1-2. (a) Sigun sa pagbuot ni Jesus na mababasa sa Mateo 28:18-20, ano an panginot na misyon kan Kristiyanong kongregasyon? (b) Anong mga hapot an pag-uulayan niyato sa artikulong ini?

SIGURADONG pano nin antisipasyon an mga apostol mantang nagkakatiripon sinda sa may bakilid nin sarong bukid. Pagkabuhay liwat ki Jesus, sinabihan niya sinda na tagbuon siya duman. (Mat. 28:16) Tibaad iyan an pangyayari na “nagpahiling siya sa labing 500 na tugang sa sarong pagkakataon.” (1 Cor. 15:6) Taano ta nakitagbuan duman si Jesus sa saiyang mga disipulo? Tanganing tawan sinda nin sarong nakakaugmang misyon: “Kun siring, padumán kamo asin gumibo kamo nin mga disipulo sa mga tawo kan gabos na nasyon.”—Basahon an Mateo 28:18-20.

² An mga disipulong nakadangog kan sinabi ni Jesus nagin kabtang kan Kristiyanong kongregasyon kan inot na siglo. An panginot na misyon kan kongregasyon na iyan iyo an paggibo nin dakul pang disipulo ni Cristo. * Ngunyan, igwa na nin manampulong ribong kongregasyon nin tunay na mga Kristiyano sa bilog na daga, asin iyan pa man giraray an panginot na misyon kan mga kongregasyon na iyan. Sa artikulong ini, pag-uulayan niyato an apat na hapot: Taano ta mahalagang marhay an paggibo nin disipulo? Ano an kalabot diyan? May kabtang daw an gabos na Kristiyano sa paggibo nin mga disipulo? Asin taano ta kaipuhan niyato nin pasensiya sa gibuhon na ini?

3. Sigun sa Juan 14:6 asin 17:3, taano ta mahalagang marhay an paggibo nin disipulo?

³ Taano ta mahalagang marhay an paggibo nin disipulo? Huling an mga disipulo sana ni Cristo an puwedeng magin amigo nin Diyos. Dugang pa, an mga nagsusunod ki Cristo igwa nin mas maugmang buhay ngunyan asin nin paglaom na mabuhay nin daing katapusan sa maabot. (Basahon an Juan 14:6; 17:3.) Tunay nanggad na tinawan kita ni Jesus nin mahalagang responsabilidad, pero bako sana kita an may kabtang sa gibuhon na ini. Mapadapit sa saiyang sadiri asin sa nagkapirang dayupot na kairiba, sinabi ni apostol Pablo: “Kami mga kapwa trabahador nin Diyos.” (1 Cor. 3:9) Sarong magayunon nanggad na pribilehiyo an itinao ni Jehova asin ni Cristo sa bakong perpektong mga tawo!

4. Ano an manunudan niyato sa eksperyensiya ni Ivan asin Matilde?

⁴ Makakatao sa sato nin dakulang kaugmahan an paggibo nin disipulo. Pag-isipan an halimbawa ni Ivan asin kan saiyang agom na si Matilde na nakaistar sa Colombia. Nagpatotoo sinda sa sarong hoben na lalaking si Davier na nagsabi sa sainda: “Gusto kong baguhon an buhay ko, pero dai ko kaya.” Boksingero si Davier; nagdodroga siya, nagbuburat, asin nagsasaro sinda kan kailusyon niyang si Erika. Inistorya ni Ivan: “Pinunan mi siyang tukduan sa Bibliya. Harayo an saindang baryo, kaya kaipuhan ming magbisikleta nin pirang oras sa malaboy na mga tinampo. Kan mahiling ni Erika an marahay na mga pagbabago sa ugali ni Davier, nag-iba na man siya sa pag-Bible study.” Pag-abot nin panahon, ipinundo na ni Davier an pagdroga, pag-inom, asin an pagboksing. Nagpakasal na man sinda ni Erika. Sinabi ni Matilde: “Kan mabawtismuhan si Davier saka Erika kan 2016, nagirumduman mi na dating sinasabi ni Davier, ‘Gusto kong magbago, pero dai ko kaya.’ Talagang dai mi napugulan an samong luha.” Talagang nakakamati kita nin dakulang kaugmahan pag natatabangan ta an mga tawo na magin disipulo ni Cristo.

