1-2. (a) Nga fintu Mateo 28:18-20 ilanda, mulimo nshi uukalamba uo Yesu apeele icilonganino ca Bena Kristu? (b) Mepusho nshi twalaasuka muli cino cipande?

ABATUMWA bafwile balitemenwe sana ilyo balongene pa lupili pantu ilyo Yesu abuushiwe, epo abebele ukuti bayemonanina nankwe. (Mat. 28:16) Nalimo ili line e lyo Yesu “amoneke ku ba bwananyina abacilile imyanda isano (500) bonse pamo.” (1 Kor. 15:6) Cinshi Yesu aebele abasambi bakwe ukuyamonanina nankwe pa lupili? Ni co alefwaya ukubapeela umulimo uusuma. Abebele ati: “Kabiyeni, kalengeni aba nko shonse ukuba abasambi.”—Belengeni Mateo 28:18-20.

² Abasambi abaumfwileko ilyo Yesu alandile aya mashiwi baishileba mu cilonganino ca Bena Kristu ica kubalilapo. Umulimo uukalamba uo ici cilonganino cakwete wa kulenga abantu na bambi baba abasambi ba kwa Kristu. * Pali ino nshita, kwaliba ifilonganino ifingi nga nshi mwi sonde lyonse ifya Bena Kristu ba cine, kabili ababa muli ifi filonganino babomba umulimo umo wine. Muli cino cipande twalaasuka amepusho yane: Cinshi umulimo wa kulengela abantu baba abasambi wacindamina sana? Finshi tufwile ukulacita pa kuti tulebomba bwino uyu mulimo? Bushe Abena Kristu bonse balabombako umulimo wa kulenga abantu baba abasambi? Kabili mulandu nshi tulingile ukubela abatekanya ilyo tulebomba uyu mulimo?

3. Ukulingana ne fyaba pali Yohane 14:6 na 17:3, cinshi umulimo wa kulengela abantu baba abasambi wacindamina sana?

³ Cinshi umulimo wa kulengela abantu baba abasambi wacindamina sana? Ni co pa kuti umuntu abe cibusa wa kwa Lesa kano aba umusambi wa kwa Kristu. Na kabili, abakonka ifyo Kristu alesambilisha balaba ne nsansa kabili balikwata isubilo lya kwikala pano isonde umuyayaya. (Belengeni Yohane 14:6; 17:3.) Ukwabula no kutwishika uyu mulimo Yesu atupeela ukalamba, lelo tatuubomba fweka. Ilyo umutumwa Paulo alelanda pa mulimo alebombela pamo na banankwe, atile: “Ifwe tubombela pamo na Lesa.” (1 Kor. 3:9) Ala ili lishuko ilikalamba ilyo Yehova na Kristu bapeela abantu abashapwililika!

4. Finshi tulesambilila ku lyashi lya ba Ivan na ba Matilde?

⁴ Umulimo wa kulenga abantu baba abasambi kuti walenga twalasekelela nga nshi. Natulande pali ba Ivan na bena mwabo ba Matilde abekala ku Colombia. Balibilile imbila nsuma ku mwaume uwe shina lya kuti Davier uwabebele ati: “Ndafwaya ukwaluka, nomba nalifilwa.” Davier ali ni kapoosa wa nkonya kabili alebomfya imiti iyo babinda, alenwesha ubwalwa kabili aleikala na Erika umukashana uo ashaupeene nankwe. Ba Ivan batile: “Twalitendeke ukulaya mu kumumona nangu ca kuti aleikala ku mushi uwali ukutali sana. Kanshi twalecofa amacinga pa maawala ayengi kabili twalepita mu misebo umwaleba sana amatipa pa kuti fye tufike kuli uyu mushi. Ilyo Erika amwene ukuti Davier alitendeke ukwaluka, alitampile ukubapo pe sambililo lya Baibolo.” Mu kuya kwa nshita Davier alilekele ukubomfya imiti iyo babinda, alilekele ukunwesha ubwalwa e lyo no kupoosa inkonya. Kabili alyupeene na Erika. Ba Matilde batile: “Ilyo Davier na Erika babatishiwe mu 2016, twalibukishe ifyo Davier alelanda. Aleti, ‘Ndafwaya ukwaluka, nomba nalifilwa.’ Twalitemenwe nga nshi ica kuti twalilukwishe ne filamba.” Ala tulasekelela nga nshi nga twayafwa abantu baba na basambi ba kwa Kristu.

