1-2. (a) Mataio 28:18-20 ena hereva bamona, Iesu ena hahegani Keristani kongrigeisen taudia dekenai be dahaka? (b) Inai stadi atikol ai edena henanadai do ita herevalaia?

APOSETOLO taudia be mai ura bada ida Iesu ena hereva idia kamonai totona ororo ai idia hebou. Iesu ia toreisi lou murinai, dala ia karaia unai gabu dekenai idia ida ia hedavari totona. (Mat. 28:16) Reana unai negai Iesu be “tadikaka 500 mai kahana dekenai” ia hedinarai. (1 Kor. 15:6) Dahaka dainai Iesu ese ena hahediba taudia ibounai ia boiria, unuseniai idia hebou totona? Badina ia ura idia dekenai mai anina bada gaukarana ia henia. Ia gwau: “Umui lao, bese ibounai taudia be hahediba taudia ai umui halaoa.”​—Mataio 28:18-20 duahia.

² Iesu ena hereva idia kamonai hahediba taudia be Keristani kongrigeisen taudia ginigunadia ai idia lao. Edia gaukara badana be taunimanima momo idia durua Keriso ena hahediba taudia ai idia lao totona. * Hari inai negai tanobada hegegemadai ai, Keristani kongrigeisen tausen momo idia noho, bona idia danu be Keriso ena hahediba taudia halaoa gaukarana idia karaia noho. Inai stadi atikol ai ita ese henanadai foa do ita herevalaia: Dahaka dainai hahediba taudia halaoa gaukarana be mai anina bada? Hahediba taudia halaoa gaukarana ita karaia totona, dahaka ita karaia be namo? Keristani taudia ibounai be hahediba taudia halaoa gaukarana idia karaia diba, a? Hahediba taudia halaoa gaukara ita karaia totona dahaka dainai ita haheauka be namo?

3. Ioane 14:6 bona 17:3 edia hereva bamona, dahaka dainai hahediba taudia halaoa gaukarana be mai anina bada?

³ Dahaka dainai hahediba taudia halaoa gaukarana be mai anina bada? Badina Keriso ena hahediba taudia sibona be Dirava ena turana ai idia lao. Danu, hari Keriso idia tohotohoa taudia be edia mauri idia moalelaia, bona vaira negai mauri hanaihanai helarona do idia abia. (Ioane 14:6; 17:3 duahia.) Momokani, Iesu ese ita dekenai mai anina bada maduna ia henia, to ita sibona iseda goada amo unai gaukara do ita karaia lasi. Aposetolo Paulo be ia bona ia idia bamoa taudia totona inai hereva ia gwauraia: Ia gwau: “Ai be Dirava ida ai gaukara hebou taudia.” (1 Kor. 3:9) Iehova bona Keriso ese goevadae lasi taudia dekenai unai hahenamo idia henia!

4. Ivan bona Matilde edia ekspiriens amo dahaka ita dibaia?

⁴ Hahediba taudia halaoa gaukarana ita karaia neganai ita moale. Colombia ai Ivan bona ena hahine, Matilde edia haheitalai mani oi laloa. Idia ruaosi ese mero matamatana ta ladana Davier idia haroro henia. Idia dekenai ia gwau: “Lau ura egu mauri lau haidaua to lau hegeregere lasi.” Davier be boxing gadara lalonai ia vareai, drag ia abia, ia inuinu kekero bona ena gelfren, Erika ida ia noho. Ivan ia gwau: “Ia ida Baibel ai stadilaia matamaia. Ena hanua be daudau dainai basikele amo hora momo lalonai kopukopu daladia ai hanaia bona ai lao. Davier be ena kara ia haidaua dainai Erika danu be Baibel stadi lalonai ia helai vareai.” Daudau lasi murinai, Davier be drag abia karana ia hadokoa, inuinu karana bona boxing gadara ia rakatania. Bona dala maorona ai ia bona Erika idia headava. Matilde ia gwau: “Davier bona Erika be lagani 2016 ai idia bapatiso neganai, Davier ena hereva ai laloatao, ia gwau ‘Lau ura egu mauri lau haidaua to lau hegeregere lasi.’ Ai moale bada dainai ai tai.” Momokani, taunimanima ita durua Keriso ena hahediba taudia ai idia lao neganai, ita moale bada.