5. Ano an inot na lakdang sa paggibo nin mga disipulo?

⁵ An inot na lakdang na kaipuhan niyatong gibuhon sa paggibo nin disipulo iyo an ‘paghanap’ sa mga tawong nasa tamang kamugtakan an puso. (Mat. 10:11) Pinapatunayan niyato na kita talagang Saksi ni Jehova paagi sa pagpapatotoo sa gabos na nanunumpungan ta. Pinapatunayan niyato na tunay kitang mga Kristiyano paagi sa pagsunod sa pagbuot ni Cristo na maghulit.

6. Ano an makakatabang sa sato na magin mapanggana sa ministeryo?

⁶ May mga tawo na interesadong manudan an mga katotoohan na nasa Bibliya, pero dakul sa mga nanunumpungan ta an garo baga mayong interes sa primero. Tibaad kaipuhan niyatong pukawon an saindang interes. Tanganing magin mapanggana sa ministeryo, kaipuhan na pag-isipan niyatong marhay an satong mga pamamaagi. Magpili nin espesipikong mga tema na posibleng marhay na makakakua kan interes kan mga manunumpungan mo. Dangan planuhon kun paano mo iiintrodusir an tema.

7. Paano mo puwedeng punan an pakikipag-ulay sa ministeryo, asin sa hiling mo, taano ta mahalagang magdangog asin magpahiling nin respeto?

⁷ Halimbawa, puwede mong haputon an kagharong: “Puwede ko daw maaraman an opinyon mo dapit sa sarong bagay? Dakul na problemang inaagihan ta ngunyan an inaagihan man kan mga tawo sa bilog na kinaban. Sa hiling mo, kaipuhan daw niyato nin sarong pambilog na kinaban na gobyerno tanganing maresolberan an mga problema sa kinaban?” Dangan puwede nindong pag-ulayan an Daniel 2:44. O puwede mong sabihon: “Ano kaya an pinakamarahay na paagi tanganing mapadakula an mga aki na may marahay na ugali? Gusto kong maaraman an opinyon mo.” Dangan pag-ulayan an Deuteronomio 6:6, 7. Ano  man an temang napili mong ipakipag-ulay, konsideraron an mga tawong makakaulay mo. Isipon kun paano sinda makikinabang pag nanudan ninda kun ano talaga an itinutukdo kan Bibliya. Mantang nakikipag-ulay ka sa sainda, mahalaga na magdangog asin irespeto an saindang opinyon. Paagi kaiyan, mas masasabutan mo sinda, asin posibleng marhay na magdangog man sinda sa saimo.

8. Taano ta kaipuhan niyatong magin matiyaga sa pagdalaw liwat?

⁸ Bago magdesisyon an sarong tawo na makipag-adal nin Bibliya, tibaad kaipuhan mong maggamit nin dakul na panahon asin kusog sa pagdalaw liwat. Taano? Huling tibaad mayo o dai puwedeng makaulay an mga tawo sa sunod na pagdalaw ta sa sainda. Tibaad kaipuhan mo man na magbalik nin nagkapirang beses bago magin komportable sa saimo an kagharong asin mag-ako nin pag-adal sa Bibliya. Tandaan, mas dakula an posibilidad na magtalubo an sarong tinanom pag pirming binabaribian iyan. Sa kaagid na paagi, mas dakula an posibilidad na magtalubo an pagkamuot ki Jehova asin ki Cristo nin sarong interesado pag regular niyatong ipinapakipag-ulay sa saiya an Tataramon nin Diyos.

9-10. Taano ta masasabi niyato na may kabtang an lambang ministrong Kristiyano sa paghanap nin mga sadiyosan an puso?

⁹ May kabtang an lambang ministrong Kristiyano sa pagtabang na mahanap an mga sadiyosan an puso. An gibuhon na ini puwede niyatong iagid sa paghanap sa sarong nawawarang aki. Sa anong paagi? Pag-isipan an totoong pangyayari dapit sa nawarang tres anyos na aking lalaki. Mga 500 katawo an nagtabang sa paghanap sa saiya. Kan huri, pagkatapos nin mga 20 oras puon kan mawara an aki, an saro sa mga boluntaryo nahanap sa maisan an aki. Nagsayuma an boluntaryong iyan na akuon an kredito sa pakahanap sa aki. Sinabi niya: “Ginatos na tawo an nagtarabang tanganing mahanap siya.”   