5. Cinshi tulingile ukubalilapo ukucita pa kuti tulelenga abantu baleba abasambi?

⁵ Ica kubalilapo ico tufwile ukucita ‘kufwaya’ abantu abafwaya ukusambilila pali Yehova. (Mat. 10:11) Nga tuleeba abantu bonse pali Yehova ninshi tulelanga ukuti cine cine tuli Nte sha kwa Yehova. Na kabili, nga tulekonka ifunde Yesu atupeele ilya kubila imbila nsuma ninshi tuli Bena Kristu ba cine.

6. Finshi tufwile ukulacita pa kuti tulebila bwino imbila nsuma?

⁶ Abantu bamo balafwaisha ukusambilila Baibolo nga twabila imbila nsuma kuli bena pa muku wa kubalilapo, lelo abengi bamoneka kwati tabalefwaya. Kanshi intanshi tulingile ukulenga balafwaya ukusambilila. E ico tufwile ukulapekanya bwino pa kuti tulelenga abantu balefwaisha ukusambilila icine. Mulesala amalyashi ayo abo mukaya mu kubilako bakatemwa ukumfwa. Lyena mufwile ukupekanya ifyo mukatendeka ukulanda pali ilyo lyashi.

7. Finshi mwingalanda pa kuti mutendeke ukulanshanya no muntu pa fyo Baibolo isambilisha, kabili finshi fingacitika nga mulekutikisha ilyo balelanda kabili tamulebasuusha?

⁷ Ku ca kumwenako, nalimo kuti mwaipusha uo mulefwaya ukubilako imbila nsuma amuti: “Bushe kuti namwipushako fimo mukwai? Amafya ayo tukwata eyo na bantu mwi sonde lyonse bakwata. Bushe mumona ukuti kwaliba  ubuteko ubwingapwisha amafya ayaba muli cino calo?” Lyena kuti mwalanshanya ilembo lya kwa Daniele 2:44. Nelyo kuti mwaipusha umuntu mulefwaya ukubilako amuti: “Bushe mumona ukuti finshi fingalenga mwakusha bwino abana? Muletipo shani?” Lyena kuti mwalanshanya ilembo lya Amalango 6:6, 7. Nangu mwasala ilyashi ilya musango shani, muletontonkanya pa bantu abo mukalalanshanya nabo. Muletontonkanya pa fyo bakaba nga basambilila Baibolo. Ilyo mulelanda nabo, mulekutikisha kabili mwilabasuusha. Nga mwacita ifi, mukabeshiba bwino kabili nalimo bakafwaya ukukutikisha ilyo mukalalanda nabo.

8. Mulandu nshi tulingile ukulabwelela ku bantu abo twabilileko imbila nsuma?

⁸ Nalimo pa kuti umuntu atendeke ukusambilila Baibolo, mufwile ukubwelelako imiku iingi. Cinshi twalandila ifi? Ni co te lyonse twingasanga abantu nelyo twingalanshanya nabo ilyo twabwelelako. Na kabili, nalimo mulingile ukubwelelako imiku iingi pa kuti amwishibe bwino ica kutila kuti asumina ukusambilila Baibolo. Nga filya fine icimenwa cingakula nga tulecitapilila lyonse, e fyo no muntu engalatemenwako Yehova na Kristu nga tulelanshanya nankwe Icebo ca kwa Lesa lyonse.

9-10. Cinshi twingalandila ukuti Umwina Kristu onse alabombako umulimo wa kufwaya abantu abafwaya ukuba abasambi?

⁹ Umwina Kristu onse alabombako umulimo wa kufwaya abantu abafwaya ukwishiba Lesa. Uyu mulimo walipalana no mulimo wa kufwaya umwana uulubile. Wapalana shani? Tontonkanyeni pa mwana wa myaka itatu uwalubile. Abantu nalimo 500 balifwaileko uyu mwana. Pa numa ya kumufwaya pa maawala nalimo 20, umwaume umo asukile amusanga mwi bala lya nyanje. Uyu mwaume talefwaya abantu balemulumbanya  pa kusanga umwana walubile. Atile: “Abantu abengi balibombeele pamo pa kuti uyu mwana amoneke.”