5. Hahediba taudia halaoa gaukarana ai ita karaia gau ginigunana be dahaka?

⁵ Hahediba taudia halaoa gaukarana ai ita karaia gau ginigunana be kudou-maoro taudia ita “tahua.” (Mat. 10:11) Ita davaria taudia ibounai ita haroro henia karana amo ita hahedinaraia ita be Iehova ena Witnes taudia. Bona Keriso ena hahegani ita badinaia bona ita haroro neganai, ita hahedinaraia ita be Keristani taudia momokanidia.

6. Haroro gaukara ita karaia namonamo totona dahaka ita karaia be namo?

⁶ Taunimanima haida be idia ura Baibel ena hereva momokani idia dibaia, to ita davaria taudia momo be ita gwauraia herevadia do idia laloa bada lasi. Reana idia do ita hagoadaia hereva momokani ma haida idia dibaia totona. Haroro gaukara ita karaia namonamo totona, ita hegaegae namonamo be gau badana. Baibel ena topik haida oi abia hidi, unai amo haroro gaukara ai ruma tauna be ia kamonai diba. Bena emu hereva hamatamaia dalana oi lalohadailaia.

7. Edena dala ai emu herevahereva oi hamatamaia diba bona dahaka dainai oi kamonai namonamo bona hemataurai be mai anina bada?

⁷ Hegeregere, ruma tauna oi nanadaia: “Inai henanadai dekenai dahaka oi laloa? Hari inai negai ita davaria hekwakwanai momo be tanobada hegegemadai taunimanima ibounai dekenai idia vara noho. Oi laloa tanobada ena gavamani ta ese unai hekwakwanai ibounai do ia haorea diba, a?” Bena Daniela 2:44 oi herevalaia. Eiava ta dekenai inai henanadai  oi henia diba: “Dahaka oi laloa? Edena dala ai iseda natudia ita durua diba kara namodia idia hahedinaraia totona?” Bena Deuteronomi 6:6, 7 oi herevalaia. Herevana edena Baibel topik oi abia hidi, to namona be oi hereva henia taudia oi laloa. Baibel amo idia abia diba ese idia ia durua dalana mani oi laloa. Idia ida oi herevahereva neganai, namona be edia hereva oi kamonai namonamo bona edia lalohadai oi matauraia. Unai amo edia hemami do oi lalopararalaia bona idia be emu haroro herevana idia kamonai diba.

8. Dahaka dainai lou henia ita karaia loulou be mai anina bada?

⁸ Baibel stadi totona ta be abia hidi ia do karaia lasi neganai, namona be oi hekwarahi emu nega oi atoa ia oi lou henia totona. Dahaka dainai? Badina idia ita lou henia negadiai reana ruma dekenai idia noho lasi. Danu, reana nega momo ruma tauna oi lou henia be namo, unai amo do ia mamia oi be ia oi laloa bada bona do ia ura Baibel ia stadilaia. Laloatao, flaoa ta ia tubu namonamo totona, ranu oi henia loulou be namo. Unai hegeregerena, Dirava ena Hereva be kamonai tauna ida oi herevalaia loulou neganai, unai tauna ena lalokau Iehova bona Keriso dekenai be do ia bada.

9-10. Dahaka dainai ita gwau diba Keristani taudia ibounai idia gaukara hebou kudou-maoro taudia idia tahua totona?

⁹ Keristani taudia ibounai be idia gaukara hebou kudou-maoro taudia idia tahua totona. Unai gaukara be boio natuna ta ita tahua gaukarana hegeregerena. Edena dala ai? Mauri lagani toi merona be ruma amo ia raka boio ena sivarai mani oi laloa. Volantia taudia 500 mai kahana be unai mero maragina idia tahua. To, hora 20 murinai, volantia ta ese koni ena fam dekenai unai mero maragina ia davaria. Ena be unai volantia tauna ese unai mero ia davaria, to ia ura lasi taunimanima  ese ia idia hanamoa. Ia gwau: “Taunimanima handred mai kahana idia gaukara hebou dainai unai mero maragi ai davaria.”