 ¹⁰ Dakul na tawo an siring sa aking iyan. Nalalagalag sinda. Mayo sinda nin paglaom, pero gusto nindang magpatabang. (Efe. 2:12) Kita na labing walong milyon may kabtang sa paghanap sa mga tawong iyan na maninigo. Tibaad mayo kang makua na makikipag-adal sa saimo nin Bibliya. Alagad, an ibang parahayag na naghuhulit sa parehong teritoryo tibaad makahanap nin saro na gustong manudan an katotoohan na nasa Tataramon nin Diyos. Pag nakahanap an satong tugang nin sarong tawo asin natabangan ini na magin disipulo ni Cristo, marahay na dahilan iyan na mag-ugma an gabos na nagtabang sa paghanap.

11. Dawa kun mayo ka nin tinutukduan sa Bibliya, sa anong iba pang mga paagi ka makakatabang sa paggibo nin mga disipulo?

¹¹ Dawa kun mayo ka nin tinutukduan sa Bibliya ngunyan, puwede kang magtabang sa paggibo nin mga disipulo sa ibang mga paagi. Halimbawa, puwede mong istimaron asin amiguhon an mga bagong nag-aatender sa Kingdom Hall. Paagi kaiyan, makukumbinsir sinda na kita an tunay na mga Kristiyano huli sa pagkamuot na ipinapahiling niyato. (Juan 13:34, 35) Pag nagkokomento ka sa mga pagtiripon, dawa halipot sana, makakatabang iyan sa mga baguhan na maaraman kun paano ipapahayag an saindang pagtubod sa sinsero asin magalang na paagi. Puwede mo man na ibanan sa ministeryo an sarong bagong parahayag asin tabangan siyang gamiton an Kasuratan sa pagtukdo sa mga tawo. Pag ginigibo mo iyan, tinutukduan mo siyang arugon si Cristo.—Luc. 10:25-28.

12. Kaipuhan daw niyato nin pambihirang mga kakayahan tanganing maggibo nin mga disipulo? Ipaliwanag.

¹² Dai niyato dapat isipon na kaipuhan ta nin pambihirang mga kakayahan sa pagtukdo sa iba tanganing magin disipulo sinda ni Jesus. Taano man? Isipon an halimbawa nin Faustina na nakaistar sa Bolivia. Dai siya tataong magbasa kan inot siyang manumpungan kan mga Saksi ni Jehova. Ngunyan, nakakabasa na siya nin dikit. Bawtisado na siya ngunyan, asin gustong-gusto niyang tukduan an iba. Sa parati, lima an tinutukduan niya sa Bibliya kada semana. Dawa bako pa siyang kasinghusay sa pagbasa kan kadaklan sa mga tinutukduan niya, anom na an natabangan niya na mabawtismuhan.—Luc. 10:21.   

13. Dawa kun sibot kitang marhay, ano an nagkapirang bendisyon na makakamtan ta sa paggibo nin disipulo?

¹³ Dakul na Kristiyano an sibot na marhay sa pag-asikaso nin mahalagang mga obligasyon. Pero nagtatagama sinda nin panahon na makapagkondukta nin mga pag-adal sa Bibliya, asin nagtatao iyan nin dakulang kaugmahan sa sainda. Mangnuhon an halimbawa ni Melanie. Nakaistar siya sa Alaska asin solong pinapadakula an saiyang otso anyos na aking babayi. Full-time man siya sa trabaho asin nagtatabang sa pag-ataman sa saiyang ama na may kanser. Si Melanie sana an Saksi sa saindang banwa na nasa puwerang lugar. Parati siyang namimibi na tawan siya nin kusog na maghulit dawa maliputon huling gusto niya talagang makahanap nin Bible study. Pag-abot nin panahon,  nanumpungan niya si Sara na ugmahon kan maaraman na may personal na pangaran an Diyos. Paghaloy-haloy, nag-ako nin pag-adal sa Bibliya si Sara. Sinabi ni Melanie: “Pag Biyernes na banggi, pagalon na ako, pero pareho kaming nakinabang kan aki ko sa pagkondukta nin pag-adal sa Bibliya ki Sara. Nag-i-enjoy kami sa pag-research sa simbag sa mga hapot ni Sara, asin ugmahon kaming marhay kan siya nagin amigo ni Jehova.” Kusog-buot na inatubang ni Sara an mga pagkontra, binayaan an saindang simbahan, asin nagpabawtismo.

