi mangurupi halak asa gabe sisean ni Jesus. Boi do tapatudos ulaon i songon na mangalului dakdanak na lilu. Pingkirhon ma contoh on. Adong sahalak dakdanak baoa na lilu na marumur tolu taon. Jala adong 500 halak na mangalului dakdanak i. Ujungna dung 20 jam, adong ma sahalak na mandapot dakdanak i di ladang jagung. Dung dapotna dakdanak i, ndang olo ibana dipuji. Didok ibana, “Rap do hami sude mangalului dakdanak i.”

¹⁰ Saonari, godang do halak na lilu songon dakdanak i. Ndang adong pangkirimon ni nasida, alani i porlu do nasida diurupi. (Eps. 2:12) Lobi sian ualu juta  Sitindangi na rap mangalului angka halak na lilu i. Ra, ndang adong jumpangmuna halak na olo marsiajar Bibel dohot hamu. Alai di huriamuna, ra adong do angka dongan na pajumpang dohot halak na olo marsiajar Bibel. Tingki pajumpang angka donganta dohot sasahalak na olo gabe sisean ni Jesus, sude do hita marlas ni roha.

11. Nang pe saonari ndang adong na diurupi hamu marsiajar Bibel, songon dia do carana hamu boi mambahen sisean?

¹¹ Nang pe saonari ndang adong na diurupi hamu marsiajar Bibel, alai boi do hamu mambahen sisean marhite cara na asing. Umpamana, molo adong diida hamu sasahalak na on dope hea ro tu Bale Harajaon, boi do dijangkon jala diurupi hamu ibana. Molo diulahon hamu i, gabe boi ma dihilala ibana songon dia holong ni halak Kristen. (Joh. 13:34, 35) Hamu pe boi do mangalehon alus di parpunguan. Nang pe jempek alusmuna, boi do i mangajari ibana songon dia patuduhon haporseaon dohot denggan. Asing ni i, boi ma hamu rap marbarita dohot penyiar na baru. Urupi ma ibana mangajari halak mamangke Bibel. Molo diulahon hamu i, na diajari hamu do ibana maniru Jesus.​—Luk. 10:25-28.

12. Ingkon malo do hita asa boi mambahen sisean? Patorang ma.

¹² Unang ma didok rohanta, ingkon malo do hita mangajari halak asa boi gabe sisean ni Jesus. Boasa? Pingkirhon ma pengalaman ni si Faustina na tinggal di Bolivia. Tingki parjolo sahali pajumpang dohot Sitindangi, ndang diboto ibana manjaha. Alai dungkon i, marsiajar manjaha ma ibana. Saonari nunga tardidi ibana jala las rohana mangajari na asing. Adong lima halak na diurupi ibana marsiajar Bibel ganup minggu. Nang pe ndang lancar dope si Faustina manjaha, alai nunga adong onom halak na diurupi ibana gabe Sitindangi.​—Luk. 10:21.

13. Nang pe sibuk, pasu-pasu aha do na boi tadapot tingki mambahen sisean?

¹³ Godang do Sitindangi na sibuk ala godang ulaon ni nasida. Nang pe songon i, dilehon nasida do tingki laho mangurupi halak marsiajar Bibel. Jala las do roha ni nasida mangulahon i. Parrohahon ma contoh ni si Melanie na tinggal di Alaska. Holan sahalakna do na pagodang-godangkon boruna na marumur ualu taon. Ingkon karejo do muse ibana lima ari di bagasan saminggu huhut mangurus bapakna na marsahit kanker. Tinggal di kota na pinjil do si Melanie jala holan ibana do Sitindangi disi. Ala ngali cuaca, sai martangiang do ibana mangido gogo asa boi marbarita. Lomo rohana pajumpang dohot sasahalak na olo marsiajar Bibel.  Ujungna, pajumpang ma ibana dohot si Sara. Lomo roha ni si Sara mamboto taringot goar ni Debata. Dung i, gabe marsiajar Bibel ma si Sara. Didok si Melanie, “Di ari Jumat borngin, loja hian do huhilala. Alai tongtong do ahu dohot borungku mangurupi si Sara marsiajar. Las rohanami mangalusi sungkun-sungkun ni si Sara jala mangida ibana gabe ale-ale ni Jahowa.” Marsitutu do si Sara marsiajar nang pe adong ambat-ambat. Ditadingkon ibana ma garejana, jala tardidi.

14. (a) Boasa ulaon mambahen sisean dipatudos songon na manjala dengke? (b) Aha do pengaruh ni hata ni si Paulus na disurat di 2 Timoteus 4:1, 2 tu hamu?

¹⁴ Nang pe ndang adong na diurupi hamu marsiajar Bibel, unang ma menyerah. Ingot ma, dipatudos Jesus do ulaon mambahen sisean songon na manjala dengke. Ingkon marjam-jam do karejo angka panjala dengke asa boi dapot ni nasida dengke. Jotjot do nasida manjala tingki borngin, manang tingki sogot dope ari. Sipata, ingkon laho do nasida sahat tu inganan na dao. (Luk. 5:5) Suang songon i ma, ingkon sabar do piga-piga Sitindangi marbarita di tingki sadihari pe jala didia pe. Boasa? Asa boi godang halak na dijumpangi nasida. Ala marsitutu mangulahon i, jumpang ni nasida do angka halak na olo manangihon barita na tapasahat. Boi do hamu marbarita di tingki manang di inganan na godang halak boi dijumpangi?​—Jaha 2 Timoteus 4:1, 2.

15. Boasa ingkon sabar hita tingki mangurupi halak marsiajar Bibel?

¹⁵ Boasa ingkon sabar hita tingki mangurupi  halak marsiajar Bibel? Alana ingkon taurupi do ibana mamboto jala mangkaholongi angka ajaran ni Bibel. Jala ingkon taurupi do ibana mamboto jala mangkaholongi Jahowa, i ma Pangarang ni Bibel. Ndang sae holan mangajari ibana taringot aha na diparentahon Jesus tu siseanna. Alai ingkon taurupi do muse ibana mamboto songon dia carana mangulahon i. Ingkon sabar do hita mangurupi ibana mangulahon prinsip ni Bibel. Adong do piga-piga halak na boi hatop paubahon cara marpingkir dohot hasomalanna. Alai na asing, ndang boi pintor hatop mangulahon i.

16. Sian pengalaman ni si Raúl, aha do na boi diparsiajari hamu?

¹⁶ Sahalak misionaris di Peru mandapot laba ala tongtong sabar. Didok ibana, “Huurupi do si Raúl marsiajar Bibel. Jala nunga sae dua buku na diparsiajari hami. Alai godang do ambat-ambat na diadopi ibana. Sursar do parsaripeonna, sai marhata na roa, jala ndang dipasangap ianakhonna ibana. Nang pe songon i, taratur do ibana ro marpungu. Alani i, torus do ahu ro mangurupi ibana dohot keluargana. Lobi sian tolu taon dung pajumpang ahu dohot si Raúl, tardidi ma ibana.”

17. Di parsiajaran na mangihut, aha do na laho taulas?

¹⁷ Didok Jesus tu hita “laho . . . bahen ma saluhut halak sian nasa bangso gabe siseanku”. Laho mangulahon i, ingkon jotjot do hita marbarita tu sude halak, dohot ma i tu angka halak na so maragama manang na so porsea adong Debata. Di parsiajaran na mangihut, taulas ma songon dia carana hita marbarita tu nasida.