¹⁰ Unai mero maragina bamona, hari inai negai taunimanima momo be idia diba lasi dahaka do idia karaia, unai dainai idia ita durua be namo. (Efe. 2:12) Ita ibounai eit milioni mai kahana be ita gaukara hebou badina ita ura kudou-maoro taudia ita tahua. Haroro gaukara ai ta oi davaria, to reana ia be do ia ura lasi oi ida Baibel ia stadilaia totona. To, pablisa haida be unai teritori tamona lalonai ta do idia davaria bona unai tauna be do ia ura Dirava ena Hereva ai idia noho hereva momokani ia dibaia. Tadikaka eiava taihu ta be ta ia durua bena ia be Keriso ena hahediba tauna ai ia lao neganai, ita ibounai be do ita moale bada.

11. Herevana hari oi be Baibel stadi ta oi karaia lasi, to edena dala idauidau ai hahediba taudia halaoa gaukarana do oi durua?

¹¹ Herevana hari oi be Baibel stadi ta oi karaia lasi, to dala idauidau ai hahediba taudia halaoa gaukarana oi durua diba. Hegeregere, kamonai taudia be Kingdom Hall ai idia mai neganai ita welkam henidia bona idia ida ita herevahereva. Unai dala amo idia dekenai oi hahedinaraia lalokau be Keristani taudia momokanidia edia toana. (Ioa. 13:34, 35) Hebou ai emu haere kwadogidia oi henia karana ese kamonai taudia do ia durua mai momokani bona hemataurai ida edia abidadama idia gwauraia hedinarai totona. Danu haroro gaukara ai, pablisa matamatadia oi bamoa diba bona idia oi durua Baibel idia gaukaralaia taunimanima idia hadibaia totona. Unai oi karaia neganai, oi be ia oi hadibaia noho Keriso ia tohotohoa totona.​—Luka 10:25-28.

12. Hahediba taudia halaoa gaukara ita karaia totona, diba bada ita abia be gau badana, a? Gwauraia hedinarai.

¹² Namo lasi ita laloa taunimanima ita durua Iesu ena hahediba taudia ai idia lao totona, diba bada ita abia be namo. Dahaka dainai unai bamona ita laloa lasi be namo? Bolivia ai ia noho kekeni ta ladana Faustina ena haheitalai mani ita laloa. Iehova ena Witnes taudia ia bamoa matamaia neganai, duahiduahi ia diba lasi. To hari duahiduahi sisina ia diba. Hari ia bapatiso bona haroro gaukara ia moalelaia bada. Ia be wiki ta lalonai Baibel stadi ibounai faiv ia karaia. Herevana Faustina be ia duahiduahi namonamo lasi, to ena stadi taudia siks ia durua bapatiso idia abia totona.​—⁠Luka 10:21.

13. Ena be ita bisi bada, to hahediba taudia halaoa gaukarana ita karaia neganai dahaka hahenamo haida ita moalelaia diba?

¹³ Keristani taudia momo be mai anina bada gaukara momo idia karaia dainai idia bisi. To, nega idia atoa Baibel stadi idia karaia totona, bona unai idia moalelaia bada. Melanie ena haheitalai mani ita laloa. Ia bona ena natuna kekeni ena mauri lagani eit be Alaska ai  idia noho. Ia be ful-taim moni gaukara ia karaia bona danu ena tamana ia naria. Ena tamana be cancer gorere ia abia. Unai taoni ai Melanie sibona be Witnes hahinena. Ena be unai gabu be paraka gabuna, to nega ibounai ia guriguri unai amo goada ia abia bena haroro totona ia lao. Ia ura kamonai tauna ta ia davaria unai amo ia ida Baibel idia stadilaia. Nega ta Sara ia davaria bona ia haroro henia. Sara ia moale badina ia diba Dirava be mai ena ladana. Daudau lasi murinai, Sara be Baibel stadi ia abia dae. Melanie ia gwau: “Friday adorahi iboudiai ena be lau hesiku bada, to lau bona egu natuna kekeni be Baibel stadi karaia totona ai lao neganai, unai ese ai ia hagoadaia bada. Sara ena henanadai edia haere tahua karana ai moalelaia, bona ai moale badina ia be Iehova ena turana ai ia lao.” Sara be dagedage ia haheaukalaia, ena tomadiho ia rakatania bona bapatiso ia abia.