¹⁰ Abantu abengi baba nga uyu umwana uwalubile. Tabakwata isubilo, lelo balafwaya aba kubafwa. (Efes. 2:12) Fwe Nte sha kwa Yehova fwe bacila pa mamilioni 8 tulabombela pamo pa kufwaya abantu ba musango uyu. Nalimo te kuti musange umuntu uwingafwaya ukumusambilisha Baibolo. Lelo bakasabankanya bambi abo mubila nabo mu cifulo cimo cine kuti basanga uwingatemwa ukusambilila icine icaba mu Cebo ca kwa Lesa. Uwa bwananyina nga asanga umuntu kabili uyu muntu aba no musambi wa kwa Kristu, bonse ababombeleko umulimo wa kufwaya abantu balasekelela.

11. Nangu ca kuti tamwakwata umuntu uo musambilisha Baibolo, finshi fimbi mufwile ukucita pa kuti muleafwa abantu ukuba abasambi?

¹¹ Nangu ca kuti tamwakwata umuntu uo musambilisha Baibolo pali ino nshita, kuli fimbi ifyo mwingacita pa kuti muleafwa abantu ukuba abasambi. Ku ca kumwenako, abapya nga baisa ku Ng’anda ya Bufumu, kuti mwabapokelela no kubafwilisha. Nga mulecita ifi, abapya bakalamona ukuti fwe Bena Kristu ba cine twalitemwana nga nshi. (Yoh. 13:34, 35) Nga muleasukapo ilyo mulelongana nangu ifyasuko fingaba ifipi, ninshi mulesambilisha abapya ifya kulanda pa fyo basuminamo. Na kabili kuti mwabomba na kasabankanya umupya umulimo wa kubila imbila nsuma no kumwafwa ukwishiba ifya kusambilisha abantu icine ca mu Baibolo. Nga mwacita ifi, ninshi mulemusambilisha ifya kucita pa kuti alepashanya Kristu.—Luka 10:25-28.

12. Bushe tulingile ukuba abasambilila sana pa kuti tulelenga abantu baleba abasambi? Londololeni.

¹² Tatufwile ukulatontonkanya ukuti tulingile ukuba abasambilila sana pa kuti tulelenga abantu baleba abasambi ba kwa Yesu. Cinshi twalandila ifi? Natulande pali ba Faustina abekala ku Bolivia. Tabaishibe ukubelenga ilyo batendeke ukusambilila Baibolo ne Nte sha kwa Yehova. Pali lelo balishibako ukubelenga. Balibatishiwa kabili balitemwa ukusambilisha abantu icine. Ilingi line basambilisha abantu 5 cila mulungu. Nangu ca kuti ba Faustina tababelenga bwino nge fyo abengi abo basambilisha Baibolo babelenga, balisambilisha abantu 6 icine ica kuti no kubatishiwa balibatishiwa.—Luka 10:21.

13. Nangu ca kuti twalikwata ifya kucita ifingi, bushe kuti twanonkelamo shani nga tulebombako umulimo wa kulenga abantu baba abasambi?

¹³ Abena Kristu abengi balikwata ifya kucita ifingi. Nangu caba ifi, balakwatako ne nshita iya kusambilisha abantu Baibolo kabili balasekelela nga nshi nga bacita ifi. Natulande pali ba Melanie. Balekusha umwana wabo umukashana uwali ne myaka 8 beka ku Alaska. Balebomba ne ncito kabili balesunga  na bafyashi babo abalwele kansa. Mwi tauni umo ba Melanie baleikala e ba Nte fye abalimo. Apo balefwaya ukusanga umuntu uo bengalasambilisha Baibolo, lyonse balepepa kuli Yehova pa kuti abakoshe balebila imbila nsuma nangu kwaletalala sana. Mu kuya kwa nshita bakumene na Sara, uwatemenwe ilyo bamusambilishe ishina lya kwa Lesa. Ilyo papitile inshita, Sara alisumine ukutendeka ukumusambilisha Baibolo. Ba Melanie batile: “Pali Cisano icungulo bushiku nalefunshika. Nangu nalefunshika, ine no mwana wandi twaleya mu kusambilisha Sara Baibolo kabili twalesekelela. Twaletemwa ukufwaya amasuko ya mepusho ayo aleipusha, kabili twalitemenwe nga nshi ilyo asalilepo ukuba cibusa wa kwa Yehova.” Sara alishipikishe ilyo abantu balemukaanya ukusambilila icine, alilekele ukuya ku calici alepepa kabili alibatishiwe.