14. (a) Paano nakakaagid sa paninira an paggibo nin disipulo? (b) Ano an epekto sa saimo kan sinabi ni Pablo sa 2 Timoteo 4:1, 2?

¹⁴ Dawa kun garo baga bakong mabunga an saimong ministeryo, padagos na hanapon an potensiyal na magin mga disipulo. Girumdumon na iinagid ni Jesus sa paninira an paggibo nin disipulo. Tibaad maghalat an mga parasira nin dakul na oras bago sinda makadakop. Sa parati, nagtatrabaho sinda nin matangang banggi o amay na aga, asin minsan kaipuhan nindang maglayag nin hararayong distansiya. (Luc. 5:5) Sa kaagid na paagi, may mga parahayag na naggagamit nin dakul na oras asin mapasensiyang “naninira” sa manlain-lain na oras asin lugar. Taano? Tanganing mas dakula an tsansa na makanumpong sinda nin mga tawo. An mga naghihinguwang marhay sa arog kaining paagi, sa parati, nakakanumpong nin mga tawong interesado sa satong mensahe. Puwede mo daw purbaran na maghulit sa oras na posibleng mas dakul na tawo an makaulay mo o sa lugar na mas posibleng manumpungan mo sinda?—Basahon an 2 Timoteo 4:1, 2.

15. Taano ta kaipuhan niyatong magin mapasensiya sa pagkondukta nin mga pag-adal sa Bibliya?

¹⁵ Taano ta kaipuhan niyatong magin mapasensiya sa pagkondukta nin mga pag-adal sa Bibliya?  Huling bako lang pagtabang sa satong tinutukduan na maaraman asin mamutan an mga katukduan sa Bibliya an kaipuhan niyatong gibuhon. Kaipuhan ta man sindang tabangan na mamidbid asin mamutan an Awtor kan Bibliya, si Jehova. Asin apuwera sa pagtukdo sa tinutukduan sa Bibliya kun ano an hinahagad ni Jesus sa saiyang mga disipulo, kaipuhan niyatong tabangan siyang manudan kun paano mamuhay bilang sarong tunay na Kristiyano. Dapat na mapasensiya niyatong tabangan siya mantang nagmamaigot siyang iaplikar an mga prinsipyo sa Bibliya. May mga nakayang baguhon an saindang kaisipan asin paggawi sa laog sana nin pirang bulan; an iba kaipuhan nin mas haloy-haloy na panahon.

16.  Ano an nanudan mo sa eksperyensiya dapit ki Raúl?

¹⁶ Ipinapahiling kan eksperyensiya nin sarong misyonero sa Peru an kahalagahan nin pagigin mapasensiya. “Duwang libro na an napag-adalan mi kan Bible study kong si Raúl,” sabi kan misyonero. “Pero nasasakitan pa man giraray siyang iaplikar an mga nanunudan niya. Pirming may problema an pag-ibanan ninda kan saiyang agom, paramuda siya, saka an mga aki niya nasasakitan na igalang siya. Pero, regular siyang nag-aatender sa mga pagtiripon kaya padagos ko siyang dinadalaw tanganing tabangan siya asin an pamilya niya. Pakalihis nin labing tulong taon puon kan manumpungan ko siya, nakuwalipikar siya sa bawtismo.”

17. Ano an pag-uulayan niyato sa sunod na artikulo?

¹⁷ Ipinagbuot sa sato ni Jesus: “Padumán kamo asin gumibo kamo nin mga disipulo sa mga tawo kan gabos na nasyon.” Tanganing magibo an sugong iyan, sa parati kaipuhan niyatong makipag-ulay sa mga tawo na an kaisipan ibang-iba sa sato, kaiba na diyan an mga mayo nin relihiyon o tibaad dai nagtutubod na may Diyos. Pag-uulayan sa sunod na artikulo kun paano ta iaatubang sa sainda an maugmang bareta.