14. (a) Edena dala ai hahediba taudia halaoa gaukara be haoda gaukarana bamona? (b) Paulo ena hereva Timoteo Iharuana 4:1, 2 ai ese edena dala ai oi ia durua?

¹⁴ Herevana emu haroro gaukara ai stadi ta oi davaria lasi, to mai haheauka ida unai gaukara oi karaia noho. Laloatao, Iesu ese hahediba taudia halaoa gaukarana be haoda gaukarana ida ia hahegeregerea. Haoda tauna be gwarume ia abia totona, hora momo lalonai ia gaukara goada be namo. Nega haida hanuaboi ai eiava daba momokani ai haoda totona ia lao, bona nega haida bouti amo haoda gabu daudaudia dekenai ia lao. (Luka 5:5) Unai hegeregerena, hahediba taudia halaoa gaukarana idia karaia taudia be hora momo lalonai, nega idauidau bona gabu idauidau ai haroro gaukara idia karaia. Dahaka dainai? Unai amo taunimanima momo do idia davaria.  Unai bamona idia karaia tadikaka taihu be kamonai taudia momo idia davaria. Taunimanima momo oi davaria negadia ai eiava taunimanima momo idia noho gabudia ai haroro gaukarana oi tohoa vadaeni, a?​—2 Timoteo 4:1, 2 duahia.

15. Ta ita stadi henia neganai, dahaka dainai haheauka karana be mai anina bada?

¹⁵ Dahaka dainai Baibel stadi ita karaia totona haheauka karana be mai anina bada? Namona be stiuden tauna ita durua Baibel ena hereva momokani ia dibaia bona laloa bada totona. Danu, ia ita durua Iehova ia dibaia bona lalokau henia totona. Bona stiuden tauna dekenai Iesu ena hahediba taudia ese do idia karaia gaudia ita hadibaia sibona lasi, to ia ita durua Keristani momokani taudia edia mauri dalana ia dibaia totona. Namona be mai haheauka ida ia ita durua Baibel ena hakaua herevadia be ena mauri ai ia badinaia totona. Stiuden taudia haida be Baibel idia stadilaia neganai, hua haida lalonai edia kara bona lalohadai idia haidaua. To ma haida be lagani haida murinai edia kara bona lalohadai idia haidaua.

16. Raúl ena ekspiriens amo dahaka oi dibaia?

¹⁶ Peru ai ia noho misinari ta be ena haheauka karana dainai namo ia davaria. Ia gwau: “Egu Baibel stiuden, Raúl ida buka rua ai stadilaia. To ia hekwarahi Baibel amo ia dibaia gaudia ia badinaia totona. Hegeregere, ena headava lalonai hekwakwanai momo idia vara, hereva dikadia ia gwauraia momo bona ena natudia ese ia idia matauraia lasi. To nega ibounai hebou dekenai ia mai, unai dainai ia bona ena ruma bese lau durua totona ia lau vadivadi henia loulou. Lagani toi ia ida Baibel ai stadilaia murinai, ia hegeregere bapatiso ia abia totona.”

17. Stadi atikol 30 ai dahaka do ita herevalaia?

¹⁷ Iesu be ita dekenai ia gwau, “umui lao, bese ibounai taudia be hahediba taudia ai umui halaoa.” Unai mai anina bada gaukarana ita karaia namonamo totona, taunimanima idauidau ita hereva henia. Idia haida be tomadiho ta idia badinaia lasi eiava Dirava ia noho lasi lalohadaina idia abia dae. Stadi atikol 30 ai, ita ese unai bamona taudia haroro henia daladia do ita herevalaia.