14. (a) Bushe umulimo wa kulenga abantu baba abasambi wapalana shani no mulimo wa bulondo? (b) Bushe amashiwi Paulo alandile ayaba pali 2 Timote 4:1, 2 yalenga mwalamona shani umulimo wa kulenga abantu baba abasambi?

¹⁴ Tamufwile ukuleka ukufwaya abantu abengaba abasambi nangu ca kuti tamulasanga uwingafwaya ukusambilila icine. Yesu apashanye umulimo wa kulenga abantu baba abasambi ku bulondo. Abalondo nalimo kuti babomba pa maawala ayengi pa kuti bepaye isabi. Ilingi line balabomba ubushiku sana nelyo ku macaca kabili limo limo balenda intamfu iitali pa menshi. (Luka 5:5) Ifi fine e fyo na bakasabankanya bamo bacita. Balabomba amaawala ayengi pa kuti basange abo bengalasambilisha icine, kabili babomba uyu mulimo pa nshita ishapusanapusana e lyo na mu fifulo fyalekanalekana.  Cinshi bacitila ifi? Ni co bafwaya ukubila ku bantu abengi. Bakasabankanya ababombesha ilingi line balasekelela pantu balasanga abantu abafwaya ukusambilila icine. Bushe te kuti ciwame mulebila pa nshita iyo nalimo mwingasanga abantu nangu mulebila mu cifulo umo mwingasanga abengafwaya ukukutika?—Belengeni 2 Timote 4:1, 2.

15. Mulandu nshi tulingile ukubela abatekanya ilyo tulesambilisha abantu Baibolo?

¹⁵ Mulandu nshi tulingile ukubela abatekanya ilyo tulesambilisha abantu Baibolo? Ni co tufwile ukwafwa umusambi pa kuti eshibe ifyo Baibolo isambilisha kabili afitemwe no kufitemwa. Kabili tulingile ukumwafwa pa kuti eshibe Yehova Umwine wa Baibolo kabili amutemwe no kumutemwa. Tatulingile ukusambilisha fye umusambi ifyo Yesu afwaya abasambi bakwe balecita, lelo tulingile no kumusambilisha ifyo engalakonka amafunde. Tufwile ukumutekanishisha ilyo tulemusambilisha ifya kulakonka amashinte ya mafunde aya mu Baibolo. Bamo balaaluka mu myeshi fye iinono, lelo bambi bena palapita inshita iikalamba.

16. Finshi mulesambilila ku lyashi lya ba Raúl?

¹⁶ Kwali ifisuma ifyacitike ilyo mishonari umo uwa ku Peru atekanishishe umusambi. Atile: “Nalipwishishe ukusambilisha ba Raúl mu fitabo fibili. Lelo balitwalilile ukukwata amafya ayakalamba. Tabaleumfwana na bena mwabo, bali no musaalula, kabili abana babo tabalebacindika pa mulandu ne misango yabo. Apo lyonse baleya mu kulongana, nalitwalilile ukuya ku mwabo ku kubafwa na ku kwafwa ulupwa lwabo. Ilyo papitile imyaka ukucila pali itatu ukutula apo batendekele ukusambilila Baibolo, balifikilepo ukubatishiwa.”

17. Finshi tukasambilila mu cipande cikonkelepo?

¹⁷ Yesu atwebele ‘ukuya mu kulenga abantu ba nko shonse ukuba abasambi.’ Pa kuti tubombe uyu mulimo, tufwile ukubila ku bantu abashitontonkanya nge fyo tutontonkanya, abashipepa nangu kumo nelyo abashasumina ukuti Lesa eko aba. Mu cipande cikonkelepo tukasambilila ifyo tufwile ukucita pa kuti tulebila ku bantu ba musango uyu.